· 2019. 10. 28. · 1 1 1 Soo ꞌudechoo wheꞌ whuditꞌen whe Yakꞌusda (Elohim) a ndi yun ꞌinkꞌez yakꞌuz ꞌet ꞌuhóonla. 2 Yun, ba ndo hoonli lhiloh ꞌinkez aw ookut

1

1 1 Soo ꞌudechoo wheꞌ whuditꞌen whe Yakꞌusda (Elohim) a ndi yun ꞌinkꞌez yakꞌuz ꞌet ꞌuhóonla.

2 Yun, ba ndo hoonli lhiloh ꞌinkꞌez ꞌaw ookꞌut ꞌet hooloh inleꞌ, yatoo kꞌut tsaholhgus za hoonli inleꞌ. Yakꞌusda (Elohim) ooyughi too kꞌut nudultsꞌut. 3 ꞌEt Yakꞌusda (Elohim) ꞌen ꞌutni, “ꞌEt njan be hootꞌen-i holeꞌ.”

ꞌEt hootꞌen whuzdliꞌ. 4 ꞌInkꞌez Yakꞌusda (Elohim) be hootꞌen-i yunilhꞌen, unzoo whe

ꞌuntꞌoh ꞌinkꞌez be hootꞌen-i ꞌinkꞌez tsaholhgus bulh lhulcho ꞌuyinla.

5 Yakꞌusda (Elohim) ndi be hootꞌen ꞌi dzin yulhni, ꞌinkꞌez ndi tsalhgus, ꞌi ꞌulhdzis yulhni, ꞌet whe hulhgha ꞌinkꞌez bundadaꞌ ꞌet soo ꞌudechoo dzin whuzdliꞌ.

6 ꞌEt Yakꞌusda (Elohim) ndutni, “Too toh yat holeꞌ ꞌinkꞌez ndo whutooꞌ ꞌinkꞌez yun kꞌut too cha lhulcho ooleꞌ.”

7 ꞌEt Yakꞌusda (Elohim) yat ꞌuhoonla, ꞌinkꞌez ndi too lhkꞌe yalhdzo njan too ꞌinkꞌez ndo yat cha, ꞌet ndúhooja.

8 ꞌInkꞌez Yakꞌusda (Elohim) ndo yat ꞌet yakꞌuz whulhni. ꞌEt hulhgha ꞌinkꞌez bundadaꞌ ꞌet whulh nat dzin whuzdliꞌ.

9 ꞌEt Yakꞌusda (Elohim) ꞌutni, “Ndi too yakꞌuz ba nyo ꞌi ꞌilho ooleꞌ, ꞌinkꞌez ꞌet yun dizgi ha hooltsꞌit.” ꞌEt nduhóoja.

10 ꞌInkꞌez Yakꞌusda (Elohim) ndi yun dizgi ꞌi yun kꞌut whulhni, ꞌinkꞌez ndi too ꞌilhoh nedimbun ꞌi yatooꞌ yulhni. ꞌEt Yakꞌusda (Elohim) ooba hoonzoo.

11 ꞌEt Yakꞌusda (Elohim) ꞌutni, “Ndi yun kꞌut ꞌet tlꞌo, ndai ꞌutꞌan ha nuyeh ootse whulih. Mai chun oomaiꞌ whulih tsꞌiyawh dichꞌoh oochꞌeꞌ nawhudlih, ꞌi ooleꞌ,” ni ꞌet whe nduhóoja.

12 ꞌEt ndi yun kꞌut tlꞌo, ndai ꞌutꞌan ha nuyeh ootse whulih whukꞌunꞌa, ꞌinkꞌez mai chun oomaiꞌ whulih tsꞌiyawh dichꞌoh ootse nawhudlih. ꞌEt Yakꞌusda (Elohim) ooba hoonzoo.

Genesis Be ꞌUdustlꞌus

a 1:1 Ndi booziꞌ, “Elohim,” ꞌi whunénulhtun, Yakꞌusda ꞌen ꞌaw ꞌilhoghun za unli íloh, ꞌet hoontsꞌi ꞌen ꞌilhoghun unli whe ꞌuntꞌoh. ꞌEt whuz unꞌa ndi booziꞌ ni whe ꞌutni. ꞌEt tube neba wheꞌ hoontꞌoh hooyoh.

13 ꞌEt hulhgha ꞌinkꞌez bundadaꞌ ꞌet whulh tat dzin. 14 ꞌEt Yakꞌusda (Elohim) ꞌutni, “Ndo yakꞌuz hootꞌen ooleꞌ, ꞌi be

lhulhcho lhtsꞌe hozit whe dzin ꞌinkꞌez ꞌulhdzis, ꞌi be ntsꞌoh hoozulh, dzin ꞌinkꞌez naoodizulh ꞌet cha.

15 ꞌInkꞌez ꞌet ndi yakꞌuz be hootꞌen, ꞌi yun kꞌut be hootꞌen ooleꞌ,” ꞌet nduhóoja.

16 ꞌEt Yakꞌusda (Elohim) ꞌen nanki be hootꞌen-i cho whulhtsi. ꞌEt ndi tube be hootꞌen-i, ꞌi dzin huba suliꞌ ꞌinkꞌez dzohyaz be hootꞌen-i, ꞌi ꞌulhdzis huba suliꞌ. ꞌInkꞌez ndi sum ꞌi cha ꞌuyinla.

17 Yakꞌusda (Elohim) ꞌen ndo yakꞌuz ndi be hootꞌen-i whulhtsi, ꞌi ndi yun kꞌut hukwꞌedodi huba.

18 ꞌInkꞌez ꞌowhi dzin ꞌinkꞌez ꞌulhdzis bulh kꞌuneꞌ hoolꞌen ha. ꞌInkꞌez lhulcho ꞌuhoonla be hootꞌen-i ꞌinkꞌez tsalhgus yo. ꞌInkꞌez Yakꞌusda (Elohim) whunilhꞌen ꞌinkꞌez ooba hoonzoo.

19 ꞌEt hulhgha ꞌinkꞌez bundadaꞌ ꞌet whulh dit dzin whuzdliꞌ. 20 ꞌEt Yakꞌusda (Elohim) ꞌutni, “Too toh lhai cho lho nduntꞌoh-i holeꞌ,

ꞌinkꞌez dutꞌai yun ando yat ndulcho dutꞌai be nuhootꞌo”. 21 ꞌEt Yakꞌusda (Elohim) toot lho cho ꞌinkꞌez ꞌusjiz-i nuhutnah-i

lhelhdoh didoh toot nuyeh-i ꞌinkꞌez nutꞌo-i lhelhdoh didoh-i ꞌinla. ꞌInkꞌez ꞌowhi yunilhꞌen, unzoo whe ꞌuntꞌoh. ꞌEt Yakꞌusda (Elohim) ooba hoonzoo suliꞌ.

22 ꞌEt Yakꞌusda (Elohim) soo hoonzoo-un hubúlhni, ꞌinkꞌez njan ndutni, “Lhkꞌuz whe lhai oohleꞌ ndi too doolhbun yatooꞌ tuz, ꞌinkꞌez dutꞌai cha ndi yun kꞌut lhkꞌuz teh lhai ooleꞌ.”

23 ꞌEt hulhgha ꞌinkꞌez bundadaꞌ ꞌet kwulat dzin suliꞌ. 24 ꞌEt Yakꞌusda (Elohim) ꞌutni, “Ndai la khuna-i dichꞌoh didoh-i,

khuna-i, musdoos te, yun nulhꞌas-i, ꞌuyoo khuna-i, tsꞌiyawh didutchꞌoh dudun dotꞌen, yun tsꞌu halhꞌas,” ꞌet whuz unꞌa ꞌuhooja.

25 ꞌEt Yakꞌusda (Elohim) khuna-i yun kꞌut nulhꞌas ꞌilhoh didoh-i, musdoos ꞌilhoh didoh-i ꞌinkꞌez tsꞌiyai yun nulhꞌas-i, ꞌilhoh didoh-i ꞌinkꞌez Yakꞌusda (Elohim) yanꞌen, unzoo whe ꞌuntꞌoh.

26 ꞌEt Yakꞌusda (Elohim) ꞌutni, “Dune ꞌutsꞌooleh, neundotꞌen-un, nekꞌunꞌa ꞌuntꞌoh-un, yatoo kꞌut, lho, dutꞌai ndo nudilh-i, musdoos, yun kꞌut cha, yun kꞌut nulhꞌas-i cha, ꞌowhi tsꞌiyawh yumoodih ooleꞌ sih”.

27 ꞌEt Yakꞌusda (Elohim) dune ꞌinla,dukꞌunꞌa Yakꞌusda (Elohim) ndotꞌeꞌ,ꞌen dune ꞌinkꞌez tsꞌekoo cha ꞌen ꞌubinla.

28 ꞌEt Yakꞌusda (Elohim) soo hoonzoo-un ꞌubulhni ꞌinkꞌez Yakꞌusda (Elohim) njan ndubulhni, “Lhane cho nohuzkeh ooleꞌ, ndi yun

Genesis 1 2

b 2:4 Ndi booziꞌ “Yahweh,” ꞌi “Mbe ꞌusli, ꞌEn ꞌUstꞌoh,” ni whe ꞌutni. Sizi Gri, ꞌen Yahweh ꞌuntꞌoh. ꞌEt whuz unꞌa ꞌet Jn 8:58 ndutni whe Sizi ꞌen ndunne Lizwifne budániꞌ, “Soo tsꞌihꞌun unꞌa nohdúsni, Abraham whutileh whutsodaꞌ, ꞌet ꞌudaꞌ si ꞌusli whe ꞌustꞌoh.” Ndi khuni ꞌi be whutsꞌodulꞌeh, ꞌoh daꞌ Sizi Gri ndi yun kꞌut nusuya whe ꞌet Abraham ꞌen ꞌudaꞌ 2,000 be yus kꞌut atꞌen ndi yun kꞌut nusiya. ꞌInkꞌez Sizi Gri ꞌen ndunne Lizwifne ꞌubulhni, “…Abraham whutileh whutsoh daꞌ, ꞌet ꞌudaꞌ ꞌusli whe ꞌustꞌoh.” Ndi khuni ꞌi be whutsꞌodulꞌeh Sizi Gri ꞌen Yahweh unli. Ex 3:14; Jn 8:24-25,58; 17:5,24; 1 Ti 1:17; 1 Jn 5:11-12.

doolhbun ꞌinkꞌez oomoodih uhli, lho, dutꞌai, nudilh-i cha ꞌinkꞌez ndi yun kꞌut ꞌusjiz-i cha tsꞌiyawh”.29 ꞌEt Yakꞌusda (Elohim) ꞌutni, “Whunulhꞌen, yun ha nuyeh-i oomaiꞌ hoonli-i, ꞌananukat-i yun kꞌut hooni-i, duchun oomaiꞌ ꞌananukat-i, nohni nohba ꞌutꞌalh-i tileh.30 ꞌInkꞌez cha ndi yun kꞌut ꞌusjiz-i, dutꞌai ndo nudilh-i, ꞌinkꞌez yun kꞌut nulhꞌas-i cha, ndi yun kꞌut ha nuyeh-i yutiꞌulh huba bugha ínusꞌai,” ꞌinkꞌez whuz unꞌa ꞌuhooja.31 Yakꞌusda (Elohim) yaneꞌ yalhꞌen-i yunilhꞌen, tsꞌiyawh ꞌuyinla-i ꞌinkꞌez ꞌalha tube unzoo. ꞌEt hulhgha ꞌinkꞌez bundadaꞌ ꞌet bulh lhkꞌu tat dzin. ꞌEt tsꞌiyawh whunalhꞌen whe tube ooba hoonzoo. ꞌEt hulhgha ꞌinkꞌez bundadaꞌ ꞌet whulh lhkꞌu tat dzin suliꞌ.

2 1 ꞌAwet yakꞌuz, yun kꞌut, ꞌinkꞌez ndai tsꞌiyawh ꞌuhoonla, ꞌi lhaoodinla. 2 ꞌEt whulh lhtakꞌantꞌit dzin suliꞌ, ꞌet Yakꞌusda (Elohim) be ꞌutꞌen, ꞌi lhaidinla ꞌinkꞌez whulh lhtakꞌantꞌit dzin ꞌet nalyiz. Ndi be ꞌutꞌen ꞌi tsꞌiyawh lhaoodinla.

3 ꞌInkꞌez Yakꞌusda (Elohim) whulh lhtakꞌantꞌit dzin ꞌet soo hoonzoo-un whulhtsi ꞌinkꞌez ꞌudun duba neooninla. Njan whulh lhtakꞌantꞌit dzin ꞌet nalyiz be ꞌutꞌen ꞌi tsꞌiyawh lhaoodinla ꞌet huwa, Yakꞌusda (Elohim) ndi ꞌuyinla ꞌi lhaoodinla.

4 Njan ꞌet soo ꞌudechoo wheꞌ whuditꞌen hukwꞌelhꞌaz yakꞌuz ꞌinkꞌez yun kꞌut njan dzin Moodihti Yakꞌusda (Yahweh b Elohim) ꞌen ndi yakꞌuz ꞌinkꞌez yun kꞌut ꞌuhoonla,5 ꞌawhuz yun whutꞌan ꞌinkꞌez oomaiꞌ hooni-i, ꞌinkꞌez dilhtan-i cha yun kꞌut ha lhusye whe, Moodihti Yakꞌusda (Yahweh Elohim) nawhulhtih-un ꞌinkꞌez dune yun gha oonaꞌ ha hooloh.6 ꞌEt hoontsꞌi tootsul whuzdliꞌ ꞌi be yun kꞌut naooniltsul.7 ꞌInkꞌez Moodihti Yakꞌusda (Yahweh Elohim) yun lez ꞌi dune yulhtsi ꞌinkꞌez be tsꞌukhuna bulh yuni ꞌainyulh ꞌinkꞌez dune khuna suliꞌ.

3 Genesis 1 , 2

Yakꞌusda (Elohim) ba haꞌ nuyeh kꞌet ꞌet dune neninꞌaz8 Eden huwun ndaz de ꞌet Moodihti Yakꞌusda (Yahweh Elohim) ꞌen

haꞌ nuyeh kꞌet newhuninꞌai. ꞌEt ꞌaꞌ nule ꞌinkꞌez ndun dune yulhtsi, ꞌen ꞌet neinilhti.9 Njan yun kꞌut Moodihti Yakꞌusda (Yahweh Elohim) tsꞌiyai duchun nulꞌen huba nzoo-i ꞌinkꞌez ꞌutꞌalh huba nzoo-i ꞌainanla. Duchun oogha tsꞌukhuna-i cha whuniz ha nuyeh yun ꞌet ꞌuyinla. ꞌInkꞌez ndi duchun be tꞌeoonudzun ndet hoonzoo ꞌinkꞌez ndet hoontsiꞌ ꞌet cha.

10 ꞌEt ndi tookꞌoh Eden whutsꞌu hainli, ꞌi ha nuyeh kꞌet be nawhunultsul, ꞌet ꞌukoh didun lhkꞌe inli whuzdliꞌ.11 Soo ꞌudechoo whutsꞌu hainli, ꞌi Pishon huyulhni, ndi ꞌi yun kꞌut Havilah ndulcho whunadizdli, ꞌet gold hooni.12 ꞌInkꞌez njan yun kꞌut gold ꞌi unzoo. Bdellium ꞌinkꞌez onyx tse ꞌi ꞌet hooni.13 Njan whulh nat tookꞌoh ye dinli, ꞌi Gihon hiyulhni, ꞌi ꞌuntꞌoh. Yun kꞌut Cush, ꞌet ndulcho whunasuli.14 Bulh ta-i ꞌukoh ꞌi Hiddekel huyulhni, ꞌi Assyria whandaꞌ tsꞌe wheinli. Bulh dunghi ꞌukoh ꞌi Euphrates ꞌuntꞌoh.

15 ꞌEt Moodihti Yakꞌusda (Yahweh Elohim) ha nuyeh kꞌet Eden ꞌet dune neninilhti, yugholeꞌ ꞌinkꞌez yotꞌeꞌ ha.16 ꞌInkꞌez Moodihti Yakꞌusda (Yahweh Elohim) ndun dune khuni yutlꞌa danꞌai whe nduyulhni, “Ndi duchun tsꞌiyawh njan ha nuyeh ꞌi onꞌalh ndet hukwaꞌ ninzin totsuk.17 Ndi duchun be tꞌeoonudzun-i, ndet hoonzoo-un, ꞌinkꞌez ndet hoontsiꞌ-un, ꞌi oomaiꞌ ꞌaw lhuzonꞌal. Ndet dzin inꞌal-un, ꞌalha datantsah.”

18 ꞌEt Moodihti Yakꞌusda (Yahweh Elohim) ꞌutni, “Dune dichꞌoh ꞌuhintꞌoh de ꞌaw lheꞌhoozooꞌ wheꞌ hoontꞌoh, yulaꞌ titꞌelh-un yundultꞌoh-un ooba ꞌoosleh si.”

19 Ndi yun kꞌut ꞌet Moodihti Yakꞌusda (Yahweh Elohim) tsꞌiyai khuna-i, dutꞌai ndo yat nudilh, ꞌi tsꞌiyawh Adam tsꞌun nebuninla, ꞌet ntsꞌenꞌa hubootazih ha. ꞌInkꞌez ntsꞌenꞌa hubonziꞌ, ꞌi huboozi suliꞌ.20 ꞌEt Adam ꞌen ndi musdoos, dutꞌai ndo yat nudilh, ꞌinkꞌez tlꞌo kꞌut khuna-i, ꞌi tsꞌiyawh hubooziꞌ whulhtsi. ꞌEt ꞌinkꞌez Adam yulh ndultꞌoh ꞌen yulaꞌ ootꞌen hooloh.

21 ꞌInkꞌez ꞌet Moodihti Yakꞌusda (Yahweh Elohim) Adam bulh cho yukꞌe dinꞌai, ꞌet Adam nanisti ꞌinkꞌez oocha ꞌilhoghi Yakꞌusda yutsꞌu haídantan ꞌinkꞌez yutsung lhtsꞌun be naíyunilhni.22 Moodihti Yakꞌusda (Yahweh Elohim) ndi ꞌucha dune tsꞌu ha idantan, ꞌi tsꞌeke yulhtsi ꞌinkꞌez dune yughi nilhti.

Genesis 2 4

23 ꞌEt Adam ꞌutni,“Ndi ꞌandit stsꞌun ootsꞌun ꞌuntꞌohꞌinkꞌez stsung ootsung ꞌuntꞌoh.

Tsꞌeke booziꞌ ooleꞌ si,dune tsꞌu halti ꞌet huwa”.

24 ꞌEt huwa dune dubá ꞌinkꞌez duloo bulh bula dootnih ꞌinkꞌez duꞌat bulh ootꞌe ꞌinkꞌez ꞌilho yustꞌe hooleꞌ.

25 ꞌInkꞌez nahultꞌoh ꞌustꞌet, dune ꞌinkꞌez duꞌat bulh whe ꞌaw yooya cha lhuhiloh.

Dune nintaꞌ ꞌutꞌih whutsꞌu nintꞌi

3 1 ꞌEt tlꞌughus ꞌi lhelhdoh didoh-i Moodihti Yakꞌusda (Yahweh Elohim) ꞌuyinla-i unli ꞌinkꞌez tsꞌeke ꞌulhni, “Duchun yun kꞌut

whuduchun ꞌaw tsꞌiyawh lhuzoohꞌal, ni eh?”2 ꞌEt tsꞌeke nyoon tlꞌughus ꞌuyulhni, “Nyoo duchun maiꞌ ha nuyeh-i,

ꞌi tsꞌooꞌalh hubaꞌ hoontꞌoh,3 ꞌet hoontsꞌi ha nuyeh kꞌet whuduchun whuniz nadanꞌa-i, ꞌi Yakꞌusda (Elohim) ꞌutni, ‘Nyoo duchun maiꞌ ꞌaw lhuzoohꞌal, kꞌus ootꞌa oohnalh junih, khun si daoohtsah,’ ” ni.

4 ꞌEt ndi tlꞌughus, tsꞌeke ꞌen ꞌuyulhni, “ꞌAlhaꞌ ꞌaw daoontsah aitꞌoh.5 Yakꞌusda (Elohim) tꞌeooninzun ndet dzin uhꞌalh-un, hoohꞌen tihleh ꞌinkꞌez Yakꞌusda (Elohim) bundutilhꞌelh, hoonzoo-un ꞌinkꞌez hoontsiꞌ-un cha tꞌewhuntahzin.”

6 ꞌEt tsꞌeke duchun tsꞌuꞌalh huba unzoo, nulꞌen huba cha unzoo, duchun tsꞌuwhunih netilhtselh huba ookaꞌ whuninzun, oomaiꞌ yilhchoot ꞌinkꞌez yanꞌal, duki cha yuloh yutlꞌa nanꞌai ꞌinkꞌez ꞌen cha yanꞌal.7 ꞌEt nahultꞌoh duna be huhonꞌen suliꞌ, ꞌinkꞌez nahultꞌoh ꞌustꞌet ꞌuhintꞌoh tꞌehonanzin, mai “fi g” huyulhni ꞌi ootꞌan lhunaꞌ hidunilhkaꞌ ꞌi be be kꞌeꞌ uzdla ꞌuhududulhtsi.

8 ꞌEt nawhudunikꞌaz whe Moodihti Yakꞌusda (Yahweh Elohim) ha nuyeh kꞌet ꞌoh nuya whe hiditsꞌo ꞌinkꞌez Adam duꞌat bulh ha nuyeh kꞌet duchun toh Moodihti Yakꞌusda (Yahweh Elohim) hichꞌa untilhꞌi.9 ꞌEt Moodihti Yakꞌusda (Yahweh Elohim) Adam ha hizya ꞌinkꞌez ꞌuyulhni, “Ntsꞌe ꞌintꞌoh”.

10 ꞌEt ꞌutni, “Ha nuyeh kꞌez nyudastsꞌo ꞌinkꞌez whenuzjut, ꞌustꞌet ꞌustꞌoh ꞌet huwa untizꞌi.”

11 ꞌInkꞌez ꞌuyulhni, “Mbe ꞌunyulhni ꞌustꞌet ꞌintꞌoh, duchun oomaiꞌ uhꞌalh junih nohdusni-i eh uhꞌal?”

12 ꞌEt dune ꞌutni, “Tsꞌeke sgha nilhtꞌi-un duchun oomaiꞌ sgha ininꞌai ꞌinkꞌez ꞌi usꞌal.”

5 Genesis 2 , 3

13 ꞌInkꞌez Moodihti Yakꞌusda (Yahweh Elohim) tsꞌeke ꞌulhni, “Dahoontꞌoh-un dainja?” ꞌInkꞌez tsꞌeke ꞌutni, “Tlꞌughus nasunanꞌa ꞌinkꞌez usꞌal.”

14 ꞌEt Moodihti Yakꞌusda (Yahweh Elohim) tlꞌughus ꞌulhni,“ꞌEt ndinja huwa ꞌuyoo khuna-i anus nkꞌe hida whe ꞌintꞌoh,ꞌinkꞌez ꞌuyoo khuna-i chuntoh nulhꞌas-i anus,

mbut tlꞌah whe nukedutanzut,ꞌinkꞌez lhez za tanꞌulh, yun ka tandalh nduwhulyiz whe.

15 ꞌInkꞌez nyun ꞌinkꞌez tsꞌeke bulh lhazdatni nohtiselh,ꞌinkꞌez nyuzkeh ꞌinkꞌez buzkeh.

Ntsi yayinduntaꞌus ꞌinkꞌez ookentsul duntalhdah.”16 ꞌEt tsꞌeke ꞌulhni,

“Ndzi unduda-un ꞌinkꞌez datantꞌelh-un ꞌonus ꞌuwhulcho whutiselh,nyulh ꞌultsꞌulh whe nyuzkeh whutaleh,

nki ookaꞌ untanzilh ꞌinkꞌez nyumoodih tileh.”17 ꞌEt Adam ꞌulhni,

“Nꞌat oozalhtsꞌaiꞌ ꞌet huwa ꞌinkꞌez ndi duchun oomaiꞌ,‘Onꞌalh junih,’ nyudusni,inꞌal ꞌet huwa, nyun mba ndi yun ꞌi ookehida,ꞌutꞌen be ootsꞌu huyukat-i tanꞌulh yun ka tandalh ndwhulyiz

whe. 18 Whus cho ꞌinkꞌez whusyaz

bulh nankiltꞌoh ookꞌut mba ha ntiyeh,ꞌinkꞌez yun ha nuyeh-i

tanꞌulh. 19 Nyunin tsꞌu halhdzilh whe

ꞌutꞌalh-i onꞌalh,yun natandleh

whutsꞌun.ꞌI ootsꞌu hainzut.

Lhez ꞌintꞌoh ꞌinkꞌez lhez ꞌi tsꞌun natandleh.”

20 ꞌInkꞌez Adam duꞌat Eve be yoozi, khunane tsꞌiyawh buloo ꞌet huwa.

21 ꞌInkꞌez Adam ooꞌat bulh Moodihti Yakꞌusda (Yahweh Elohim) ꞌen ndi zuz ꞌi buba ꞌuyinla hiye óokeꞌ ha.

Genesis 3 6

(3:24)© 1996 David C. Cook

22 ꞌEt Moodihti Yakꞌusda (Yahweh Elohim) ꞌutni, “Nulhꞌen, dune Neundultꞌoh suliꞌ, hoonzoo-un ꞌinkꞌez hoontsiꞌ-un tꞌewhunozin ha. ꞌInkꞌez ꞌandit doo ka si dula be ndi duchun oomaiꞌ yolhchoot ꞌinkꞌez yooꞌalh ꞌinkꞌez ꞌilhiz whutinalh.”23 ꞌEt huwa Moodihti Yakꞌusda (Yahweh Elohim) njan ha nuyeh kꞌet, Eden, ꞌet tenabunilhꞌaꞌ, ꞌinkꞌez njan yun whutꞌas tileh ꞌi ootsꞌu ha itsꞌalhti ꞌet, ootꞌeꞌ ha.24 ꞌEt dune teininyoot ꞌinkꞌez Eden ndaz tsꞌe ꞌet lizasne, Cherubne hubulhni, ꞌet nebunilhti, ꞌinkꞌez saluzti kwun dunukw dotꞌen lhelhtsꞌun nadighus-i duchun oogha tsꞌukhuna-i yugholeꞌ ha.

Cain ꞌen Abel yuzilhghi

4 1 ꞌEt Adam duꞌat Eve, tꞌeinanzin ꞌinkꞌez ooꞌat ulchan ꞌinkꞌez Cain ꞌen yulhtsi ꞌinkꞌez ꞌutni, “Moodihti (Yahweh) tsꞌun dune sgha ninzut.”

2 ꞌEt doo cha Eve ꞌulhtsi, ꞌandit ꞌet bulhutsin Abel ꞌen ꞌusbai ghunli unli, ꞌet Cain ꞌen yun ghana-un suliꞌ.

3 ꞌEt whudizulh whutoh Cain yun whumaiꞌ, Moodihti (Yahweh) gha italelh ha yughi ninla.4 Abel cha ꞌusbai ꞌudechoo whuzdli-i nilhkꞌa whe whuz wheyanla ꞌinkꞌez Moodihti (Yahweh) Abel yudilhtiꞌ ꞌinkꞌez yuba soo ꞌuja.5 ꞌEt hoontsꞌi Cain yuba whusayanla-i ooba lheꞌyizooꞌ ꞌinkꞌez Cain tube hunilchꞌe ꞌinkꞌez oonin tsꞌe ꞌutsꞌun unꞌa ꞌuja.

6 ꞌEt huwa Moodihti (Yahweh) ꞌen Cain ꞌuyulhni, “Ndet huwa hunilchꞌe ꞌinkꞌez nyunin tsꞌe ꞌutsꞌun unꞌa ꞌinja?”7 “Soo ꞌantꞌen, ꞌaw lakw ꞌuyoo neba lheꞌhootazooꞌ? ꞌEt ꞌaw soo lheꞌzintꞌen de, ꞌutꞌen untsiꞌ-i dati ꞌusꞌai whe ꞌuntꞌoh. ꞌInkꞌez nkaꞌ ninzun whe ꞌuntꞌoh, ꞌet hoontsꞌi whuchꞌa whumoodih ꞌonleꞌ.”

8 ꞌEt Cain dudulhutsin Abel yulh yailhduk, ꞌet ꞌuhooja nus tlꞌo kꞌut ꞌuhintꞌoh whe, Cain dudulhutsin Abel yuchꞌaz nedinja ꞌinkꞌez yuzilhghi.

9 ꞌEt whe Moodihti (Yahweh) Cain ꞌuyulhni, “Nyulhutsin Abel daja?” Cain ꞌutni, “Tꞌeoonuzuszun, si eh sulhutsin ghusli?”

10 ꞌInkꞌez ꞌutni, “Ntsꞌenꞌa dainja? Yun whutsꞌun nyulhutsin buzkaiꞌ stsꞌun huyih.11 ꞌAndit ꞌawet ndi yun mba whutátsiꞌ. Yun diztsꞌo nla kꞌez nyulhutsin buzkaiꞌ ookꞌeijul ꞌet huwa.12 Yun gha itanalh te, daltus la hukwꞌunꞌa mba ookꞌut ha lheꞌuntizye. Ndi yun kꞌut tandalh whutoh nunulꞌiꞌ-un ꞌinkꞌez yoh lhuhootꞌiꞌ-un tanleh.”

13 ꞌEt Cain ꞌen Moodihti (Yahweh) uyúlhni, “Be sba nahisda-i ꞌonus sba hoondaz kꞌet ꞌaw whulh oostꞌeꞌ aitꞌoh.

7 Genesis 3 , 4

14 ꞌAlha ꞌandit dzin whutsꞌun ndi yun kꞌut suntinyoot nyunin ba whuꞌiz ꞌutistꞌelh, ndi yun kꞌut nunulꞌiꞌ-un ꞌinkꞌez yoh lhuhootꞌiꞌ-un tisleh, ꞌinkꞌez mbe nasilhti-un sutuzilhghelh whe ꞌuntꞌoh”.

15 ꞌEt Moodihti (Yahweh) ꞌuyulhni, “ꞌEt huwa, mbe Cain silhghi-un lhtakꞌantꞌit ꞌuwhultsuk-un ooba kꞌu titnelh.” Doo ka si Moodihti (Yahweh) ꞌen Cain ye hoodalhꞌen khun nahiyilhti ꞌinkꞌez hizoolhghelh whuchꞌa.

Cain tsꞌu haindene16 ꞌEt Cain Moodihti (Yahweh) chꞌa suya ꞌinkꞌez yun kꞌut Nod

huwhutni-un ꞌet nenina, haꞌ nuyeh kꞌet Eden ꞌon daz tsꞌe.17 ꞌInkꞌez Cain duꞌat tꞌeinanzin, ulchan ꞌinkꞌez Enoch ooyaz

whuzdli. ꞌInkꞌez keyoh whuti ꞌuhoonla ꞌinkꞌez duyeꞌ booziꞌ, Enoch be hoozi.18 Irad ꞌen Enoch ooyeꞌ suliꞌ ꞌinkꞌez Irad, Mehujael ooyeꞌ suliꞌ ꞌinkꞌez Mehujail ꞌen Methushael, ꞌinkꞌez Methushael, Lamech ooyeꞌ suliꞌ.

19 ꞌEt Lamech nane tsꞌekoo ilhchoot, duꞌatke eni, ꞌilhoghun ooꞌat, Adah booziꞌ ꞌinkꞌez ꞌon ꞌat-un ꞌen Zillah huyulhni.20 ꞌInkꞌez Adah, ꞌen Jabal ooyaz suliꞌ. ꞌEn buzkehkene nimbali bet huwhutꞌi ꞌinkꞌez khuna-i ꞌi nulhyeh.21 Bulhutsin booziꞌ Jubal, ꞌen ndi harp ꞌinkꞌez fl ute hiyulhni ꞌi be hujun, ꞌenne tsꞌiyawh hube ꞌabá.22 Zillah, ꞌen cha buzke hooni. ꞌIlhoghun ꞌen Tubal-Cain hiyulhni. ꞌEn mbe ndi ꞌutes ꞌinkꞌez dulkꞌun te ꞌinkꞌez lhuztih bulh yugha khuna ꞌenne tsꞌiyawh hubodulhꞌeh. ꞌInkꞌez Tubal-Cain bulhtus ꞌen Naamah tsꞌutni.

23 ꞌEt Lamech duꞌatke ꞌubulhni,“Adah ꞌinkꞌez Zillah, soo zulhtsꞌai,

dune ka sulhtsi huwa sisghi, chilh hoontsꞌi sundilhdaꞌ hukwa sisghi”.

24 Cain kꞌu titnelh te, lhtakꞌantꞌit tighan,ꞌet de Lamech lhtakꞌantꞌit whunizyat ꞌon ꞌat lhtakꞌantꞌit ꞌuwhultsuk-un.

Adam doo cha za ooyeꞌ hooni25 Adam doo cha duꞌat tꞌenanzin whe ooyaz dune suliꞌ, ꞌen Seth

yulhni. Eve ꞌutni, “Yakꞌusda (Elohim) ꞌuyeꞌ sgha nilhti, ꞌen Abel yukꞌe naidalhti, Cain yuzilhghi-un.”26 Seth cha ooyeꞌ whuzdliꞌ, Enosh yulhni. ꞌEt ndoh dzin dunene Moodihti (Yahweh) booziꞌ be ka whehuninyih.

Genesis 4 8

Adam Buzkehne

5 1 Ndi ꞌudustlꞌus, Adam tsꞌu haindene ghun ꞌuntꞌoh. Yakꞌusda (Elohim) ndet dzin ꞌuyinla dzin, Yakꞌusda (Elohim) ndotꞌen yulhtsi.

2 Dune ꞌinkꞌez tsꞌeke bulh ꞌubinla ꞌinkꞌez soo hoonzoo-un hubulhni ꞌinkꞌez yun ka duneꞌne ꞌubinla, dzin ꞌubinla-un.

3 ꞌInkꞌez Adam ꞌilho whunizyat whunizyat ꞌon ꞌat tat whunizyat (130) yus kꞌut khunaꞌ ꞌinkꞌez ooyeꞌ yundotꞌen-un ooyeꞌ suliꞌ, Seth yulhni.4 Seth ooyeꞌ suliꞌ hukwꞌelhꞌaz, Adam lhkꞌu dit whunizyat whunizyai (800) be yus kꞌut hukwꞌelhꞌaz ꞌinkꞌez ooyeꞌke, ootseꞌke cha whuzdli.5 Adam khunaꞌ ꞌuwhuldzoh hanaꞌ-un ꞌilho hooloh whunizyat whunizyai ꞌon ꞌat tat whunizyat (930) yus kꞌut khunaꞌ ꞌet dazsai.

6 Seth ꞌen ꞌilhoh whunizyat whunizyai ꞌinkꞌez kwulat be yus kꞌut (105) khunaꞌ whe Enosh ooyeꞌ suliꞌ.7 Enosh ooyeꞌ suliꞌ hukwꞌelhꞌaz, Seth lhkꞌu dit whunizyai lhkꞌu dit ꞌon ꞌat lhtakꞌantꞌit (807) be yus kꞌut whe ooyeꞌke ꞌinkꞌez ootseꞌke cha whuzdliꞌ.8 Seth ꞌilho hooloh whunizyat whunizyai ꞌon ꞌat ꞌilho hooloh ꞌinkꞌez ꞌon ꞌat nat be yus kꞌut (912) whe dazsai.

9 Enosh ꞌilho hooloh whunizyat (90) ꞌinkꞌez Cainan ooyeꞌ suliꞌ.10 Cainan ooyeꞌ suliꞌ hukwꞌelhꞌaz lhkꞌu dit whunizyat whunizyai ꞌon ꞌat whunizyat ꞌon ꞌat kwulat (815) be yus kꞌut ꞌinkꞌez ooyeꞌke ꞌinkꞌez ootseꞌke cha whuzdliꞌ.11 Enosh yinka indaꞌ ꞌuwhulyiz-un ꞌilho hooloh whunizyat whunizyai ꞌinkꞌez kwulaiꞌ (905) be yus kꞌut whe dazsai.

12 Cainan lhtakꞌantꞌit whunizyat (70) khanaꞌ ꞌinkꞌez Mahaleel ooyeꞌ suliꞌ.13 Maheleel whuzdli hukwꞌelhꞌaz, Cainan lhkꞌu dit whunizyat whunizyai ꞌon ꞌat dit whunizyat (840) be yus kꞌut ꞌinkꞌez ooyeꞌke ꞌinkꞌez ootseꞌke cha whuzdliꞌ.14 ꞌEt Cainan ꞌilho hooloh whunizyat whunizyai ꞌinkꞌez whunizyat (910) be yus kꞌut ꞌet dazsai.

15 Mahaleel lhkꞌu tat whunizyat ꞌon ꞌat kwulat (65) be yus kꞌut, ꞌinkꞌez Jared ooyeꞌ suliꞌ.16 Jared whuzdli hukwꞌelhꞌaz Mahaleel lhkꞌu dit whunizyat whunizyai ꞌinkꞌez tat whunizyai (830) be yus kꞌut ꞌinkꞌez ooyeꞌke ꞌinkꞌez ootseꞌke cha whuzdliꞌ.17 ꞌEt Mahaleel be yus kꞌut lhkꞌu dit whunizyat whunizyai ꞌinkꞌez ꞌilho hooloh ꞌinkꞌez kwulat (895) be yus kꞌut ꞌet dazsai.

9 Genesis 5

18 Jared yun ka indaꞌ ꞌilho whunizyat whunizyai ꞌinkꞌez lhkꞌu tat whunizyat (162) be yus kꞌut ꞌinkꞌez nanki Enoch ooyeꞌ suliꞌ.19 Enoch whuzdli hukwꞌelhꞌaz Jared lhkꞌu dit whunizyat whunizyai (800) be yus kꞌut nahítnaꞌ ꞌinkꞌez ooyeꞌke ꞌinkꞌez ootseꞌke cha whuhuzdliꞌ.20 Jared be yus kꞌut ꞌilho hooloh whunizyat whunizyai ꞌinkꞌez lhkꞌu tat ꞌinkꞌez nat (962) be yus kꞌut khanaꞌ ꞌinkꞌez dazsai.

21 Enoch lhkꞌu tat whunizyat ꞌinkꞌez kwulat (65) be yus kꞌut khanaꞌ ꞌinkꞌez Methuselah ooyeꞌ suliꞌ.22 Methuselah whuzdli hukwꞌelhꞌaz Enoch Yakꞌusda (Elohim) bulh nusaꞌaz tat whunizyat whunizyai (300) be yus kꞌut ꞌinkꞌez ooyeꞌke ꞌinkꞌez ootseꞌke cha whuzdliꞌ.23 Enoch yun ka ꞌindaꞌ-un tat whunizyat whunizyai ꞌon ꞌat kwulat (365) be yus kꞌut ꞌet khanaꞌ.24 ꞌInkꞌez Enoch Yakꞌusda (Elohim) bulh nusaꞌaz ꞌinkꞌez hoolel, Yakꞌusda (Elohim) nayilhchoot huwa.

25 Methuselah ꞌilho hooloh whunizyai whunizyat ꞌinkꞌez lhkꞌu dit whunizyat ꞌon ꞌat lhtakꞌantꞌit (187) be yus kꞌut khuna ꞌet Lamech ooyeꞌ whuzdliꞌ.26 Lamech whuzdli hukwꞌelhꞌaz, Methuselah lhtakꞌantꞌit whunizyai whunizyat ꞌinkꞌez lhkꞌu dit whunizyat ꞌon ꞌat nanki (782) be yus kꞌut whe khuna ꞌinkꞌez ooyeꞌke ꞌinkꞌez ootseꞌke cha whuzdliꞌ.27 ꞌEt Methuselah ꞌilho hooloh whunizyat whunizyai ꞌinkꞌez lhkꞌu tat whunizyat whunizyai ꞌinkꞌez lhkꞌu tat whunizyai ꞌon ꞌat ꞌilho hooloh (969) be yus kꞌut whe dazsai.

28 Lamech ꞌen ꞌilhoh whunizyai whunizyat ꞌinkꞌez lhkꞌu dit whunizyat ꞌon ꞌat nanki (182) be yus kꞌut suliꞌ ꞌinkꞌez ꞌilhoghun ooyeꞌ suliꞌ.29 ꞌInkꞌez, Nowe be yoozi ꞌinkꞌez ꞌutni, “Ndun ꞌen si kꞌunenunooꞌah neye ꞌutꞌen ha ꞌinkꞌez neba be oogha tsꞌana-i, yun Moodihti (Yahweh) ye kꞌe hanya ꞌet huwa”.30 Nowe yun ka neninya hukwꞌelhꞌaz kwulat whunizyat whunizyai ꞌinkꞌez ꞌilho hooloh whunizyai ꞌinkꞌez kwulat (595) be yus kꞌut suliꞌ ꞌet ooyeꞌke ꞌinkꞌez ootseꞌke cha whuhuzdliꞌ.31 Lamech khanaꞌ nduwhulyiz-un lhtakꞌantꞌit whunizyai whunizyat ꞌinkꞌez lhtakꞌantꞌit whunizyat ꞌon ꞌat lhtakꞌantꞌit (777) be yus kꞌut ꞌet dazsai.

32 ꞌInkꞌez Nowe kwulat whunizyai whunizyat (500) be yus kꞌut whe Shem, Ham ꞌinkꞌez Japheth ꞌenne ooyeꞌke suliꞌ.

Genesis 5 10

Dune huye untsiꞌ-i ꞌinkꞌez be buba nahisda

6 1 ꞌEt ꞌuhooja, ndi yun kꞌut dune ꞌawet nus za ꞌuhuniltsuk whe ꞌinkꞌez tsꞌekoo bubuzkeh suliꞌ.

2 Yakꞌusda (Elohim) ooyeꞌke ꞌenne ndunne tsꞌekoo dune ootseꞌkene huhinzooo hubonilhꞌen. ꞌInkꞌez mbene la bukaꞌ huninzunne ꞌenne tsꞌekoo bubu hilhchoot, buꞌatke holeꞌ ha.3 ꞌEt Moodihti (Yahweh) ꞌutni, “Syoghi ꞌaw ꞌilhiz wheni dune bulh buchꞌaz dotni aitꞌoh. ꞌAlha ndi yun kꞌut dune unli ꞌet hoontsꞌi whunizyat whunizyai ꞌinkꞌez nat whunizyai (120) be yus kꞌut tileh whe ndi yun kꞌut tidalh.”

4 ꞌEt ꞌoh daꞌ njan yun kꞌut dunechone hanleꞌ. ꞌEt hukwꞌelhꞌaz Yakꞌusda (Elohim) ooyeꞌke ꞌenne ndi yun kꞌut dune butseꞌke buzisda ꞌinkꞌez bubuzkehke yahonleꞌ. ꞌEt ndunne dune whuzdliꞌne, ꞌenne dune lhtuscho ꞌinkꞌez nchane ꞌuhintꞌoh.

5 ꞌEt Moodihti (Yahweh) bunilhꞌen ndi yun kꞌut dune huye untsiꞌ tube ncha suliꞌ. Tsꞌiyawh ꞌahoolhyiz wheni ndune bubeni untsiꞌ, ꞌet whunilhꞌen.6 ꞌEt Moodihti (Yahweh) tube huwu dzi unduda ndi yun kꞌut dune ꞌinla-un, oodzi yo tube whunduda suliꞌ.7 ꞌEt Moodihti (Yahweh) ꞌutni, “Mbene la dune ndi yun kꞌut wheni ꞌubuslane, soo tsꞌiyawh gak hubutiselh. Ndi dune ꞌinkꞌez khuna-i, yun kꞌut nulhꞌas-i ꞌinkꞌez ndo dutꞌai nudilh-i cha, ꞌi tsꞌiyawh. ꞌEt tube huwu sdzi unduda ꞌubusdla ꞌet huwa.”8 ꞌEt hoontsꞌi Nowe ꞌen Moodihti (Yahweh) oonalh ndi ye netsꞌun unzoo-i ꞌet nahoonꞌai.

Nowe ꞌen Yakꞌusda (Elohim) yuba soo nduja9 Nowe tsꞌu haindene hukwꞌeguz ꞌet ꞌuhoontꞌoh. Nowe ꞌen tsꞌihꞌun

dune unli, khuna daꞌ whe ꞌaw ookꞌe holtsꞌit hooloh. Nowe ꞌen Yakꞌusda (Elohim) bulh nuya inleꞌ.

10 Nowe tane ooyeꞌke suliꞌ: Shem, Ham, ꞌinkꞌez Japheth.11 Yakꞌusda (Elohim) oonalh ndi yun kꞌut ndulcho dune nintaꞌ

honilhꞌen ꞌinkꞌez dune lhezudla-un, dulcho whe whudizbun.12 ꞌEt Yakꞌusda (Elohim) njan yun kꞌut ꞌet whunilhꞌen whe ꞌalha tube nintaꞌ whuntꞌen. Dunene, ꞌenne tsꞌiyawh soo tsꞌihꞌun ꞌantsꞌi halhjut leꞌ hintꞌoh suliꞌ.

Tsꞌi cho ꞌulya13 Yakꞌusda (Elohim) ꞌen Nowe ꞌuyulhni, “Njan tsꞌiyawh ndai la

ꞌusjiz-i, ꞌawet sba whula toh suliꞌ. Dunene ꞌenne bulagha tsꞌe ndi yun

11 Genesis 6

kꞌut tsꞌiyawh be lhezudla-i be hodilhbun. ꞌEt whunilhꞌen, ndi yun ndulcho whe ndi khuna tsꞌiyawh yun kꞌut husjiz-i, tsꞌiyawh bulh gak whutiselh.14 Ndi duchun gopher hiyulhni, ꞌi be tsꞌi cho ꞌónleh. ꞌInkꞌez bez tsꞌe ꞌet lhelhdun whulai holhtselh. Dzeh ꞌi be bez tsꞌe ꞌinkꞌez yoo ꞌaz tsꞌe cha be ondzeh.15 ꞌInkꞌez ꞌet ndiz unꞌa ndi tsꞌi cho ꞌi ꞌonleh: 450 feet ꞌet ꞌuhoolyiz, ꞌinkꞌez 75 feet ꞌet ꞌuhooltel, ꞌinkꞌez 45 feet naoodalhzaꞌ.16 Dadintꞌaz cho ooba ꞌonleh. ꞌIlho cubit ndo ooban whutsꞌun, ꞌet neninꞌa holhtselh. Oozih kꞌut ꞌet dati-un ꞌonleh. ꞌUdeyo-un yun cha ꞌonleh ꞌinkꞌez ꞌon do cha ꞌudun ꞌuhoonleh, ꞌinkꞌez bulh tat-un yun ꞌet ꞌuhonleh.17 ꞌEt whunilhꞌen ꞌet si ꞌutisnelh, yun kꞌut ndulhcho too ha tadutisbilh. Yat whutah ꞌet gak whutiselh. Tsꞌiyawh ndai ndi ꞌusjiz be tsꞌukhuna bulh ꞌuntꞌoh, ꞌi gak tileh. Ndi yun kꞌut ꞌet tsꞌiyai yatadlah.18 ꞌEt hoontsꞌi nyun ntsꞌun sghuni ntlꞌa dutisꞌalh. ꞌInkꞌez ndi tsꞌi cho bez tonyaꞌ, nyun, nyeꞌke, nꞌat, ꞌinkꞌez nyeꞌkeh buꞌatke cha, ꞌen dulh ꞌúbolneh.19 ꞌInkꞌez ndai la ndi yun kꞌut ꞌusjiz-i, lhawh didoh ꞌilho whe nawh didoh-i, ꞌi ndi ꞌi tsꞌi cho be ꞌonlelh. ꞌEt tsꞌiyawh khutinalh wheni tsꞌeke cha ꞌinkꞌez dune cha unli-i didoh-i tsꞌiyawh.20 Ndai la ndo nudilh-i dundultꞌoh-i, yun nulhꞌas-i dundultꞌoh-i cha, ꞌinkꞌez yun nutsꞌeh-i dundultꞌoh-i cha, nanki dundultꞌoh-i tsꞌiyawh ntsꞌun tidulh, khutinalh wheni.21 ꞌInkꞌez ndai la ꞌutꞌalh-i tsꞌiyawh, tanꞌulh-i tsꞌiyawh be ꞌonlelh, ꞌi tsꞌiyawh ꞌulhonlelh. ꞌI la oohꞌalh nyun ꞌinkꞌez ndi khuna-i cha.”

22 ꞌEt Nowe ꞌet nduja, ntsꞌenꞌa Yakꞌusda (Elohim) yuba nahizya, ꞌet tsꞌiyawh nduja.

Dutadiltꞌo-un

7 1 ꞌEt whe Moodihti (Yahweh) ꞌen Nowe ꞌuyulhni, “Nyuzkeh cha, nyunchꞌoh cha, mbene la nyoh whutꞌine tsꞌiyawh ndi tsꞌi cho

behdilh, daintꞌoh la tsꞌihꞌun dune inli, ndi ꞌandit dune toh ndoh whuya hoozulh dune toh daintꞌoh la tsꞌihꞌun dune inli-un ꞌet whunusꞌen.2 Ndi yun kꞌut khuna-i ootsun hooloh-i, lhtakꞌantꞌi dune ꞌinkꞌez tsꞌeke bulh ꞌilhoh didoh-i nanki whe khuna-i tsꞌiyawh. Ndi khuna-i dutsun-i cha, dune cha tsꞌeke cha, ꞌohwhi ꞌi tsꞌiyawh olhchoot.3 ꞌInkꞌez ndi yun kꞌut ndai la nudilh-i dutꞌai tsꞌiyawh cha lhtakꞌantꞌi dune ꞌinkꞌez tsꞌeke bulh cha, ꞌohwhi tsꞌiyawh ndi yun kꞌut khuna-i ndai la khutinalh-i.

Genesis 6 , 7 12

4 Lhtakꞌantꞌi dzin hukwꞌelhꞌaz ꞌet ndi yun kꞌut dit whunizyat (40) dzin ꞌinkꞌez dit whunizyat ꞌulhdzis whutsꞌun nawhutilhtilh. Ndai ꞌusla ndi yun kꞌut ꞌusjiz-i tsꞌiyawh hooloh whutilhtselh.”

5 ꞌEt Nowe ntsꞌenꞌa Moodihti (Yahweh) yuba nahizya, tsꞌiyawh ꞌet nduja.

6 Nowe ꞌen 600 be nawhudizut yun kꞌut indaꞌ whe ndi yun kꞌut ꞌet dutadiltꞌo.7 ꞌEt Nowe ooyeꞌke ooꞌat cha, ꞌinkꞌez ooyeꞌke buꞌatke cha tsꞌiyawh ꞌi nyoo tsꞌi cho huye indil ꞌawet too ndo ꞌutinelh ꞌet huwa.8 Ndai la khuna-i lhditsun-i ꞌinkꞌez khuna-i dutsun ꞌi cha, dutꞌai cha ꞌinkꞌez ndi yun kꞌut nulhꞌas-i tsꞌiyawh.9 Nanki hinli whe ndi tsꞌi cho bez Nowe tsꞌun dahunilhꞌaz, dune ꞌinkꞌez tsꞌeke cha. ꞌEt ntsꞌenꞌa Yakꞌusda (Elohim) ꞌen Nowe yuba nahizya, ꞌet nduhuja.10 ꞌEt hukwꞌelhꞌaz lhtakꞌantꞌi dzin inleꞌ ꞌet ꞌawet ndi yun kꞌut too whuzdliꞌ.

11 Nowe be yus kꞌut-un, whunizyat lhkꞌu tat whunizyat (600) ꞌet ꞌuhooja whulh nanki sanun (2) whunizyat ꞌon ꞌat lhtakꞌantꞌit dzin (17)

13 Genesis 7

(7:10)© 1996 David C. Cook

ꞌet ꞌuhooja ndi yun kꞌut too tsꞌiyawh oodahaꞌdiltsꞌut, ꞌinkꞌez ndo yakꞌuz whudadintꞌaz cha whudahaꞌdankat.12 Dit whunizyat dzin ꞌinkꞌez dit whunizyat ꞌulhdzis ꞌet ndi yun kꞌut yun chan honleꞌ.

13 Soo ꞌet dzin za Nowe ooyeꞌke cha, Shem, Ham ꞌinkꞌez Japheth, ꞌinkꞌez Nowe ooꞌat, ꞌinkꞌez ooyasꞌatke cha tsꞌiyawh ndi tsꞌi cho huye indil.14 ꞌEnne cha ꞌinkꞌez tsꞌiyawh khuna-i lhelhtsꞌun didoh, tsꞌiyawh musdoos lhelhtsꞌun didoh, tsꞌiyai yun nulhꞌas lhelhtsꞌun didoh, ꞌinkꞌez yat whudutꞌai lhelhtsꞌun didoh cha, tsꞌiyai didoh lhelhchꞌa ꞌuwhutꞌen.15 Nanki whe tsꞌiyawh Nowe bulh ndi tsꞌi cho huye indil. Ndai la khuna-i ndi yun kꞌut ooyiz hoonli-i tsꞌiyawh.16 ꞌEt ndowhi tsꞌiyawh tsꞌeke dune tubulh. Ndi yun kꞌut hoonli-i Yakꞌusda (Elohim) ꞌen yuba nahizya, whuz unꞌa ndi tsꞌi huye indil ꞌinkꞌez buchꞌaz naꞌdinꞌai.

17 Ndi ha tadiltꞌo-i too dit whunizyat dzin (40) ꞌet ꞌantꞌeꞌ too ndo za lheꞌinelh ꞌinkꞌez ndi tsꞌi cho dudinlat yun ando tsꞌe whuz dudinlat.18 Too ꞌet za ndutꞌen ꞌinkꞌez nus za lheꞌiltus ndi yun kꞌut, ꞌinkꞌez ndi tsꞌi cho ꞌoh nulat.19 ꞌEt ndi yun kꞌut too tube takhulh suliꞌ. Dzulh ꞌowhi cha tsꞌiyawh ba ndo ha tadiltꞌo.20 Ndo za ꞌutꞌen (15 cubits) ꞌinkꞌez ndi too dzulh ba ndo ha tadiltꞌo.21 ꞌEt ndi yun kꞌut khuna-i nuhutnah-i, dutꞌai cha, ꞌinkꞌez musdoos nduntꞌi-i cha, yun nulhꞌas-i cha, tsꞌiyawh dune cha tsꞌiyawh hooloh huzdliꞌ.22 Mbene la ooyiz hoonline husjizne, ꞌinkꞌez hoonli husjiz-i ꞌohwhi tsꞌiyawh yun kꞌut ꞌuntꞌoh-i, tsꞌiyawh yaidla.23 ꞌEt ndi yun kꞌut hoonli khuna-i tsꞌiyawh gak whulhtsi. Yun nulhꞌas-i cha, dune cha, ꞌinkꞌez khuna-i cha, dutꞌai cha, tsꞌiyawh gak whulhtsi. Nowe ꞌinkꞌez yulh ꞌutꞌenne ꞌenne za ndi tsꞌi cho bet hukhuna.

24 ꞌEt whunizyat whunizyat ꞌinkꞌez kwulat whunizyat dzin (150) ꞌet ꞌuwhulhyiz whe ndi yun kꞌut too honleꞌ.

Too ꞌawet yo ꞌuja

8 1 ꞌEt Yakꞌusda (Elohim) Nowe ꞌinkꞌez khuna-i ndai la ꞌusjiz-i tsꞌi bet tsꞌiyawh yulh ꞌuntꞌohne whunalnih, ꞌinkꞌez Yakꞌusda nilhtsꞌi ꞌi

ꞌuyinla ꞌi ndi yun kꞌut nalhtsꞌi, ꞌet too yo ꞌuja.2 Ndi yun kꞌut too tsꞌiyawh ꞌinkꞌez ndo yakꞌuz whudadintꞌaz cha tsꞌiyawh yudanaꞌdinla ꞌinkꞌez yakꞌuz tsꞌun chan ꞌetsul ꞌuyinla.3 ꞌInkꞌez too tsꞌiyawh yo wheꞌ ninleꞌ, whunizyat whunizyat ꞌinkꞌez ꞌon ꞌat kwulat whunizyat dzin (150) ꞌet too yo ꞌuja.

Genesis 7 , 8 14

4 ꞌEt ndi tsꞌi ꞌi ntsꞌe ndi dzulh Ararat huyulhni ꞌuntꞌoh, ꞌi lhtakꞌantꞌit sanun ꞌinkꞌez whunizyat ꞌon ꞌat lhtakꞌantꞌit dzin (17), ꞌi kꞌut neninkez.5 ꞌInkꞌez too yo ꞌuja ꞌinkꞌez yo za lheꞌinelh whunizyat sanun whutsꞌun, ꞌudechoo dzin ꞌet dzulh oolatoh hooltsai.

6 ꞌEt ꞌuhooja dit whunizyat dzin (40) ꞌetsul ꞌuhooja whe Nowe dadintꞌaz ꞌi dahaꞌ idantan.7 Datsancho ꞌi yula ditni ꞌaz ndulcho ꞌawh nutꞌo za ꞌutꞌen, too gak tileh whutsꞌun.8 ꞌEt doo cha dutꞌaiyaz, ꞌimbin huyulhni, ꞌi yula ditni ꞌawet tila too yo ꞌuja ha.9 ꞌEt ndi ꞌimbin ꞌaw nootꞌah-un hooloh, ꞌet ka ndi tsꞌi cho yutsꞌun naoostꞌo, ꞌawhuz ndi yun ndulcho too hoonli. ꞌEt huwa Nowe dula be yuba tedilni ꞌinkꞌez ꞌet danainilhti.10 ꞌEt doo cha lhtakꞌantꞌi dzin ꞌet whubailhꞌeꞌ. ꞌEt doo cha ndi ꞌimbin yula ditni.11 ꞌEt hulhgha ꞌet ndi ꞌimbin whusanatꞌo ꞌinkꞌez duchun, olive hiyulhni, ootꞌan ꞌandit ha nalhyai, ꞌi ooze yudiztan. ꞌEt ꞌawet Nowe tꞌeooninzin ndi yun kꞌut ꞌawet too hooloh suliꞌ.12 ꞌEt doo cha lhtakꞌantꞌi dzin ꞌet huba ꞌilhꞌeꞌ, ꞌet doo cha ndi ꞌimbin, ꞌi yula ditni ꞌinkꞌez ꞌaw whusanalhitꞌoh.

13 ꞌEt ꞌuhooja lhkꞌu tat whunizyat yus kꞌut ꞌinkꞌez ꞌet ꞌudechoo yus kꞌut (601), ꞌinkꞌez ꞌudechoo sanun ꞌudechoo dzin sanun ꞌet yun kꞌut naoodisgih. ꞌInkꞌez Nowe ndi tsꞌi ndo yudahaꞌdantan ꞌinkꞌez whunilhꞌen ndulcho yun naoodisgih.14 ꞌEt whulh nanki sanun nat whunizyat dzin ꞌon ꞌat lhtakꞌantꞌi dzin sanun (27), ꞌet yun naoodisgih.

15 Yakꞌusda (Elohim) ꞌen Nowe yulh yailhduk ꞌuyulhni,16 “Nyoo tsꞌi tenanindaih ndai la nꞌat cha ꞌinkꞌez nyuzkehke, duꞌatke tubulh tenanuhdilh.17 Ndai la tsi bet daltsꞌiꞌ-i khuna-i ꞌusjiz-i tsꞌiyawh tenaninle, dutꞌai cha ꞌinkꞌez khuna-i ꞌinkꞌez yun nulhꞌas-i cha, ꞌet si ndi yun kꞌut lhai hooleꞌ.”

18 ꞌEt Nowe teninya ꞌinkꞌez buzke cha ooꞌat cha ꞌinkꞌez buꞌatke cha tsꞌiyawh bubulh.19 Khuna-i ndai la yun nulhꞌas-i cha, dutꞌai cha, tsꞌiyawh lhulhdidoh-i, ꞌi tsꞌiyawh ndi tsꞌi huye haindil.

Yakꞌusda (Elohim) ꞌen Nowe khuni ꞌinla20 ꞌEt Nowe ꞌen Moodihti (Yahweh) tsꞌun loodel ꞌuzdilhkꞌun kꞌut,

ꞌi ꞌinla, ꞌinkꞌez ndai la khuna-i ꞌaw lhditsun-i, ꞌinkꞌez ndai la dutꞌai ꞌaw lhditsun-i cha, ꞌohwhi ꞌi kꞌut yudalhkꞌun.

15 Genesis 8

21 ꞌEt Moodihti (Yahweh) ndi sooltsun-i yunahoolhtsun. ꞌInkꞌez Moodihti (Yahweh) didutchꞌoh dudzi yo ꞌutni, “ꞌAw ꞌon ꞌat ndi yun dune gha ꞌaw ookꞌe hoosyih aitꞌoh. Dahintꞌoh la dune budzi ntsiꞌ hintsool whutsꞌun, ꞌet hoontsꞌi ꞌaw doo cha ꞌon ꞌat khuna-i ndi yun kꞌut gak hooselh aitꞌoh. 22 Ndi yun hoonli whutoh ꞌaꞌ nukat-un ꞌinkꞌez haꞌ nukat-un,

whuzkꞌuz ꞌinkꞌez whunulwus-un cha,khit cha ꞌinkꞌez shin cha.ꞌInkꞌez dzenis cha ꞌinkꞌez ꞌulhdzis cha hoonli-un,ꞌaw ꞌetsul lheꞌwhutasnel.”

9 1 ꞌEt Yakꞌusda (Elohim) ꞌen Nowe ꞌinkꞌez ooyeꞌke tucha tsꞌiyawh soo hoonzoo-un hubúlhni whe ꞌubulhni, “Lhane cho ooleꞌ ndi yun

doolhbun hubulhni.2 Ndi yun kꞌut khuna-i tsꞌiyai huye ntiljut, dutꞌai cha ndi yun nuhutnah-i ꞌinkꞌez lho cha tsꞌiyawh nohla kꞌez be huwantꞌai.3 Dantꞌi tsꞌiyawh ꞌusjiz ꞌi nukhutnah, ꞌi ꞌutꞌalh-i nohba ooleꞌ. ꞌEt ndai tsꞌiyawh nohgha nusla, ꞌutꞌan ha nuyeh tsꞌuꞌalh-i hoontsꞌi.

4 ꞌEt hoontsꞌi ndi khuna-i ꞌawhuz buzkaiꞌ be khuna bulh ꞌuntꞌoh, ꞌi ꞌaw lhuzonꞌal. Ndi ‘be khutna’, ꞌi buzkaiꞌ ꞌuntꞌoh ni whe ꞌutni.5 ꞌAlha dune nyuzkaiꞌ ha whulhtsi de sbut hutiyin wheꞌ hoontꞌoh. Khuna-i dune silhghi ꞌi hoontsꞌi whuz unꞌa za ꞌuhoontꞌoh. Dune ꞌuyoon dune silhghi-un mbe ꞌuja-un buzkaiꞌ ookaꞌ nuszun. 6 Mbe dune ꞌuyoon buzkaiꞌ whulhtsi-un,

ꞌuyoon dune ndun dune ꞌuja-un yuzkaiꞌ whutilhtselh wheꞌ hoontꞌoh,

Yakꞌusda (Elohim) dune yulh ndultꞌoh yulhtsi ꞌet huwa.7 ꞌInkꞌez nohni, lhane cho nohuzkeh ooleꞌ. Lhanꞌun cho ndi yun kꞌut

whutꞌenne lhane cho nohhuzkeꞌ hooleꞌ.”8 ꞌEt Yakꞌusda (Elohim) Nowe ꞌinkꞌez ooyeꞌke te ꞌenne ꞌubulhni,

9 “ꞌEt si whunulhꞌen sghuni ꞌi bulh ꞌi nohbulh lhadusla. Mbene la nohtsꞌu haindene nohkꞌelhꞌaz ꞌenne cha.10 ꞌInkꞌez khuna-i tsꞌiyawh nohbulh ꞌuntꞌoh-i, dutꞌai cha, musdoos cha, ꞌinkꞌez khuna-i tsꞌiyawh ndi yun kꞌut hoonli-i nohbulh ꞌuntꞌoh-i, ꞌi tsꞌiyawh tsꞌi cho be nohbulh dehailhꞌaz, yun kꞌut khuna-i tsꞌiyawh.11 Whuz unꞌa sghuni ꞌi bulh ꞌi nohbulh lhadusla. ꞌAw doo cha za ndi yun kꞌut ndai la khuna-i tsꞌiyawh ꞌusjiz-i, tsꞌiyawh ꞌaw too be ꞌaw huboosghan aitꞌoh. ꞌAw doo cha za dutadiltꞌo whe ndi yun gak ooselh aitꞌoh.”

12 ꞌInkꞌez Yakꞌusda (Elohim) ꞌutni, “Njan ꞌet si whehoodalhꞌeh khuni nohtsꞌun lhadusla-i, si ꞌinkꞌez nohni nohbulh, ndai ndi yun kꞌut ꞌusjiz-i hoonli-i tsꞌiyawh ꞌilhiz wheni khuni ꞌuntꞌoh.

Genesis 8 , 9 16

13 Ditni naꞌanguz kwꞌus toh ꞌi ꞌusla. ꞌI gha whe hoodatꞌen tileh si ꞌinkꞌez ndi yun kꞌut-i bulh khuna-i ꞌusla-i.14 ꞌEt ꞌuhotꞌeꞌ, ndet yun kꞌut, kwꞌus whulhlih teh, ꞌet ditni naꞌanguz ꞌi tsꞌunoolhꞌen kwꞌus toh ꞌet.15 Ndai la nohni cha ꞌinkꞌez khuna-i cha tsꞌiyawh ꞌi oonatiznih khuni nohtsꞌun lhadusla-i, tsꞌiyawh ꞌaw doo cha ꞌon ꞌat too ndo ha tadiltꞌo, yun kꞌut hoonli-i gak ooselh aitꞌoh.16 Ditni kwun ꞌi kwꞌus toh hoonli de ꞌi nusꞌen de ꞌet whunatiznih, ꞌilhiz wheni ndi khuni Yakꞌusda (Elohim) ꞌinkꞌez ndi yun kꞌut hoonli-i ꞌusjiz-i tsꞌiyawh khuni nohba lhadúsla, oonatiznih.”

17 ꞌEt Yakꞌusda (Elohim) Nowe ꞌulhni, “Njan whe hoodatꞌen-un ꞌuhoontꞌoh, ꞌuwhusla-un, njan khuni nohba lhadúsla ꞌuhoontꞌoh, Si ꞌinkꞌez ndi yun kꞌut hoonli tsꞌiyawh ꞌusjiz-i bulh lheto khuni.”

Nowe ꞌinkꞌez buyeꞌke ꞌen hubulh dahooja18 ꞌAndit ꞌet Nowe ooyeꞌke ꞌen ndi tsꞌi cho be ha handil, ꞌen Shem,

Ham, ꞌinkꞌez Japheth. ꞌInkꞌez Ham, ꞌen Canaan be oobá ꞌuntꞌoh.19 Ndunne tane ꞌenne Nowe ooyeꞌke hinle, ꞌenne butsꞌu haidune. ꞌEnne bugha ndi yun kꞌut whudizbun.

20 ꞌInkꞌez Nowe ha nuyeh-i ghana-un suliꞌ, duchun oomaiꞌ hoonli-i ꞌet ꞌuhoonla.21 ꞌEt ndi tsꞌekoo tooꞌ ꞌuyinla-i yitnaiꞌ whe tanisnaiꞌ ꞌinkꞌez ookꞌeꞌtizkat nimbali tꞌah.22 ꞌEt Ham Canaan oobá ꞌen dubá ye ꞌustꞌet yanꞌen ꞌinkꞌez nane dulhusinke ꞌenne budaniꞌ ꞌaz.23 ꞌEt Shem ꞌinkꞌez Japheth bulh naih hilhchoot ꞌinkꞌez dutꞌa tsꞌe kꞌe huyilhbal duwus kꞌut ꞌinkꞌez kꞌoh unꞌa hiꞌus whe dubá hikꞌe huyinꞌoh ꞌaw dubá lhuhinilhꞌel, ye ꞌustꞌet lhuhuyiꞌel.

24 ꞌEt Nowe tsꞌekoo tooꞌ ꞌutnaiꞌ whe tsꞌe ninzut, ꞌudekꞌoh-un duyeꞌ ꞌen dadudinla la ꞌet tꞌeoonanzin.25 ꞌInkꞌez ꞌutni,

“Canaan ookꞌe hidih.Dune ba ꞌutꞌen-un ꞌenne bubaꞌ titꞌelh ꞌet la dudulhutsinke cha

bubaꞌ titelh.”26 ꞌInkꞌez ꞌutni,

“Moodihti (Yahweh) soo hoonzoo-un unli.Shem ooYakꞌusda (Elohim) ꞌuntꞌoh. ꞌInkꞌez Canaan yunat

neꞌutꞌen-un ooleꞌ. 27 Yakꞌusda (Elohim) Japheth ncha yoolhtselh,

Shem oonimbali tꞌah ꞌoh hootꞌeꞌ,

17 Genesis 9

ꞌinkꞌez Canaan yunat neꞌootꞌen.”28 ꞌInkꞌez Nowe butadiltꞌo hukwꞌelhꞌaz ꞌet whunizyat tat whunizyat

ꞌinkꞌez kwulat whunizyat yus kꞌut (350) ꞌet nakhitnaꞌ.29 ꞌEt Nowe ꞌalhgoh ndi yun kꞌut ꞌindaꞌ-un whunizyat ꞌilho hooloh whunizyat ꞌinkꞌez kwulat whunizyai yus kꞌut (950) whe dazsai.

Nowe tsꞌu haindene

10 1 Ndunne ꞌenne Nowe ooyeꞌke tsꞌu haindene Shem, Ham ꞌinkꞌez Japheth, tsꞌiyawh buyeꞌke whuzdliꞌ dutadiltꞌo hukwꞌelhꞌaz.

2 Japheth buzkeh dunene,Gomer, Magog, Madai, Javan, Tubal, Meshech ꞌinkꞌez Tiras.

3 Gomaer buzkeh dunene,Ashkenaz, Riphath, ꞌinkꞌez Togarmah.

4 Javan buzkeh dunene,Elishah, Tarshish, Kittim, ꞌinkꞌez Dodanim.

5 Ndunne ꞌenne yatoo ba ꞌudun keyoh whutꞌenne buchꞌoh nehunindil didutchꞌoh duyun mbene la ꞌilho khuni be za yalhdukne ꞌinkꞌez dahintꞌoh la lhelhdoh hudidoh ꞌenne ꞌoh huwhutꞌi. 6 Ham buzkeh ꞌenne dunene,

Cush, Misraim, Put, ꞌinkꞌez Canaan ꞌuhantꞌe. 7 Cush buzkeh ꞌenne dunene,

Seba, Havilah, Sabtah, Raamah, ꞌinkꞌez Sabtechah.Raamah buzkeh ꞌenne dunene,

Sheba ꞌinkꞌez Dedan ꞌuhantꞌe.8 Cush ꞌen Nimrod ooyeꞌ suliꞌ, ꞌinkꞌez Nimrod tube ulhtus ndi yun

kꞌut neninya.9 ꞌEn ꞌuntꞌoh Moodihti (Yahweh) bunalh soo tube cho ꞌukaꞌ ꞌutꞌen-un unli. ꞌEt huwa ꞌuwhutni, “Nimrod kꞌunꞌa Moodihti (Yahweh) bunalh soo tube cho ꞌukaꞌ ꞌutꞌen-un unli.”10 ꞌUdechoo whulerwe suliꞌ-un, ꞌen Babel, Erech, Accad ꞌinkꞌez Calneh, Shinar yun kꞌut.11 ꞌEt yun whutsꞌun Assyria ꞌinkꞌez Nineveh huwhutni-un ꞌet cha ꞌuhoonla, Rehoboth Ir ꞌinkꞌez Calah.12 ꞌInkꞌez Resen, Nineveh ꞌinkꞌez Calah whulheguz, ꞌet ꞌudechoo keyoh whuti. 13 Mizraim buyeꞌke, ꞌenne Lud whutꞌenne, Anam whutꞌenne, Lehob

whutꞌenne, Naphtu whutꞌenne, 14 Pathrus whutꞌenne, ꞌinkꞌez Casluh whutꞌenne, ꞌenne Philistinene

ꞌinkꞌez Caphtor whutꞌenne ha hande. 15 Canaan ꞌen Sidon, ꞌudechoo ooyeꞌ yuzdliꞌ, ꞌinkꞌez Heth;

Genesis 9 , 10 18

16 Jebus whutꞌenne, Armor whutꞌenne, ꞌinkꞌez Girgash whutꞌenne cha, 17 ndunne Hiv whutꞌenne, Ark whutꞌenne, ꞌinkꞌez Sin whutꞌenne cha, 18 ndunne Arvad whutꞌenne, Zemar whutꞌenne, ꞌinkꞌez Hanath

whutꞌenne cha. ꞌEt hukwꞌelhꞌaz Canaan tsꞌu haindene ꞌenne lhelhtsꞌun yahandil.

19 Canaan whutꞌenne whukeyoh whuban ꞌet Sidam, Girard tsꞌu wheti-un Gaza ꞌuwhuldzoh, Sodom tsꞌu wheti-un Gomorrah, Admah, Zeboim, Lasha tsꞌe ꞌuwhuldzoh.

20 Ndunne, ꞌenne Ham ooyeꞌke tsꞌu haindene cha ꞌilho khuni be yahulhduk ꞌinkꞌez duyun ꞌinkꞌez ꞌilhoh hudidoh.

21 Shem ꞌen cha oobuzkeh whuzdliꞌ, Eber buzkeh, ꞌen ooba. Bulhutsin Japheth ꞌudetso whudilhdzulh-un. 22 Shem ooyeꞌke,

ꞌenne Elam, Assur, Arphaxad, Lud, ꞌinkꞌez Aram. 23 Aram ooyeꞌke,

ꞌenne Uz, Hul, Gether, ꞌinkꞌez Mash. 24 Arphaxad ꞌen Shelah ooyeꞌ ꞌuntꞌoh,

ꞌinkꞌez Shelah ꞌen ooyeꞌ Eber ꞌuntꞌoh. 25 Eber ooyeꞌke nane hinli.

ꞌIlhoghun boozi ꞌen Peleg. ꞌEn khuna daꞌ ndi yun kꞌut lhtsꞌe hooltsꞌut ꞌet huwa. ꞌInkꞌez bulhutsin, ꞌen Joktan tsꞌutni.

26 Joktan ooyeꞌke ꞌenne Almodad,Sheleph, Hazarmaveth, Jerah,

27 Hadoram, Uzal, Diklah, 28 Obal, Abimael, Sheba, 29 Ophir, Havilah, ꞌinkꞌez Jobab. ꞌEn tsꞌiyawh Joktan ooyeꞌke

ꞌuhintꞌoh.30 Ndet la huwhutꞌi-un, Mesha, Sephar tsꞌu wheti-un ndaꞌ dzulh

hoonli ꞌet huwhutꞌi.31 ꞌEnne Shem ooyeꞌke tsꞌu haindene cha, ꞌilho khuni yahulhduk.

ꞌIlho hudidoh whe ꞌilhoh huwhutꞌi.32 Ndunne ꞌenne Nowe ooyeꞌke tsꞌu haindene ꞌenne tsꞌiyawh lhkꞌe

hidil ndi yun kꞌut too whuzdliꞌ hukwꞌelhꞌaz. ꞌInkꞌez ꞌilhoh huwhutꞌi ndi yun kꞌut lhelhdoh ꞌuhoontꞌoh.

Babel whunedanꞌa

11 1 Ndi yun kꞌut ꞌoh daꞌ ꞌilho khuni za hoonli tsꞌiyanne lhkꞌunꞌa yahulhduk.

2 ꞌEt ꞌuhooja ndaꞌ ndaz de hutizdil whe yun, Shiner huyulhni, ꞌi hikꞌe indil ꞌet ꞌuhoontꞌoh duchun hooloh-un nahuhoonꞌai ꞌet nehunina.

19 Genesis 10 , 11

3 ꞌEt lhgha ꞌuhudutni, “ꞌAnih, tse tlꞌus ꞌi ꞌutsꞌooleh, ꞌinkꞌez soo cho whe tsꞌoolhtꞌes.” Tse tlꞌus ꞌi tse ba huyutꞌi ꞌinkꞌez be tsꞌuwhudzeh, ꞌi hiye whutlꞌus ba.4 ꞌEt ꞌuhutni, “ꞌAnih njan keyoh whuti ꞌutsꞌodoolneh ꞌinkꞌez ndo yakꞌuz nainꞌa-i nyiz-i cho ꞌi ꞌutsꞌooleh. ꞌEt wheni si neooziꞌ hoonli holeꞌ, ndi ꞌutsꞌinla da, doo ka si ndulcho whe ndi yun kꞌut yatsꞌodilh.”

5 ꞌEt whe Moodihti (Yahweh) ndus de hainya ꞌinkꞌez nyo keyoh whunilhꞌen ꞌinkꞌez nyoo nainꞌa-i cho yoh huyulhtsi, ꞌi cha ꞌuhuyinla-i yunalhꞌen.6 ꞌEt Moodihti (Yahweh) ꞌutni, “A ꞌilhune za hinli dune ꞌinkꞌez lhkꞌunꞌa za yahulhduk. ꞌEt njan ꞌet ꞌazi wheꞌ honilhꞌen ndai la ꞌuhitilelh hukwaꞌ huninzun-un tsꞌiyawh si ꞌuhuhooleh.7 ꞌAnih butsꞌun tsꞌutoodilh, ꞌinkꞌez bughuni ꞌi buchꞌa lhtatsꞌuholelh. ꞌEt si lhulh hoodostsꞌo.”

8 ꞌEt whe Moodihti (Yahweh) lhchꞌa buninla, ꞌinkꞌez njan yun kꞌut ndulhcho nehunindil. ꞌEt whe dune whutꞌi whucho nehoninꞌai ꞌet ꞌetsul ꞌuhuja.9 ꞌEt huwa nyo nainꞌa-i cho, ꞌi Babal huyulhni, ndai la huye yalhduk-i cha tsꞌiyawh Moodihti (Yahweh) lhelhtsꞌun unꞌa yahulhduk hubulhtsi ꞌinkꞌez ndulcho yahandil.

Shem tsꞌu haindene10 Shem huyulhni-un, ꞌen ootsꞌu ha yandene ndi ꞌi ꞌuntꞌoh:

whunizyat whunizyai ꞌet be yus kꞌut (100) whe ooyeꞌ Arphaxad huyulhni, ꞌen ooyeꞌ suliꞌ dutadiltꞌo hukwꞌelhꞌaz nat yus kꞌut ꞌet whuzdliꞌ.

11 Arphaxad ookꞌelhꞌaz whuzdli-un ꞌet Shem 500 yus kꞌut ꞌet nahidaꞌ whe ꞌet ooyeꞌke cha ꞌinkꞌez ootseꞌke cha nahodleꞌ.

12 Arphaxad ꞌen tat whunizyai ꞌon ꞌat kwulat be yus kꞌut whe ꞌet Shelah huyulhni, ꞌen ooyaz suliꞌ.13 Shelah whuzdli hukwꞌelhꞌaz Arphaxad 403 be yus kꞌut whe dune cha ꞌinkꞌez tsꞌekoo cha ꞌenne buzkeh nasdliꞌ.

14 Shelah ꞌen tat whunizyat be yus kꞌut (30) whe ꞌet ooyeꞌ, Eber huyulhni, ꞌen ooyeꞌ suliꞌ.15 Eber hukwꞌelhꞌaz ꞌet Shelah 403 yus kꞌut whe ꞌet ꞌuyoonne dune cha ꞌinkꞌez tsꞌekoo cha buzkeh nasdliꞌ.

16 Eber tat whunizyat ꞌon ꞌat dit be yus kꞌut (34) whe ꞌet Peleg huyulhni, ꞌen ooyeꞌ suliꞌ.17 ꞌEt Peleg ookꞌelhꞌaz ꞌet Eber 430 yus kꞌut ꞌuyoonne dune cha, tsꞌekoo cha buzkeh nasdliꞌ.

Genesis 11 20

18 Peleg tat whunizyat be yus kꞌut (30) whe ꞌet Reu huyulhni ꞌen ooyeꞌ suliꞌ.19 Reu whuzdli hukwꞌelhꞌaz whe ꞌet Peleg nat whunizyat nat ꞌinkꞌez ꞌilho hooloh be yus kꞌut (209) whe ꞌet ꞌuyoonne dune cha ꞌinkꞌez tsꞌekoo cha nawhusdliꞌ.

20 Reu tat whunizyat ꞌon ꞌat nat be yus kꞌut (32) whe ꞌet ooyeꞌ, Serug huyulhni, ꞌen ooyeꞌ suliꞌ.21 Serug whuzdli hukwꞌelhꞌaz Reu 207 be yus kꞌut whe ꞌet ꞌuyoonne, dune cha tsꞌekoo cha buzkeh nawhusdliꞌ.

22 Serug tat whunizyat be yus kꞌut (32) whe ꞌet Nahor huyulhni-un, ꞌen ooyeꞌ suliꞌ.23 Nahor whuzdli hukwꞌelhꞌaz Serug 200 be yus kꞌut ꞌet ꞌuyoonne dune cha ootseꞌke cha nawhusdliꞌ.

24 Nahor nat whunizyat ꞌon ꞌat ꞌilho hooloh be yus kꞌut (29) whe ꞌet Terah huyulhni-un ꞌen ooyeꞌ suliꞌ.25 Terah hukwꞌelhꞌaz, Nahor 119 be yus kꞌut ooyeꞌke ꞌinkꞌez ootseꞌke cha nawhuzdliꞌ.

26 ꞌEt Terah lhtakꞌantꞌit whunizyat be yus kꞌut (75) whe ꞌet Abram huyulhni-un, Nahor ꞌinkꞌez Haran ꞌenne buzkeh suliꞌ.

Terah tsꞌu haindene27 ꞌEt Terah tsꞌu haindene: ꞌenne Abram, Nahor ꞌinkꞌez Haran.

Haran ꞌen Lot ooyeꞌ suliꞌ.28 ꞌInkꞌez Haran ꞌen dubá yutso dazsai, didutchꞌoh dukeyoh ꞌet

Chaldeanne bukeyoh ꞌet.29 ꞌEt Abram ꞌinkꞌez Nahor bulh buꞌat whuzdliꞌ. Abram ooꞌat, ꞌen Sarai huyulhni, ꞌinkꞌez Nahor ooꞌat, ꞌen Milcah huyulhni, Haran ootseꞌ, Milcah oobá ꞌinkꞌez Iscah oobá.30 ꞌEt Sarai ꞌen oochan danáwhudiltsꞌut, oobuzkeh hooloh.

31 ꞌInkꞌez Terah duyeꞌ Abraham, duchai Lot te, Haran ooyeꞌ ꞌinkꞌez duyasꞌat, Sarai duyeꞌ, Abram ooꞌat cha. Ur, Chaldean bukeyoh, ꞌet Canaan tsꞌe whehandil, keyoh Haran highu nindil ꞌinkꞌez ꞌet huhootꞌeꞌ.

32 ꞌEt whe Terah oodzin ꞌet 205 be yus kꞌut yinka indaꞌ, ꞌinkꞌez Terah ꞌen Haran keyoh tsꞌuwhutni, ꞌet dazsai.

Abram ooba hoonzoo ooleꞌ la

12 1 ꞌEt Moodihti (Yahweh) Abram ꞌulhni, “Nkeyoh cha whuchꞌa sinyaiꞌ, nyunatneke cha whuchꞌa sinyaiꞌ, ꞌinkꞌez mbá ooyoh cha

teninyaiꞌ, ꞌinkꞌez yun whununtistun-un hoonli. 2 Tube didoh-un ncha-un nyutiselh,

21 Genesis 11 , 12

soo hoonzoo-un ntsꞌun tiszooꞌ ꞌinkꞌez nyooziꞌ cha ncha tiselh.ꞌInkꞌez ꞌuyoonne ba soo hoonzoo-un bugha hóotaltsꞌulh ꞌintꞌoh

nyutiselh. 3 Mbene la mba soo hoonzoo-un ngha hóotaltsꞌulh,

ꞌenne cha soo hoonzoo-un bugha hóotaltsꞌulh,ꞌinkꞌez mbe la nkꞌe hiyihne cha bukꞌe hutisyih,

ndi yun kꞌut dilhtsꞌine ꞌenne tsꞌiyawh nyun ngha soo hoonzoo-un bugha hóotaltsꞌulh.”

4 ꞌEt Abram Moodihti (Yahweh) daja la ꞌet nduja whe tizya Lot ꞌen yulh tizꞌaz ꞌinkꞌez Abram ꞌen lhtakꞌantꞌit whunizyat ꞌon ꞌat kwulat be yus kꞌut (75) whe ꞌet njan Haran huwu tizya.5 ꞌEt Abram duꞌat yilhchoot ꞌinkꞌez Lot ooꞌat cha hubilhchoot ꞌinkꞌez ndai la huyutꞌi-i cha tsꞌiyawh nahuyalhdzoo ꞌinkꞌez mbe la dune bugha nindene ꞌenne cha Haran, Canaan tsꞌe yun kꞌuz whehandil ꞌinkꞌez Canaan nehunindil.

6 Abram ꞌoh whuya keyoh lhusuya ꞌinkꞌez keyoh Shechem huwhutni-un Moreh duchun Terabim huyulhni, ꞌi nadanꞌa ꞌet whutsꞌun ꞌinkꞌez Canaan whutꞌenne ꞌenne nyo yun kꞌut hudilhtsꞌi.7 ꞌEt Moodihti (Yahweh) Abram yunalhtsꞌet hainya ꞌinkꞌez ꞌuyulhni, “Mbene la ntsꞌu haindene ꞌenne ndi yun bugha ítasꞌalh.” ꞌEt Moodihti (Yahweh) yunalhtsꞌet hainya-un ꞌen yutsꞌun loodel ꞌinla.

8 ꞌEt whutsꞌun Bethel huwhutni-un dzulh hoonli ꞌon daꞌ whuz wheinya, ꞌet nimbali neninꞌai ba nooꞌ ꞌet. Bethel ꞌinkꞌez ꞌon daꞌ ꞌet Ai ꞌet loodel neninꞌai. Moodiht (Yahweh) tsꞌun ꞌinkꞌez Moodihti (Yahweh) yooziꞌ ꞌi yukaꞌ daniꞌ.9 Abram ꞌet nyan za Negev lhoyalh.

10 ꞌEt ꞌuhooja nyo keyoh dai whuzdliꞌ ꞌinka Abram Egypt tsꞌe wheinya tube dai whuzdliꞌ ꞌet huwa.11 ꞌEt ꞌuhooja ꞌawet Egypt wheinghoh whe duꞌat Sarai ꞌuyulhni, “Tꞌeoonuszun tube tsꞌeke ꞌinzooꞌ whe ꞌintꞌoh.12 ꞌEt huwa ꞌet la ꞌuhoneh Egypt nenitꞌaz de nyo nilhꞌen whe ꞌet la ꞌuhudooniꞌ, ‘Ndun ooꞌat ꞌuntꞌoh,’ ꞌinkꞌez la sozoolhghelh nyun ꞌaw nyozoolhghelh aitꞌoh.13 ꞌEt soo cho ꞌudoniꞌ ndun ꞌen sulhutsin ꞌuntꞌoh ꞌet de la soo oostꞌeꞌ nyun gha. ꞌInkꞌez la nyulh khoosnaꞌ.”

14 ꞌEt Abram Egypt neninya whe nyoonne Egypt whutꞌenne tsꞌeke hitilhꞌen whe tube tsꞌekezooꞌ.15 Lerwe ooyeꞌke Pharaoh ꞌenne cha hinilhꞌen ꞌinkꞌez dubá ꞌen hidaniꞌ, “Ndun ꞌen tube tsꞌekezooꞌ,” ꞌinkꞌez nyoon tsꞌeke ꞌen Pharaoh ooyoh tsꞌe huyoolhti.

Genesis 12 22

16 Abram soo cho neꞌhuyulhꞌen nyoon ooꞌat ꞌen gha. ꞌUsbai cha musdoos dune cha donkey huyulhni, dune cha, tsꞌekoo ꞌinkꞌez dune cha hinat neꞌutꞌenne. Donkey tsꞌekoo cha ꞌinkꞌez camel huyulhni, ꞌi higha hininla.

17 ꞌEt hoontsꞌi Pharaoh tube dada untsiꞌ-i Pharaoh ooyoh cha ꞌet dinzut whulhtsi Sarai, Abram ooꞌat, ꞌen gha.18 ꞌEt Pharaoh Abram ꞌanih yudaniꞌ, “Dane ꞌinla whe neꞌinla? ꞌEt di ha lhunedinelh, ndun tsꞌeke nꞌat ꞌuntꞌoh?19 ꞌEt di ha ꞌuneꞌdini, ‘Ndun sulhtus ꞌuntꞌoh?’ Nedini sꞌat eni daꞌ ꞌoschoot ooleꞌ. ꞌEt huwa ndun nꞌat nailhchoot ꞌinkꞌez ntsꞌe tanyalh tsꞌe inyalh.”20 ꞌEt Pharaoh duduneꞌne ꞌubulhni ꞌinka whenahuyalhꞌaꞌ ooꞌat cha ꞌinkꞌez ndai tsꞌiyawh yutꞌi cha.

Abram ꞌinkꞌez Lot ꞌet lhchꞌa hustꞌaz

13 1 ꞌEt Abram Egypt whuchꞌa huzdil, ooꞌat cha ꞌinkꞌez Lot cha bubulh tizꞌaz whe tsꞌiyawh huyutꞌi-i tubulh ndaꞌ hutizdil.

2 Abram tube hoonzooꞌ ꞌuntꞌoh, khuna-i cha lhai yutꞌi ꞌinkꞌez silver ꞌinkꞌez gold tubulh lhai yutꞌi.

3 ꞌEt hutizdil Bethel whutsꞌun hutizdil ndet daꞌ ꞌudaꞌ nimbali neninꞌai inleꞌ ꞌet ꞌudechoo whutsꞌun Bethel ꞌinkꞌez Ai whulhetoh whuz hoozdil.4 ꞌUdechoo loodel neninꞌai inleꞌ ꞌet whutsꞌun ꞌet whuz hoozdil. ꞌEt Abram Moodihti (Yahweh) yutsꞌun tenadidli.

5 Lot ꞌen cha Abram bubulh tizya, khuna-i cha, musdoos cha, ꞌinkꞌez nimbali cha, lhai cha ꞌutꞌi.6 Ndi yun ꞌaw soo lheꞌilcho hikꞌoh hutinalh huba ꞌaw lhzih huhootꞌeꞌ aitꞌoh, tube lhai hoonli tsꞌiyai hutꞌi kꞌet.7 ꞌEt Abram bughunaiꞌ ghunline ꞌinkꞌez Lot bughunaiꞌ ghunline ꞌenne ꞌaw ꞌulhuholdzin aitꞌoh. ꞌOh daꞌ ndunne Canaan whutꞌenne ꞌinkꞌez Periz whutꞌenne, ꞌenne cha njan yun kꞌut huwhutꞌi.

8 ꞌEt Abram, Lot yulhni, “ꞌAw hoonli huwun nyun ꞌinkꞌez si bulh lhdulhyoh ꞌudotniꞌ aitꞌoh. ꞌInkꞌez si skhunai-i ghunline, ꞌinkꞌez nyun nghunai-i ghunline, lhulh dulhyoh hudotni aitꞌoh. Lhulhlhutsinke tsinli ꞌet huwa.9 Nyoo yun lheꞌulcho-i nilhꞌen. Schꞌa sinyaiꞌ ꞌintlꞌus tsꞌe whuz inyalh ꞌinkꞌez si cha nailhni tsꞌe toosyaꞌ, kꞌus nyun nailhni tsꞌe inyalh ꞌinkꞌez si ꞌintlꞌus tsꞌe si toosyaꞌ.”

10 ꞌEt Lot whunilhꞌen Jordon keyoh duchun hooloh-un tsꞌiyawh yunilhꞌen. Too cha lhai wheꞌ hoontꞌoh, (Moodihti (Yahweh) Sodom ꞌinkꞌez Gomorrah bulh gak whutilhtselh whutsꞌo), Moodihti (Yahweh)

23 Genesis 12 , 13

ha nuyeh kꞌet ꞌet nduhoontꞌoh inleꞌ, Egypt dahoontꞌoh la Zoar tsꞌu wheti tsꞌe, ꞌet nduhoontꞌoh.11 ꞌEt Lot nyo yun kꞌut Jordan whunat tsꞌiyawh ꞌet ꞌutahaooditꞌai, ꞌinkꞌez ndaꞌ wheinya ꞌet ꞌinkꞌez ꞌet lhchꞌa hustꞌaz.12 Abram ꞌen Canaan keyoh ꞌet nenina ꞌinkꞌez Lot ꞌen keyoh whuti duchun hooloh-un ꞌinkꞌez ꞌet nimbali neninꞌai Sodom whutsꞌun.13 ꞌEt hoontsꞌi nyoonne Sodom dunene tubeh hintsiꞌ, ꞌinkꞌez Moodihti (Yahweh) chꞌaz lubeshi ꞌuhulhꞌen.

Genesis 13 24

(13:1)© 1996 David C. Cook

14 ꞌEt Moodihti (Yahweh) ꞌen Abram ꞌuyulhni Lot bulh lhchꞌa hustꞌaz hukwꞌelhꞌaz whe, “Whunilhꞌen ndet sinyin ꞌet whutsꞌun whunilhꞌen, no cha, nyan cha, ndaꞌ cha, ꞌinkꞌez nooꞌ cha.15 Ndai la yun nilhꞌen-i ꞌilhiz wheni tsꞌiyawh ntsꞌu haindene tubulh ꞌi nohgha nusꞌai.16 ꞌInkꞌez ntsꞌu ha hande ꞌenne yun kꞌut lhez kꞌunꞌa butiselh. ꞌEt whe dune yun kꞌut lhez hodutilhto de, ꞌet si ntsꞌu haindene ꞌenne cha si bulh olto.17 Dudinyaih ꞌinkꞌez yun kꞌinyaih inyalh, dawhulhyiz la ꞌinkꞌez dawhulhtel la ndi yun ꞌi ngha tisꞌalh ꞌet huwa.”

18 ꞌEt Abram dunimbali nanayanꞌai ꞌinkꞌez ndun Mamre ooduchun, Terebinth huyulhni, ꞌet nenina. Keyoh Hebron ꞌuhoontꞌoh ꞌinkꞌez ꞌet loodel ꞌinla Yakꞌusda tsꞌun.

Lot huyilhchoot

14 1 ꞌEt ꞌuhooja Amraphel huyulhni, yun kꞌut Shinar whulerwe Arioch, keyoh Ellasar whulerwe, Chedorlaomer, yun kꞌut Elam

whulerwe ꞌinkꞌez Tidal Goiim whutꞌenne whulerwe.2 Bera huyulhni, Sodom whulerwe, Birsha huyulhni Gomorrah whulerwe, Shinab Admah whulerwe, Shemeber Zeboiim whulerwe, ꞌinkꞌez Bela whulerwe, ꞌenne bubulh lhuwhehunigan.3 Ndunne tsꞌiyawh lhtsꞌu nehudindil ꞌinkꞌez Siddim wheguz (ꞌet ꞌuhoontꞌoh, lisel yatooꞌ).4 Whunizyat ꞌon ꞌat nat yus kꞌut (12) ꞌet ndun Chedorlaomer huyulhni ꞌen baꞌ hitꞌen ꞌinkꞌez whulh whinizyat ꞌon ꞌat tat yus kꞌut (13) ꞌet hichꞌaz nedindil.

5 Whulh whunizyat ꞌon ꞌat dunghi be yus kꞌut (14) whe Chedorlaomer ꞌinkꞌez nyoonne lerwe yulh ꞌutꞌenne, ꞌenne hubulh whelhonigan, nyoonne Reph whutꞌenne, keyoh Ashteroth-Karnaim hudilhtsꞌi, ꞌinkꞌez nyoonne Zuz whutꞌenne, ndunne keyoh Ham hudilhtsꞌi, ꞌinkꞌez nyoonne Em whutꞌenne, ꞌenne keyoh Shaveh Kiriathaim hudilhtsꞌi,6 ꞌinkꞌez ndunne Hor whutꞌenne, ꞌenne dudzulh kꞌut dzulh Seir ꞌet El Paran whutsꞌun ꞌuhoolhdzoh, chuntoh ꞌuhoontꞌoh whenghoh ꞌet whutsꞌun.7 ꞌEt lhtꞌanahunisdil ꞌinkꞌez keyoh Mishpat (Kadesh ꞌuhoontꞌoh) whuz hutizdil Amalek whutꞌenne bukeyoh ꞌinkꞌez Amor whutꞌenne bukeyoh ꞌenne Hazazon Tamar huwhutꞌen, ꞌenne bubulh whelhonigan.

8 ꞌInkꞌez Sodom whulerwe, Gomorrah whulerwe, Admah whulerwe ꞌinkꞌez Zeboi whulerwe ꞌinkꞌez Bela whulerwe, Zoar huwhutni ꞌenne

25 Genesis 13 , 14

c 14:18 Ndi booziꞌ El Elyon, ꞌi “Yakꞌusda Soo ꞌUkꞌenus Diztiꞌ unli,” ni whe ꞌutni. 1 Ti 6:15 ꞌEt Sizi Gri huwun ndutni, “…NeMoodihti ꞌen za kꞌuneꞌ ꞌutꞌen-un unli. Lerwene tsꞌiyawh bulerwene unli. ꞌInkꞌez moodihne cha tsꞌiyawh buMoodihti unli.”

tsꞌiyawh lhtsꞌu nehudindil ꞌinkꞌez Sidom dzulh eguz whuzꞌai-un ꞌet whelhonigan.9 ꞌEt Chedorlaomer, Elam whulerwe, Tidal, ꞌudun keyoh whutꞌenne bulerwe, Amraphel, Shinar whulerwe, ꞌinkꞌez Arioch, Ellasar whulerwe, dine lerwe ꞌenne kwulane lerwe buchꞌaz nehudindil.10 ꞌEt njan Sidom dzulh eguz whuzꞌai-un, asphalt huyulhni, lhai ꞌoh duntꞌi ꞌinkꞌez Sodom whulerwe ꞌinkꞌez Gomorrah whulerwe bulh whe tse halhdil. Whulohne ꞌet yahadla, ꞌet mbene la lhchꞌu tizkatne ꞌenne ndo dzulh tuz whe tse halhdil.11 ꞌEt ndunne dine lerwene, ꞌenne Sodom ꞌinkꞌez Gomorrah keyoh whuchꞌeꞌ tsꞌiyawh huyilhchoot, ndai la hikꞌu huna-i cha ꞌinkꞌez whe nahidil.12 Lot ꞌen cha huyilhchoot, Abram bulhutsin ooyeꞌ ꞌuntꞌoh. Sodom ꞌet whutꞌi, ndai la yutꞌi-i cha ꞌinkꞌez tsꞌiyawh hiyulh whenadil.

13 ꞌEt ꞌilhoghun nintanalgai-un whe Abram, Hebrew whutꞌen-un, ghu ninya ꞌinkꞌez yulhni. Abram ꞌen njan duchun, oak hiyulhni, ꞌet whutꞌi. Ndi duchun ꞌi ndun Amor whutꞌen, Mamre ꞌintꞌoh, ꞌen ye ꞌuntꞌoh-i ꞌuntꞌoh. Boono Eshcol ꞌinkꞌez boono Aner ꞌen, Abram hitsꞌu dutni ꞌuhintꞌoh.14 ꞌEt Abram bulhutsin Lot huyulhna huyulhni whe duduneꞌne 318 ꞌenne hodilꞌeꞌne yuba ꞌutꞌenne, Abram hiyoh whuzdline, ꞌenne buba untizyoot keyoh Dan whutsꞌun.15 ꞌEnne tsꞌiyawh lhkꞌe banla ꞌinkꞌez ꞌulhdzis whe yuba ꞌutꞌenne tubulh ndunne bubulh whelhonigan Hobah whutsꞌun whenabonanyoot Damascus whano ꞌet ꞌuhoontꞌoh.16 ꞌEt ndai la huyilhchoot-i cha ꞌinkꞌez bulhutsin Lot cha, highu huyilhchoot-i cha, tsꞌekoo cha ꞌinkꞌez dunene tsꞌiyawh nabuhilhchoot.

17 ꞌEt Sodom whulerwe, Shaveh wheguz ꞌet, ꞌen Abram yududizya (Lerwe wheguz whuzꞌai huwhutni), Chedorlaomer hichꞌaꞌ nilhde hukwꞌelhꞌaz ꞌinkꞌez lerwe hiyulh ꞌutꞌenne tubulh.

18 ꞌEt Melchizedek Salem whulerwe, ꞌutꞌalh-i cha ꞌinkꞌez tsꞌekoo tooꞌ cha ꞌi bubut neininla, ꞌen Yakꞌusda ꞌukꞌenus diztiꞌ-un (El Elyon) c ꞌen oolubret ꞌuntꞌoh.19 Soo hoonzoo-un ubulh yalhduk whe ꞌutni

“Yakꞌusda ꞌukꞌenus diztiꞌ-un (El Elyon) yakꞌuz

Genesis 14 26

d 15:2 Ndi boozi Adonai ꞌi, “Moodih ꞌEn neKꞌuneꞌulꞌen-un ꞌUntꞌoh,” ni whe ꞌutni. Php 2:9-11 ꞌI be whutsꞌodulꞌeh whe Sizi Gri ꞌen Moodih ndun neKꞌuneꞌulꞌen-un ꞌUntꞌoh. Njan ꞌudustlꞌus ꞌet ndutni, “ꞌEt huwa Yakꞌusda tsꞌiyaintsuk gha ndo yudálhtiꞌ ꞌinkꞌez booziꞌ ꞌukꞌenus hooncha hukwꞌunꞌa yooziꞌ whulhtsi. ꞌEt whuz unꞌa ndi Sizi booziꞌ, ꞌi oogha tsꞌiyanne dugwutsi be hitsꞌun nudútilyalh wheꞌ hoontꞌoh. Yakꞌuz whutꞌenne ꞌinkꞌez ndi yun kꞌut whutꞌenne, ꞌinkꞌez yun kꞌut ꞌuntꞌohne, ꞌenne cha tsꞌiyawh. ꞌEt tsꞌiyawh lhenyoo khuni be yalhdukne, ꞌenne tsꞌiyawh njan nduwhutanelh, Sizi Gri neMoodihti ꞌuntꞌoh. ꞌEt whuz unꞌa nduwhútanelh, ꞌet Yakꞌusda neBá, ꞌen hidutálhtiꞌ wheꞌ hutni.” 1 Ti 6:14-16; Rev 19:15-16.

ꞌinkꞌez ndi yun kꞌut cha oochꞌeꞌ hoonli-un ꞌen gha Abram soo hoonzoo-un oogha hootaltsꞌulh.

20 Yakꞌusda ꞌukꞌenus diztiꞌ-un (El Elyon) ꞌen soo hoonzoo-un ꞌuntꞌoh,

nchꞌaz ditnine nlakꞌe banla.” ꞌInkꞌez 1/10th yutꞌi tsꞌiyawh yugha ininla.

21 ꞌEt Sodom whulerwe Abram yulhni, “Dune ꞌenne sgha buninle ꞌinkꞌez ndai la hoonli-i, ꞌi nyunchꞌoh ilhchoot.”

22 ꞌEt hoontsꞌi Abram Sodom whulerwe yulhni, “Ndi sla ꞌuntꞌoh Moodihti (Yahweh) Yakꞌusda ꞌukꞌenus yoo do ꞌuntꞌoh (El Elyon) ꞌen ootsꞌun duduzni, ꞌen yakꞌuz cha ndi yun kꞌut cha oochꞌeꞌ hoonli.23 ꞌAw hoonli lhituzaschulh ꞌughabatsꞌeꞌ ntsool-iyaz kꞌus kenatlꞌoolh hoontsꞌi ndai la nchꞌeꞌ ꞌaw hoschoot aitꞌoh, doo ka la ꞌudoniꞌ ‘Abram hoonzooꞌ ꞌuntꞌoh susi doniꞌ la.’24 Ndai la chilke hiyanꞌal-i ꞌinkꞌez dune sulh tizdilne Aner, Eshcol ꞌinkꞌez Mamre ꞌenne oochꞌeꞌ huyolhchoot dulhni.”

Yakꞌusda (Elohim) ꞌen Abram khuni ooba lhaidinla

15 1 ꞌEt nduhooja hukwꞌelhꞌaz Moodihti (Yahweh) ooghuni Abram honꞌen whe nduyulhni,

“Abram, wheniljut ꞌilhoh.Nyun mba neꞌi súbal ꞌusli,soo ꞌukꞌenus mba kꞌelha whutaleꞌ-un.”

2 ꞌEt hoontsꞌi Abram ꞌutni, “Moodihti Yakꞌusda (Adonai d Yahweh) di sgha tanꞌalh? ꞌAw suzkeh cha hooloh mbe la skꞌe dutiyalh ꞌen Eliezer Damascus whutꞌen-un eh ꞌuntꞌoh?”3 ꞌEt Abram ꞌutni, “Whunilhꞌen ꞌaw suzkeh sghalhinlel. Mbe la syoh whuzdli-un ꞌen skꞌe dutiyalh-un tileh.”

27 Genesis 14 , 15

4 ꞌEt whunilhꞌen, Moodihti (Yahweh) ooghuni weidiltsꞌut ꞌutni, “Ndun ꞌaw nkꞌelhdutisyal whe ꞌuntꞌoh nyustꞌe tsꞌu hainzut-un ꞌen nkꞌedutiyalh.”5 ꞌEt nꞌaz teinilhti ꞌinkꞌez ꞌuyulhni, “Ndo yakꞌuz tsꞌe whunilhꞌen sum hoolhto hukwa soo tila holhto.” ꞌInkꞌez ꞌet ꞌuyulhni, “Mbene la ntsꞌu haindene ꞌet ꞌuhutiltsuk.”

6 ꞌEt Moodihti (Yahweh) yuba ꞌalha ꞌudija, ꞌinkꞌez “Tsꞌihꞌun dune unli,” ꞌuyulhni.

7 ꞌEt ꞌuyulhni, “Si, Moodihti (Yahweh) ꞌustꞌoh. Ndunne Chaldea whutꞌen, ꞌet buyun kꞌut Ur, ꞌet whuchꞌa njan yun kꞌut nchꞌeꞌ whutileh ha.”

8 ꞌEt ꞌuyulhni, “SMoodihti Yakꞌusda (Adonai Yahweh), ntsꞌenꞌa tꞌewhuntazin stlꞌa whutikulh ꞌet?”

9 ꞌEt nduyulhni, “Tat be yus kꞌut-i musdoos tsꞌekeyaz cha, tat be yus kꞌut-i tsꞌeke ꞌusbai cha, ꞌinkꞌez tat be yus kꞌut-i dúbe cha, dutꞌai ꞌimbin cha, turtle dove huyulhni, ꞌinkꞌez dutꞌaiyaz cha, pigeon huyulhni, ꞌi ndiz stsꞌinlelh.”

10 ꞌEt ndokhi tsꞌiyawh yughi ninla, tsꞌiyawh lhkꞌe yantꞌaz lhzih neininla, ꞌet nyoo dutꞌai ꞌi ꞌaw yutꞌalhanal.11 ꞌEt whe dutꞌai cho, vulture huyúlhni, ꞌi ndi khuna-i huyanghan, ꞌi yukꞌendil whe Abram whenabunanyoot.

12 ꞌEt hulhgha sa nainꞌai whe soo bulh cho ꞌi Abram ookwꞌeidiltsꞌut ꞌinkꞌez whunulhꞌen soo wheioonujut-un ꞌinkꞌez tsaholhgus-un ꞌet ookwꞌeoodiltsꞌut.13 ꞌEt whe Yakꞌusda (Elohim) Abram ꞌuyulhni, “Soo soo cho tꞌeoononzeh, ntsꞌu hainde ꞌen ꞌuyoo yun kꞌut ꞌet ꞌaw tꞌelhonizun ꞌinkꞌez ꞌaw hubeꞌ hoolhdzun chaíloh. ꞌEt ndunne yun kꞌut whutꞌen, ꞌen dzoh neꞌbulhꞌen ꞌinkꞌez bunat neꞌhootꞌen whe 400 nawhudizut whutsꞌun bubaꞌ hutitꞌelh.14 ꞌEt mbene la bubaꞌ hitꞌenne hukwꞌelhꞌaz buba nahutisyeh soo lhai hutꞌi whe whusahutidulh.15 ꞌEt hoontsꞌi, nyun mbákene soo tsꞌihꞌun mba oodizghel leꞌ hoontꞌoh ꞌet butsꞌun tanyalh. Soo yoo ꞌun inzulh whe ꞌet ꞌanyotilhtelh.16 ꞌEt whulh dit dune nawhusdli-un, ꞌet ndiz nahutidulh. Amor whutꞌenne tankꞌus unꞌa ꞌuhutꞌen-un ꞌawhuz lhalhodusne.”

17 ꞌEt ꞌuhooja, hulhgha sa yo wheinꞌai whe tsaholhgus whuzdliꞌ. Whunulhꞌen lhes ꞌutes-un lhut ootsꞌa hadanꞌa ꞌinkꞌez daltꞌai bulh ꞌi ndi khuna-i lhtsꞌeltꞌaz-i beguz lhuyuzkat.18 ꞌEt dzin za Moodihti (Yahweh) Abram tsꞌun khuni ooba lhaidinla whe njan ndutni, “Ntsꞌu haindene ꞌenne ndi yun bugha óonusꞌai,

Genesis 15 28

Egypt whedinli tsꞌun ꞌinkꞌez ndi ꞌukoh whucho, ꞌet Euphrates ꞌukoh whucho ꞌet.19 Ken whutꞌenne cha, Kenez whutꞌenne cha, ꞌinkꞌez Kadmon whutꞌenne cha.20 Hitt whutꞌenne cha, Periz whutꞌenne cha ꞌinkꞌez Reph whutꞌenne cha.21 Amor whutꞌenne cha, Canaan whutꞌenne cha, Girgash whutꞌenne cha ꞌinkꞌez Jebus whutꞌenne, ꞌenne cha.”

Hagar ꞌinkꞌez Ishmael

16 1 ꞌEt Sarai, Abram ooꞌat ꞌaw buzkeh hooloh inleꞌ, Egypt whutꞌen tsꞌeke yunat neꞌutꞌen-un Hagar huyulhni ꞌen yutꞌi.

2 ꞌEt Sarai Abram ꞌuyulhni, “Whunilhꞌen Moodihti (Yahweh) ꞌaw suzkeh hooloh sulhtsi, ndun sba neꞌutꞌen-un ꞌen ꞌinleh ꞌinkꞌez ꞌet de tila tsꞌoodunne oostꞌeꞌ.” ꞌEt Abram, Sarai yukꞌunꞌa ꞌuja.

3 ꞌEt Sarai, Abram ooꞌat yuba neꞌutꞌen-un Hagar ilhchoot, Egypt whutꞌen-un unli ꞌinkꞌez duki yugha inilhti, yuꞌat ooleꞌ ha. ꞌEt Abram whunizyat yus kꞌut (10) ꞌet nyo Canaan keyoh indaꞌ.4 ꞌEt Hagar tꞌeinanzin ꞌinkꞌez ulchan. ꞌEt ulchan tꞌeoonanzin, nyoon tsꞌeke yuba ꞌutꞌen-un ooba yintsiꞌ suliꞌ.

5 ꞌEt Sarai, Abram ꞌuyulhni, “Whe nintaꞌ nustꞌen-un nkꞌe holtsꞌit! Ndun tsꞌeke ngha nusti ꞌinkꞌez ulchan tꞌeoonanzin whe, oostsꞌu dutni suliꞌ. Moodihti (Yahweh) nyun, si bulh neba nahutiyeh.”

6 ꞌEt Abram, Sarai ꞌuyulhni, “A, ꞌalha nyun mba ꞌutꞌen-un nyun nlakꞌet ꞌuhoontꞌoh, ntsꞌenꞌa hukwaꞌ ninzun-un kꞌunꞌa ꞌinleh.” ꞌInkꞌez Sarai yuba ꞌutꞌen-un tubeh dzoh nayulhdzut, ꞌinkꞌez Hagar yughu wheitselhya.

7 ꞌEt Moodihti (Yahweh) oolizas nyo too naindli-un, chuntoh ꞌet whuzih, ꞌet nayilhti, nyo too naindli-un whuzih, Shur tsꞌu wheti-un.8 ꞌInkꞌez ꞌuyulhni, “Hagar, Sarai ba ꞌutꞌen-un, ntsꞌez de hainya ꞌinkꞌez ntsꞌe tinya whe ꞌintꞌen?” ꞌEt ꞌutni, “Sarai smoodih ooba ꞌustꞌen-un oochꞌa tsꞌe tisya whe ꞌustꞌen.”

9 ꞌEt Moodihti (Yahweh) oolizas ꞌuyulhni, “Ooba ꞌintꞌen-un ootsꞌun naindalh ꞌinkꞌez ntsꞌe hukwaꞌ ninzun-un kꞌunꞌa neꞌnyoolhꞌen si.”10 ꞌEt Yakꞌusda (Yahweh) oolizas ꞌuyulhni, “Ntsꞌu haindene lhane ngha tislelh. Huldlai kꞌet ꞌaw bootsꞌolhto aitꞌoh tileh.”

11 ꞌInkꞌez Moodihti (Yahweh) oolizas, cha yulhni,“Whunilhꞌen ꞌawet tsꞌoodun bulh ꞌintꞌoh suliꞌ.Dune nyaz tileh ꞌinkꞌez booziꞌ Ishmael dutanelh.

Njan teneꞌnilhdzun Moodihti (Yahweh) nyudantsꞌo.

29 Genesis 15 , 16

e 16:13 Ndi booziꞌ El Roi ꞌi “Yakꞌusda ꞌEn Whunilhꞌen” ni whe ꞌutni. Jn 1:48 Nathanael ꞌen Sizi yughu ninya whe Sizi ꞌen Nathanael yúlhni, “Mai chun tꞌah sinda daꞌ, Philip ꞌanih nyudutánelh whutsodaꞌ, ꞌet nyunusꞌen.” ꞌEt whuz unꞌa ndi booziꞌ “El Roi” ni whe ꞌutni. f 17:1 Ndi boozi El Shaddai, ꞌi “Yakꞌusda ꞌUkꞌenus ꞌUltus-un,” ni whe ꞌutni. Whuz unꞌa Jn 2:19 ꞌet Sizi ubúlhni, “Njan yoh whudíztiꞌ-un nohni musai whulhtsi ꞌinkꞌez tat dzin inleꞌ de, ꞌet dunaoodutásꞌalh.” Njan whutsꞌodulꞌeh neMoodihti Sizi Gri ꞌen duyustꞌe yughu yalhduk whe ubudániꞌ. ꞌEn soo ꞌultus unli whe whulh tat dzin inleꞌ de dunaoodutáꞌalh. ꞌInkꞌez ꞌet whuz unꞌa nduhooja. Tulalhkꞌus kꞌut neba dazsai whe whulh tat dzin dunadija. Mt 28:18; Col 1:15-17.

12 Tube dune nzoodilꞌi-un tileh,tsꞌiyanne dune buchꞌaz ditni tilehꞌinkꞌez tsꞌiyanne dune hichꞌaz ditni tileh,ꞌinkꞌez dulhutsinke butoh ꞌet dune tileh.”

13 ꞌEt Moodihti (Yahweh) yutsꞌu huyih whe ꞌen dulh yailhduk, “Nyun ꞌintꞌoh, ndun Yakꞌusda-Ndun-Sunilhꞌen (El Roi)” e ꞌInkꞌez ꞌutni, “Mbe la siꞌen-un, si cha tila ꞌusꞌen eh?”14 ꞌEt huwa njan too dizꞌai-un ꞌet ꞌuwhuhutni Beer Lahai Roi. Whunulhꞌen Kadesh ꞌinkꞌez Bered bulh whetoh ꞌuhoontꞌoh.

15 ꞌEt Hagar duneyaz ꞌen Abram yughu sulhtsi ꞌinkꞌez Abram duyeꞌ yoozi Ishmael yulhni.16 ꞌEt ꞌoh whuya whudizulh Abram ꞌen lhkꞌu dit whunizyat ꞌon ꞌat lhkꞌu tat be yus kꞌut (86) whe Ishmael yughu yulhtsi.

Yakꞌusda (Elohim) Abram ndi khuni ꞌi ooba lhaidinla

17 1 ꞌEt Abram ꞌen ꞌilho hooloh whunizyai ꞌon ꞌat ꞌilho hooloh (99) nawhudizut whe, Moodihti (Yahweh) yunalhtsꞌet hainya ꞌinkꞌez

ꞌuyulhni, “Yakꞌusda ꞌUkꞌenus ꞌUltus-un (El Shaddai) f ꞌustꞌoh, stso inyalh ꞌinkꞌez ꞌaw hoonli nkꞌelhuholhtsꞌit.2 ꞌInkꞌez sghuni nyun, si bulh lhadutalneh ꞌinkꞌez ꞌonus lhane cha tihleh.”

3 ꞌEt Abram yubut nachanitno ꞌinkꞌez Yakꞌusda (Elohim) ꞌen yulh yalhduk, njan ꞌuyulhni,4 “ꞌEt si whunilhꞌen, khuni ntsꞌun lhadusla-i ꞌudun keyoh whutꞌenne dune lhane ꞌenne bubá tanleh.5 ꞌAw ꞌon ꞌun Abram lhunyodutasnelh, nyooziꞌ Abraham nyo dutanelh, lhelhtsꞌun whutꞌenne didoh lhane ꞌenne bubá nyuzusi ꞌet huwa.

Genesis 16 , 17 30

6 Soo tsꞌihꞌun lhane ntsꞌu ha kedande nyutiselh, lhelhdoh didohne dune nyutiselh, lerwene ꞌenne hoontsꞌi ntsꞌu ha hande tileh.7 ꞌInkꞌez khuni nyun bulh lhadilya-i, ꞌi ꞌet dutaꞌalh ntsꞌu haindene ꞌenne lhanꞌun te, ꞌilhiz wheni ndi khuni lhadutalneh, NYakꞌusda (Elohim) tisleh ꞌinkꞌez ntsꞌu haindene cha.8 ꞌInkꞌez cha nyun cha ꞌinkꞌez ntsꞌu haindene nkꞌelhꞌaz, ndi yun nohgha nusꞌai, ꞌawhuz ꞌet tꞌenyuzinzun, Canaan yun tsꞌiyawh nohchꞌeꞌ ooleꞌ ꞌilhiz wheni, ꞌinkꞌez buYakꞌusda tisleh.”

9 ꞌInkꞌez Yakꞌusda (Elohim) Abraham ꞌuyulhni, “Nyun ndi khuni ntsꞌun lhadasla-i ootahtun, ntsꞌu haindene tubulh lhanꞌun te ndi khuni ootahtun.10 Ndi ꞌi khuni ntsꞌun lhadasla-i, ꞌi ootahtun, nyun ꞌinkꞌez si bulh ꞌinkꞌez ntsꞌu haindene nkꞌelhꞌazne. Dune tsꞌoodunne whuzdline nohtoh ꞌenne tsꞌiyawh hika dune unli-un hubuhootatꞌus.11 Nyunchꞌoh cha ooka dune inli-i nyo titꞌus, ꞌet huwa tꞌentihdzeh ndi khuni lhadilya-i nyun, si bulh.12 Mbe la lhkꞌudidzin be yus kꞌut suliꞌ-un, ꞌen cha hititꞌus. Duneyaz ꞌandit whuzdline nyoh whuzdline, kꞌus sooniya be dune tꞌenuzuhzun tsꞌun ꞌohket-un tsꞌoodun ntsꞌu hainde lhilohne, ꞌen cha.13 Mbe la nyoh whuzdline ꞌinkꞌez mbe la sooniya be ohketne, tsꞌiyawh ka dune unli-un hubotitꞌus, ndi sghuni ntsꞌun lhadusla-i nus whe lhkꞌelhꞌaz te ꞌet ndi ꞌi gha ꞌilhiz wheni be hoodutahtꞌen.14 ꞌInkꞌez dune tsꞌoodun ꞌaw lhuhuyitꞌus-un ꞌen ꞌudun nehuyolhtelh ndi khuni ntsꞌun lhadasla-i kꞌe ininyuz ꞌet huwa.”

15 ꞌEt Yakꞌusda (Elohim) Abraham ꞌuyulhni, “Nꞌat Sarai dini-un ꞌet ꞌetsul ꞌudonih ꞌinkꞌez Sarah ꞌi booziꞌ tileh.16 ꞌInkꞌez soo hoonzoo-un ooba whutiselh ꞌinkꞌez duneyaz ꞌen mba nyaz tileh. ꞌInkꞌez ꞌen soo hoonzoo-un ooba whutiselh ꞌinkꞌez ndoh hidoh ꞌenne buloo tileh, ꞌinkꞌez lerwene cha hitsꞌu ha tidoh.”

17 ꞌEt Abraham yubut nachanitno ꞌinkꞌez udloh ꞌinkꞌez dudzi yo tsꞌe ꞌutni, “Dune 100 be yus kꞌut soo toleh ooyeꞌ whutaleh? ꞌInkꞌez Sarah ꞌen cha 90 be yus kꞌut soo tilah ooyaz holeꞌ?”18 ꞌInkꞌez Abraham Yakꞌusda ꞌuyulhni, “Ishmael soo nyun ba khuna ooleꞌ?”

19 ꞌEt Yakꞌusda (Elohim) ꞌutni, “ꞌAwundooh Sarah nꞌat nyeꞌ nghu tilhtsi ꞌinkꞌez Isaac dutanelh. Sghuni lhadusla-i ꞌilhiz wheni ꞌen cha ootsꞌun lhadutisleh, mbene la ootsꞌu haindene hukwꞌelhꞌaz ꞌenne cha.20 ꞌInkꞌez Ishmael ꞌen ghun nyudastsꞌo. Whunilhꞌen soo hoonzoo-un oogha whultsꞌut, ꞌinkꞌez lhane ootsꞌu hainde tileh. Whunizyane ꞌon ꞌat nane lerwe yeꞌke ootsꞌu ha tidoh ꞌinkꞌez ꞌen didoh-un ncha tíselh.

31 Genesis 17

21 ꞌEt hoontsꞌi ndi sghuni Isaac tsꞌun lhadutisleh. Sarah ndo whuya whudizulh nat de, ꞌet nyeꞌ tileh.”22 ꞌEt yulh yalhduk-un ꞌetsul ꞌudija ꞌinkꞌez Yakꞌusda (Elohim) ndo whe naja.

23 ꞌEt Abraham duyeꞌ Ishmael yilhchoot ꞌinkꞌez mbene la yuyoh whuzdline ꞌinkꞌez mbene la sooniya kꞌelha bubonketne, dune tsꞌiyawh Abraham ooyoh dilhtsꞌine ꞌet dzin za yuka dune unli-un hubuhuztꞌus Yakꞌusda (Elohim) yulhni hukwꞌunꞌa.24 Abraham ꞌet 99 be yus kꞌut whe yuka dune unli-un huyuztꞌus.25 ꞌEt ooyeꞌ Ishmael whunizyat ꞌon ꞌat tat be yus kꞌut whe ooka dune unli-un huyuztꞌus.26 ꞌEt dzin za Abraham ooyeꞌ Ishmael ꞌen bulh hika dune unline hubuhuztꞌus.27 ꞌInkꞌez mbene la ooyoh dune ꞌet whutꞌine, ꞌinkꞌez sooniya be bubonketne, ꞌenne cha hika dune unli-un tsꞌiyawh hubuhuztꞌus.

Yakꞌusda (Elohim) ꞌen Abraham yunalh hainya

18 1 ꞌEt Moodihti (Yahweh) ꞌen Abraham yunalh hainya, njan ndun Mamre, duchun tꞌah terebinth, oak huyulhni,

whuꞌiz whunilghaz whe nimbali dati ꞌet usda.

Genesis 17 , 18 32

(18:1)

2 Ndo yutanꞌen ꞌinkꞌez yutilhꞌen, tane dune yuzih nudilhya whe butilhꞌen. Nimbali dati tsꞌe dudilgai ꞌinkꞌez bududilhgai ꞌinkꞌez soo yun tsꞌe bubut nachaniti.

3 ꞌInkꞌez ꞌutni, “SMoodih (Adonai) tube sba ꞌuszoo whe la ꞌusinla, ꞌandit khun te mba ꞌutꞌen-un senghonyaꞌ junih.4 Sla ꞌineh whe tooyaz ntsool-iyaz whusaooskalh ꞌinkꞌez sih nohke be tunaoohgus, ꞌinkꞌez nyo duchun sa whusꞌih ꞌet sih naoolhyis.5 ꞌInkꞌez ꞌet ꞌutꞌalh-iyaz nohba ha óoslelh, ꞌet sih nohyustꞌe naóolhyis. ꞌEt hukwꞌelhꞌaz sih ꞌoya lhohdilh. Ntsꞌenꞌa nohba ꞌutꞌen-un tsꞌun hahya ꞌet.” ꞌEt ꞌuhuyulhni, “Daja datanelh-un, ꞌet dineh.”

6 ꞌEt Abraham nimbali tꞌah tsꞌe Sarah yughulgai ꞌinkꞌez ꞌuyulhni, “Soo ꞌa tawh ꞌultsuk-i lhes, ꞌi lhadinleh ꞌinkꞌez nilhtlus ꞌinkꞌez ilhtꞌes.”

7 ꞌEt Abraham khuna-i yughulgai ꞌinkꞌez musdoosyaz soo unzoo-i yilhchoot ꞌinkꞌez chilhyaz ꞌen yutlꞌa yalhti ꞌinkꞌez soo ꞌahoh lhai dutileh ha yilhchoot.8 ꞌEt butter cha ꞌinkꞌez lilet cha ꞌinkꞌez musdoosyaz lhadutja-i, ꞌi bubut neininla ꞌinkꞌez buzih usyin whe nahuyitꞌal.

9 ꞌEt ꞌuyulhni, “Nꞌat Sarah ntsꞌe ꞌutꞌen?” ꞌInkꞌez ꞌutni, “Nyo nimbali tꞌah usda.”

10 ꞌInkꞌez ꞌuyulhni, “Soo ꞌalha-i be ndo whuya whudizulh-un ꞌinkꞌez ꞌet Sarah nꞌat dune ooyaz tileh.” ꞌInkꞌez Sarah nimbali dati usyin ꞌinkꞌez yoozilhtsꞌai.

11 ꞌAndit ꞌet Abraham ꞌinkꞌez Sarah ꞌen tube hoonyan huzdliꞌ. Yoo ꞌun hizulh ꞌinkꞌez Sarah ꞌen buzkeh whutaleh ꞌet tube ꞌon ꞌun hainzut.12 ꞌEt huwa Sarah duyo tsꞌe udloh ꞌinkꞌez ꞌutni, “Nisjan hukwꞌelhꞌaz ꞌinkꞌez smoodih cha nisjan, ꞌet de sba hoonzoo whutaleh?”

13 ꞌInkꞌez Moodihti (Yahweh) Abraham ꞌuyulhni, “Di ha ꞌutni Sarah udloh, ꞌinkꞌez ꞌutni, ‘ꞌalhaꞌ eh syaz whutaleh tube nisjan hoontsꞌi?’14 ꞌAw hoonli hoontsꞌi eh Moodihti (Yahweh) ꞌaw ooba hoolhtus eh? Ndet la ꞌet newhudizut-un ꞌet la nohghu naoosjaꞌ ꞌinkꞌez Sarah dune ooyaz tileh.”

15 ꞌEt Sarah ꞌawundooh ni, “ꞌAw lhuzusdloh,” whe nuljut. ꞌInkꞌez Moodihti (Yahweh) ꞌuyulhni, “ꞌAwundooh, indloh inleꞌ!”

Abraham ndunne Sodom whutꞌenne buba tenadudli16 ꞌEt dune dunahudidil ꞌinkꞌez Sodom keyoh tsꞌe whuz hunilhꞌen,

ꞌinkꞌez Abraham ꞌon ꞌun bubulh nunatitꞌus ha bubulh tizꞌaz.17 ꞌInkꞌez Moodihti (Yahweh) ꞌutni, “Abraham oochꞌa whuntisꞌih eh datisnelh-un,18 ꞌalha Abraham ꞌen didoh-un ncha ꞌinkꞌez tube ulhtus tileh. ꞌInkꞌez ꞌen gha tsꞌiyawh didohne ꞌenne soo hoonzoo-un bugha hóotaltsꞌulh.

33 Genesis 18

19 Tꞌeniszin duduzke bukꞌunuhilhyeꞌ, yoh whutꞌine cha bukꞌelhꞌaz Moodihti (Yahweh) ookwꞌunꞌa huhoontun zaꞌ hintꞌoh tsꞌihꞌun neꞌhutꞌen, ꞌet de la Moodihti (Yahweh) Abraham daja yulhni-un ꞌet yugha whutalelh.”

20 ꞌInkꞌez Moodihti (Yahweh) ꞌutni, “Sodom ꞌinkꞌez Gomorrah bulh tube huwu yaduk hooni, hiye tankꞌus-i tube ntsiꞌ.21 Whuz butsꞌun tisyalh ꞌandit ꞌinkꞌez whuntisꞌelh daja hutni la sdabe cha hintsiꞌ. ꞌAlha tila ꞌuhutni khuni sghu dinkat, ꞌet ꞌawundooh de la, ꞌet tꞌeoonooszeh.”

22 ꞌEt nyoonne dune lhtꞌanahunistꞌaz ꞌinkꞌez Sodom tsꞌe hutizꞌaz, ꞌet Abraham ꞌawhuz Moodihti (Yahweh) yubut usyin.23 ꞌInkꞌez Abraham yenghun neninya ꞌinkꞌez ꞌuyulhni, “ꞌEt whe eh ndunne tsꞌihꞌun dune hinli ꞌinkꞌez lubeshi ꞌuhulhꞌen bulh tsꞌiyawh gak butilhtselh?24 Khun te kwulat whunizyane (50) dune, ꞌenne tsꞌihꞌun dune hinli njan keyoh whutoh ꞌet. ꞌEt cha eh tsꞌiyawh gak butalhtselh ꞌinkꞌez buyun kꞌut ꞌet cha eh gak whutalhtselh? Kwulat whunizyane ꞌet hudilhtsꞌi hoontsꞌi?25 Tube ꞌaw ndoneh aitꞌoh dune nzoone ꞌinkꞌez ntsiꞌne tubulh gak butalhtselh huba, tsꞌiyawh lhgha ꞌuhootꞌeꞌ! ꞌAw ndi yun kꞌut huwun nahiyilh-un, ꞌen tsꞌiyawh iloh lakw tsꞌihꞌun unꞌa ꞌuhutitꞌelh?”

26 ꞌEt whe Moodihti (Yahweh) ꞌutni, “Sodom kwulat whunizyane tsꞌihꞌun ꞌuntꞌohne keyoh hoonli de, ꞌet de ꞌaw dalhubutuzislel.”

27 ꞌEt Abraham ꞌuyulhni, “Si ꞌantsꞌi yun lhez ꞌusli whe ꞌustꞌoh, ꞌet hoontsꞌi Moodihti (Adonai) bulh yatisduk.28 ꞌEt te kwulaiꞌ hukwꞌelhꞌih whe whunizyane ꞌon ꞌat kwulane (50) tsꞌihꞌun dune hooni te, ꞌet whe eh tsꞌiyawh gak whutalhtselh tsꞌuwhutꞌi whucho ꞌet?” ꞌEt ꞌutni, “Dit whunizyai ꞌon ꞌat kwulane (45) nabinla te, ꞌaw tsꞌiyawh huboolhtsꞌelh aitꞌoh.”

29 ꞌEt doo cha za yulh yatilhduk ꞌinkꞌez ꞌutni, “Dit whunizyane nabinla de?” ꞌEt ꞌutni, “ꞌEnne bugha daboosleh aitꞌoh.”

30 ꞌInkꞌez ꞌutni, “Moodihti (Adonai) khun te hunolchꞌeh junih, ꞌinkꞌez yatisduk. Tat whunizyane ꞌenne tsꞌihꞌun ꞌuntꞌohne nainlane, ꞌet doꞌ?” ꞌEt ꞌuyulhni, “ꞌEt de ꞌaw gak lhubutuzissel tat whunizyane ꞌenne bugha.”

31 ꞌEt ꞌuyulhni, “ꞌAntsꞌi sichꞌoh khana oonustꞌai whe ꞌudusni, Moodihti (Adonai) bulh yasduk, nat whunizyane ꞌenne nabinlane tsꞌihꞌun ꞌuntꞌohne?” ꞌEt ꞌutni, “ꞌEt ꞌaw gak hubooselh aitꞌoh ndunne nat whunizyane ꞌenne bugha.”

32 ꞌEt ꞌutni, “Khun te Moodihti (Adonai) hunolchꞌeh junih ꞌinkꞌez doo cha za yatisduk. Whunizyane nainla de ꞌet doꞌ?” ꞌEt Moodihti (Yahweh) ꞌutni, “Whunizyane nasla de, ꞌenne bugha ꞌaw dalhubutuzislel.”

Genesis 18 34

33 ꞌEt Moodihti (Yahweh) Abraham yalhduk-un ꞌetsul ꞌudija whe ꞌet ꞌawet yughu whe naja ꞌinkꞌez Abraham dunimbali bez whe naja.

Keyoh Sodom ꞌinkꞌez keyoh Gomorrah hooloh whutilhtselh

19 1 ꞌEt hulhgha nyoonne lizas nane Sodom tsꞌe hoozꞌaz. Lot Sodom dati-un ꞌet usda, Lot hubutilhꞌen dudinya ꞌinkꞌez bubut nachaniti.

2 ꞌInkꞌez ꞌutni, “Njan whunulhꞌen smoodihne nohba ꞌutꞌen-un ooyoh tsꞌe uhꞌus ꞌinkꞌez ꞌulhdzis ꞌet oohtez sih ꞌinkꞌez nohke tunaoohgus ꞌinkꞌez bundadaꞌ ꞌudaꞌ cho duduhꞌaz ꞌinkꞌez sih toohꞌas.” ꞌEt ꞌuhuyulhni, “ꞌAwundooh ꞌet hoontsꞌi ꞌandit ꞌulhdzis ꞌet ꞌaz uztitez.”

3 ꞌEt tube cho ꞌubulhni, ꞌet huwa hiyoh highu daninꞌaz ꞌinkꞌez hiyuꞌalh-i bugha ninꞌai ꞌutꞌalh-i bulh yuntuldoh-i yit ꞌinkꞌez ꞌi cha bubaꞌ yinla ꞌinkꞌez ꞌuhanꞌal.4 ꞌEt yun nehutilgwulh whutsꞌo nyo keyoh whuduneꞌne tsꞌiyawh dunetine cha ꞌinkꞌez chilke cha tsꞌiyawh nyo yoh whunahusguz.5 ꞌInkꞌez Lot hitsꞌu huyih ꞌinkꞌez ꞌuhuyulhni, “Nyoonne dune ꞌandit nghu daninꞌazne ntsꞌe ꞌuhintꞌoh ndiz tꞌebunilhtih ꞌet ꞌinkꞌez sih tꞌebuznoozeh.”

6 ꞌEt Lot dati butsꞌu teninya yoh danaꞌdintan.7 ꞌInkꞌez ꞌutni, “ꞌAwundooh sulhutsinke, tube hoontsiꞌ ꞌet dohneh junih!8 Whunulhꞌen ꞌandit nane stseꞌke ꞌaw dune tꞌenuszunne ꞌustꞌi, ꞌenne nohghu tebostelh ꞌinkꞌez ntsꞌe hukwaꞌ nuhzun kꞌunꞌa neꞌboolhꞌen sih. ꞌAntsꞌi ndunne dune ꞌenne butsꞌa ha lhuzohꞌai, njan ꞌet huwa ꞌandit syoh dahuninꞌaz wheꞌ hintꞌoh.”

9 ꞌEt ꞌuhutni, “ꞌUdun sinyin!” ꞌEt ꞌuhutni, “Ndun ꞌandit ꞌantsꞌiya whusainya ꞌinkꞌez ꞌantsꞌi nahiyilh-un leꞌ ꞌutni sih! Nyun ꞌonus ntsꞌitilelh kꞌat ndune dune lhabuzdinla de!” ꞌInkꞌez Lot tube cho nꞌun hinilhtꞌi ꞌankwꞌus dati dahidanyuz.

10 ꞌEt hoontsꞌi nyoonne dune nane ꞌaz tehudilni ꞌinkꞌez Lot danahinilhtsus ꞌinkꞌez danaꞌ hudintan.11 ꞌInkꞌez nyoonne ꞌaz dati higha nane tsꞌiyawh huhoosꞌ̱en hubuhulhtsi nchane ꞌinkꞌez ntsoolne tubulh, nyoo dati nahuyotan aitꞌoh kꞌet nehunintsai.

Keyoh Sodom ꞌinkꞌez Gomorrah ꞌet hooloh whulhtsi12 ꞌInkꞌez nyoonne dune Lot ꞌuhuyulhni, “ꞌAw eh ꞌuyoonne cha njan

hooloh? Nghundan, nyeꞌke, ntseꞌke ꞌinkꞌez mbe njan keyoh dilhtsꞌi tsꞌiyawh whusabinle!13 Sdabe cha ꞌuwhudija njan keyoh hoontsiꞌ huwu yaduk, ꞌet huwa njan gak tsꞌotilhtselh. Moodihti (Yahweh) whunilhꞌen whe, ꞌen Moodihti (Yahweh) ꞌen ndiz netilhꞌaꞌ njan gak tsꞌotilhtselh ha.”

35 Genesis 18 , 19

14 ꞌEt Lot teninya ꞌinkꞌez dughu ndankene ootseꞌke ghu dilhtsꞌine, ꞌinkꞌez ꞌubulhni, “Duduhdilh, njan whuchꞌa suhdilh! Moodihti (Yahweh) njan keyoh gak whutilhtselh!” ꞌEt ooghundankene ꞌenne buba ꞌantsꞌi la ꞌutni huninzun.

15 Bundadaꞌ yulhkai whe nyoonne lizasne Lot huyulhni, “Soo ꞌa! Dudinyaih ꞌinkꞌez nꞌat cha, ntseꞌ nane cha, njan nzih ꞌuntꞌohne, doo ka sih njan nohbulh whudokꞌun ꞌinkꞌez dzoh notizut!”

16 ꞌEt saꞌ neꞌutꞌen ꞌet nyoonne dune hila ilhchoot, ooꞌat cha hila ilhchoot, ꞌinkꞌez ootseꞌke nane ꞌenne cha bula ilhchoot, Moodihti (Yahweh) bugha teꞌninzun whe, ꞌinkꞌez teboninla keyoh yoo ꞌaz tsꞌe.17 ꞌEt ꞌuhooja tsꞌiyawh teboninla hiyulhni, “Soo ꞌa tulhghas ꞌududoolhyih sih! Khun te kꞌoh naitohtꞌen junih, kꞌus njan ꞌet te dolhtsꞌiꞌ junih, dzulh kꞌuz tsꞌe uhdulh doo ka sih gak oohleꞌ!”

18 ꞌEt Lot ꞌubulhni, “Sla ꞌuhneh whe, ꞌawundooh smoodihne!19 ꞌAndit nohba ꞌutꞌen-un nohba unzoo be teꞌ nuhzun-i be ꞌonus whusunilhtan be khusna-i ba sulhyih, ꞌet hoontsꞌi ꞌaw ndo dzulh kꞌuz toosyaꞌ aitꞌoh doo ka si hoontsiꞌ sulh ꞌuhoneh ꞌinkꞌez la daoosah.20 ꞌAndit whunulhꞌen njan keyoh whuyaz ꞌet nilhdukw wheꞌ hoontꞌoh, whuz toosyaꞌ, ꞌet de la szul khoonaꞌ.”

21 ꞌInkꞌez ꞌet ꞌuyulhni, “Whunilhꞌen tube nla ꞌusja wheꞌ hoontꞌoh njan keyoh whuyaz ꞌaw gak hooselh aitꞌoh huwu yailhduk-un.22 Soo ꞌa ꞌududilyih! ꞌAw hoonli oosneh aitꞌoh ndet la keyoh ninya whutsꞌun.” ꞌEt huwa nyo keyoh Zoar huwhutni.

23 ꞌAwet sa hainꞌai ꞌet Lot Zoar tsꞌe oozya.24 ꞌEt Moodihti (Yahweh) tse dunizkꞌun-i ꞌinkꞌez kwun tubulh ꞌi Sodom ꞌinkꞌez Gomorrah bulh nayalhtan ndo yakꞌuz whutsꞌun, Moodihti (Yahweh) ꞌen ꞌuhoonla. 25 ꞌEt whuz unꞌa nyo keyoh gak whulhtsi, whunat cha ꞌet whutꞌine cha, yun ha nuyeh-i cha.26 ꞌEt hoontsꞌi Lot ooꞌat kꞌoh whunalhꞌen whe lisel tse nainꞌa-i suliꞌ.

27 ꞌInkꞌez Abraham bundadaꞌ ꞌudaꞌ ꞌet nyo whutsodaꞌ Moodihti (Yahweh) yubut inyin-un, whuz oozya.28 ꞌInkꞌez Sodom ꞌinkꞌez Gomorrah whulh yun tubulh nyo whulut yun cha oolut ꞌantsꞌi dizkꞌun-i cho leꞌ hoontꞌoh whe ndo wheinꞌa.

29 ꞌEt ꞌuhooja Yakꞌusda (Elohim) nyo keyoh gak whulhtsi hukwꞌelhꞌaz ꞌet Yakꞌusda (Elohim) Abraham nalnih ꞌinkꞌez Lot nyo hootꞌeꞌ-un keyoh gak whulhtsi ꞌuchꞌa nayulhꞌa ꞌinkꞌez ꞌutsꞌun whe yalhꞌaꞌ.

30 ꞌEt Lot Zoar whuchꞌa nasja ꞌinkꞌez dzulh toh tsꞌe nenina, ootseꞌke nane cha huyulh ꞌutꞌen. Zoar whutitꞌelh-un whe nuljut, ꞌinkꞌez dutseꞌ bulh nyo tseꞌan ꞌet huwhutꞌi.

Genesis 19 36

37 Genesis 19

(19:24) © 1996 David C. Cook

31 ꞌEt ꞌudetso whuzdli-un ꞌen dulhtus ꞌuyulhni, “Ndun nebá tube duneti unli ꞌinkꞌez ꞌaw ndi yun kꞌut dune hooloh suliꞌ bubulh ꞌutsꞌootꞌen-un hooloh, ndi yun hukwꞌuneꞌ whutꞌen.32 ꞌAnih nebá tsꞌekoo tooꞌ butsꞌoolhnaiꞌ ꞌinkꞌez sih oozih tsꞌootez, ꞌet de la netsꞌu haindene hooleꞌ.”

33 ꞌEt ꞌulhdzis dubá tsꞌekoo tooꞌ higha nilhdzo ꞌinkꞌez ꞌudetso whuzdli-un ꞌen dubá yuchantꞌelget ꞌaw tꞌeoonuszun ndet yuchantꞌelget, ꞌinkꞌez dunadija-un cha tꞌeoonuszun.

34 ꞌEt ꞌuhooja ꞌom bun ꞌudetso ꞌudekꞌoh ꞌuyulhni, “ꞌAlhaꞌ sbá ꞌulhdzis daꞌ oobulh husteꞌ inleꞌ. Hulhgha doo cha za tsꞌekoo tooꞌ butsꞌoolhnaiꞌ ꞌinkꞌez nyun bulh hontꞌe. ꞌEt de la netsꞌu haindene hooleꞌ.”35 ꞌEt ꞌulhdzis dubá doo cha za tsꞌekoo tooꞌ higha nilhdzo ꞌinkꞌez ꞌudekꞌoh-un ꞌen dubá yuchantꞌinteꞌ, ꞌaw tꞌeoonuszun ndet yuchantꞌelget ꞌinkꞌez dunadija-un cha.

36 ꞌEt whe Lot ootseꞌke nahultꞌoh dubá higholchan.37 ꞌUdechoo whuzdli-un ooyaz dune suliꞌ, ꞌinkꞌez booziꞌ Moab yulhni. ꞌEn Moab dunene didohne, ꞌenne ꞌandit dzin whutsꞌun bubá unli.38 ꞌInkꞌez ꞌudekꞌoh-un ꞌen cha dune ooyaz suliꞌ ꞌinkꞌez booziꞌ Ben-Ammi yulhni. ꞌEnne Ammon dunene bubá unli ꞌandit dzin whutsꞌun.

Abraham ꞌinkꞌez Abimelech

20 1 ꞌInkꞌez Abraham ꞌet whe dinya whe nyan wheinya, Kadesh ꞌinkꞌez Shur bulh ꞌet whulheguz ꞌet hootꞌeꞌ, ꞌinkꞌez Gerar

howhutni whuz cha whuloh te whutꞌi.2 ꞌEt Abraham nyoon Sarah duꞌat, ꞌen ꞌubulhni, “Sulhtus ꞌuntꞌoh.” ꞌInkꞌez Abimelech, Gerar whulerwe, ꞌen Sarah yilhchoot.

3 ꞌEt hoontsꞌi Yakꞌusda (Elohim) Abimelech ꞌulhdzis nute whe yughu ninya ꞌinkꞌez ꞌuyulhni, “A, dune dazsai-un inli whe ꞌintꞌoh ndun tsꞌeke ilhchoot-un ꞌuyoon dune ꞌat ꞌuntꞌoh.”

4 ꞌEt hoontsꞌi Abimelech ꞌaw yuzih nulhiyal ꞌinkꞌez ꞌuyulhni, “Moodihti (Adonai) dune tsꞌihꞌun ꞌuntꞌohne didohne tsꞌiyawh eh butanghan?5 ꞌAw lakw sulhdinel, ‘Sulhtus ꞌuntꞌoh sulhdinel?’ ꞌInkꞌez didutchꞌoh cha ꞌutni, ‘Sulhutsin ꞌuntꞌoh,’ ni. Sdzi tsꞌihꞌun ꞌuntꞌoh ꞌinkꞌez sla cha ꞌaw lhditsun whe njan ꞌet dusja.”

6 ꞌInkꞌez Yakꞌusda (Elohim) ꞌuyulhni nute whe, “A, tꞌeoonuszun ndzi tsꞌihꞌun ꞌuntꞌoh whe ꞌinja ꞌinkꞌez si cha nintaꞌ tantꞌelh-un whuchꞌa nyostun whe ꞌustꞌoh ꞌet huwa ꞌaw ootalhanal.

Genesis 19 , 20 38

7 ꞌAndit ꞌet huwa ndun tsꞌeke ootlꞌaꞌ nayilhtih, nus hooꞌen-un dune ꞌuntꞌoh, ꞌinkꞌez si mba tenadoodli ꞌinkꞌez khonaꞌ. ꞌAw ootlꞌa nalhuyilhtel de, ꞌalha dantantsah whe ꞌintꞌoh ꞌinkꞌez mbene la nchꞌeꞌ unline ꞌenne cha tsꞌiyawh.”

8 ꞌEt ꞌom bun Abimelech ꞌudaꞌ dudinya ꞌinkꞌez mbene la yuba ꞌutꞌenne tsꞌiyawh ꞌanih budaniꞌ ꞌinkꞌez tsꞌiyawh daja ni la tsꞌiyawh bubudaniꞌ, ꞌinkꞌez dune tsꞌiyawh hunilhjoot.9 ꞌInkꞌez Abimelech, Abraham ꞌanih yudaniꞌ ꞌinkꞌez ꞌuyulhni, “Dane ꞌinla whe ꞌintꞌoh? Ndet whe tankꞌus ꞌunyusla ha lheꞌhoontꞌoh-un skꞌe hoonꞌai ꞌinkꞌez njan whulerwe ꞌusli-un cha ꞌutꞌen untsiꞌ-i cha? ꞌAw ndusonleꞌ hubaꞌ lheꞌhootꞌoh whuz unꞌa ꞌusinla.”10 ꞌEt Abimelech ꞌen Abraham ꞌuyulhni, “Daja ninzun whe ꞌinja ꞌet dinja yulhni?”

11 ꞌInkꞌez Abraham ꞌutni, “Dune Yakꞌusda (Elohim) ehunuljut-un njan keyoh ꞌaw hooloh nuszun, ꞌet huwa ꞌusja ꞌinkꞌez sꞌat ꞌen gha tila sozoolhghelh nuszun.12 ꞌEt hoontsꞌi ꞌalha sulhtus ꞌuntꞌoh. Sbá ootseꞌ ꞌuntꞌoh, ꞌaw sloo ooyaz iloh ꞌuntꞌoh ꞌinkꞌez sꞌat suliꞌ.13 ꞌInkꞌez ꞌet ꞌuhooja Yakꞌusda (Elohim) sbá ooyoh huwutisya whe ꞌet ndun tsꞌeke dusni, ‘Njan whe ꞌinzoo whe ꞌet tsꞌiyantsuk sba ꞌet doneh ntsꞌoh te nitꞌas te, sulhutsin ꞌuntꞌoh doniꞌ.’ ”

14 ꞌEt Abimelech ꞌusbai ꞌinkꞌez musdoos dune cha, tsꞌeke ꞌinkꞌez dune bulh, yunatneꞌ ꞌutꞌenne ꞌenne cha, tsꞌiyawh Abraham gha buninla, ꞌinkꞌez yuꞌat cha yutlꞌa nayalhti.15 ꞌInkꞌez Abimelech ꞌutni, “Whunilhꞌen ndi syun njan mbut whuzꞌai, ndet hukwaꞌ ninzun-un, ꞌet hoontꞌi.”

16 ꞌInkꞌez Sarah ꞌen cha ꞌuyulhni, “Whunilhꞌen nyulhutsin 1,000 silver nukat-i ꞌi cha oogha inusla. ꞌI gha mbene la nyulh ꞌutꞌenne cha ꞌinkꞌez ꞌuyoonne nalh cha, ꞌawet tsꞌihꞌun mba nawhúsdliꞌ wheꞌ hoontꞌoh!” ꞌEt whe hukwa yudaniꞌ.

17 ꞌEt Abraham Yakꞌusda (Elohim) tsꞌun tenadidli ꞌinkꞌez Yakꞌusda (Elohim) Abimelech soo naꞌyinla, yuꞌat cha ꞌinkꞌez tsꞌekoo yunat neꞌutꞌenne cha, ꞌinkꞌez bubuzkeꞌ whuzdliꞌ.18 ꞌEt whe Moodihti (Yahweh) ndunne Abimelech ooyoh dilhtsꞌine tsꞌekoo tsꞌiyawh buchan whudanaꞌdinla, ndun Sarah ꞌen gha.

Isaac whuzdli

21 1 ꞌInkꞌez Moodihti (Yahweh) ꞌen Sarah yughu ninya ꞌet whe ndutínelh ni daꞌ, ꞌinkꞌez Moodihti (Yahweh) ꞌen Sarah ba nduja,

ntsꞌe datni ꞌet.

39 Genesis 20 , 21

2 Sarah ꞌen ba Abraham ba ooyeꞌ titꞌelh ꞌen duneyaz tileh. Hoonyan whe ꞌet ndet Yakꞌusda (Elohim) yuba yulhni-un ꞌet nduhooja.3 ꞌInkꞌez Abraham ndun tsꞌoodun yughu yulhtsi-un, duneyaz, Sarah yulhtsi, Isaac yulhni.4 ꞌInkꞌez Abraham duyeꞌ Isaac hukwa dune unli-un yuztꞌus lhkꞌu dit dzin be, be inleꞌ whe daja ni la Yakꞌusda (Elohim) ndoneh yulhni ꞌet nduja.5 ꞌEt Abraham whunizyat whunizyat be yus kꞌut (100) whe ꞌet Isaac yughu yulhtsi.

6 ꞌInkꞌez Sarah ꞌutni, “Yakꞌusda (Elohim) usdlo-un sgha ooninꞌai. Mbene la suditsꞌone tsꞌiyawh la sulh hoodloh.”7 ꞌInkꞌez cha ꞌutni, “Mbe suba Abraham yudoniꞌ Sarah tsꞌoodun eꞌtilhtuk hidoniꞌ, duneti unli, ꞌet whe dune ooyaz ba ꞌustꞌi suliꞌ.”

8 ꞌEt tsꞌoodun nuyeh ꞌinkꞌez ꞌulhtuk-un ꞌetsul ꞌuja ꞌet dzin ꞌet Abraham dune ghu nusuya.

Hagar ꞌinkꞌez Ishmael tebuninyoot9 ꞌEt Sarah yunilhꞌen nyoon tsꞌeke Egypt whutꞌen ooyeꞌ ꞌuntꞌoh,

Abraham dune ghu yulhtsi-un, yughudloh.10 ꞌEt huwa Abraham ꞌuyulhni, “Ndun tsꞌekoo ꞌulhna ꞌinkꞌez buyaz bulh tenabuninyoot. Ndun ꞌulhna buyaz ꞌen ꞌaw syaz Isaac tsꞌiyai nkꞌelhꞌaz yolhchoot aitꞌoh.”

11 ꞌInkꞌez daja ꞌutni whe, ꞌet Abraham ooba nekꞌeꞌ hootꞌoh nyoon ooyeꞌ ꞌen ghun.12 ꞌEt hoontsꞌi Yakꞌusda (Elohim) ꞌen Abraham ꞌuyulhni, “Khun te mba dzoh ꞌuhootꞌeꞌ junih, ndun tsꞌeke kꞌus duyaz bulh ꞌen bughun, Sarah daja nyulhni la oozilhtsꞌai, Isaac ꞌen la toh tsꞌe dune whutaleh ꞌen, nyun ntsꞌu haindene ꞌuhutitꞌelh.13 ꞌEt hoontsꞌi ndun tsꞌeke ꞌulhna ooyaz, ꞌen gha didoh-un tiselh, ntsꞌu hainzut ꞌet huwa.”

14 ꞌEt Abraham bundadaꞌ ꞌudaꞌ dudinya ꞌinkꞌez ꞌutꞌalh-i ꞌinkꞌez too cha, duwus kꞌe yinla ꞌinkꞌez duyeꞌ, Hagar ooyaz ꞌen yugha ininla, ꞌinkꞌez whenayalhꞌaꞌ. ꞌInkꞌez whe naja tsꞌeke, Beersheba chuntoh, dune lhuhóotꞌih, ꞌoh nuya.

15 ꞌInkꞌez nyoo too cha ha idalhde, ꞌinkꞌez nyoon duyaz dune ꞌilhoghun duchun sa whusꞌih-un ꞌet neinilhti.16 ꞌInkꞌez yanchꞌaz tsꞌihyan natlꞌa didaꞌ, kꞌaza be ꞌuhututsoh-un ꞌet ꞌuwhuldzoh, ꞌinkꞌez didutchꞌoh ꞌududutni, “Ndun syaz datitsah-un ꞌaw lhozoosꞌen.” ꞌInkꞌez yanchꞌaz netlꞌa didaꞌ ꞌinkꞌez whenintse.

Genesis 21 40

17 ꞌEt Yakꞌusda (Elohim) ndun tsꞌoodun ꞌutso yuduztsꞌai. ꞌEt whe Yakꞌusda (Elohim) oolizas ꞌen Hagar yutsꞌun huyih yakꞌuz tsꞌun, ꞌinkꞌez ꞌuyulhni, “Hagar, dainja whe ꞌudini? ꞌAw whenilhjut iloh! Yakꞌusda (Elohim) ndun duneyaz yudantsꞌo whe ꞌuntꞌoh.18 Dudinyaih ꞌinkꞌez tsꞌoodun dudilhtih, ꞌinkꞌez oola oontun, tube dune ootsꞌu ha tidoh whutiselh.”

19 ꞌInkꞌez Yakꞌusda (Elohim) tsꞌeke hoonꞌen yulhtsi leꞌ yinla ꞌinkꞌez nyo too dizꞌai-un ka kꞌet ꞌet whutilhꞌen, ꞌinkꞌez nyoo ꞌuzuz be too sulhdzo-i nuyaꞌa-i, ꞌi yudilhbun ꞌinkꞌez duyaz cha too yugha nilhdzo.

20 ꞌEt Yakꞌusda (Elohim) ndun duneyaz yulh ꞌuntꞌoh ꞌinkꞌez nizyai. ꞌInkꞌez nyo chuntoh ꞌet whutꞌi ꞌinkꞌez kꞌaza beꞌ tutsoh suliꞌ.21 Keyoh Paran huwhutni-un chuntoh ꞌet whutꞌi ꞌinkꞌez ooloo Egypt whutꞌen-un tsꞌeke ꞌen yuba yilhchoot ooꞌat yutaleh ha.

Ndun Abimelech ꞌinkꞌez Phichol, ꞌen Abraham huyulh yalhduk22 ꞌEt ꞌuhooja ꞌowhuya whudizulh Abimelech ꞌinkꞌez Phicol, lhuganne

bumoodih, Abraham huyulh yailhduk ꞌinkꞌez ꞌuhuyulhni, “Ntsꞌoh tila neꞌintꞌen-un tsꞌiyawh Yakꞌusda (Elohim) nyulh ꞌuntꞌoh.23 ꞌEt huwa Yakꞌusda (Elohim) nalh sudini stsꞌu haindene cha ndun syaz cha, danyusla la ngha teꞌnuszun whe neꞌnyuzusꞌen whe nyun cha whuz unꞌa neꞌsolhꞌen ndi yun kꞌut cha, ookwꞌut ninya-i cha.”

24 ꞌEt Abraham ꞌutni, “A whuz unꞌa nahutisyeh.”25 ꞌEt Abraham, Abimelech hukwaꞌ yudaniꞌ, di ha Abimelech

oonatneꞌutꞌenne ndi too dizꞌai-un ooghu huhoolhchoot.26 ꞌEt Abimelech ꞌutni, “ꞌAw tꞌeoonuzuzun njan duhooja-un ꞌaw sulhdinel, ꞌandit dzin ꞌet ꞌandit tsꞌiya tꞌeooniszin.”

27 ꞌEt Abraham ꞌusbai cha, musdoos dune cha, ꞌi Abimelech gha ininla ꞌinkꞌez nahultꞌoh lhba khuni be ba lhaoodulya.28 ꞌInkꞌez Abraham lhtakꞌantꞌi ꞌusbaiyaz, tsꞌekoo ꞌusbaiyaz ꞌi ꞌudun neininla.29 ꞌEt Abimelech Abraham yoodulhkut, “Dahoontꞌoh huwa ndi lhtakꞌantꞌi ꞌusbaiyaz ꞌudun neninla?”

30 ꞌEt ꞌuyulhni, “Ndi lhtakꞌantꞌi ꞌusbaiyaz slakꞌez olhchoot ꞌi gha tꞌeoonudzun, njan too dizꞌai-un si ꞌuwhusla wheꞌ hoontꞌoh.”

31 ꞌEt huwa njan ꞌet Beersheba whulhni nahultꞌoh lhtsꞌun nahuhisda-un ꞌet huwa.

32 ꞌEt njan Beersheba ꞌet khuni buba lhaoodulya, ꞌet Abimelech dunadija, Phicol lhuganne bumoodih bulh ꞌinkꞌez Philistinene bukeyoh tsꞌe whuz whenahitꞌaz.

41 Genesis 21

g 21:33 Ndi booziꞌ El Olam ꞌi “ꞌIlhiz Wheni Yakꞌusda unli” ni whe ꞌutni. Ndi duchun Abraham ꞌet ꞌainanla, ꞌi tube saꞌ ha nulhyeh ꞌinkꞌez tube dune ba whudiztiꞌ wheꞌ hoontꞌoh. ꞌEt Jn 1:1-2 ꞌukꞌu whuzguz whe njan ndutni, “Soo ꞌudechoo daꞌ ꞌet khuni hoonli ꞌinkꞌez ndi khuni ꞌi Yakꞌusda yulh ꞌúntꞌoh. Ndi khuni ꞌi Yakꞌusda ꞌuntꞌoh. Ndun ꞌen soo ꞌudechoo daꞌ whutsꞌun Yakꞌusda bulh ꞌuntꞌoh.” ꞌI be whutsꞌodulꞌeh, Sizi Gri ndi duchun kꞌunꞌa ꞌen ꞌilhiz wheni Yakꞌusda unli. Whuz unꞌa ndi booziꞌ “El Olam” ni whe ꞌutni. Rom 1:20; 1 Ti 1:17.

33 ꞌEt Abraham nyo Beersheba ꞌet tamarisk duchun ꞌi nyoh ꞌet ꞌainanla, ꞌinkꞌez ꞌet Moodihti (Yahweh Olam) g yuka huyih, ꞌen ꞌilhiz wheni Yakꞌusda (El) unli.34 ꞌInkꞌez Abraham nyo Philistine bukeyoh ꞌet lhat dzin ꞌet usda.

Yakꞌusda Abraham yoolhdzai

22 1 ꞌEt njan hukwꞌelhꞌaz ꞌet ꞌuhooja, Yakꞌusda (Elohim), Abraham yoolhdzai ꞌinkꞌez ꞌuyulhni, “Abraham!” ꞌEt Abraham ꞌutni,

“Njan ꞌustꞌen.”2 ꞌInkꞌez ꞌutni, “Nyeꞌ ilhchoot, nyeꞌ ꞌaw ꞌilhoghun Isaac ilhchoot

ookꞌeintsiꞌ, ꞌinkꞌez yun kꞌut Moriah tsꞌe whuz ilhtelh. ꞌInkꞌez dolhkꞌun nyo dzulh nyudutasnelh-un, ꞌet si stsꞌun dolhkꞌun sih.”

3 ꞌEt Abraham ꞌom bun ꞌudaꞌ dudinya, donkey hikꞌe ꞌinla ꞌinkꞌez nane chilke ꞌenne cha dudulh hubutilhꞌaz, ꞌinkꞌez ooyeꞌ Isaac cha. Tsuz cha lhtsꞌu neidilhnat yudutalhkꞌun wheni, ꞌinkꞌez dudinya. Whuz Yakꞌusda (Elohim) whuyuntilhtun-un tsꞌe whuz whenya.4 ꞌEt whulh tat dzin Abraham ꞌet Abraham ndo yutanꞌen, ꞌet nyo nilhdzaꞌ ꞌet whutilhꞌen.5 ꞌInkꞌez Abraham nyoonne chilkeyaz ꞌubulhni, “Njan donkey oozih suhke ndun tsꞌoodun ꞌinkꞌez nꞌun tatꞌus ꞌinkꞌez Yakꞌusda (Elohim) ootsꞌu teniꞌ uznilhdzun, ꞌinkꞌez sih nohghu naootꞌas.”

6 ꞌEt Abraham nyoo tsuz lhtsꞌe nidilhnat-i yilhchoot ꞌinkꞌez Isaac ꞌen yutꞌuyuzꞌai yutoogheꞌ ha. Didut kwun ꞌi yutizꞌai ꞌinkꞌez lhuztiꞌ cha ꞌinkꞌez whehanꞌaz.7 ꞌInkꞌez Isaac, Abraham dubá yulh yatilhduk ꞌinkꞌez ꞌutni, “ꞌUbá!” ꞌInkꞌez Abraham ꞌutni, “Syeꞌ, njan si ꞌustꞌoh.” ꞌInkꞌez Isaac ꞌutni, “Whunilhꞌen! Kwun cha titꞌai ꞌinkꞌez tsuz cha, ꞌinkꞌez ꞌusbaiyaz dutalhkꞌun-i daja?”

8 ꞌInkꞌez Abraham ꞌutni, “Syeꞌ Yakꞌusda (Elohim) didutchꞌoh la ndi ꞌusbaiyaz netlꞌa yoolhtelh,” ꞌinkꞌez nahultꞌoh whehanꞌaz.

Genesis 21 , 22 42

h 22:14 Ndi booziꞌ Yahweh-Yireh ꞌi “Moodihti ꞌen Haootiꞌalh,” ni whe ꞌutni. Yakꞌusda dichꞌoh za ndi ꞌusbai dune yukꞌé dalhti Abraham ꞌen ooyeꞌ tsꞌu yutsꞌu ꞌudutalhkꞌun ba yukꞌe danya. ꞌEt whuz unꞌa Yakꞌusda ꞌen ꞌaw ꞌilhoghun za ooyeꞌ negha nilhti tulalhgus kꞌut nekꞌedanya ha. Jn 1:29 ꞌEt ndutni, “Sizi yutsꞌun úyalh whe John yutilhꞌen, ꞌinkꞌez ꞌutni, ‘Nulhꞌen, Yakꞌusda be ꞌusbaiyaz. ꞌEn ꞌutꞌen, yinka duneꞌne bulubeshi butsꞌu ha náyule.’ ” ꞌEt whuz unꞌa ndi booziꞌ “Yahweh-Yireh” ni whe ꞌutni.

9 ꞌEt ndet Yakꞌusda (Elohim) whenilhtan-un ꞌet nehuninꞌaz ꞌinkꞌez Abraham loodel ꞌinla ꞌinkꞌez tsuz cha yukꞌe dinla ꞌinkꞌez duyeꞌ Isaac yulhghel ꞌinkꞌez tsuz yukꞌe yilhti. 10 ꞌInkꞌez Abraham lhuztih yilhchoot ꞌinkꞌez duyeꞌ yutuzilhghelh ha do dutilhni.11 ꞌEt hoontsꞌi Moodihti (Yahweh) oolizas yakꞌuz whutsꞌun yukahizya ꞌinkꞌez ꞌutni, “Abraham! Abraham!” ꞌEt Abraham ꞌutni, “Njan ꞌustꞌoh.”

12 ꞌInkꞌez ꞌuyulhni, “Nyeꞌ ookꞌedolnih junih kꞌus hoonli ꞌonleꞌ junih! ꞌAndit tꞌeooniszin Yakꞌusda (Elohim) be niljut, nyeꞌ ꞌen hoontsꞌi oochꞌa lhuyoontun ꞌaw ꞌilhoghun nyeꞌ, si schꞌa lhoontun.”

13 ꞌEt Abraham ndo yutanꞌen ꞌinkꞌez whunilhꞌen njan ootꞌa ꞌet ꞌusbai dune whutoh tsꞌuldílhtan, ꞌet oode be usdlooh. ꞌEt Abraham whuz whenya ꞌinkꞌez ꞌusbai dune yílhchoot ꞌinkꞌez ꞌi be yutsꞌeꞌ dalhkꞌun ooyeꞌ yukꞌe dalhti.14 Abraham nyo hooziꞌ whulhtsi, “Moodihti ꞌEn Neghaꞌ ooꞌalh (Yahweh-Yireh),” h whulhni. ꞌEt ꞌandit whutsꞌun ꞌi boozi unli,

43 Genesis 22

(22:9) © 1996 David C. Cook

“Moodihti (Yahweh) oodzulh kꞌut ꞌet la neghaꞌ ooꞌalh.”

15 ꞌEt Moodihti (Yahweh) oolizas ꞌen ndo yakꞌuz tsꞌun whulh nat hika huyih,16 ꞌet ꞌutni, “Sichꞌoh ooghu nahizusya, ni Moodihti (Yahweh), njan ꞌet dinja-un huwa, ꞌaw nyeꞌ ꞌen hoontsꞌi ꞌaw ꞌilhoghun nyeꞌ ꞌen hoontsꞌi schꞌa lhoontun.17 Be soo hoonzoo-un ꞌi ꞌutisdlilh, mba soo hoonzoo-un tileh. ꞌInkꞌez ntsꞌu haindene lhane whutaleh, sum kꞌunꞌa huldlai tileh, sai taba usdzai-i cha ꞌet ꞌultsuk-i hutileh ntsꞌu haindene, ꞌinkꞌez nchꞌaz ditnine bukeyoh ꞌi huyootatun.18 Ntsꞌu hainde-un ndi yun kꞌut dune tsꞌiyawh soo hoonzoo-un bugha hóotaltsꞌulh, skꞌunꞌa ꞌinja ꞌet huwa.”

19 ꞌEt Abraham chilkeyaz bughu nahuntꞌaz, dunahuditꞌaz ꞌinkꞌez keyoh Beersheba tsꞌe whehandil, ꞌinkꞌez Abraham keyoh Beersheba ꞌet whutꞌi.

Nahor tsꞌu haindene20 ꞌEt ꞌuhooja hukwꞌelhꞌaz

Abraham hidaniꞌ, “ꞌAlhaꞌ Milkah ꞌen cha buzkeh hooni Nahor nyulhutsin ꞌen buzkeh:21 ꞌUdetso ooyaz Uz huyulhni, bulhutsin Buz ꞌinkꞌez Aram oobá Kemuel.22 Chesed, Hazo, Pildash, Jidlaph, ꞌinkꞌez Bethuel.”23 ꞌInkꞌez Bethuel ꞌen Rebekah ooyaz suliꞌ, ndune lhkꞌudine ꞌenne Milcah, Nahor bubulhtsi, Abraham bulhutsin.24 Nahor ndun ooꞌat ꞌen yughu yulhtsi ꞌuntꞌoh, ꞌen booziꞌ Reumah, ꞌen cha buzkeh hooni: Tebah, Gaham, Thahash, ꞌinkꞌez Maachah.

Genesis 22 44

(22:14)

(22:24)© 1996 David C. Cook

Abraham duꞌat Sarah nyo tseꞌan ꞌet ꞌayalhti

23 1 Sarah ꞌen 127 be yus kꞌut whe dazsai. ꞌEt njan duwhuldzoh Sarah khanaꞌ.

2 ꞌEt Sarah ꞌen keyoh Kirjath Arba, (Hebron ꞌuhoontꞌoh) Canaan keyoh ꞌet dazsai ꞌinkꞌez Abraham whusainya ꞌinkꞌez Sarah yukꞌe nudleh ꞌinkꞌez yukꞌetso.

3 ꞌEt Abraham oochꞌa dazsai-un oobut dudinya ꞌinkꞌez Heth buzkeh ꞌubulhni,4 “ꞌUdun keyoh whutꞌen-un ꞌusli ꞌinkꞌez ꞌantsꞌi nohtoh nusya. Yun sgha nuhꞌaih, tsꞌun kꞌut wheni nohtoh sghu yaidlane ꞌet si ꞌabooslelh.”

5 ꞌInkꞌez Heth ooyeꞌke ꞌuhuyulhni,6 “Nemoodih, neoozilhtsꞌai, lerwe yeꞌ dune uncha-un inli whe ꞌintꞌoh netoh, ndet hukwaꞌ ninzun-un hoonzoo-un ꞌet nghu yaidlane ꞌabinle, ꞌaw nchꞌa tsꞌuhotun aitꞌoh. Dune ꞌatanlelh-un ꞌet si nghu yaidlane ꞌabonlelh.”

7 ꞌEt Abraham dudinya ꞌinkꞌez Heth buzkeh soo yun bubut nachaniti.8 ꞌInkꞌez ꞌubulhni, “Hukwaꞌ nahzun de njan snanto ꞌet ꞌabuhoolelh, soo zulhtsꞌai, Ephron, Zohar ooyeꞌ ꞌen bulh yalhduk.9 Njan nyun kꞌut whuzꞌai-un tseꞌan Machpelah oochꞌeꞌ, ꞌet sgha hoꞌalh, ndet ꞌultsuk-un ꞌet la hosket ꞌinkꞌez dune ꞌatislelh-un.”

10 ꞌEt Ephron, Heth buyeꞌke butoh whutꞌi ꞌinkꞌez Ephron Hitt whutꞌen-un ꞌuntꞌoh, ꞌen Abraham ꞌuyulhni. Heth buzkeh bunalh, njan keyoh whuti dati-un dandilhne ꞌuyulhni,11 “ꞌAwundooh smoodih! Soo zilhtsꞌai, njan yun ꞌinkꞌez tseꞌan hukwꞌuh whuzꞌai, nduwhulcho ngha oonusꞌai ndune sduneꞌne buzkeh bunalh ngha oonusꞌai ꞌet nghu yaidlahne ꞌabinle.”

12 ꞌEt Abraham tsꞌiyawh yun kꞌut whutꞌenne bubut nachanitno,13 ꞌinkꞌez Ephron bulh yalhduk nyoonne dune bunalh ubulh ꞌuyulhni, “ꞌEt sgha ooninꞌaih de soo zilhtsꞌai, sooniya hukwꞌelha tiselh njan yun, sooniya ilhchoot ꞌinkꞌez ꞌet si sghu yaidlane ꞌabooslelh.”

14 ꞌInkꞌez Ephron, Abraham ꞌuyulhni,15 “Smoodih soo zilhtsꞌai, ndi yun dit whunizyat whunizyai (400) ꞌultsuk-i silver ꞌet di whutaleh daꞌ nyun si bulh eguz, ꞌet nghu yaidlane ꞌabinle.”

16 ꞌInkꞌez Abraham Ephron yoozilhtsꞌai, ꞌinkꞌez Abraham nyoo silver nuyulhdaz Ephron yutsꞌiyoozi-i nyoonne Heth buzkeh bunalh, dit whunizyat whunizyai (400) silver ꞌet ꞌultsuk-i, ꞌoh daꞌ ꞌi yutlꞌa yandzai.

17 ꞌEt Ephron ooyun Machpelah ꞌuhoontꞌoh inleꞌ, Mamre whuzih, yun ꞌinkꞌez tseꞌan cha ꞌinkꞌez duchun cha nanudizꞌa-i tsꞌiyawh yuyonket.

45 Genesis 23

18 ꞌEt Abraham nyoonne Heth buzkeh bunalh, ꞌinkꞌez keyoh whuti dati ꞌet dandilhne cha, ꞌenne bunalh ꞌi oogha ininkat.19 ꞌEt hukwꞌelhꞌaz Abraham duꞌat Sarah nyo tseꞌan ꞌet ꞌayalhti, Machpelah ooyun kꞌut, Mamre whuzih (Hebron ꞌuntꞌoh), Canaan keyoh ꞌet.20 ꞌEt nyo yun kꞌut ꞌinkꞌez tseꞌan cha ookꞌut whuzꞌai, ꞌi Abraham yonket, Heth buzkeh ꞌenne bubuyonket dune ꞌadutilalh wheni.

Isaac ꞌawet ꞌat titꞌelh

24 1 Abraham ꞌawet tube yoo ꞌun uzulh ꞌinkꞌez Moodihti (Yahweh) tsꞌiyaitsuk Abraham soo hoonzoo-un ba whulhtsi.

2 ꞌEt Abraham yuba ꞌutꞌen-un yoo ꞌun uzulh-un, ꞌen yoh yuba huwunli-un tsꞌiyantsuk whumoodih yilhꞌi-un, ꞌen ꞌuyulhni, “ꞌAnih njan swuz tꞌah nedilnih.3 ꞌInkꞌez Moodihti (Yahweh) yakꞌuz whuYakꞌusda (Elohim), ꞌinkꞌez yun kꞌut whuYakꞌusda (Elohim) cha, ꞌen nalh stsꞌun nahitanyeh, ꞌaw njan Canaan whutꞌenne, ꞌenne butoh whustꞌine buyaz tsꞌeke ꞌen syeꞌ dune ꞌaw ꞌenne butoh ꞌaw ooꞌat sba tizulalhchulh.4 ꞌEt hoontsꞌi sichꞌoh skeyoh ꞌinkꞌez sichꞌoh snatneke ꞌenne butoh ꞌet syeꞌ Isaac ooꞌat ooba yitalhchulh.”

5 ꞌEt nyoon yuba ꞌutꞌen-un ꞌuyulhni, “ꞌInkꞌez nyoon tsꞌeke ꞌaw ndiz hukwa lheꞌnizun tila, ꞌet nyeꞌ whuz eh tistꞌelh ntsꞌez de ha kedanzut tsꞌe?”

6 ꞌEt Abraham ꞌutni, “Huwinli ꞌaw syeꞌ whuz tolhteꞌ aitꞌoh.7 Yakꞌuz whuMoodihti Yakꞌusda (Yahweh Elohim) ꞌen sbá ooyoh ꞌinkꞌez ookeyoh whuz de ha salhti, sulh yailhduk ꞌinkꞌez stsꞌun nahizya ꞌusulhni, ‘Mbene la ntsꞌu haindene ndi yun bugha inusꞌai.’ ꞌEn la oolizas ntso yutilhꞌalh ꞌinkꞌez syeꞌ ooꞌat yutaleh-un ꞌen whuz de ha talhtelh.8 ꞌEt ndun tsꞌeke ꞌaw ndiz nyulh natitꞌus hukwa lheꞌnizun de, ꞌet de ndi khuni be stsꞌun nahizinya-i gak natidleh, ꞌet hoontsꞌi ꞌaw syeꞌ whuz tolhteꞌ aitꞌoh.”9 ꞌEt nyoon hiba ꞌutꞌen-un yuwuz tꞌah nedilni Abraham ꞌinkꞌez ꞌuyulhni, yutsꞌu nahizya daja yulhni.

10 ꞌEt nyoon yuba ꞌutꞌen-un, whunizyai oomoodih oochꞌeꞌ khuna-i, camel huyulhni, yilhchoot ꞌinkꞌez whenya. Ndai la oomoodih oochꞌeꞌ tsꞌiyawh didut oola kꞌet yuzdla wheꞌ hoontꞌoh ꞌinkꞌez dudinya. ꞌInkꞌez yun kꞌut Mesopotamia, Nahor ookeyoh, ꞌet whuz whenya.11 ꞌInkꞌez nyo keyoh whughu ninya whe tadizꞌai, too kꞌet whuzꞌai, ꞌet nyoo camel dugwut tsi be ꞌet nebuninla, ꞌowhuya whudizulh ꞌet tsꞌekoo too huhudilh.

Genesis 23 , 24 46

12 ꞌInkꞌez ꞌutni, “O Abraham smoodih ooMoodihti Yakꞌusda (Yahweh Elohim), soo tsꞌihꞌun unꞌa lhaoodoosleh-un ꞌet sgha ooninꞌaih ꞌinkꞌez smoodih Abraham soo teꞌ ninzun-i be neꞌolhꞌen.13 Whunilhꞌen njan too dizꞌai-un ꞌet whuzih susyin, ꞌinkꞌez njan keyoh whuduneꞌne butseꞌke, too huhutidulh ꞌawet nilhdukw.14 ꞌEt lhaoodonleh mbe la tsꞌekeyaz ꞌudutasnelh-un, nyoo too be silhdzo-i yun neninꞌaih oosnaiꞌ sih dusni-un, ꞌen sih dooniꞌ, ‘Too intnai ꞌinkꞌez nyoo camel ꞌi cha si oogha taooꞌalh,’ sulhni-un, ꞌen ootꞌeꞌ, mba ꞌutꞌen-un Isaac ooꞌat wheni ꞌet si tꞌeoonoszin, ꞌawet smoodih oogha teꞌninzun hukwꞌunꞌa ꞌinla.”

15 ꞌEt ꞌuhooja ꞌawhuz yalhduk whe ꞌet Rebekah huyulhni-un, Bethuel ootseꞌ, Milcah ooyaz, Nahor ooꞌat, Abraham bulhutsin, ꞌen ꞌowhuya too ha tizya oosaꞌ duwus kꞌut yulhꞌai.16 ꞌEt nyoon tꞌetyaz, tube tsꞌekezooꞌ ꞌaw dune yatꞌalhasnai ꞌawhuz unli, ꞌet nyooz too ha tizya nyoo dude oosaꞌ yudilhbun ꞌinkꞌez nyus de ha naja.

17 ꞌInkꞌez nyoon Abraham yuba ꞌutꞌen-un yududilhgai ꞌinkꞌez ꞌuyulhni, “Sla ꞌineh whe nyoo nye oosaꞌ be sulhdzo-i, too oosnaiꞌ-un sgha ooninꞌaih.”

18 ꞌEt tsꞌekeyaz ꞌuyulhni, “Too intnai smoodihti.” ꞌInkꞌez ꞌaho dude oosaꞌ duwus kꞌe itizꞌai ꞌinkꞌez dula tsꞌun ye neininꞌai, ꞌinkꞌez yugha tanilhdzo.

19 ꞌEt hukwꞌelhꞌaz too ꞌutnai lhadutja whe ꞌet ꞌutni, “Nyoon camel ꞌi cha sih too nahootnaiꞌ.”20 ꞌEt soo ꞌaho ꞌet nyoo huye tatnai-i duchun ꞌi too huba idilhbun, ꞌinkꞌez too dizꞌai-un whuz whenalgih whe ndi camel tsꞌiyawh hititnelh huba.21 ꞌInkꞌez nyoon dune tꞌedusnih ꞌet la Moodihti (Yahweh) whusainya-un, tsꞌiyawh lhaoodutneh tila kꞌus gak tila.

22 ꞌEt doo cha nyoo khuna-i camel tanatnaiꞌ hukwꞌelhꞌaz ꞌet nyoon dune nyoo gwul ndultꞌoh-i bunintsis huba, ꞌilho shekel huyulhni, ꞌilhudzin dune yukꞌelha ꞌutꞌih-i ꞌuldaz lhulcho ꞌinkꞌez nanki lachun huyulhya-i, ꞌi whunizyai shekel, ꞌi cha tsꞌiyawh gold ꞌuntꞌoh.23 ꞌInkꞌez ꞌutni, “Mbe ootseꞌ inli whe ꞌintꞌoh? Sudini, mbá ooyoh neba sooꞌ whulcho tilah ꞌet uztitez huba?”

24 ꞌEt ꞌuyulhni, “Si Bethuel ootseꞌ Milcah ooyaz, ꞌen Nahor ooghu yulhtsi-un ꞌustꞌoh.”25 ꞌInkꞌez ꞌon ꞌun cha ꞌuyulhni, “Tlꞌo cha lhai tsꞌutꞌi, ꞌinkꞌez tihtez-un cha sooꞌ whulcho.”

26 ꞌEt dune yo nenintꞌai ꞌinkꞌez Modihti (Yahweh) yutsꞌun teniꞌ nalhdzin.

47 Genesis 24

27 ꞌInkꞌez ꞌutni, “Ooba ꞌustꞌen-un Abraham ooYakꞌusda (Elohim) ꞌinkꞌez ooMoodihti (Yahweh) cha ꞌen dotiꞌ. ꞌAw ndun ooba ꞌustꞌen-un ye yugha teꞌninzun ꞌinkꞌez ye tsꞌihꞌun ꞌuntꞌoh-i cha yula lhditnih. ꞌEt si ꞌowhuya usyalh Moodihti (Yahweh) ꞌen ndun ooba ꞌustꞌen-un oonatneke ꞌen whusunilhtan, ꞌet whuz oozusya.”

28 ꞌEt nyoon tꞌetyaz yoh tsꞌu whelgai ꞌinkꞌez duloo ooyoh tsꞌe hubudaniꞌ.29 ꞌEt Rebekah bulhutsin, Laban huyulhni, ꞌinkꞌez Laban ꞌen nꞌaz yutsꞌun telhgai ꞌinkꞌez nyoon dune too dizꞌai-un yuzih usyin-un, ꞌen yuzih neninya.30 ꞌEt ꞌuhooja nyoo yuni wheni yugha ininla ꞌinkꞌez nyoo lachun wheni gha ininla ꞌi cha yunilhꞌen ꞌinkꞌez nyoon dulhtus ooghuni yudantsꞌo ꞌet ꞌinkꞌez ꞌutni, “Whuz unꞌa dune sulh yalhduk,” ꞌinkꞌez nyoon dune yubut neninya ꞌinkꞌez ꞌet yubut usyin nyoo camel oozih cha too kꞌet whuzih.31 ꞌEt ꞌuyulhni, “Daninyaih Moodihti (Yahweh) dawhuldzooꞌ-un oogha whultsꞌut! Di ha dati sinyin? Yoh lhaoodusla ꞌinkꞌez khuna-i, Camel, cha ba lhaoodusla.”

32 ꞌEt nyoon dune yoh daninya ꞌinkꞌez nyoo khuna-i camel, ꞌi cha yukꞌeꞌ tizdla ꞌinkꞌez tlꞌo cha yutiꞌulh-i cha yubut neidilhdze. ꞌInkꞌez too duke ye tunatigus-i cha ꞌinkꞌez nyoonne dune yulh nudilhne, ꞌenne cha buke huye tunatigus inleꞌ buba ꞌet neininla.33 ꞌInkꞌez ꞌutꞌalh-i cha bubut neꞌhuninla ꞌinkꞌez ꞌutni, “Ndet huwa njan whusasya-un ꞌawhuz lhunoduzusnih wheꞌ oosꞌalh aitꞌoh.” ꞌInkꞌez ꞌuyulhni, “A, yailhduk!”

34 ꞌEt ꞌutni, “Abraham ba ꞌutꞌen-un ꞌusli whe ꞌustꞌoh.35 Moodihti (Yahweh) ꞌen smoodih tube soo hoonzoo-un yuba whulhtsi ꞌinkꞌez dune ncha-un suliꞌ. Khuna-i didoh-i tsꞌiyawh ꞌinkꞌez silver ꞌinkꞌez diztiꞌ-i gold duntꞌi-i, ꞌinkꞌez dune cha, tsꞌekoo yuba ꞌutꞌenne cha ꞌinkꞌez ndi camel cha ꞌinkꞌez donkey cha lhai yugha ninla.36 ꞌInkꞌez Sarah, smoodih ooꞌat, ꞌen dune ooyaz suliꞌ, tube hoonyan unli, ꞌet hoontsꞌi. ꞌInkꞌez ꞌen huye tsꞌiyai ꞌutꞌi tsꞌiyawh yugha ininla.37 ꞌEt smoodih nahinyeh sulhni, ꞌinka nahizusya, ‘ꞌAw Canaan whutꞌenne buyun kꞌut whustꞌine ꞌenne butsꞌu hainzut-un syeꞌ ooꞌat olhchoot juni.38 ꞌEt hoontsꞌi sba ooyoh ꞌinkꞌez snatneke butoh ꞌet syeꞌ ba ooꞌat olhchoot.’

39 ꞌEt smoodih ꞌudusni, ‘Ndun tsꞌeke ꞌaw sulh natitꞌus hukwa lheꞌnizun de?’

40 ꞌEt hoontsꞌi ꞌusulhni, ‘Moodihti (Yahweh) mbe la ootso nusya-un, ꞌen lizas yulh tiꞌus ha yutlꞌa itilhtelh ꞌinkꞌez inyalh whe sooꞌ hoontꞌoh

Genesis 24 48

whe syeꞌ ba ooꞌat snatneke butoh ꞌinkꞌez sbá ooyoh whutsꞌun, whuz de hainzut-un ꞌen ooba yutalhchulh.41 Ndet la snatneke butoh ninya de, ndun tsꞌeke ꞌaw hukwa lheꞌhunizun de, be tsꞌu nahizinya-i gak natidleh.’

42 ꞌEt ꞌandit dzin nyo too dizꞌai-un ꞌet nenusya whe ꞌudusni, ‘O Moodihti (Yahweh), ooba ꞌustꞌen-un Abraham ooYakꞌusda (Elohim), soo sba lhaoodonleh ntsꞌe usyalh-un.43 Nulhꞌen too dizꞌai-un whuzih susyin whe ꞌet de la ꞌuhoneh tꞌet ootꞌa lheꞌasnai-un, too ha tiyalh ꞌinkꞌez ꞌudusni, “Tooyaz sgha nilhdzeh nyoo nye oosaꞌ be.”44 ꞌInkꞌez ꞌusudutanelh, “Too intnai ꞌinkꞌez nyoo nghunaꞌ, Camel, ꞌi cha sih too ooba ꞌoosleh ititnelh-i,” Moodihti (Yahweh), ꞌen tsꞌeke ootꞌeꞌ smoodih ooba ꞌustꞌen-un, ooyeꞌ ꞌen ba ootꞌeꞌ.’

45 ꞌEt hoontsꞌi ꞌawhuz sdzi bez yasduk whe Rebekah ꞌowhuya uyalh dude oosaꞌ duwus kꞌuyulhꞌai ꞌinkꞌez too dizꞌai-un tsꞌe tainkai ꞌinkꞌez ꞌudusni, ‘Aweꞌ too sgha nilhdzeh tisnelh-i.’

46 ꞌInkꞌez soo ꞌahoh ꞌet dude oosaꞌ duwus kꞌe tizꞌai ꞌinkꞌez ꞌusulhni, ‘Too intnai ꞌinkꞌez nghunaꞌ ꞌenne cha sih too buba ꞌoosleh.’ ꞌInkꞌez too usnaiꞌ ꞌinkꞌez sghunaꞌ, ꞌi cha too yutitnelh-i ba lhaidinla.

47 ꞌEt ooduskut ꞌinkꞌez ꞌudusni, ‘Mbe ootseꞌ inli whe ꞌintꞌoh?’ ꞌInkꞌez ꞌutni, ‘Bethuel ootseꞌ, Nahor ooyeꞌ Milcah ghu yulhtsi-un inleꞌ-un.’ ꞌEt nyo ooni huba cha ꞌinkꞌez lachun huba cha ꞌi oogha inusla.

48 ꞌEt stsi be yo ꞌusja ꞌinkꞌez Moodihti (Yahweh) tsꞌun teníꞌ nalhdzin, ꞌinkꞌez smoodih Abraham ꞌen ooMoodihti Yakꞌusda (Yahweh Elohim) ꞌen ooba soo hoonzoo-un whulhtsi, ꞌen whuz be ntsꞌe tsꞌihnus tsꞌun ꞌutisnelh whe smoodih be ꞌilhoghun ꞌen ootseꞌ, ꞌen ꞌutahatálhtelh smoodih ooyeꞌ ba.49 ꞌEt soo teꞌnuzun whe tsꞌihꞌun ꞌunꞌa smoodih ꞌutilelh suduhni, ꞌet ꞌawundooh de, ꞌet de natisdalh nailhnih tsꞌunkꞌus tila toosyaꞌ, kꞌus ꞌintlꞌus tsꞌe tila natoojaꞌ, ꞌet sudohniꞌ.”

50 ꞌEt Laban ꞌinkꞌez Bethuel bulh ꞌuhuyulhni, “Moodihti (Yahweh) tsꞌu ha hooltsꞌut wheꞌ hoontꞌoh, ꞌaw hoonzoo-un hukwꞌunꞌa kꞌus hoontsiꞌ kꞌunꞌa nyulh yatsꞌoolhduk aitꞌoh.51 Njan Rebekah, mbut usyin ilhchoot ꞌinkꞌez naindalh. ꞌEn ooba ꞌintꞌen-un ooyeꞌ, ooꞌat ooleh sih, Moodihti (Yahweh) yatilhduk hukwꞌunꞌa.”

52 ꞌEt hukwꞌelhꞌaz Abraham ba neꞌutꞌen-un ndi khuni yudantsꞌo whe, ꞌawet yun nachaniti ꞌinkꞌez Moodihti (Yahweh) yutsꞌun teniꞌ nalhdzin.53 ꞌEt nyoon Abraham yuba ꞌutꞌen-un, diztiꞌ-i khutsꞌulhya-i, silver cha, ꞌinkꞌez gold cha ꞌuntꞌoh ꞌinkꞌez naih cha, ꞌi Rebekah yugha ininla, ꞌinkꞌez diztiꞌ-i bulhutsin cha ꞌinkꞌez ooloo cha ꞌi bugha ininla.

49 Genesis 24

54 ꞌEt whe didut ꞌinkꞌez dune hiyulh nudilh ꞌenne ꞌuhanꞌalh ꞌinkꞌez tahitnaiꞌ. ꞌEt ꞌulhdzis nduhoolhyiz ꞌet hantez. ꞌEt whe bundadaꞌ duhudindil ꞌinkꞌez ꞌet ꞌutni, “Sumoodih tsꞌun nasalhꞌalh.”

55 ꞌEt hoontsꞌi Rebekah bulhutsin ꞌinkꞌez ooloo cha ꞌuhutni, “Whute ndet tꞌet ꞌatsul nezih naoodaꞌ whunizyat dzin atꞌen, ꞌet de hukwꞌelhꞌaz ꞌet sih nyulh natooꞌas.”

56 ꞌEt ꞌubulhni, “Dah sudohniꞌ junih! Moodihti (Yahweh) ꞌen lheꞌwhuldzooꞌ-un sba whulhtsi. Skꞌoh ndiz nutisyalh-un, whute nasilhꞌalh smoodih tsꞌun natoosjaꞌ.”

57 ꞌEt ꞌuhuyulhni, “Ndun tꞌetyaz ꞌanih tsꞌudoniꞌ ꞌinkꞌez didutchꞌoh tsꞌoodolhkut.”58 ꞌEt Rebekah, ꞌanih, hidaniꞌ, ꞌinkꞌez ꞌuhuyulhni, “Ndun dune bulh tanꞌus eh?” ꞌEt ꞌutni, “A, whuz toosyaꞌ lah.”

59 ꞌEt ꞌinka Rebekah dudulhtus ꞌinkꞌez yughunli-un tsꞌeke, ꞌinkꞌez Abraham yuba ꞌutꞌen-un ꞌinkꞌez dune tubulh ubulh whe huyalhꞌaꞌ.60 ꞌInkꞌez Rebekah soo hoonzoo-un hiba tenadidli ꞌinkꞌez ꞌuhuyulhni,

“Neulhtus, lhez te whunizyai lhkꞌuz te (100,000,000) dune buloo ꞌonleꞌ sih

ꞌinkꞌez ntsꞌu haindene mbene la butsꞌu dutnine hukwuti-un dati ꞌi himoodih ooleꞌ.”

61 ꞌEt Rebekah ꞌinkꞌez mbene la yuba ꞌutꞌenne tsꞌekoo, dodindil ꞌinkꞌez nyoo Camel hikꞌe tlꞌa diltsꞌiꞌ, nyoon dune huyuntizdil ꞌinkꞌez Abraham hiba ꞌutꞌen-un, Rebekah hubilhchoot ꞌinkꞌez nahutisdil.

62 ꞌEt Isaac nyan whutꞌi Beer Lahai Roi huwhutni, ntsꞌun whuz whutꞌi.63 ꞌEt Isaac hulhgha nusꞌa yun kꞌut nuni nuzut ha whuz oozya. Ndo yutanꞌen ꞌinkꞌez whunilhꞌen, ꞌet nyo camel whuz de nalꞌus.64 ꞌEt Rebekah ndo yutanꞌen ꞌinkꞌez Isaac yunilhꞌen whe camel yukꞌutizya, nyoo khuna-i kꞌusda-i.65 ꞌEt nyoon ba ꞌutꞌen-un yoodulhkut, “Nyoon dune netsꞌoyalh-un, mbe whe ꞌutꞌen?” ꞌEt ndun ba ꞌutꞌen-un ꞌuyulhni, “Smoodih ꞌutꞌen.” ꞌEt Rebekah dunin kꞌeꞌ nilhbal.

66 ꞌEt nyoon Abraham yuba ꞌutꞌen-un ntsꞌoh tila datꞌen-un ꞌet Isaac yudaniꞌ.67 ꞌEt Isaac duloo Sarah oonimbali tꞌah tsꞌe Rebekah dainilhti ꞌinkꞌez Rebekah yuꞌat suliꞌ, ꞌinkꞌez yukꞌentsiꞌ. ꞌEt Isaac ooloo dazsai whe tube kꞌe naininꞌa.

Abraham ꞌinkꞌez Keturah

25 1 ꞌEt Abraham ooꞌat cha, Keturah huyulhni, ꞌen yughu nasda.2 ꞌEn cha yuba buzkeh hooni, Zimran, Jokshan, Medan, Midian,

Ishbak, ꞌinkꞌez Shuah.

Genesis 24 , 25 50

3 Jokshan ꞌen Sheba ꞌinkꞌez Dedan bulh buzkeh suliꞌ, ꞌinkꞌez Dedan ooyeꞌke ꞌenne Asshurim Lutushim ꞌinkꞌez Leumim.4 ꞌInkꞌez Midian ooyeꞌke, ꞌenne Ephah, Epher, Hanoch, Abida ꞌinkꞌez Eldaah ꞌenne tsꞌiyawh Keturah buzkeh.

5 ꞌInkꞌez Abraham ndai la yutꞌi-i tsꞌiyawh Isaac gha ininla.6 ꞌEt hoontsꞌi Abraham ꞌuyoonne tsꞌekoo ooꞌat bugha nyus ꞌuhintꞌohne, ꞌenne bubuzkeh ꞌenne cha butsꞌeꞌ tilhdil, butlꞌaꞌ ꞌandla ꞌinkꞌez ooyeꞌ Isaac yuchꞌaz ndaꞌ ꞌutsꞌun keyoh tsꞌe whuz whe balhꞌaꞌ.

Abraham dazsai ꞌinkꞌez ꞌahuyalhti7 Njan duwhultsuk yus kꞌut ꞌet ndi yun kꞌut indaꞌ Abraham 175 yus

kꞌut ꞌet ndi yun kꞌut indaꞌ.8 ꞌEt Abraham ꞌen ꞌudekꞌez ha naji ꞌinkꞌez soo hoonyan suliꞌ whe dazsai. Tube hoonyan ꞌinkꞌez ndi yinka indaꞌ ꞌet ba whudizbun. ꞌEt whe duduneꞌ ꞌenne butsꞌun whe naja.9 ꞌInkꞌez ooyeꞌke Isaac ꞌinkꞌez Ishmael, ꞌenne nyo Machpelah tseꞌan ꞌet ꞌahuyalhti. Mamre whutso Ephron ootlꞌo kꞌut, Zohar Hitt whutꞌen-un, ꞌen ooyeꞌ, ꞌet nyo tseꞌan ꞌet ꞌahuyalhti.10 Nyoo tlꞌo kꞌut Abraham Heth buzkeh butsꞌun yonket-i, ꞌet Sarah oozih ꞌet Abraham ꞌahuyalhti.11 ꞌEt whe lhuwhuzut Abraham dazsai hukwꞌelhꞌaz, ꞌet Yakꞌusda (Elohim) ꞌen ooyeꞌ Isaac soo hoonzoo-un yubaꞌ hoonla. ꞌInkꞌez Isaac ꞌen Beer Lahai Roi ꞌet whutꞌi.

Ishmael ꞌinkꞌez Isaac tsꞌu haindene12 Ndunne ꞌenne Ishmael tsꞌu haindene: Ishmael ꞌen Abraham ooyeꞌ,

Hagar Egypt whutꞌen-un, ꞌen Sarah yunat neꞌutꞌen-un, ꞌen ooyaz, ꞌen Abraham yughulhtsi-un ooyeꞌ.

13 Ndowhi ꞌi Ishmael ooyeꞌke bubooziꞌ: ꞌudechoo Nabajoth, ꞌet hukwꞌelhꞌaz Kedar, Adbeel ꞌinkꞌez Mibsam,14 Mishma, Dumah, Massa,15 Hadar, Tema, Jetur, Naphish, ꞌinkꞌez Kedemah.16 ꞌEnne Ishmael ooyeꞌke ꞌuhintꞌoh. Ndi ꞌi bubooziꞌ ntsꞌe bukeyoh ꞌinkꞌez hudilhtsꞌi ꞌet. Whunizyai ꞌon ꞌat nanki (12) budayiyaz, ꞌenne ntsꞌe ha hande hukwa sih booziꞌ.17 Ishmael ndi yun kꞌut ꞌinda-un, 137 be yus kꞌut ꞌet dazai. ꞌEn cha whutsodaꞌ yulh ꞌuntꞌohne butsꞌun whenya.18 Yun kꞌut Havilah ꞌinkꞌez Shur ꞌet ꞌuwhuldzoh, Egypt whandaꞌ, Assyria tsꞌu wheti, ꞌoh huwhutꞌi ꞌinkꞌez Ishmael dunatneke butoh ꞌet dazsai.

51 Genesis 25

19 Ndi ꞌi Abraham ooyeꞌ Isaac ootsꞌu ha yandene. Abraham ꞌen Isaac oobá.

20 Isaac ꞌen dit whunizyai (40) naoodizut whe ooꞌat Rebekah ꞌen yughusda. Bethuel ootseꞌ ꞌen Syria whutꞌen, Padan Aram keyoh, ꞌet Laban, ꞌen Syria whutꞌen ꞌen bulhtus.

21 ꞌEt Isaac ꞌen Moodihti (Yahweh) yutsꞌu tedudlih duꞌat ba, ꞌaw buzkeh holeꞌ aitꞌoh. ꞌEt Moodihti (Yahweh) ꞌet yugha ooninꞌai ꞌinkꞌez Rebekah ulchan.22 ꞌEt nyo oochan tsꞌe nane nukahulhoh, “Soo ꞌustꞌoh ꞌet hoontsꞌi ꞌet di ha njan dustꞌoh?” ni, ꞌinkꞌez Moodihti (Yahweh) yoodalhkut.

23 ꞌEt Moodihti (Yahweh) ꞌen Rebekah ꞌuyulhni,“Nawh didohne ꞌenne nchan ꞌuhintꞌoh.Nawh didohne ꞌenne hubutalhtsi,ꞌilhoh didoh-un ꞌen onghun-un ha nus ulhtus,ꞌinkꞌez ꞌudetso whutileh-un ꞌen dukꞌoh-un yuba neꞌtitꞌen.”

24 ꞌEt ꞌawet ooba newhultsꞌut ooyaz whutaleh ha, ꞌet nane lhtꞌudinke oochan.25 ꞌUdetso whuzdli-un ꞌen dulkꞌun ꞌinkꞌez ꞌantsꞌi naih ꞌugha unli ꞌi yesda leꞌ ꞌuntꞌoh ndulcho whe ooyustꞌe, ꞌen Esau huyulhni.26 ꞌEt hukwꞌelhꞌaz bulhutsin ꞌen whuzdli, ꞌinkꞌez Esau ookentsul ꞌi yilhchoot. ꞌEn Jacob huyulhni. Isaac lhkꞌu tat whunizyat be yus kꞌut (60) ꞌet nyoon tsꞌoodunne huwhuzdli.

27 ꞌEt nyoonne duneyaz huniyilh, Esau ꞌen tube ꞌukaꞌ ꞌutꞌen-un ꞌinkꞌez chuntoh whuduneꞌ whe ꞌuyoo unli. ꞌEt hoontsꞌi Jacob ꞌen tꞌedusnih-un dune unli, nimbali tꞌah za whutꞌi.28 ꞌInkꞌez Isaac ꞌen Esau yukꞌentsiꞌ, ndai yughan-i yuꞌalh, ꞌinkꞌez Rebekah ꞌen Jacob yukꞌentsiꞌ.

Esau ndai la kꞌat le oogha itakulh-i, ꞌi Jacob ꞌen ye tsꞌun ꞌonket29 ꞌAw ꞌet Jacob tazul ꞌinla ꞌinkꞌez Esau ꞌen chuntoh tsꞌun ha naja

ꞌinkꞌez tube nenintsai.30 ꞌEt Esau ꞌen Jacob ꞌuyulhni, “Sla ꞌinleh whe nyutazul dulkꞌun, ꞌi za sunailꞌalh, tube nenisai ꞌet huwa.” ꞌEt huwa booziꞌ ꞌi Edom tsꞌutni.

31 ꞌEt hoontsꞌi Jacob ꞌutni, “Ndai la mba ootadzilh-i kꞌat le, ꞌi ꞌandit be stsꞌeꞌ oonket.”

32 ꞌInkꞌez Esau ꞌutni, “Whunilhꞌen ꞌawet datisah! Be daoostꞌeꞌ suba ndi sba huyoozi-i?”

33 ꞌEt Jacob ꞌutni, “ꞌAndit dzin stsꞌun nahinyeh.” ꞌEt huwa yutsꞌu nahizya ꞌinkꞌez ndai la kꞌat le oogha itakulh-i, ꞌi Jacob ꞌen ye tsꞌun ꞌonket.

Genesis 25 52

34 ꞌInkꞌez Jacob, Esau ꞌutꞌalh-i ꞌinkꞌez nyoo yuzdliz-i ha nuyeh, ꞌi yugha ininla ꞌinkꞌez ꞌi yanꞌal, ꞌinkꞌez dunadija ꞌinkꞌez ꞌaz whe naja. ꞌEt Esau ndai la kꞌat le oogha itakulh-i tsꞌiyawh ꞌaw yukalheꞌnizun, ꞌun yutilhdil.

Isaac ꞌinkꞌez Abimelech

26 1 ꞌEt nyo keyoh dai dinzut, whutsodaꞌ Abraham khuna whe ꞌet cha dai dinzut inleꞌ ꞌinkꞌez Isaac, Abimelech huyulhni,

Philistine whutꞌenne buba lerwe, Gerar whutꞌi, ꞌen butsꞌun whenya.2 ꞌEt Moodihti (Yahweh) yunalhtsꞌet hainya ꞌinkꞌez ꞌuyulhni, “ꞌAw Egypt tsꞌu tonyaꞌ junih. Ndet la yun nyudutasnelh-un ꞌet sih hontꞌeꞌ.3 Ndi yun ꞌi kꞌut hontꞌe ꞌinkꞌez nyulh ꞌutistꞌelh, ꞌinkꞌez mba soo hoonzoo-i ubooselh. Nyun cha ꞌinkꞌez ntsꞌu haindene cha ndi yun bugha inusꞌai, ndet la mbá Abraham ootsꞌu nahizusya-i, ꞌi lhadutisleh ꞌet huwa.4 ꞌInkꞌez ntsꞌu haindene, ꞌenne yakꞌuz whusum kꞌunꞌa lhkꞌuz te huldlai hubutilhtselh. ꞌInkꞌez ntsꞌu hainde ꞌen tsꞌiyawh njan yun kꞌut bugha óotasꞌalh. ꞌInkꞌez ntsꞌu haindene, ꞌenne bugha ndi yun kꞌut dune tsꞌiyawh huba soo hoonzoo-i ꞌi butilhtselh.5 Abraham ꞌen sghuni oontun ꞌinkꞌez skꞌoh tsꞌe ꞌantꞌeꞌ, sghuni ꞌi yukꞌuneꞌ ꞌustꞌen, dadusni, ꞌet cha hontun, ꞌinkꞌez ntsꞌenꞌa ba newhuninꞌai, ꞌet huwa.”6 ꞌEt Isaac nyo keyoh Gerar howhutni-un ꞌet hootꞌeꞌ.

7 ꞌEt nyoonne dune ꞌet whuduneꞌne hiꞌat ka huyoodulhkut ꞌinkꞌez ꞌubulhni, “Sulhtus ꞌuntꞌoh.” “Sꞌat ꞌuntꞌoh” hubulhni de, doo ka la sozoolhghelh ninzun ꞌawhuz ndun Rebekah tsꞌekezooꞌ ꞌet huwa.

8 ꞌEt ꞌuhooja saꞌ nyo ꞌet keyoh hootꞌeꞌ whe Abimelech, Philistinene bulerwe, dadintꞌaz kꞌet ꞌaz whunilhꞌen whe Isaac, Rebekah yughu dzedziꞌ whe yunulhꞌen.9 ꞌEt Abimelech Isaac, “ꞌAnih!” yudaniꞌ, “ꞌAlhaꞌ ꞌuhoontꞌoh whe ndun tsꞌeke nꞌat ꞌuntꞌoh ꞌinkꞌez ntsꞌenꞌa ꞌudini ‘Sulhtus ꞌuntꞌoh,’ dini?” ꞌInkꞌez Isaac ꞌuyulhni, “Doo ka sih ookꞌuz daoosah ꞌinka ꞌudusni.”

10 ꞌInkꞌez Abimelech ꞌutni, “ꞌEt dane ꞌinla whe neꞌinla? Nyoonne dune ꞌilhoghun te daꞌ, nyoon nꞌat yuchan tꞌeooteꞌ ooleꞌ! Njan lheꞌhoontꞌoh-un ꞌet daꞌ nekꞌe holtsꞌit ooleꞌ.”

11 ꞌEt Abimelech mbene la duduneꞌne ꞌubulhni, “Ndun dune kꞌus ooꞌat te ootꞌa izahnai de, datihtsah.”

12 ꞌEt Isaac nyo yun kꞌut ꞌaꞌ nanla ꞌinkꞌez yus kꞌut haꞌ nanla. Lhai haꞌ nanla, 100 ꞌet ꞌuwhultsuk, ꞌinkꞌez Moodihti (Yahweh) soo hoonzoo-un yuba whulhtsi.

53 Genesis 25 , 26

13 ꞌEt ndun dune ꞌawet hoonzoo whe ninleꞌ ꞌinkꞌez lhkꞌuz te whe tube hoonzoo suliꞌ.14 ꞌUsbai ꞌi yulh lhai suliꞌ, musdoos ꞌi cha lhai whe yutꞌi suliꞌ, ꞌinkꞌez hinat neꞌutꞌen ꞌenne cha huldlai. ꞌEt whe Philistine whutꞌenne higheꞌ oolnih huzliꞌ.15 ꞌEt nyoonne Philistinene nyo too dizdla-un ꞌuhuhoonla-un, tsꞌiyawh lhez buchꞌa ꞌananuhulhkat, Abraham yuba ꞌutꞌenne, ꞌenne ha huhonkai, Abraham khuna whe, ꞌinkꞌez nyoonne sai dizbun whe ꞌananulhkat.

16 ꞌInkꞌez Abimelech, Isaac ꞌuyulhni, “Nechꞌa naindalh! Neanus ilhtus whe ꞌintꞌoh.”

17 ꞌEt Isaac nyo huwu natisja ꞌinkꞌez dzulh eguz, Gerar, ꞌet nimbali neninꞌai ꞌinkꞌez ꞌet whutꞌi.18 ꞌInkꞌez Isaac doo cha nyo too kꞌet naꞌhoonla, mbe la oobá ꞌulhuhoonla-un inleꞌ-un. ꞌOh daꞌ tsꞌiyawh nyoonne Philistinene tsꞌiyawh lhez ꞌanunahulhkat inleꞌ. ꞌInkꞌez ndai la nyo too dizdla-un oobá ye honziꞌ-un, whuz unꞌa hooziꞌ nawhulhtsi.

19 ꞌInkꞌez Isaac yuba ꞌutꞌenne nyo dzulh eguz ha huhonkai, ꞌet doo cha too unzoo hoonli-un ꞌet nahuhoonꞌai.20 ꞌEt hoontsꞌi nyoonne Gerar whutꞌenne khuna ghunline, Isaac khunaꞌ ghunline tube hube hududulh. Nyoonne Gerar whutꞌenne hutni, “Ndi too nechꞌeꞌ ꞌuntꞌoh!” hutni, ꞌet nyo too kꞌet, ꞌet Esek yooziꞌ, hiye dindil ꞌet huwa.21 ꞌEt doo cha ꞌudun too dizꞌai-un ꞌuhuhoonla. ꞌEt nyo ꞌet cha hukwa lhehudindil, ꞌet cha hooziꞌ whulhtsi, Sitnah whulhni.22 ꞌEt nyo tizna ꞌinkꞌez doo cha ꞌudun too kꞌet ꞌuhuhoonla. ꞌEt ꞌaw hukwa lhelhdulhyoh lheꞌhuditnelh ꞌet huwa, Rehoboth whulhni. ꞌEt ꞌutni, “ꞌAndit njan Moodihti (Yahweh) hooncha neba whulhtsi, soo lhai cho la ꞌutsꞌooleh ndi yun kꞌut.”

23 ꞌInkꞌez ꞌet whe dinya ndo Beersheba tsꞌun whenya.24 ꞌEt ꞌulhdzis za Moodihti (Yahweh) yunalhtsꞌet hainya ꞌinkꞌez ꞌutni, “Mbá Abraham ooYakꞌusda (Elohim) ꞌustꞌoh. Whenilhjut iloh, nyulh ꞌustꞌen ꞌinkꞌez soo hoonzoo-un mba whutiselh ꞌinkꞌez ntsꞌu haindene cha lhane hutileh, ndun sba ꞌutꞌen-un Abraham ꞌen gha.”

25 ꞌEt nyo loodel ꞌinla ꞌinkꞌez Moodihti (Yahweh) yuka huyih ꞌinkꞌez ꞌet nimbali neninꞌai. ꞌEt doo cha Isaac yuba ꞌutꞌenne too kꞌet ha honkai.

26 ꞌEt Abimelech yughu ninya keyoh Gerar tsꞌe hainya, ookꞌeke ꞌilhoghun Ahuzzah huyulhi, ꞌinkꞌez Phichol lhuganne bumoodih ꞌen tubulh.27 ꞌInkꞌez Isaac ꞌubulhni, “ꞌEt di ha sghu nuhdil, stsꞌu duhni ꞌinkꞌez whenasunihyoot inleꞌ?”

Genesis 26 54

28 ꞌEt hoontsꞌi ꞌuhuyulhni, “Soo tsꞌihꞌun ꞌalha tꞌetsꞌonanzin Moodihti (Yahweh) nyulh ꞌuntꞌoh. ꞌEt ꞌutsꞌutni, ‘Natsꞌuhooyeh nyun ꞌinkꞌez wheni tubulh natsꞌuhooyeh,’ huyulhni.29 ꞌAw hoonli hoontsiꞌ hukwꞌunꞌa neꞌonleh aitꞌoh, ꞌaw ntꞌalhtsꞌinalh ꞌet huwa. Hoonzoo-un te za neꞌuntsꞌuyulhꞌen, dalhtsꞌinelh whe za whenantsꞌuyalhꞌaꞌ. Moodihti (Yahweh) soo hoonzoo-un ngha óoninꞌai inli.”

30 ꞌEt bughu nusuya ꞌinkꞌez ꞌuhanꞌalh ꞌinkꞌez tahitnaiꞌ.31 ꞌEt bundaꞌ ꞌudaꞌ duhudindil ꞌinkꞌez lhtsꞌunahuhisda whe Isaac ꞌun whenabalhꞌa ꞌinkꞌez budzi dizghel whe whe nahidil.

32 ꞌEt nyoonne ꞌet dzin za Isaac yuba ꞌutꞌenne, doo cha za too hoonli ha honkai ꞌinkꞌez highu nindil ꞌinkꞌez ꞌuhuyulhni, “Too kꞌet ꞌet ꞌutsꞌuhoonla!”33 ꞌEt nyo too kꞌet ꞌet Shibah whulhni, ꞌet huwa nyo keyoh whuti ꞌandit dzin whutsꞌun Beersheba huwhutni.

34 ꞌEt Esau dit whinizyat (40) be yus kꞌut whe tsꞌekoo nane ꞌenne bughusda. ꞌIlhoghun Judith, Beeri ootseꞌ, Hitt whutꞌen-un ꞌuntꞌoh, ꞌinkꞌez Basemath, Elon, Hitt whutꞌen-un, ꞌen ootseꞌ bulh.35 ꞌInkꞌez nyoonne tsꞌekoo, Isaac ꞌinkꞌez Rebekah bulh budzi hundulhda.

Isaac ꞌen Jacob ooba soo hoonzoo-un ꞌuyulhni

27 1 ꞌEt ꞌuhooja Isaac duneti suliꞌ ꞌinkꞌez oona cha ꞌawet tetsun suliꞌ whe, Esau, ooyeꞌ ꞌudetso-un ꞌen yukaꞌ daniꞌ, “Syeꞌ,” yulhni.

ꞌEt ꞌutni, “Njan ꞌustꞌoh,” yulhni.2 ꞌEt ꞌutni, “Whunilhꞌen ꞌandit duneti susliꞌ, ndet dzin datisah-un ꞌaw

tꞌeoonuzuszun.3 ꞌAndit whe sla ꞌineh, be ꞌukaꞌ ꞌintꞌen, kꞌaza zus, ꞌinkꞌez kꞌaza bulh ꞌi tonla. ꞌEt tlꞌo kꞌuz tsꞌe tonyaꞌ, ꞌinkꞌez khuna-i sba kaꞌ ꞌontꞌen.4 ꞌInkꞌez nyoo ndai la oonustꞌiꞌ-i, ꞌi sba ꞌinleh, ꞌinkꞌez stsꞌu tonkaꞌ, ꞌet de sih oosꞌalh. ꞌEt de sih szul be soo hoonzoo-un ntsꞌun tizooꞌ datisah whutso.”

5 ꞌEt Rebekah yoozilhtsꞌai whe ꞌutni Esau bulh yalhduk, ꞌinkꞌez Esau whenya ꞌukaꞌ titꞌelh ha ꞌinkꞌez whusaitilelh.6 ꞌEt Rebekah ꞌen duyeꞌ Jacob ꞌuyulhni, “ꞌIlhiz soo oozolhtsꞌaiꞌ mbá ꞌen Esau ꞌuyulhni, njan ndi yulhni,7 ‘Silhghe-i stsꞌinlelh ꞌinkꞌez nzoo-i sba ꞌinleh, tisꞌulh ha datisah whutso Moodihti (Yahweh) oonalh ꞌet sih soo hoonzoo-un ntsꞌun tiszooꞌ.’8 ꞌEt huwa syeꞌ daja nyudusni la ꞌet soo zilhtsꞌai.9 ꞌAz inyalh ꞌinkꞌez khuna-iyaz toh tsꞌe nanki dúbe uzkehyaz soo unzoo-i, ꞌi si mba ꞌoosleh, mbá oogha itankalh wheni, ntsꞌenꞌa yoontꞌiꞌ, whuz unꞌa.

55 Genesis 26 , 27

10 ꞌInkꞌez ndi mbá oogha ininkaih ꞌinkꞌez yooꞌalh sih ꞌinkꞌez datitsah whutso ꞌet ꞌen gha soo hoonzoo-un ngha hootaltsꞌulh.”

11 ꞌEt Jacob ooloo Rebekah ꞌen ꞌuyulhni, “Whunilhꞌen sulhutsin Esau tube dughai whe ꞌuntꞌoh ꞌinkꞌez ꞌaw si ndulhustꞌoh.12 Ndun sbá ndi sla tila yukunudoolnih ꞌinkꞌez nanisꞌa ꞌinkꞌez sichꞌoh, skꞌe hooyeh tila ꞌinkꞌez ꞌaw soo hoonzoo-un sgha holtsꞌit aitꞌoh.”

13 ꞌEt hoontsꞌi ooloo ꞌuyulhni, “Whute ye nkꞌe hizya-i si sih skꞌuzꞌooneh! Syeꞌ, ꞌantsꞌi soo zilhtsꞌai ꞌinkꞌez ndi khuna-iyaz sba ookainyalh!”

14 ꞌInkꞌez ndi khuna-iyaz yilhchoot ꞌinkꞌez duloo gha ininla ꞌinkꞌez ooloo yuba yuzdliz, ndai la oobá ooba yinzoo-i.15 ꞌEt Rebekah duyaz ꞌudetso-un Esau, ꞌen oonaih kꞌus unzoo-i yoh yuzdla-i, ꞌi Jacob ꞌudekꞌoh-un, ꞌen ye yalhti.16 ꞌInkꞌez nyoo dúbe buzkeh oozuz ꞌi yula yugha iyozduz, ootsꞌilchun cha yugha iyozduz.17 ꞌInkꞌez nyoo yuzdliz-i ꞌinkꞌez ꞌutꞌalh-i cha ꞌi duyaz Jacob yutlꞌa yanla.

18 ꞌInkꞌez dubá yutsꞌu yoozdla ꞌinkꞌez ꞌuyulhni, “ꞌUbá.” “Njan ꞌustꞌoh. Syeꞌ, mbe inli whe ꞌintꞌoh?” ni.

19 ꞌEt Jacob dubá ꞌuyulhni, “Nyeꞌ, ꞌudetso whuzdli-un, Esau ꞌustꞌoh. Daja sudaniꞌ la whuz unꞌa ꞌusja. Dudinyaih ꞌinkꞌez njan sinda ꞌinkꞌez ndi sisghi-i ꞌinꞌalh, ꞌet de sih nzul be soo hoonzoo-un sgha hooltsꞌit.”

20 ꞌEt hoontsꞌi Isaac duyeꞌ ꞌuyulhni, “Syeꞌ, ꞌet ntsꞌenꞌa ꞌa cho nainla ꞌi silhghi?” ꞌInkꞌez ꞌuyulhni, “Moodihti nYakꞌusda (Yahweh Elohim) ꞌen sgha ininla ꞌet huwa.”

21 ꞌEt Isaac, Jacob ꞌuyulhni, “Njan szih neninyaih ꞌinkꞌez sih nkꞌunudooznih, syeꞌ ꞌalha Esau tila ꞌintꞌoh.”

22 ꞌEt Jacob dubá Isaac yuzih neninya ꞌinkꞌez yukꞌunudilhni ꞌinkꞌez ꞌutni, “Nyiz yailhduk, ꞌet Jacob ooyiz ꞌutni, ꞌet hoontsꞌi ndi nla ꞌi Esau oola ꞌuntꞌoh.”23 ꞌInkꞌez ꞌaw nalhuyóoltsꞌulh, nyoo oola dughai Esau oola kꞌunꞌa, ꞌinka soo hoonzoo-un be ubulh yalhduk.24 ꞌInkꞌez ꞌutni, “ꞌAlhaꞌ eh syeꞌ Esau ꞌintꞌoh?” “A,” yulhni.

25 ꞌInkꞌez ꞌutni, “Szih neninꞌaih nyoo syeꞌ yanghan-i, ꞌi sih oosꞌalh ꞌinkꞌez ndi szul be soo hoonzoo-un ngha hóotaltsꞌulh sih.” Yuzih neꞌninkai ꞌinkꞌez yanꞌal ꞌinkꞌez tsꞌekoo tooꞌ cha yugha nilhdzo ꞌinkꞌez ꞌi cha yitnaiꞌ.

26 ꞌEt oobá Isaac ꞌuyulhni, “Syeꞌ szih neninyaih ꞌinkꞌez nasudintsꞌoos.”

27 ꞌInkꞌez yuzih neninya ꞌinkꞌez naiditsꞌooz ꞌinkꞌez nyoo naih yunahoolhtsun ꞌinkꞌez soo hoonzoo-un ootlꞌa ookat, ꞌinkꞌez ꞌuyulhni,

Genesis 27 56

“ꞌAlhaꞌ soo tsꞌihꞌun syeꞌ ꞌaw hukwꞌunꞌa oonawhultsun,ndai la Moodihti (Yahweh) tlꞌo kꞌut soo hoonzoo-un

whulhtsih. 28 ꞌEt huwa Yakꞌusda (Elohim) yakꞌuz nanaduldzoh-i,

ꞌi ngha yolhdzeh ꞌinkꞌez ndi yun kꞌut ndai la nzoo-i tsꞌiyawh cha,

ha nuyeh cha ꞌinkꞌez tsꞌekoo tooꞌ cha lhai ꞌi ngha yolelh. 29 Dune cha nyunat neꞌhootꞌen ꞌinkꞌez didohne cha mba nacha

hunooldulh.Nyulhutsinke cha bumoodih ꞌonleꞌ,ꞌinkꞌez nloo buzkeh, ꞌenne cha mbut nacha hunooldulh.

Mbene la nkꞌe huyihne ꞌenne cha bukꞌe hoodeh,mbene la soo hoonzoo-un ntsꞌun hutizooꞌ,ꞌenne cha soo hoonzoo-un bugha hóotaltsꞌulh.”

30 ꞌEt ꞌuhooja Isaac, Jacob yuba soo hoonzoo-un za ootlꞌa ookat ꞌetsul ꞌudija, ꞌinkꞌez Jacob ꞌawhuz nꞌaz nalhtusdai, ꞌet Esau bulhutsin daninya ndai la yuka ꞌitꞌen-i bulh.31 ꞌEn cha ndi tꞌalh-i nzoo-i ꞌuyinla ꞌinkꞌez dubá yughu daininkai ꞌinkꞌez dubá ꞌuyulhni, “Sbá dudoyaꞌ ꞌinkꞌez ndi ooyeꞌ yuzilhghi-i yooꞌalh, ꞌet la nzul be soo hoonzoo-un sgha hóotaltsꞌulh.”

32 ꞌInkꞌez oobá Isaac ꞌuyulhni, “Mbe inli whe ꞌintꞌoh?” ꞌEt ꞌuyulhni, “Nyeꞌ ꞌustꞌoh. Nyeꞌ ꞌudetso-un Esau.”

33 ꞌEt Isaac soo tube cho ꞌet ditlut ꞌinkꞌez ꞌutni, “Mbe ꞌuja khuna-i yuzilhghi-i ꞌinkꞌez sghu daininkai? Tsꞌiyawh usꞌal dantanyalh whutso ꞌinkꞌez ꞌen soo hoonzoo-un ootsꞌun ꞌuszooꞌ. ꞌInkꞌez ꞌalha ꞌen soo cho oobulh ꞌuwhutatꞌelh.”

34 ꞌEt Esau dubá ooghuni yudantsꞌo whe soo ꞌultus-un intse ꞌinkꞌez dubá ꞌuyulhni, “Sbá si cha O sbá soo hoonzoo-un sghá holtsꞌit!”

35 ꞌEt hoontsꞌi ꞌuyulhni, “Nyulhutsin whunutꞌiꞌ ꞌi be sghu daninya ꞌinkꞌez ndi mba soo hoonzoo-un ngha hóotaltsꞌulh, ꞌi yilhchoot.”

36 ꞌInkꞌez Esau ꞌutni, “ꞌAlhaꞌ ꞌi be Jacob ꞌuyulhni, ꞌawet nat ꞌusinla, ꞌudechoo ndi stsꞌu oozinzi-i cha sghu yilhchoot ꞌinkꞌez whunilhꞌen ꞌandit be soo hoonzoo-un sgha hóotaltsꞌulh, ꞌi cha yilhchoot!” ꞌInkꞌez ꞌutni, “ꞌAw eh ꞌuyoo soo hoonzoo-un sgha hóotaltsꞌulh sba lhintꞌih?”

37 ꞌEt Isaac ꞌen Esau ꞌuyulhni, “A, nyumoodih susi. Bulhutsinke ꞌenne cha hibut neꞌtitꞌen whuzusi. Ha nuyeh cha ꞌinkꞌez tsꞌekoo tooꞌ cha tsꞌiyawh ꞌi oogha inusla. Syeꞌ, ndet mba dawhutislelh?”

38 ꞌInkꞌez Esau dubá ꞌuyulhni, “Sbá, ꞌilho soo hoonzoo-un za ꞌintꞌi eh? Sbá si cha O sbá soo hoonzoo-un sgha hóotaltsꞌulh!” ꞌInkꞌez Esau tube cho whenintse.

57 Genesis 27

39 ꞌEt Isaac oobá ꞌuyulhni,“Whunilhꞌen hoontꞌiꞌ-un ndi yun kꞌut nzoo-i whutaleh,ꞌinkꞌez ndo yakꞌuz naduldzoh-i ꞌi cha tantꞌelh.

40 Nla luzti ꞌi be hutanalh ꞌinkꞌez nyulhutsin ooba ꞌutantꞌelh.ꞌInkꞌez ꞌuwhutanelh mba wheꞌ hoontꞌoh hooloh suliꞌ de,ndai la ntsꞌilchun ye yoontun-i kꞌutanyus.”

41 ꞌEt huwa Esau, Jacob yutsꞌu dutni ndai la yube soo hoonzoo-un oogha whútiltsꞌulh, yilhchoot, ꞌinkꞌez Esau dudzi yo tsꞌe ꞌutni, “Sbá ookꞌeni whuntidleh-un ꞌawet nilhdukw, ꞌet de Jacob sulhutsin tuzisghelh.”

42 ꞌInkꞌez Esau ooghuni ꞌudetso ooyaz-un Rebekah hidaniꞌ. ꞌEt Rebekah Jacob ꞌanih yudaniꞌ ꞌinkꞌez ꞌuyulhni, “ꞌAlhaꞌ nyulhutsin Esau nyutuzilhghelh ꞌet whe hazih kꞌe naꞌdunitꞌah.43 ꞌEt huwa syaz sghuni ookꞌoh tsꞌe ꞌineh. Dudinyaih ꞌinkꞌez sulhutsin Laban, Haran whutꞌi-un, ꞌen ootsꞌilgih.44 ꞌInkꞌez oozih sinda, ꞌatsulyaz nyulhutsin ye hunilchꞌe-i gak naoodleh sih.45 Nyulhutsin ye hunilchꞌe-i nchꞌaz naꞌootneh, dainla la whunaoodilhnoh de, ꞌet sih nka nawhutoosꞌa ꞌinkꞌez whusanaoonjaꞌ. ꞌEt di ha nyun cha nkꞌeni untisleh ꞌilhudzin za?”

46 Rebekah ꞌen Isaac ꞌuyulhni, “ꞌAwet tube be khúsna-un be nenisai, be khúsna-un be nenisai ndunne Heth butseꞌke kꞌuz. Ndunne ndi yun kꞌut whutꞌenne whutseꞌ leꞌ hintꞌoh. ꞌEt Jacob, ꞌen Heth butseꞌ ghusda te, ꞌet dantꞌi whe be khúsna-un sba ooleꞌ ha?”

28 1 ꞌEt Isaac, Jacob ꞌanih yudaniꞌ ꞌinkꞌez soo hoonzoo-un yuba whulhtsi, ꞌinkꞌez ꞌuyulhni, “ꞌAw Canaan whutsꞌekeꞌ ꞌilhoghun,

ꞌen nꞌat wheni olhchoot junih.2 Dudinyaih ꞌinkꞌez Paddan Aram, Bethuel ooyoh tsꞌe inyalh, nloo oobá, ꞌinkꞌez ꞌet tsꞌeke nꞌat wheni ilhchoot, Laban buzkeh ꞌilhoghun nloo bulhutsin.3 Yakꞌusda ꞌUkꞌenus ꞌUltus-un ꞌUstꞌoh (El Shaddai) soo cho ncha mba hoonzoo-un ngha hóotaltsꞌulh ꞌinkꞌez lhane hooleh dune huldlaine oohleh.4 Abraham ye soo hoonzoo-un whusaínkat, ꞌi cha ntsꞌun tookat, nyun cha ꞌinkꞌez ntsꞌu ha hande nyulh ꞌuhintꞌoh ꞌenne cha. ꞌEt sih njan yun kꞌut nohchꞌeꞌ ooleꞌ, ꞌet ꞌutsꞌun hoontꞌen inli. Njan ꞌet Yakꞌusda (Elohim) ꞌen Abraham yugha óoniꞌai inleꞌ.”5 ꞌEt Isaac, Jacob wheyalhꞌa ꞌinkꞌez yun kꞌut Paddan Aram tsꞌe whenya, Laban, Bethuel ooyeꞌ, Syria whutꞌen, ꞌen Rebekah bulhutsin Jacob ꞌinkꞌez Esau buloo.

Genesis 27 , 28 58

Esau ꞌen Mahalath yughusda6 ꞌEt Esau, Isaac, Jacob ꞌen soo hoonzoo-un ꞌubulhni ꞌinkꞌez whe

yalhꞌaꞌ yun kꞌut Paddan Aram, ooꞌat yutaleh-un yolhchoot ha, ꞌinkꞌez yuba soo hoonzoo-un whulhtsih whe ꞌet njan ꞌuyulhni, “Nyun Canaan whutꞌenne tsꞌekoo butoh, ꞌenne nꞌat wheni olhchoot junih!”7 ꞌInkꞌez Jacob dubá yukꞌoh tsꞌe ꞌuja, duloo cha yukꞌoh tsꞌe ꞌuja, ꞌinkꞌez yun kꞌut Paddan Aram tsꞌe whenya.8 ꞌInkꞌez cha Esau, Canaan whutꞌenne whutsꞌekoo dubá ꞌaw hukwa lheꞌnizun.9 ꞌEt Esau, Ishmael, Abraham ooyeꞌ, ꞌen tsꞌu whenya, ꞌinkꞌez Ishmael, ꞌen ootseꞌ Mahalath, ꞌen duꞌat wheni yilhchoot. Ishmael ootseꞌ Nabajoth, ꞌen bulhtus ꞌuntꞌoh, Mahalath, ꞌen cha ooꞌat yoleꞌ, ꞌuyoonne ooꞌatke tubulh.

10 ꞌAndit ꞌet Jacob ꞌen Beersheba whuz de ha naja ꞌinkꞌez keyoh Haran tsꞌun whenya.11 ꞌEt ꞌutsꞌun whenya ꞌinkꞌez ꞌulhdzis nduwhulhyiz whe ꞌet indaꞌ, sa yo whinꞌai ꞌet huwa, ꞌinkꞌez nyoo tse, ꞌet dizꞌai-i ꞌilho ꞌi yukꞌut tse nilhꞌai nantitelh wheni.12 ꞌEt nusuti ꞌinkꞌez whunilhꞌen, kwꞌut dughaiti-i ndi yun kꞌut whedinꞌa, ndo yakꞌuz tsꞌe wheinꞌa, ꞌet Yakꞌusda (Elohim) oolizasne ndo cha whehudulh ꞌinkꞌez nyo cha whenahudulh. 13 ꞌInkꞌez whunilhꞌen ndo Moodihti (Yahweh) ꞌen usyin ꞌinkꞌez ꞌutni, “Si Moodihti (Yahweh) Abraham ooYakꞌusda (Elohim) mbá cha ꞌinkꞌez Isaac ooYakꞌusda (Elohim) cha ꞌustꞌoh. Ndi yun ookwꞌut sinti-i ꞌandit ngha tisꞌalh ntsꞌu haindene cha.14 ꞌInkꞌez cha mbene la ntsꞌu haindene ndi yun kꞌut lhez lheꞌuntꞌoh. Lhai whuz unꞌa hutildlaiꞌ, nooꞌ cha ꞌinkꞌez ndaꞌ cha, whuz netihnelh, no cha, nyan ꞌinkꞌez ntsꞌu hainde-un cha, ꞌen gha ndi yun kꞌut dilhtsꞌine, ꞌenne tsꞌiyawh soo hoonzoo-un bugha hóotaltsꞌulh.15 Whunilhꞌen nyulh ꞌustꞌoh, ntsꞌoh teninya te, nyulh ꞌutistꞌelh ꞌinkꞌez ndi yun kꞌut nenyutastelh. ꞌEt ꞌawet nghu natisdulh datisnelh la nyudusni-un, ꞌet ꞌawhusla whutsꞌun.”

16 ꞌEt Jacob tsꞌe nandzut ꞌinkꞌez ꞌutni, “ꞌAlhaꞌ la Moodihti (Yahweh) njan ꞌet usda ꞌinkꞌez ꞌaw ꞌazi tꞌeoonuzuszun.”17 ꞌInkꞌez nuljut ꞌinkꞌez ꞌutni, “Tube ꞌusla njan huwa ꞌitꞌen! ꞌAlha ꞌet Yakꞌusda (Elohim) ooyoh ꞌinkꞌez njan ꞌet ꞌazi yakꞌuz ti tsꞌe whudatih!”

18 ꞌInkꞌez Jacob ꞌudaꞌ dudinya ꞌinkꞌez nyoo tse yukꞌutsenalhꞌaꞌ-i, ꞌi nyo whedinꞌa yulhtsi, ꞌinkꞌez khe yukꞌe ilhdzo.

59 Genesis 28

Genesis 28 60

(28:12) © 1996 David C. Cook

19 ꞌInkꞌez nyo ꞌet booziꞌ huwa dinꞌai, Bethel whulhni, ꞌet keyoh whutsodaꞌ ꞌet Luz huwhutni inleꞌ.

20 ꞌEt Jacob nahizya whe ndutni, “Yakꞌusda (Elohim) sulh ꞌuntꞌoh de, ꞌinkꞌez ndiz unꞌa ꞌusilhdzun, ꞌinkꞌez tisyalh tsꞌe ꞌutꞌalh-i cha sgha tiꞌalh, ꞌinkꞌez naih be dune tisleh-i cha,21 ꞌet de sbá ooyoh tsꞌe soo tsꞌihꞌun sdzi dizghel whe whuz natoosjaꞌ, ꞌet de Moodihti (Yahweh) ꞌen sih Yakꞌusda (Elohim) sba ooleꞌ.22 ꞌEt ndi tse njan nadanꞌa kꞌunꞌa silhtsi, ꞌi Yakꞌusda (Elohim) ooyoh holeꞌ, ꞌinkꞌez ndai sgha ninla, ꞌi whunizyai ꞌon ꞌun (10%) ntsꞌun naꞌóotneh.”

Jacob ꞌen Rachel yughu ninya

29 1 ꞌEt Jacob tizya tsꞌe whenya, ndaꞌ keyoh whutꞌenne bukeyoh tsꞌe oozya.

2 ꞌInkꞌez whunalhꞌen ꞌinkꞌez tlꞌo kꞌut whuniz ꞌet too dizꞌai ꞌinkꞌez whunulhꞌen tawh didoh-i ꞌusbai, ꞌi nus ustez nyo too dizꞌai-un ꞌet whutooꞌ-i higha huyulhdzoh, nyo too dizꞌai-un too kꞌet whudah ꞌet ꞌatsꞌo tse dizꞌai.3 ꞌInkꞌez nyoo ꞌusbai tsꞌiyawh nyo ꞌet ꞌilho ulhꞌus ꞌinkꞌez nyoo tse ꞌi tsꞌo sanahidunulhgih, ꞌinkꞌez ꞌusbai too highalhdzoh, ꞌinkꞌez nyoo tse ꞌet nenahiduꞌaih.

4 ꞌInkꞌez Jacob ꞌubulhni, “Sulhutsinke ntsꞌez de hahdil whe ꞌuhtꞌoh?” ꞌInkꞌez ꞌuhutni, “Haran tsꞌe ha tsꞌandil.”

5 ꞌInkꞌez ꞌubulhni, “Nahor ooyeꞌ, Laban, tꞌenuhzun eh?” ꞌInkꞌez ꞌuhutni, “Tꞌezninzun.”

6 ꞌEt ꞌubulhni, “Soo ꞌuntꞌoh eh?” ꞌInkꞌez ꞌuhutni, “Soo ꞌuntꞌoh ꞌinkꞌez whunilhꞌen ootseꞌ Rachel ꞌusbai bugha tatilhdzoh ha whuz de uyalh.”

7 ꞌInkꞌez ꞌutni, “Whunulhꞌen ꞌawhuz dzetniz whenghoh, ꞌawhuz khuna-i ꞌilhunahuyoontayulh ꞌinkꞌez ꞌusbai cha higha tatilhdzoh ꞌinkꞌez bughaꞌ hutiꞌalh-un cha.”

8 ꞌEt hoontsiꞌ ꞌuhutni, “ꞌAw ꞌet dutsꞌooneh aitꞌoh. ꞌUsbai tsꞌiyawh ꞌilhunaoolhꞌaz whutso ꞌinkꞌez tse cha too kꞌet whusanahidunti lhgih, ꞌet de ꞌusbai oogha tatsꞌulhdzoh.”

9 ꞌAwhuz yalhduk whe Rachel dubá be ꞌusbai bulh whusainanyoot, ꞌusbai ghunli-un tsꞌeke ꞌet huwa.10 ꞌInkꞌez ꞌuhooja Jacob, Rachel, Laban ootseꞌ, ooloo bulhutsin, yutilhꞌen whe ꞌinkꞌez Laban be ꞌusbai, ooloo bulhutsin, Jacob ꞌet nyoo tse whusanaidunalhgai ꞌinkꞌez ooloo bulhutsin Laban be ꞌusbai ꞌi yugha tanilhdzo.11 ꞌInkꞌez Jacob, Rachel naiditsꞌooz ꞌinkꞌez tube cho whenintse.

61 Genesis 28 , 29

12 ꞌInkꞌez Jacob, Rachel yulhni, oobá oonadun ꞌustꞌoh, ꞌinkꞌez Rebekah ooyaz ꞌustꞌoh, yulhni. ꞌEt Rebekah whelgai ꞌinkꞌez dubá yudaniꞌ.

13 ꞌEt ꞌuhooja Laban ndi khuni yudantsꞌo Jacob, bulhtus ooyaz, whuz oolhgai ꞌinkꞌez shih beꞌ yilchoot, ꞌinkꞌez naiditsꞌooz. ꞌInkꞌez duyoh dainilhti. ꞌEt Jacob Laban ndi tsꞌiyawh yudaniꞌ.14 ꞌInkꞌez Laban ꞌuyulhni, “ꞌAlhaꞌ syustꞌe ꞌinkꞌez stsꞌun cha inli.” ꞌInkꞌez ꞌilhoh sanun yuzih indaꞌ.

Jacob ꞌen Leah ꞌinkꞌez Rachel bughusda15 ꞌEt Laban, Jacob ꞌuyulhni, “Snadun inli, ꞌet huwa ꞌaw eh ꞌantsꞌi ꞌet

sbaꞌ tantꞌelh? Sudini, daltsuk kꞌelha la ꞌintꞌen?”16 Laban nane ootseꞌke hoonli, ꞌudetso-un ꞌen Leah huyulhni,

ꞌinkꞌez ꞌudekꞌoh-un ꞌen Rachel huyulhni.17 Leah oona soo lheꞌíltus, ꞌet hoontsꞌi Rachel tubeh sooꞌ otꞌen.18 ꞌEt Jacob, Rachel yukꞌentsiꞌ ꞌinkꞌez ꞌuyulhni, “Lhtakꞌantꞌit whunizyat (7) yus kꞌut ꞌet mba ꞌoostꞌen, Rachel ꞌudekꞌoh-un ꞌen kꞌelha.”

19 ꞌInkꞌez Laban ꞌuyutni, “ꞌUyoon dune gha tistꞌelh whutso, ꞌet ꞌonus sooꞌ hoontꞌoh nyun ngha tistꞌelh. Szih sinda.”20 ꞌEt Jacob lhtakꞌantꞌit yus kꞌut ꞌet Rachel yukꞌelha ꞌitꞌen. ꞌAntsꞌi ꞌatsulyaz ooba leꞌ hoontꞌoh, tube yukꞌentsiꞌ kꞌet.

21 ꞌEt Jacob, Laban ꞌuyulhni, “Sꞌat sgha nilhtih, ꞌawet dzin lhaoodusla ꞌinkꞌez la oostꞌeꞌ.”

22 ꞌInkꞌez Laban dune tsꞌiyawh ooduneꞌne ꞌilhubozdla ꞌinkꞌez dune ghu nusuya.23 ꞌEt ꞌuhooja ꞌet hulhgha dutseꞌ Leah yilhchoot ꞌinkꞌez Jacob ghi nilhti, ꞌen cha ooꞌat yuzdliꞌ.24 ꞌInkꞌez Laban yuba ꞌutꞌen-un, Zilpah huyulhni, ꞌen dutseꞌ Leah yuba ootꞌen ha yugha inilhti.

25 ꞌEt ꞌuhooja bundadaꞌ Leah ꞌatsꞌo ꞌuntꞌoh, ꞌinkꞌez Laban ꞌuyulhni, “Dainja whe ꞌinja, wheꞌ sinla? Rachel iloh lakw mba ꞌistꞌen ꞌinkꞌez di ha nasunanꞌa?”

26 ꞌInkꞌez Laban ꞌutni, “Njan nekeyoh, ꞌaw ꞌudekꞌoh-un, ꞌen, ꞌudetso-un ootso dune gha butsꞌolhtelh aitꞌoh.27 ꞌAndit lisman lhaoodinleh, ꞌinkꞌez ndun ꞌen cha ꞌantꞌen hukwꞌelha ngha tsꞌoolhtelh. ꞌInkꞌez doo cha ꞌon ꞌun lhtakꞌantꞌit yus kꞌut, ꞌet sih sba ꞌontꞌen.”

28 ꞌInkꞌez Jacob ꞌet lisman lhaoodinla, ꞌinkꞌez dutseꞌ Rachel ꞌen cha ooꞌat yutaleh ha yugha inilhti.29 ꞌInkꞌez Laban, yuba ꞌutꞌen-un tsꞌeke, Bilhah, ꞌen dutseꞌ Rachel yubaꞌ ootꞌen ha yugha inilhti.

Genesis 29 62

30 ꞌEt Jacob, Rachel ꞌen cha ooꞌat yuzdliꞌ, ꞌinkꞌez ꞌen Leah anus yukꞌentsiꞌ. ꞌInkꞌez Laban doo cha lhtakꞌantꞌit (7) yus kꞌut ꞌet yuba ꞌitꞌen.

Jacob buzkeh31 ꞌEt Moodihti (Yahweh), Leah ꞌaw dune yukꞌelhitsiꞌ ꞌinka oochan

yudahaꞌdanꞌai, ꞌinkꞌez Rachel ꞌen ꞌaw buzkeh hooloh.32 ꞌEt Leah ulchan ꞌinkꞌez dune ooyaz suliꞌ. Ruban ꞌi be yoozi ꞌinkꞌez ꞌutni, “Moodihti (Yahweh) ꞌalha njan whe undusda-un whunalhꞌen, ꞌet huwa ski skꞌe ootsiꞌ la.”

33 ꞌEt doo cha za ulchan ꞌinkꞌez dune ooyaz suliꞌ. ꞌInkꞌez ꞌutni, “Dune skꞌelhitsiꞌ, Moodihti (Yahweh) whudantsꞌo, ꞌet huwa dune ꞌen syaz sgha inilhti.” ꞌInkꞌez ꞌen Simeon yulhni.

34 ꞌEt doo cha za ulchan ꞌinkꞌez dune ooyaz suliꞌ. ꞌInkꞌez ꞌutni, “ꞌAndit ꞌet la ski skꞌe ootsiꞌ ooleꞌ, ꞌawet tane ooyeꞌ susi ꞌet huwa.” ꞌEt huwa duneyaz boozi, Levi, yulhni.

35 ꞌInkꞌez doo cha za ulchan ꞌinkꞌez dune ooyaz suliꞌ. ꞌInkꞌez ꞌutni, “ꞌAndit ꞌet Moodihti (Yahweh) dutástiꞌ!” ꞌEt huwa yooziꞌ, Judah, yulhni. ꞌEt hukwꞌelhꞌaz ꞌet ꞌawet buzkeh hoonli-un ꞌetsul ꞌuja.

30 1 ꞌEt ꞌawet Rachel ꞌaw Jacob tsꞌoodunne yughalhilel tꞌeoonanzin, dulhtus ꞌen hukwa yugheꞌ oolnih ꞌinkꞌez Jacob

ꞌuyulhni, “Tsꞌoodunne sgha ninle kꞌus datisah!”2 ꞌEt Jacob, Rachel yulh hunilchꞌe ꞌinkꞌez ꞌutni, “Si eh Yakꞌusda

ookꞌedusda? Si ꞌunyusla ꞌaw nyuzkeh holeꞌ aitꞌoh nyuzusi?”3 ꞌEt Rachel ꞌutni, “Ndun sba ꞌutꞌen-un, Bilhah, ꞌen oozih sinti ꞌinkꞌez

la ꞌolhtsi, ꞌinkꞌez sgwut kꞌut daꞌ tsꞌoodun ꞌinkꞌez ꞌenne suzkeh holeꞌ, nghu bulhtsine.”

4 ꞌInkꞌez Bilhah, Jacob gha inilti ooꞌat yoleꞌ ha ꞌinkꞌez Jacob yuchantꞌinteꞌ.5 ꞌInkꞌez Bilhah ulchan ꞌinkꞌez Jacob duneyaz yughu yulhtsi.6 ꞌEt Rachel ꞌutni, “Yakꞌusda (Elohim) sba nahizya ꞌinkꞌez syiz cha yudantsꞌo ꞌinkꞌez duneyaz, syaz ooleꞌ ha sgha inilhti.” ꞌEt huwa Dan yulhni.

7 ꞌInkꞌez Rachel yuba ꞌutꞌen-un, Bilhah, ꞌen doo cha ulchan, ꞌinkꞌez Jacob bulh whulh nat-un ooyeꞌ ꞌutꞌi.8 ꞌEt Rachel ꞌutni, “Sulhtus Leah bulh lhchꞌa ꞌoldeh hukwa ꞌitꞌen, soo ꞌiltus whe ꞌinkꞌez si whuchaꞌ nus de.” ꞌInkꞌez nyoon tsꞌoodun Naphtali yulhni.

9 ꞌEt Leah ꞌawet buzkeh hoonli-un ꞌetsul ꞌuja, ꞌet yuba ꞌutꞌen-un, Zilpah, ꞌen Jacob ooꞌat yoleꞌ ha yugha inilhti.10 ꞌInkꞌez Leah yuba ꞌutꞌen-un, Zilpah, Jacob duneyaz yughu sulhtsi.

63 Genesis 29 , 30

i 30:11 Ndi booziꞌ Gad, ꞌi “Hoonzoo Negha Whultsꞌut” ni whe ꞌutni.

11 ꞌEt Leah ꞌutni, “Dune lhuganene ꞌaz de hidulh!” ꞌInka nyoon tsꞌoodun Gad i yulhni.

12 ꞌInkꞌez Leah yuba ꞌutꞌen-un, Zilpah, whulh nat Jacob yughe ꞌulhtsi, duneyaz ooyaz suliꞌ.13 ꞌEt Leah ꞌutni, “Hoonústꞌiꞌ, tsꞌekoo ꞌenne soo hoonzoo-un sgha whultsꞌut-un sodoniꞌ lah.” ꞌInkꞌez nyoon duneyaz Asher yulhni.

14 ꞌEt Reuben haꞌ nuyeh-un whuz ꞌutꞌen whe ꞌet nyoo ꞌilho ha nuyeh-i duchunyoo cha ootoh hoonli-i (nedoh kꞌoh tsꞌe mandrakes huyulhni) ꞌi ngha ininla ꞌinkꞌez duloo Leah yughi ninla. ꞌEt Rachel, Leah ꞌuyulhni, “Nyoo nyaz ngha ininla-i, ooloh sgha ninle.”

15 ꞌEt hoontsꞌi ꞌuyulhni, “Tube hoontsool-un ꞌinja ski ilhchoot ninzun eh? Doo cha syaz ndi mandrake sgha ininla-i, ꞌi cha sghi talhchulh hukwaꞌ ninzun?” ꞌInkꞌez Rachel ꞌuyutni, “ꞌAndit ꞌulhdzis ndi ꞌi kꞌelha, ꞌandit ꞌulhdzis nzih tidalh.”

16 ꞌEt Jacob hulhgha nus ꞌutꞌen-un tsꞌe ha naja, Leah yududizya ꞌinkꞌez ꞌuyutni, “ꞌAndit ꞌulhdzis szih ꞌonteꞌ, ndi syaz naininla-i mandrake, ꞌi kꞌelha.” ꞌEt ꞌulhdzis yuchantꞌinteꞌ.

17 ꞌInkꞌez Yakꞌusda (Elohim) Leah yudantsꞌo ꞌinkꞌez ulchan, ꞌinkꞌez Jacob whulh kwulane dune ooyaz suliꞌ.18 Leah ꞌutni, “Yakꞌusda (Elohim) ꞌen sba kꞌelhla whulhtsi. Sba ꞌutꞌen-un, ꞌen ski butlꞌa yalhti ꞌet huwa.” ꞌEt ꞌen booziꞌ ꞌi Issachar yulhni.

19 ꞌInkꞌez Leah doo cha ulchan ꞌinkꞌez Jacob bulh lhkꞌutan-un ooyeꞌ suliꞌ.20 ꞌEt Leah ꞌet ꞌutni, “Tube Yakꞌusda (Elohim) hoonzoo-un sgha ooninꞌai. ꞌAwet ꞌandit ski szih la oodaꞌ, lhkꞌutane dune ooghu susi.” ꞌInkꞌez nyoon tsꞌoodun Zebulun yulhni.

21 ꞌEt hukwꞌelhꞌaz tsꞌeke ooyaz suliꞌ, ꞌen Dinah yulhni.22 ꞌAwet Yakꞌusda (Elohim) ꞌen Rachel yunalnih ꞌet neoodelhdzut

ꞌinkꞌez Yakꞌusda (Elohim) ꞌen yoozalhtsꞌai whe oochan ꞌantsꞌi yudahaꞌdanꞌai leꞌ yinla.23 ꞌInkꞌez ulchan whe dune ooyaz suliꞌ. ꞌEt ꞌutni, “Yakꞌusda (Elohim) ꞌen sba yooya ꞌi nꞌun naꞌyinla.”24 ꞌInkꞌez ꞌen Joseph yulhni, ꞌinkꞌez ꞌutni, “Moodihti (Yahweh) doo cha sih ꞌuyeꞌ sugha oolhtelh.”

Jacob ꞌinkꞌez Laban bulh lhghaꞌ hudija25 ꞌEt ꞌuhooja Rachel, Joseph sulhtsi hukwꞌelhꞌaz Jacob, Laban

ꞌuyulhni, “Nasalhꞌalh, sichꞌoh whustꞌi-un skeyoh tsꞌe whuz si natoosja.

Genesis 30 64

26 Sꞌatke cha ꞌinkꞌez suzkehke cha bukꞌelha ꞌistꞌen, ꞌinkꞌez sla naditnih, daja la mba ꞌistꞌen ꞌet tꞌeooninzin.”

27 ꞌInkꞌez Laban ꞌen ꞌuyulhni, “ꞌEt sinda, mba ꞌuszoo de! Tꞌeooniszin ꞌawet nyun ngha Moodihti (Yahweh) soo hoonzoo-un sgha ooninꞌai.”28 ꞌInkꞌez ꞌuyulhni, “Daltsuk kꞌelha ꞌutantꞌelh-un sudini ꞌinkꞌez la ngha oosꞌalh.”

29 ꞌInkꞌez Jacob ꞌuyulhni, “Tꞌeooninzun ntsꞌenꞌa la mba ꞌistꞌen ꞌinkꞌez nghunaꞌ ꞌi cha ghosleꞌ.30 Nghu tisyalh whutso tube ntsool-i ꞌintꞌi inleꞌ, ꞌandit tsꞌiyawh ꞌonus lhai suliꞌ. Moodihti (Yahweh) soo hoonzooꞌ mba whulhtsi, si nghu nusya whutsꞌun ꞌinkꞌez nkede sichꞌoh syoh dilhtsꞌine bubaꞌ tistꞌelh.”

31 ꞌEt ꞌuyulhni, “Di ngha tisꞌalh?” ꞌInkꞌez Jacob ꞌutni, “ꞌAw hoonli sgha lhtuzanꞌa. Njan ꞌet dusinleh, ꞌet de doo cha sih nghunaꞌ cha ghosleꞌ ꞌinkꞌez oogha ꞌoosꞌaih.

32 ꞌAndit dzin nyoo ꞌintꞌi-i, tsꞌiyawh ootununoostaꞌ. Ndai la ookwꞌeꞌnizdla-i tsꞌiyawh ꞌusbai ꞌi cha ꞌudun neooslelh, ꞌinkꞌez dulba-i cha ꞌusbaiyaz toh ꞌi cha tsꞌiyawh, ꞌinkꞌez dúbe ootoh ꞌi cha ookwꞌeꞌnizdla-i, ꞌi tsꞌiyawh ꞌudun neooslelh ꞌi kꞌelha ꞌistꞌen whutaleh.33 ꞌEt de ntsꞌenꞌa la whe tsꞌihꞌun ꞌustꞌoh-un, ꞌet la tꞌeoonoodzeh. Ndai la ookꞌelha mba ꞌistꞌen-i, doo cha ooghu yatalduk de, ndai la dúbe ookwꞌulheꞌniloh-i ꞌinkꞌez ꞌusbai dulba-i cha ꞌi tsꞌiyawh nghu hidunistꞌi ooleꞌ sih, sba whuz unꞌa ꞌuhoontꞌoh.”

34 ꞌEt Laban ꞌutni, “ꞌEt whuz unꞌa ncha nghuni kꞌunꞌa ꞌuhooja.”35 ꞌEt dzin Laban ꞌen dune dúbe ookwꞌeꞌnizdla-i ꞌinkꞌez tsꞌeke dúbe ookwꞌeꞌnizdla-i cha, lhyul-i ookꞌut ꞌutꞌen-i ꞌinkꞌez ndai la dulba-i ꞌusbaiyaz toh, ꞌi tsꞌiyawh duyeꞌke bugha ininla.36 ꞌEt Laban tat dzin ꞌuwhuldzoh Jacob yuchꞌa suya ꞌinkꞌez Jacob nyoo Laban ooghunaꞌ tsꞌiyawh bube ulhꞌalh.

37 ꞌInkꞌez Jacob tꞌughus duli-i ꞌinkꞌez nyoo duchun almond ꞌinkꞌez chesnut huyulhni, ꞌi yudilhchoot ootꞌooz yukꞌe itilhchul ꞌinkꞌez nyo dulyul suliꞌ.38 Nyoo duchun yukꞌeꞌ tilhchul-i, ꞌi nyo ꞌusbai dilhtsꞌi-un yananuyuz sih, ndet la tatnai-un, ꞌet de sih nyo yuzih nyoo duchun tatnai de oolchan.39 ꞌEt nyo yuzih nyoo duchun tatnai te, ꞌet ulchan tsꞌiyawh, ꞌet nyo tsꞌiyawh ꞌusbai ookꞌeꞌnizdla ꞌinkꞌez lhyul-i bulh ꞌutsꞌun otꞌen.40 ꞌEt Jacob nyoo ꞌusbaiyaz tsꞌiyawh ꞌudun nebuninla, ꞌinkꞌez nyoo ꞌusbai ꞌon yoghi Laban ooghunaꞌ tsꞌiyawh lhelhtsꞌun otꞌen ookwꞌeꞌnizdla te ꞌuntꞌoh, whuntilhꞌeh wheni. ꞌInkꞌez didutchꞌoh ooghunaꞌ ꞌi ꞌudun nebuninla ꞌaw Laban ooghunaꞌ yutalhuyilel.

65 Genesis 30

41 ꞌEt ꞌuhooja ndet la nyoo kꞌus ulhtus-i khuna-i ulchan te, nyoo duchun ꞌuyinla-i, ꞌi nyoo khuna-i yubut neidinla, ꞌet de nyo duchun ootoh ꞌet oolchan ꞌinka.42 ꞌEt hoontsꞌi nyoo khuna-i tetsun de, kwa nyoo duchun yuzih nelhubilel. Ndai la tetsun-i, ꞌi Laban ooghunaꞌ ꞌuntꞌoh, ꞌinkꞌez ndai la lhtus-i, ꞌi Jacob ooghunaꞌ ꞌuntꞌoh.43 ꞌEt dune tube hoonzooꞌ ꞌuntꞌoh suliꞌ. Ndai la khuna yutꞌi-i lhai suliꞌ. Tsꞌekoo ꞌinkꞌez dune yuba ꞌutꞌenne cha ꞌinkꞌez nyoo khuna-i camel huyulhni, ꞌi cha ꞌinkꞌez donkey huyulhni, ꞌohwhi cha lhai suliꞌ.

Jacob ꞌen Laban chꞌa tse tilhya

31 1 ꞌEt Jacob, nyoonne Laban buzkeh yahulhduk budantsꞌo, njan nduhutni, “Jacob ndai la ꞌubá oochꞌeꞌ tsꞌiyawh yilhchoot

ꞌinkꞌez ndai la ꞌubá oochꞌeꞌ ꞌi be hoonzooꞌ ꞌuntꞌoh suliꞌ.”2 ꞌInkꞌez Jacob, Laban oonin yutilhꞌen ꞌaw whutsodaꞌ yutsꞌun unzoo-un kꞌunꞌa ꞌilhoh yunilhꞌen.

3 ꞌEt Moodihti (Yahweh) Jacob ꞌuyulhni, “Mbá ooyun kꞌut tsꞌe naindalh, nyunchꞌoh nyunatneke butoh tsꞌe ꞌinkꞌez nyulh ꞌutistꞌelh.”

4 ꞌEt Jacob, Rachel ꞌinkꞌez Leah bulh nus ꞌutꞌen tsꞌe khuna-i cha ꞌet dilhtsꞌi whuz bukaꞌ daniꞌ,5 ꞌinkꞌez ꞌubulhni, “Mbá oonin nusꞌen whutsodaꞌ hukwꞌunꞌa ꞌilhoh sulh nilhꞌen, ꞌet hoontsꞌi sbá ooYakꞌusda (Elohim) ꞌen sulh ꞌantꞌeꞌ.6 ꞌInkꞌez tꞌeoonuhzun ndet ꞌustꞌoh-un ꞌet nohbá oonat neꞌzustꞌen.7 ꞌEt hoontsꞌi nohbá nasunanꞌa ꞌinkꞌez kwꞌelha ꞌustꞌen-i cha ꞌutsꞌun unꞌa naꞌhoonla, whunizyat atꞌen ꞌet hoontsꞌi Yakꞌusda (Elohim) ꞌaw mbá sundolhdah whuchꞌa sghunli.8 Nja dutni de, ‘Ndi ookwꞌeꞌnizdla-i ookꞌelha ꞌutantꞌelh,’ ꞌinkꞌez khuna-i uzkehyaz tsꞌiyawh ookwꞌeꞌnizdla. ꞌInkꞌez njan ndutni de, ‘Ndai la lhelhtsꞌun-un otꞌen-i tsꞌiyawh ookꞌelha ꞌutantꞌelh,’ ꞌinkꞌez nyoo khuna-i uzkehyaz tsꞌiyawh lhelhtsꞌun otꞌen.9 ꞌEt whe Yakꞌusda ndai la mbá ooghunaꞌ tsꞌiyawh yilhchoot ꞌinkꞌez sgha ininla.

10 ꞌEt ꞌuhooja ndet la ndi khuna-i ulchan whe ndo yutasꞌen ꞌet ꞌinkꞌez nususti ꞌinkꞌez whunulhꞌen dúbe dune nyoo ꞌusbai ye kꞌeilhuk tsꞌiyawh nyoo ookꞌeꞌnizdla ꞌinkꞌez ooka dulgi be nodulhgus.11 ꞌEt Yakꞌusda (Elohim) oolizas sulh yatilhduk nuste whe ꞌinkꞌez ꞌutni, ‘Jacob,’ ꞌet ꞌudusni, ‘Njan ꞌustꞌoh.’12 ꞌInkꞌez ꞌusulhni, ‘Do yutinꞌen ꞌinkꞌez nyoo dúbe dune ꞌusbai yukꞌe ilhuk tsꞌiyawh lhelhtsꞌun otꞌen ꞌinkꞌez ookꞌeꞌnizdla cha ꞌuntꞌoh. Nusꞌen Laban danyalhꞌen la tsꞌiyawh whunusꞌen ꞌet huwa.

Genesis 30 , 31 66

13 Bethel whuYakꞌusda (El) ꞌen ꞌustꞌoh. Ndet daꞌ tse whedintsi-i soo ꞌinla ꞌinkꞌez stsꞌun nahuzinya ꞌawet dudinyaih ꞌinkꞌez njan keyoh whuchꞌa nasindaih ꞌinkꞌez nyunatneke bukeyoh tsꞌe naindalh.’ ”

14 ꞌEt Rachel ꞌinkꞌez Leah bulh hiyulh yatilhduk ꞌinkꞌez ꞌuhuyulhni, “ꞌAwhuz tole ꞌubá oochꞌeꞌ ꞌinkꞌez neba yootazilh-i cha neba hoonli?15 Wheni cha ꞌutsꞌun keyoh neninzun ꞌinkꞌez neye ꞌonket ꞌinkꞌez nezooniya gak yulhtsi.16 Ndai be hoonzooꞌ hoontꞌoh-i Yakꞌusda (Elohim) ꞌubá yughu yilhchoot, ꞌi tsꞌiyawh nechꞌeꞌ ꞌuntꞌoh neuzkehne ba cha, ꞌet ꞌandit Yakꞌusda (Elohim) daja nyulhni la ꞌet whuz unꞌa ꞌet ndoneh.”

17 ꞌEt Jacob dudinya ꞌinkꞌez duyeꞌke ꞌinkꞌez duꞌatke cha ꞌenne tsꞌiyawh nyoo camel kꞌe binla.18 ꞌInkꞌez ndai la khuna-i yutꞌi-i ꞌinkꞌez oogha ininkat-i cha, njan keyoh Paddan Aram ndi khuna-i oogha ininkat-i, oobá Isaac, Canaan keyoh tsꞌe, whuz whe naja.

19 ꞌEt Laban nus ꞌusbai ha titꞌus whe ꞌet Rachel ndai la nyo yoh ba ꞌukꞌeltsi hitsꞌu tenadudli-i, oobá oochꞌeꞌ, ꞌi tsꞌiyawh yundunistꞌi.20 ꞌInkꞌez Jacob whenanilꞌiꞌ, ꞌaw Laban tꞌeoonuszun yuchꞌa nintanatilgih-un, ꞌaw lhidinel.21 Ndai la yutꞌi-i tsꞌiyawh bulh dudinya ꞌinkꞌez ꞌukoh yaninya ntsꞌe la yun kꞌut Gilead whudzulh, whuz whe naja.

Laban ꞌen Jacob yuntizya22 Whulh tat dzin-un ꞌet ꞌandit tsꞌiya Laban hidaniꞌ Jacob

whenatselya.23 ꞌEt dulhutsinke dulh hubutilhdil ꞌinkꞌez huyuntizyoot. Lhtakꞌantꞌit dzin la hidulh ꞌinkꞌez Gilead whudzulh toh ꞌet yutꞌasuya.24 ꞌEt hoontsꞌi ꞌuldzis ꞌet Laban, Syria whutꞌen-un, nusuti whe Yakꞌusda (Elohim) be hóodiltsai ꞌinkꞌez ꞌuyulhni, “Huwaꞌoonli Jacob bulh yatalhdih te, hoontsiꞌ te kꞌus hoonzoo kꞌunꞌa te bulh yaoolhduk junih.”

25 ꞌEt Laban, Jacob yutꞌasuya nyo Jacob nimbali neninꞌai dzulh toh, ꞌinkꞌez Laban dulhutsinke tubulh nyo ꞌet nimbali nehuninꞌai Gilead whudzulh whutoh.26 ꞌInkꞌez Laban Jacob ꞌuyulhni, “Daintꞌen whe ꞌintꞌen whe nanalhꞌiꞌ? Tꞌeoonuzuszun whe ꞌinkꞌez stseꞌke cha ꞌantsꞌi ꞌulhnane hubilhchoot saluzti be kꞌunꞌa.27 Di ha ꞌinja snanto ꞌet whenatseilya? Soo hoonustꞌiꞌ ꞌinkꞌez shun be tubulh daꞌ, be tsꞌujun-i cha nanyutoosꞌaꞌ ooleꞌ.28 ꞌAw syeꞌke ꞌinkꞌez stseꞌke cha ꞌaw nalhubudustsꞌoos? ꞌEt whe tube whuzini whe ꞌinja ꞌet ndinja!

67 Genesis 31

29 Soo ꞌustus whe ꞌustꞌoh nyunduntasdoh wheni. ꞌEt hoontsꞌi mbá ooYakꞌusda (Elohim) ꞌulhdzis daꞌ sulh yailhduk ꞌinkꞌez ꞌusulhni, ‘Huwinli ꞌaw tsꞌihꞌun unꞌa ꞌuhoontꞌoh kꞌus hoontsiꞌ hukwꞌunꞌa te Jacob bulh yaoolhduk junih.’30 ꞌEt ꞌandit ꞌalha mbá ooyoh kwꞌeni inli ꞌinka whenainja. ꞌEt hoontsꞌi di ha nyoo ꞌukꞌeltsi tsꞌu tenadusdli-i, tsꞌiyawh ꞌi dunintꞌi?”

31 ꞌEt Jacob ꞌuyulhni, “Whenuzjut ꞌet huwa ꞌusja. ꞌEt ꞌudusni, ‘Doo ka la ntseꞌke nutꞌi be sgha ha nabolyelh,’ dusni.32 Ndun nyakꞌusda bulh nainla, khun hoonaꞌ junih. Nyulhutsinke bunalh ndai la nchꞌeꞌ nusle-i, tsꞌiyawh nahuyoltsꞌit ꞌinkꞌez nailhchoot!” ꞌAw Jacob tꞌeoonuszun Rachel dubá ooyakꞌusdane yundunistꞌi-i.

33 ꞌInkꞌez Laban, Jacob oonimbali tꞌah tsꞌe whenya, ꞌinkꞌez Leah oonimbali tꞌah cha nane yuba ꞌutꞌenne tsꞌekoo bunimbali tꞌah cha, tsꞌiyawh nusuya ꞌinkꞌez gak, ꞌaw nalheꞌileh ꞌinkꞌez Leah oonimbali tꞌah tenanja ꞌinkꞌez Rachel oonimbali tꞌah daninya.34 ꞌEt whutsodaꞌ Rachel nyoo oobá ꞌukꞌeltsi yutsꞌu tenadudli-i yilhchoot, ꞌinkꞌez ndi camel yukꞌusda-i, ꞌi ookwꞌuyuzꞌai-i, ꞌi ye yanla ꞌinkꞌez yukꞌetlꞌa didaꞌ. ꞌInkꞌez Laban dulcho nimbali tꞌah nuniztai ꞌinkꞌez ꞌaw nalhuyilel.

35 ꞌInkꞌez dubá ꞌuyulhni, “Khun te smoodihti whutsꞌun dooniꞌ junih, ꞌaw mbut dudosyaꞌ aitꞌoh, whuz unꞌa tsꞌekoo ꞌet nduhoontꞌoh nekꞌunꞌa ꞌinkꞌez nuniztai.” ꞌInkꞌez gak ꞌaw nyoo ꞌukꞌeltsi yutsꞌu tenadudli-i nalhuyilel.

36 ꞌEt Jacob hunilchꞌe ꞌinkꞌez Laban hukwa yidaniꞌ ꞌinkꞌez Jacob Laban ꞌulyuhni, “Ndet whe tankꞌus ꞌusja ha sdabe soo hunilchꞌe whe suntinyoot?37 ꞌEt ndinja, snaih toh whe dulcho nunintai. Dantꞌi nyoh ꞌusla ꞌi nainla? ꞌI njan nohbut neninle sih, sulhutsin ꞌinkꞌez nyun, nyulhutsin bunalh! ꞌEt ꞌenne sih neba nahooyeh nyun ꞌinkꞌez si bulh!

38 Nat whunizyat (20) yus kꞌut whutsꞌun nyulh ꞌistꞌen, ꞌusbai tsꞌeke ꞌinkꞌez dúbe tsꞌeke, ꞌaw ꞌilhoh hoontsꞌi lhuhiyat ꞌinkꞌez ꞌusbai dune cha ꞌaw lhusꞌulh.39 Ndai la khuna-i yayidalhchꞌulh-i, ꞌaw ntlꞌa lhuslel tsꞌiyawh ookꞌelha whuzusi, mba kꞌelha susi-i slakꞌet whe ntlꞌa ꞌusꞌai, dune yudunistꞌi tila kꞌus ꞌulhdzis tila hidunistꞌi tsꞌiyawh.40 ꞌEt ꞌustꞌoh dzenis whunulwus, chan yit cha ꞌinkꞌez ꞌulhdzis cha yaootullhuk ꞌinkꞌez ꞌaw lhustoh.41 Nyoh nat whunizyat (20) yus kꞌut ꞌet ꞌistꞌen, whunizyat ꞌon ꞌat dit (14) yus kꞌut ꞌet ntseꞌ bukꞌelha ꞌistꞌen, ꞌinkꞌez lhkꞌu tat (6) yus kꞌut cha ndi khuna-i cha ookꞌelha ꞌistꞌen. Whunizyat (10) ꞌet ookꞌelha ꞌustꞌen-un lhelhtsꞌun unꞌa naꞌhoonla.

Genesis 31 68

42 Sbá ooYakꞌusda (Elohim) ꞌinkꞌez Abraham ooYakꞌusda (Elohim) ꞌinkꞌez Isaac be nuzjut-un sulh ꞌuhoontꞌoh de, ꞌet de soo tsꞌihꞌun ꞌaw slakꞌet hoonli hooloh whudaꞌ nasutolhꞌaꞌ ooleꞌ. Yakꞌusda (Elohim) ndet la hukwꞌe ndusda-un ꞌinkꞌez sla be ꞌistꞌen-un tsꞌiyawh honꞌen ꞌinkꞌez ꞌulhdzis daꞌ hukwaꞌ nyudaniꞌ!”

Laban ꞌen Jacob yutsꞌun tsꞌihꞌun nahizya43 ꞌInkꞌez Laban, Jacob ꞌuyulhni, “Ndunne stseꞌ ꞌuhintꞌoh ꞌinkꞌez

bubuzkeh cha suzkeh ꞌuhintꞌoh, ꞌinkꞌez ndi khuna-i cha schꞌeꞌ ꞌuntꞌoh. Ndai la nilhꞌen-i, tsꞌiyawh schꞌeꞌ ꞌuntꞌoh, ꞌet daoosneh subah stseꞌke kꞌus bubuzkeh te?44 ꞌEt huwa ꞌanih khuni ꞌolneh, nyun si bulh daja datniꞌ lah, ꞌet tꞌeoonodzin.”

45 ꞌEt Jacob tse ꞌilho dilhchoot ꞌinkꞌez ꞌet neidinꞌai.46 ꞌEt Jacob dulhutsinke ꞌubulhni, “Tse nadulhdzooh ꞌinkꞌez tse nahadalhdzooꞌ ꞌinkꞌez lhkꞌe hidinla.” ꞌInkꞌez nyo tse ookꞌut ꞌet naꞌhitꞌal.47 Laban nyoo tse ꞌuwhulhni, “Jegar Sahadutha,” ꞌet hoontsꞌi Jacob ꞌen “Galeed,” whulhni.

48 ꞌEt Laban ꞌen ꞌutni, “Ndi tse lhkꞌu dizdla-i, ꞌi nyun si bulh khuni ꞌilya-i, ꞌi oonalh ꞌuhoontꞌoh.” ꞌEt huwa Galeed hidoniꞌ.49 Mizpah ꞌi cha ꞌet njan ꞌuwhulhni, ꞌet huwa ndutni, “Moodihti (Yahweh) nyun, si bulh ne-eguz nenilhꞌen lhchꞌoh ꞌitꞌoh te cha.50 Stseꞌ dzoh nubilhdzut de, kꞌus ꞌuyoonne ꞌatke te ilhchoot de, ꞌet hoontsꞌi Yakꞌusda ꞌen nyun, si bulh ne-eguz hoonilhꞌen wheꞌ hoontꞌoh.”

51 ꞌEt Laban, Jacob ꞌuyulhni, “Ndi tse lhkꞌu dizdla-i, ꞌi ꞌinkꞌez njan nainꞌa-i cha nyun, si bulh ne-eguz ꞌusla-i.52 Ndi tse lhkꞌu dizdla-i, ꞌi tꞌeooninzun ꞌinkꞌez ndi nainꞌa-i cha tꞌeooninzun ndi ꞌaw ba nꞌun toosyaꞌ aitꞌoh ꞌinkꞌez nyun cha ndiz unꞌa ꞌon ꞌun tonyaꞌ aitꞌoh lhunduntaldah hukwa.53 Abraham ooYakꞌusda (Elohim), Nahor ooYakꞌusda (Elohim) ꞌinkꞌez bubá buYakꞌusda (Elohim) cha, ꞌen ne-eguz nahotiyeh.” ꞌInkꞌez Jacob dubá, kꞌus mbe ye nuljut-un, ꞌen ꞌi be nahizya.

54 ꞌEt Jacob nyoo dzulh kꞌut ꞌet khuna-iyaz dalhkꞌun ꞌinkꞌez dulhutsinke ꞌuhooꞌalh hubulhni. Nyoo ꞌutꞌalh-i hanꞌal ꞌinkꞌez ꞌulhdzis dulyiz whe dzulh kꞌut ꞌet hudaltsꞌiꞌ.

55 ꞌEt bundadaꞌ ꞌet ꞌudaꞌ Laban dudinya ꞌinkꞌez duchaike, dutseꞌke tubulh nabuditsꞌooz, ꞌinkꞌez soo hoonzoo-i za butlꞌa ookat ꞌi be soo hoonzoo-un be ubulh yalhduk ꞌinkꞌez whe naja, ꞌinkꞌez duyoh tsꞌe whe naja.

69 Genesis 31

Esau ꞌen Jacob yududizya

32 1 ꞌEt Jacob whenya ntsꞌe tizya tsꞌe ꞌinkꞌez Yakꞌusda (Elohim) oolizasne hidudizdil.

2 ꞌEt hubutilhꞌen whe ꞌutni, “Njan ꞌet Yakꞌusda whutꞌi-un ꞌuhoontꞌoh,” ꞌinkꞌez nyo hooziꞌ ꞌet Mahanaim whulhni.

3 ꞌEt Jacob dutso khuni nuꞌane ꞌenne dulhutsin Esau whuz whe balhꞌaꞌ, yun kꞌut Seir huwhutni-un Edom keyoh.4 ꞌInkꞌez ꞌubulhni, “Smoodih Esau njan dudohniꞌ, ‘Nyunatneꞌutꞌen-un Jacob njan ndutni, “Laban ꞌen oozih hoostꞌeꞌ ꞌinkꞌez ꞌet usda ꞌandit whutsꞌun.5 Khuna-i lhai ꞌustꞌi, musdoos cha, donkey cha, ꞌinkꞌez dune ꞌinkꞌez tsꞌekoo sba ꞌutꞌenne cha, hoonintꞌiꞌ whe la sonꞌen ꞌinka ntsꞌun whebisꞌaꞌ.” ’ ”

6 ꞌEt nyoonne nukhuni nuꞌane Jacob highu nandil ꞌinkꞌez ꞌuhuyulhni, “Nyulhutsin Esau ooghuznindil. Didut cha ndiz nyudutiyalh, dit whunizyat whunizyat (400) ꞌet ꞌenne dune hiyulhtidulh.”

7 ꞌEt Jacob tubeh nilhjoot ꞌinkꞌez huwu ni suliꞌ, duduneꞌ tsꞌiyawh nawh hidulh whe lhkꞌe banla, ndai la khuna-i ꞌinkꞌez musdoos cha tsꞌiyawh nyokhi camel ꞌi cha nawh ukulh whe lhkꞌe yanla.8 ꞌInkꞌez ꞌutni, “Esau njan ꞌilhoh ꞌudulhne bughu ninya ꞌinkꞌez whe buninghan de, ꞌonghuni ꞌudun ulhꞌus-i ꞌi la yuchꞌa nintaoolhghas.”

9 ꞌInkꞌez Jacob ꞌutni, “O sbá Abraham ooYakꞌusda (Elohim), sbá Isaac ooYakꞌusda Moodihti (Elohim Yahweh) ꞌusulhni, ‘Nkeyoh tsꞌe naindalh ꞌinkꞌez nyunatneke butsꞌun ꞌet whuz hoonzoo whe ꞌutanelh mba ootiselh’.10 ꞌAw sgha teꞌninzun ꞌinkꞌez tsꞌihꞌun khuni be cha sulh yailduk, ꞌi ꞌaw soo ba lheꞌuzdzooꞌ whe ꞌustꞌoh. Mba ꞌutꞌen-un whunilhtan njan ꞌukoh Jordan yanusya ndai la stuz cha nustun ꞌinkꞌez nawh ꞌudulhne tsꞌuzdliꞌ.11 Ntsꞌu tenadusdli sulhutsin Esau, ꞌen oola ꞌi chꞌa. ꞌEn be nuzjut doo ka sih ndiz sghu ninya ꞌinkꞌez seooyaꞌ ꞌinkꞌez suzkeh buloo tubulh.12 ꞌUsudini inleꞌ, ‘Hoonzoo mba ootiselh sudini inleꞌ. Mbene la ntsꞌu haindene yatoo ba sai ꞌet ꞌuhultsuk, ꞌaw butsꞌolhto aitꞌoh butalhtselh.’ ”

13 ꞌEt ꞌulhdzis nyo ꞌet hantez ꞌinkꞌez ndai la yula kꞌe yankat-i, ꞌi dulhutsin Esau yutsꞌi tilhdulh.14 Nat whunizyai whunizyai (200) tsꞌeke dúbe, ꞌinkꞌez nat whunizyai (20) dune dúbe, ꞌinkꞌez nat whunizyai whinizyai (200) ꞌi ꞌusbai tsꞌeke, ꞌinkꞌez nat whunizyai (20) ꞌusbai dune cha.15 Tat whunizyai (30) nyoo camel uljas-i ooyazke cha, dit whunizyai (40) musdoos, ꞌinkꞌez whunizyai (10) musdoos dune, nat whunizyai (20) donkey tsꞌeke, whunizyai (10) buzkeh cha.

Genesis 32 70

16 ꞌI nyokhi yuba ꞌutꞌenne tlꞌa yanla dichꞌoh whe ꞌinkꞌez yuba ꞌutꞌenne ꞌubulhni, “Senghoozuhdilh ꞌinkꞌez nilhdzaꞌ beguz whuzdla whe ndi whuz nihyulh khuna-i uhꞌulh whe.”

17 ꞌInkꞌez ꞌudechoo khuni yutlꞌa yanꞌai ꞌuyulhni, “Ndet la sulhutsin Esau nohdudizya ꞌinkꞌez nohoodulhkut de, ‘Mbe chꞌeꞌ uhli whe ꞌuhtꞌoh?’ nohulhni de, ꞌinkꞌez, ‘Ntsꞌe tihdil?’ ni de, ‘Mbe oochꞌeꞌ ꞌuntꞌoh ndi nohtso ꞌusdla-i?’18 ꞌEt ꞌudoohniꞌ, ‘Mba ꞌutꞌen-un Jacob oochꞌeꞌ ꞌuntꞌoh. Oomoodihti Esau tsꞌotlꞌa yanla, ꞌinkꞌez whunilhꞌen ꞌudekꞌoh nehuniyalh.’ ”

19 ꞌEt ꞌulhnane bulh nat, bulh tane cha ꞌinkꞌez khuna-i yunidulhne ꞌubulhni, “ꞌEt whuz unꞌa Esau bulh yatilhduk nalhti de.20 ꞌInkꞌez ꞌet cha ndudoohniꞌ, ‘Whunilhꞌen nyunatneꞌutꞌen Jacob ꞌen nekꞌoh uyalh.’ ” ꞌEt ꞌuninzun, “Ndi stso ulhꞌus, ꞌi bugha ininla ꞌinkꞌez ꞌet hukwꞌelhꞌaz oonin nilhꞌen de, ꞌet de sih soo sulh nehoꞌalh.”21 ꞌEt huwa ndi yutsꞌi tilhdil-i yutso ꞌuja, ꞌet hoontsꞌi didut nyo ꞌet ꞌulhdzis ꞌet nimbali neninꞌai ꞌinkꞌez ꞌet hantez.

22 ꞌInkꞌez ꞌet ꞌulhdzis dudinya ꞌinkꞌez duꞌat nahultꞌoh cha, buba ꞌutꞌenne cha ꞌinkꞌez whunizyane ꞌon ꞌat ꞌilhune (11) ooyeꞌke cha, ꞌet nyo yahunindil ꞌukoh.23 ꞌEnne hubilhchoot ꞌinkꞌez ꞌukoh whuyaz yahunindil, ndai la yutsꞌi tilhdulh-i cha.

Jacob Yakꞌusda (Elohim) bulh nulhuhulte24 ꞌEt Jacob dichꞌoh za ꞌet neltsꞌut ꞌinkꞌez Dune bulh nulhuhulte,

ꞌet ꞌulhdzis nduhoolhyiz yukaih whutsꞌun.25 ꞌEt nyoon Dune tꞌeooninzun ꞌaw Jacob chꞌa lheꞌilhdoh, ꞌet nyoon Dune Jacob bulh nulhuhulte whe Jacob ookꞌi lhghu nawhudulhghuz-un, ꞌet yutꞌaiznai ꞌinkꞌez ꞌet nyoo Jacob ookꞌi ꞌi kꞌulkut.26 ꞌInkꞌez ndun Dune, ꞌen ꞌet ꞌutni, “Sla nadintnih ꞌawet hootꞌen.” ꞌEt hoontsꞌi ꞌuyulhni, “ꞌAw nlanadoosnih aitꞌoh soo hoonzoo-un bulh ꞌusinla ꞌandit za.”

27 ꞌEt ꞌuyulhni, “Ndai la nyooziꞌ?” ꞌInkꞌez ꞌutni, “Jacob.”28 ꞌEt ꞌutni, “ꞌAw nyooziꞌ ꞌon ꞌun Jacob lhunyodutasnel. Israel nyo

dutanelh. Yakꞌusda (Elohim) ꞌen bulh nulhuziltiꞌ, dune cha, ꞌinkꞌez ꞌenne buchꞌaꞌ nilhde.”

29 ꞌEt Jacob yoodulhkut, “Ntsꞌu tedusdlih, nyooziꞌ ꞌi sudini?” ꞌInkꞌez ꞌet ꞌutni, “Di ha sooziꞌ ꞌi ookaꞌ oodilhkut?” ꞌInkꞌez ꞌawet whe soo hoonzoo-un oogha whultsꞌut.

30 ꞌInkꞌez Jacob nyoo boozi, “Penuel,” whulhni, “Yakꞌusda soo oonin tsꞌe ꞌusꞌen ꞌinkꞌez ꞌaw dalhusnel,” ni ꞌet huwa.

71 Genesis 32

31 ꞌEt soo nyo Penuel yaninya whe ꞌet sa hainꞌai ꞌinkꞌez nunulkꞌiꞌ suliꞌ.32 ꞌAndit dzin whutsꞌun Israel ootsꞌu haindene, ꞌenne nyoo ꞌukꞌi tsꞌeh tsung ꞌaw lhuhayusꞌal, ndun Dune ookꞌi yutꞌaiznai ꞌet huwa, ꞌinkꞌez nyoo ootsꞌeh sugi suliꞌ.

Jacob ꞌinkꞌez Esau lhghu hudistꞌaz

33 1 ꞌEt Jacob ndo yutanꞌen whe dulhutsin Esau ꞌaz de uyalh yutilhꞌen, dit whunizyai whunizyat (400) dune ꞌet ꞌuhultsuk,

ꞌenne hiyulh udulh whe ꞌet duduzke lhkꞌe banla, Leah cha, Rachel cha ꞌinkꞌez nyoonne nane buba ꞌutꞌenne cha butabuninla.2 ꞌInkꞌez ndune tsꞌekoo yuba ꞌutꞌenne ꞌinkꞌez tsꞌoodunne cha dubut nebuninla ꞌinkꞌez Leah duduzke te ooniz de nebuninla.3 ꞌEt whe butso neninya ꞌinkꞌez yubut nachaniti, lhtakꞌantꞌit ꞌet yubut nachaniti ꞌet dulhutsin yuzih neninya.

4 ꞌEt hoontsꞌi Esau ꞌaz de tilhgai, yududilhgai ꞌinkꞌez yilhchoot ꞌinkꞌez yutsꞌilchun kꞌet ꞌet naiditsꞌooz ꞌinkꞌez nahultꞌoh hantse.

Genesis 32 , 33 72

(32:26)© 1996 David C. Cook

5 ꞌInkꞌez ndo yutanꞌen, ꞌet nyoonne tsꞌekoo ꞌinkꞌez tsꞌoodunne te, ꞌenne butilhꞌen ꞌinkꞌez ꞌutni, “Ndunne ꞌenne mbene wheꞌ hintꞌoh?” ꞌEt ꞌuyulhni, “Yakꞌusda (Elohim) ye unzoo-i gha mba ꞌutꞌen-un bugha buninla ꞌuhintꞌoh.”

6 ꞌEt nyoonne tsꞌekoo natneꞌutꞌenne ꞌinkꞌez tsꞌoodunne tubulh nus hutizdil ꞌinkꞌez yubut yo ꞌuntutsulh.7 ꞌInkꞌez Leah cha duduzke tubulh hibut nenindil ꞌinkꞌez hibut yo ꞌuntutsulh, ꞌet hukwꞌelhꞌaz Joseph ꞌinkꞌez Rachel bulh hizih neninꞌaz, ꞌenne cha hibut yo ꞌuntizsel.

8 ꞌEt Esau ꞌutni, “Daja ninzun whe ndi lheltsuk-i nyulh ꞌuhintꞌoh?” ꞌEt ꞌuyulhni, “ꞌI bududisya, ꞌet de la soo cho sunolhꞌen smoodih.”

9 ꞌEt hoontsꞌi Esau ꞌutni, “Soo ꞌultsuk-i ꞌustꞌi sulhutsin, ndai la ꞌintꞌi-i nyunchꞌoh ꞌintꞌi.”

10 ꞌEt Jacob ꞌutni, “ꞌAwundooh! Sla ꞌineh, ꞌandit ꞌawet soo sunalhꞌen, ꞌet de ndi ntsꞌu tisdil-i ilhchoot ndet la nyisꞌen whe ꞌantsꞌi Yakꞌusda (Elohim) oonin nusꞌen sba leꞌ hoontꞌoh ꞌinkꞌez tubeh hoonintꞌiꞌ whe sunilhꞌen.11 Ndi soo hoonzoo-i sgha whultsꞌut ngha nusꞌai-i ilhchoot, Yakꞌusda (Elohim) tube stsꞌun nzoo inleꞌ ꞌinkꞌez tsꞌiyai lhai ꞌustꞌi.” ꞌEt doo cha ꞌuyulhni, ꞌinka yilhchoot.

12 ꞌEt Esau ꞌutni, “Dugweꞌ ꞌawet uztoodilh ꞌinkꞌez ntso sih natoosjaꞌ.”13 ꞌEt hoontsꞌi Jacob ꞌen ꞌuyulhni, “Smoodih tꞌeooninzun tsꞌoodunne

tehutsun, ꞌinkꞌez ndi khuna-i whulukhi be ꞌudulhtuk whe ꞌuntꞌoh, ꞌi cha sulh ꞌuntꞌoh, ꞌinkꞌez dune tube ꞌilhudzin hiniyulh de nyoo khuna-i yaoodlah lah.14 Whute smoodih! Stso inyalh, mba ꞌutꞌen-un ootso inyalh, ꞌinkꞌez ndune butso toosyaꞌ sih nanilhtsulyaz, khuna-i cha ꞌinkꞌez tsꞌoodunne cha, ndet la buba sooꞌ hoontꞌoh-un ꞌinkꞌez smoodih keyoh Seir ꞌet la ooghosyaꞌ.”

15 ꞌInkꞌez Esau ꞌutni, “Ndunne sulh nudilhne, oolohne nzih neboslelh.” ꞌEt hoontsꞌi ꞌutni, “Smoodih, ꞌawundooh, sooꞌ hoontꞌoh! Soo cho sunoolhꞌen sih.”

Jacob ꞌen yun kꞌut Canaan tsꞌun whuz oozya16 ꞌEt Esau ꞌet dzin whe naja keyoh Seir whutsꞌun.

17 ꞌInkꞌez Jacob keyoh, Succoth huwhutni, tsꞌe whuz hoozdil. Yoh ꞌuhoonla ꞌinkꞌez khuna-i ba cha dilhtsꞌi-un ꞌuhoonla, ꞌet huwa nyo ꞌet ꞌandit Succoth huwhutni.

18 ꞌEt Jacob soo dalhinel whe nyo keyoh whuti, Shechem huwhutni, whuz oozya, Canaan yun kꞌut ꞌet whuzꞌai Paddan Aram tsꞌe hainya, ꞌinkꞌez nyo keyoh whuti ꞌet yoo ꞌaz tsꞌe dunimbali neninꞌai.

73 Genesis 33

j 33:20 Ndi booziꞌ, El Elohe Israel, ꞌi “Yakꞌusda ꞌEn Israel Whutꞌenne buYakꞌusda Ulhtus ꞌUntꞌoh,” ni whe ꞌutni. Ndunne Israel whutꞌenne kꞌus Jacob tsꞌu hainzutne cha hiyulhni, ꞌen duyun kꞌut whuz lhgha nadija tileh. ꞌEt Yakꞌusda yuba nahizya hoontsiꞌ whuchꞌa yughu tileh ooyun kꞌut whusanátidalh ha. ꞌEt Israel buyun kꞌut whusanája whe tꞌehoninzun Yakꞌusda soo ꞌultus dichꞌoh hoontsiꞌ whuchꞌa bubulhyih. ꞌEt huwa Yakꞌusda ꞌen “El Elohe Israel ꞌUntꞌoh” ꞌen ndi booziꞌ. Jn 10:28 Sizi ndutni, “ꞌIlhiz huye khúna, ꞌi bugha núsꞌai. ꞌAw yalhahitásdla ꞌinkꞌez ꞌaw dune yula kꞌé haboolelhne hooloh.” ꞌEt whuz unꞌa ndi booziꞌ “El Elohe Israel” ni whe ꞌutni.

19 ꞌInkꞌez nyo nimbali neninꞌai-un yun, ꞌi Hamor buzkeh ꞌenne bubuyonket. Shechem oobá, whunizyai whunizyat (1,000) sooniya ꞌi kꞌelha.20 ꞌEt nyo loodel ꞌinla ꞌinkꞌez El Elohe Israel j whulhni.

Dinah ꞌen bulh dzoh ꞌuhooja

34 1 ꞌEt Dinah, Leah ooyatsꞌe, Jacob ghu yulhtsi inleꞌ-un, nyo tsꞌekoo nyoh whutꞌine, ꞌoh whutꞌine, ꞌenne butsꞌu tizya.

2 ꞌInkꞌez Shechem, Hamor ooyeꞌ, nyo keyoh lerwe yeꞌ unli, yutilhꞌen whe yilhchoot ꞌinkꞌez yuchantꞌinteꞌ ꞌinkꞌez nintaꞌ yunilhꞌen.3 Oozul tubeh nyoon Dinah ooba yinzoo, Jacob ootseꞌ, ꞌinkꞌez tube yukꞌentsiꞌ ꞌinkꞌez soo cho yulh yalhduk.4 ꞌEt Shechem dubá Hamor yulh yalduk ꞌuyulhni, “Ndun tsꞌekeyaz ꞌen sꞌat tileh wheni sba ilhchoot.”

5 ꞌEt Jacob whulh ꞌudantsꞌo yutseꞌ Dinah nintaꞌ yunilhꞌen, ꞌet whulh ꞌudantsꞌo ꞌet nyoonne ooyeꞌke nus khuna-i bulh ꞌuhutꞌen ꞌinkꞌez Jacob ꞌaw whusanahidil whutsꞌun lhubudinel.

6 ꞌEt Hamor, Shechem oobá, Jacob yughu ninya yulh yatilhduk huba.7 ꞌInkꞌez Jacob ooyeꞌke nus ꞌuhutꞌen whe whuz de ha nahidil ꞌinkꞌez whulh ꞌuhudantsꞌo tube buba dzoh suliꞌ ꞌinkꞌez honilchꞌe. Lheꞌhoontꞌoh whe kꞌunꞌa hukwaya hoonli ꞌuja, Israel ootseꞌ yuchantꞌinteꞌ, ꞌaw nduhoneh huba lheꞌhootꞌoh.

8 ꞌEt hoontsꞌi Hamor bubulh yalhduk ꞌinkꞌez ꞌubulhni, “Syeꞌ Shechem oozul ntseꞌ tube yukꞌeni unli ooꞌat yutaleh wheni oogha inilhtih.9 ꞌInkꞌez nebulh lhgho dolhtsꞌiꞌ. Ntseꞌkene ꞌenne negha buninle ꞌinkꞌez wheni netseꞌke ꞌenne hubilhchoot.10 ꞌEt de sih nezih hoohtꞌeꞌ ꞌinkꞌez nyo yun cha ꞌet ꞌusꞌai, ꞌi kꞌut hoontꞌi ꞌinkꞌez hoohket ꞌinkꞌez ꞌeꞌoohket. Teꞌahtꞌen ꞌinkꞌez nohnichꞌoh eni nohgha ꞌoozit sih.”

Genesis 33 , 34 74

11 ꞌEt Schechem ꞌen cha Dinah oobá ꞌinkꞌez bulhutsinke ꞌenne ꞌubulhni, “Nohba ꞌuszoo ooleꞌ. Daja suduhni-un ꞌet la nohgha ooslelh.12 Daltsuk haꞌ nuhzun ꞌinkꞌez nohtsꞌu tisdulh-i. Daja duhni daltsuk-i ꞌinkꞌez ndun tsꞌekeyaz sꞌat tileh huba sgha nulhtih.”

13 ꞌEt hoontsꞌi Jacob ooyeꞌke Shechem ꞌinkꞌez Hamor bulh ꞌubuhutni ꞌinkꞌez whunutꞌih ꞌi be bubulh yahulhduk, nyoon dudulhtus Dinah nintaꞌ inilhꞌen ꞌinka.14 ꞌInkꞌez ꞌubuhutni, “ꞌAw ꞌet dutsꞌooneh aitꞌoh, ꞌaw neulhtus ꞌaw yuka dune lhitꞌus-un gha tsꞌoolhtelh aitꞌoh. Wheni neba hukwaya hoonli wheꞌ hoontꞌoh.15 ꞌEt njan ꞌilhughun huwa ꞌet de ꞌaꞌah usdutinelh nekꞌunꞌa ꞌutantꞌelh, dune tsꞌiyawh yuka dune unli-un hubotitꞌus.16 ꞌEt de la netseꞌke nohgha butsꞌolelh ꞌinkꞌez nohtseꞌke hubutsꞌitalhchulh ꞌinkꞌez nohzih tsꞌotitꞌelh ꞌinkꞌez ꞌilhoghun yinka duneꞌne ꞌuztileh.17 ꞌEt ꞌaw lhunedahtsꞌil de, ꞌinkꞌez nohka dune uhli-i nohuztꞌus de, ꞌet de ndun neulhtus natsꞌitalhchulh ꞌinkꞌez naztidulh.”

18 ꞌEt ndi khuni ꞌi tube buba yinzoo Hamor ꞌinkꞌez ooyeꞌ Shechem ꞌen cha.19 ꞌEt nyoon chilh ꞌahoh ꞌet duja nyoon Jacob ootseꞌ ooba yinzoo ꞌinka ꞌonus huwa ꞌitꞌen-un ꞌuja oobá ooyoh dilhtsꞌine buba nus.20 ꞌInkꞌez Hamor ꞌinkꞌez Shechem ooyeꞌ te nyo keyoh whudatih ꞌet nehunindil ꞌinkꞌez nyo keyoh whuduneꞌne bubulh yahulhduk.21 “Ndunne dune nebulh soo dune hinli wheꞌ hintꞌoh, ꞌet huwa njan yun kꞌut huhootꞌeꞌ ꞌinkꞌez ꞌuhooket teꞌhootꞌen, ndi yun soo ꞌulcho whe ꞌuntꞌoh. Butseꞌke ꞌenne butsꞌolhchoot neꞌatke wheni, ꞌinkꞌez wheni netseꞌke bugha butsꞌolelh.22 Njan ꞌilhoghun ꞌet za ndutsꞌuja te, ꞌandit za dune neulh dune hutileh, whe ꞌilho tsꞌutileh. ꞌEt ndun nedune ꞌenne tsꞌiyawh hika dune unli ꞌi ookꞌut tsꞌootꞌus, ꞌet didut tsꞌiyawh nduhintꞌoh.23 Ndi bughunaꞌ huyutꞌi-i cha ꞌinkꞌez khuna-i tsꞌiyawh nechꞌeꞌ tileh? ꞌAntsꞌi ꞌaꞌah uzdoonih ꞌet de la nebulh dune hooleꞌ.”

24 ꞌEt nyo keyoh whuti tenindilne tsꞌiyawh Hamor, Shechem bulh ooyeꞌ, hubodantsꞌo, dune tsꞌiyawh yuka dune unli-i bubuhuztꞌus, nyo keyoh tenindilne.

25 ꞌEt ꞌuhooja whulh tat dzin tsꞌiyawh bubulh ꞌultsꞌulh, nane Jacob ooyeꞌke Simeon ꞌinkꞌez Levi bulh Dinah bulhutsin, saluzti huyilhchoot ꞌinkꞌez soo tsꞌet ꞌet nyo keyoh whuti dune tsꞌiyawh hubuhanghan.26 ꞌInkꞌez Hamor ꞌinkꞌez Shechem ooyeꞌ, ꞌenne cha saluzti be bubozilhghi ꞌinkꞌez Dinah Shechem ooyoh ꞌet tenahinilhti ꞌinkꞌez tenahundil.

75 Genesis 34

27 Jacob ooyeꞌke ndunne huba ha nghanne buzih nehunindil ꞌinkꞌez nyo keyoh cha tsꞌiyai hilhchoot, bubulhtus nintaꞌ hinilhꞌen ꞌet hukwa.28 ꞌEt nyoo dude ꞌusbai, musdoos dune cha ꞌinkꞌez khuna-i donkey cha, ꞌinkꞌez nyo keyoh ꞌusla-i cha nus yun kꞌut ꞌusla-i cha tsꞌiyawh huyilhchoot.29 ꞌInkꞌez huye hoonzooꞌ ꞌuntꞌoh-i cha tsꞌiyawh huyilhchoot. Ntsoolneyaz ꞌinkꞌez buꞌatke cha hubuhilhchoot, ꞌinkꞌez ndai la yoh ꞌusla-i cha tsꞌiyawh huyilhchoot.

30 ꞌEt Jacob ꞌen Simeon ꞌinkꞌez Levi ꞌen ndo ꞌubulhni, “Tube sba dzoh ꞌuhja! Ndunne dune ndoh whutꞌine buba ska lheꞌhunizun suliꞌ. Canaan whutꞌenne ꞌinkꞌez Perizz whutꞌenne, tube wheni tsꞌintsool wheꞌ tsꞌintꞌoh, tsꞌiyawh ꞌilhohozdil ꞌinkꞌez la schꞌaz nehudindil ꞌinkꞌez la sozoolhghelh. Gak sotilhtselh syoh whutꞌine cha, si cha.”

31 ꞌEt hoontsꞌi ꞌuhutni, “Neulhtus ꞌantsꞌi ꞌulꞌenne kꞌunꞌa neꞌuztilhꞌen?”

Jacob ꞌen Bethel tsꞌun whe naja

35 1 ꞌEt Yakꞌusda (Elohim) ꞌen Jacob ꞌuyulhni, “Dudinyaih ꞌinkꞌez Bethel tsꞌe inyalh ꞌinkꞌez ꞌet hontꞌeꞌ sih. ꞌInkꞌez Yakꞌusda (El)

nyunalh hainya inleꞌ, ꞌen tsꞌun loodel ꞌonleh, nyulhutsin Esau oochꞌa tse tilya whe.”

2 ꞌEt Jacob, yulh dune unline yulh whutꞌine, ꞌet ꞌubulhni, “Nyo ꞌudun keyoh lhelhyoo ꞌuyakꞌusdane butsꞌu tenaduhdli, ꞌudun nenuhle, nohtsun hooloh nadudulhtsih ꞌinkꞌez nohnaih cha lhkꞌe naduhle.3 ꞌInkꞌez duzdodilh, ꞌinkꞌez Bethel tsꞌe uztoodilh. ꞌEt Yakꞌusda (El) tsꞌun loodel ꞌoosleh sih, mbe la dzin dzoh nuzut-un sulh ꞌutꞌen whe whesya.”4 ꞌInkꞌez nyoo ꞌutsꞌun keyoh whutꞌenne, dantꞌi ꞌukꞌeltsi yakꞌusda hitsꞌun tenadudli-i nuhuyule-i, ꞌi tsꞌiyawh Jacob tlꞌa huyanla, ꞌinkꞌez dudzo gwul cha tsꞌiyawh ꞌinkꞌez Jacob nyo duchun, oak huyulhni, ꞌi yucheh ꞌahuyanla.5 ꞌInkꞌez nahutisdil ꞌinkꞌez Yakꞌusda oonujut-i, ꞌi tsꞌiyawh nyo keyoh whuti bukeidiltsꞌut, ꞌaw Jacob ooyeꞌke lhubontiyulh.

6 ꞌEt Jacob ꞌet Luz (Bethel huwhutni-un) whuz oozya, Canaan yun kꞌut mbene la yulh nudilhne cha tsꞌiyawh.7 ꞌInkꞌez ꞌet loodel ꞌinla, ꞌinkꞌez nyo ꞌet El Bethel whulhni, ꞌet Yakꞌusda nghu ninya inleꞌ, bulhutsin chꞌa tse tilhya whe.

8 ꞌEt Deborah, Rebekah yuba neꞌutꞌen-un, dazsai. Nyo Bethel ꞌon yo nyoo duchun oak ndi ꞌi hicheh ꞌahuyalhti. ꞌEt Allon Bacuth huwhutni.

9 ꞌEt Yakꞌusda (Elohim) Jacob doo cha yunalhtsꞌet hainya, whutsodaꞌ Padan Aram tsꞌe hainya whe soo hoonzoo-un oogha whultsꞌut.10 ꞌInkꞌez Yakꞌusda (Elohim) ꞌuyulhni, “Nyooziꞌ Jacob tsꞌutni, ꞌaw ꞌon ꞌun Jacob be ntsꞌiyoziꞌ aitꞌoh, Israel ꞌi nyooziꞌ tileh.” ꞌEt whe booziꞌ ꞌi Israel yulhni.

Genesis 34 , 35 76

11 ꞌInkꞌez ꞌet cha Yakꞌusda (Elohim) ꞌuyulhni, “Si Yakꞌusda ꞌUkꞌenus ꞌUltus-un (El Shaddai) ꞌen ꞌustꞌoh. Lhai cho ntsꞌu ha ookat ꞌinkꞌez lhai cho ooleꞌ didohne ꞌinkꞌez dune didohne tsꞌiyawh ꞌenne ntsꞌu ha hutidoh, ꞌinkꞌez lerwene ꞌenne nyustꞌe tsꞌu ha hutidulh.12 Yun Abraham ꞌinkꞌez Isaac bulh bugha inusꞌai-i, ꞌi ngha nusꞌai. Ntsꞌu haindene nkꞌelhꞌazne, ndi yun nohgha nusꞌai.”13 ꞌEt whe Yakꞌusda (Elohim) ꞌen ndo yuchꞌa whe naja, ntsꞌe yulh yailhduk inleꞌ ꞌet.

14 ꞌEt Jacob tse whedintsiꞌ Yakꞌusda (Elohim) bulh yailduk-un, tse lhkꞌe idinla-i ꞌi nayantsi. ꞌInkꞌez tsꞌutnai-i ꞌi ookꞌut ꞌi yukꞌe yilhdzo ꞌinkꞌez khe cha yukꞌe yilhdzo.15 ꞌInkꞌez nyo ꞌet Yakꞌusda yulh yailhduk-un, Bethel whulhni.

Rachel dazsai16 ꞌEt hutizdil Bethel whuchꞌa usdil ꞌinkꞌez Ephrath ꞌawet

nilhdukwyaz, ꞌet Rachel ꞌawet ooyaz whutaleh bulh ꞌutilhtsul ꞌinkꞌez tube ooba hoontsiꞌ.17 ꞌEt ꞌuhooja bulh ꞌultsꞌulh whe nyoon yughunli-un ꞌuyulhni, “Wheniljut ꞌilhoh, ndun ꞌen cha dune nyaz tileh.”18 ꞌEt ꞌuhooja ꞌawet dawhenintsai whe ꞌet ndun duneyaz Ben-Oni yulhni, ꞌet hoontsꞌi oobá ꞌen Benjamin yulhni.

19 ꞌEt Rachel dazsai ꞌinkꞌez Ephrath tsꞌu wheti-un (ꞌet Bethlehem ꞌuhoontꞌoh), ꞌet ꞌahuyalhti.20 ꞌInkꞌez tse lhkꞌe dinla nyo yuntsꞌun kꞌut, ꞌet ꞌandit dzin whutsꞌun Rachel ootsꞌun kꞌut huwhutni.

21 ꞌEt Israel tizya ꞌinkꞌez Eder whuzih nainꞌa zih, ꞌet dunimbali neininꞌai.22 ꞌEt ꞌuhooja Israel nyo yun kꞌut hootꞌeꞌ whe Reuben ꞌen Bilhah nyoon oobá ooꞌat ꞌen yugha nyus ꞌuntꞌoh, ꞌen yuchantꞌinteꞌ ꞌinkꞌez Israel whulh ꞌudantsꞌo. ꞌInkꞌez Jacob ooyeꞌke tsꞌiyawh whunizyane ꞌon ꞌat nane hinli.

Jacob whunizyane ꞌon ꞌat nane (12) ooyeꞌke

23 Leah ooyeꞌke,ꞌenne Reuben, Jacob ꞌudechoo ooyeꞌ,ꞌinkꞌez Simeon, Levi cha, Judah, Isaachar ꞌinkꞌez Zebulun.

24 Rachel ooyeꞌke,ꞌenne Joseph ꞌinkꞌez Benjamin.

25 Bilhah ooyeꞌke, Rachel yuba ꞌutꞌen-un,Dan ꞌinkꞌez Naphtali.

77 Genesis 35

26 Zilpah, Leah yuba ꞌutꞌen-un,ooyeꞌke dune Gad ꞌinkꞌez Asher hubuhutni.

ꞌEnne tsꞌiyawh Jacob ooyeꞌke, Paddan Aram whutꞌi whe.27 ꞌEt Jacob, dubá Isaac, yughu ninya. Mamre kꞌut Kirjath Arba

huwhutni, (Hebron ꞌuhoontꞌoh), ndet la Abraham ꞌinkꞌez Isaac bulh huhootꞌen-un.28 ꞌEt Isaac ꞌen 180 yus kꞌut yinka indaꞌ.29 ꞌEt Isaac ꞌudekꞌez ha naji ꞌinkꞌez dazsai, ꞌinkꞌez whutsodaꞌ hubulh ꞌantꞌeꞌne, ꞌenne butsꞌun whenya. Tube duneti ꞌinkꞌez lhat dzin cha be yus kꞌut. ꞌInkꞌez ooyeꞌke Esau ꞌinkꞌez Jacob bulh ꞌahuyalhti.

Esau tsꞌu haindene

36 1 Ndi ꞌi Esau tsꞌu haindene ghun, Edom huyulhni.2 Esau tsꞌekoo Canaan whutꞌenne butoh ꞌenne duꞌat eni

hubilhchoot. Adah ꞌen Elon ootseꞌ, Hitt whutꞌen-un ꞌuntꞌoh, Aholibamah, Anah ootseꞌ Zebeon, Hiv whutꞌen-un ꞌen ootseꞌ,3 ꞌinkꞌez Basemath, Ishmael ootseꞌ, Nabajoth bulhtus.4 ꞌEt Adah, Eliphaz yulhtsi, Esau ghu yulhtsi ꞌinkꞌez Basemath, Reuel sulhtsi.5 ꞌInkꞌez Aholibamah, Jeush sulhtsi, Jalam ꞌinkꞌez Korah cha, ꞌen Esau ooyeꞌke, Canaan yun kꞌut whutꞌi whe.6 ꞌEt Esau duꞌatke, duyeꞌke, dutseꞌke ꞌenne mbene la yuyoh whutꞌine, tsꞌiyawh musdoos cha ꞌinkꞌez khuna-i, ndai la yutꞌi-i oogha ininde-i Canaan okhi yilhchoot ꞌinkꞌez dulhutsin Jacob yughu whenya.7 Ndai la huyutꞌi-i sdabe ꞌonus lhai suliꞌ, ꞌaw lhzih huhootꞌeꞌ aitꞌoh ꞌinkꞌez nyo yun tꞌe honuszun-un huwhutꞌi-un ꞌet cha ꞌaw nahultꞌoh hikꞌu huna-i ꞌuhoolhꞌen aitꞌoh, khuna-i lhai hutꞌi kꞌet.8 ꞌInka Esau ꞌen Dzulh Seir ꞌet whutꞌi, Esau ꞌen Edom ꞌuntꞌoh.

9 ꞌInkꞌez ndi ꞌi Esau tsꞌu haindene Edom whutꞌenne bubá, Mount Seir huwhutꞌi. 10 Ndi ꞌi Esau ooyeꞌke bubooziꞌ,

Eliphaz, Adah ooyaz Esau ooꞌat ꞌinkꞌez Reuel, Basemath, Esau ooꞌat cha.

11 ꞌInkꞌez Eliphaz ooyeꞌke,ꞌenne Teman, Omar, Zepho, Gatam ꞌinkꞌez Kenaz.

12 ꞌEt Timna ꞌen Eliphaz ooꞌat ꞌen yugha nyus ꞌuntꞌoh, ꞌen Esau ooyeꞌ, ꞌinkꞌez ꞌen Amelek yughu sulhtsi, ꞌenne Adah, Esau ooꞌat buzkeh.

13 Ndunne ꞌenne Reuel ooyeꞌke:Nehath, Zerah, Shammah ꞌinkꞌez Mizzah. ꞌEnne Basemath Esau

ooꞌat buzkeh.

Genesis 35 , 36 78

14 Ndunne ꞌenne Aholibamah ooyeꞌke, Esau ooꞌat, Anah ootseꞌ, Zibeon ootseꞌ.

ꞌEn Esau, Jeush, Jalam ꞌinkꞌez Korah ꞌen yughu bulhtsi. 15 Ndunne ꞌenne Esau ooyeꞌke moodih hubuhilhꞌi,

Eliphaz ooyeꞌke, Esau ꞌudechoo ooyeꞌ inleꞌ,ꞌen dayi Teman, dayi Omar, dayi Zepho ꞌinkꞌez dayi Kenaz,

16 dayi Korah, dayi Gatam ꞌinkꞌez dayi Amalek.ꞌEnne Eliphaz oodayi hinli, Edom yun kꞌut.ꞌEnne Adah ootsꞌu hainzutne ꞌuhintꞌoh.

17 Ndunne ꞌenne Reuel ooyeꞌke, Esau ooyeꞌ:dayi Nahath, dayi Zerah, dayi Shammah ꞌinkꞌez dayi Mizzah. ꞌEnne Reuel oodayi Edom yun kꞌut ndunne ꞌenne Basemath Esau ooꞌat buzkeh.

18 Ndunne ꞌenne Aholibamah Esau ooꞌat buzkeh:dayi Jeush, dayi Jalam ꞌinkꞌez dayi Korah ꞌenne Aholibamah

tsꞌu ha hande Esau ooꞌat, Anah ootseꞌ. 19 Ndunne ꞌenne Esau ooyeꞌke Edom ꞌuntꞌoh, ꞌinkꞌez ndunne ꞌenne

budayi hanleꞌ.

Seir ooyeꞌke

20 Ndunne ꞌenne Seir, Hor whutꞌi-un ooyeꞌke ꞌenne ndi yun kꞌut huwhutꞌi: Lotan, Shobal, Zibeon ꞌinkꞌez Anah,

21 Dishon, Ezar ꞌinkꞌez Dishan. ꞌEnne Hor whutꞌenne budayi, Seir ooyeꞌke Edom yun kꞌut.

22 ꞌInkꞌez Lotan ooyeꞌke:ꞌenne Hori ꞌinkꞌez Heman, Lotan bulhtus ꞌen Timna huyulhni.

23 Ndunne ꞌenne Shobal ooyeꞌke:Alvan, Manahath, Ebal, Shepho ꞌinkꞌez Onam.

24 Ndune ꞌenne Zibeon ooyeꞌke:Aiah ꞌinkꞌez Anah bulh, ndun Anah ꞌen ꞌuja chuntoh duba

donkey nulhyeh whe too kꞌet nahoonꞌai. 25 Ndunne Anah buzkeh:

Dishon ꞌinkꞌez Aholibamah, Anah ootseꞌ. 26 Ndunne ꞌenne Dishon ooyeꞌke:

Hemdan, Eshban, Ithran ꞌinkꞌez Cheran. 27 Ndunne ꞌenne Ezer ooyeꞌke:

Bilhan, Zaavan ꞌinkꞌez Akan. 28 Ndune ꞌenne Dishan ooyeꞌke:

Uz ꞌinkꞌez Aran. 29 Ndune ꞌenne Hor whutꞌenne whudayi:

79 Genesis 36

dayi Lotan, dayi Shobal, dayi Zibeon, dayi Anah, 30 dayi Dishon, dayi Ezer, ꞌinkꞌez Dishan, ꞌenne Hor whutꞌenne

whudayi hinli, Seir yun kꞌut ꞌet.

Edom budayi cho31 ꞌEt ndunne ꞌenne lerwene Edom yun kꞌut ꞌet hudaltsꞌiꞌ, ꞌaw Israel

buzkeh whutsodaꞌne bulerwe hooloh. 32 Bela, Beor ooyeꞌ Edom ꞌet whulerwe inleꞌ, ꞌet nyo keyoh whuti

ꞌet Dinhabah huwhutni. 33 ꞌInkꞌez Bela dazsai whe Jobab, Zerah, Bozrah whutꞌen-un ooyeꞌ,

ꞌen lerwe inleꞌ yukꞌe danya. 34 ꞌEt Jobab dazsai whe Teman whutꞌenne bulerwe Husham

huyulhni, ꞌen yukꞌe danya. 35 ꞌEt Hasham dazsai whe Hadad, Bedad ooyeꞌ ꞌen la Midian

neninya whe whelhonigan Moab yun kꞌut, haꞌ nuyeh-un, whe hubuchꞌaꞌ nilhde, ꞌen yukꞌe danya nyo ꞌet keyoh Avith huwhutni.

36 ꞌEt Hadad dazsai whe Samlah, Masrekah whutꞌen-un, ꞌen yukꞌe danya.

37 ꞌInkꞌez Samlah dazsai whe Saul, Rehoboth-ꞌUkoh-Taba whutꞌen-un, ꞌen yukꞌe danya.

38 ꞌEt Saul dazsai whe Baal-Hanaan, Achbor ooyeꞌ ꞌen yukꞌe danya. 39 ꞌEt Baal-Hanaan, ꞌAchbar ooyeꞌ, dazsai whe Hadar ꞌen yukꞌe

danya. Nyo ꞌet keyoh ꞌet Pau huwhutni. Ooꞌat booziꞌ ꞌi Mehetabal, Matred ootseꞌ ꞌen Mezahab ootseꞌ ꞌuntꞌoh.

40 Ndi ꞌi Esau oodayine bubooziꞌ ntsꞌenꞌa lah didohne ꞌinkꞌez huwhutꞌine bubooziꞌ:

dayi Timnah, dayi Alvah, dayi Jetheth, 41 dayi Aholibamah, dayi Elah, dayi Pinon, 42 dayi Kenaz, dayi Teman, dayi Mibzar, 43 dayi Magdiel, ꞌinkꞌez Iram.

ꞌEnne Edom whudayi ꞌinkꞌez nyo yun kꞌut huwhutꞌine ꞌinkꞌez buchꞌeꞌ cha, Esau ꞌen Edom whutꞌenne bubá ꞌuntꞌoh.

Joseph hooncha huwunute

37 1 ꞌEt Jacob nyo Canaan yun kꞌut ꞌet whutꞌi ꞌet ꞌaw oobá tꞌenuszun.

2 Jacob ntsꞌoh tuneꞌustꞌen: Joseph ꞌen whunizyat ꞌon ꞌat lhtakꞌantꞌit be yus kꞌut (17) ꞌet nus khuna-i ghaꞌ unꞌaih dulhutsinke tubulh, bubulh ꞌutꞌen nyoonne bulhutsinke ꞌenne Bilhah buzkeh ꞌinkꞌez Zilpah buzkeh

Genesis 36 , 37 80

cha, oobá ooꞌatke, ꞌenne bubulh ꞌutꞌen ꞌinkꞌez Joseph dubá ꞌen yulh nahoolnuk tankꞌus neꞌhutꞌen huwun.

3 ꞌEt Israel, Joseph ꞌonghunne duzkeh buba nus yukꞌentsiꞌ. ꞌUdekꞌoh ooyeꞌ ꞌinkꞌez duneti whe ooyeꞌ yuzdliꞌ ꞌet huwa, ꞌinkꞌez dzoot yuba ꞌinla, lhelhtsꞌun otꞌen-i ꞌi dzoot yubaꞌ yinla.4 ꞌEt bulhutsinke dalcho-i be la bubá Joseph yukꞌentsiꞌ huwhunilhꞌen, ꞌinka hitsꞌu dutni ꞌinkꞌez ꞌaw soo cho hiyulh yalhulhduk.

5 ꞌEt Joseph nusuti ꞌinkꞌez dulhutsinke bubulh nahoolnuk. ꞌEt ꞌonus hitsꞌu dutni suliꞌ.6 ꞌEt ꞌubulhni, “Ndi oowanususti-i oozulhtsꞌai.7 ꞌEt ꞌatsꞌo nus lhes ha nanyai-i, ꞌaw lhduniltꞌo whe be neꞌtsꞌudulhchꞌuz ꞌinkꞌez ndi lhadusla-i ꞌi ꞌatsꞌo do ꞌuja ꞌinkꞌez ꞌantsꞌi usyin leꞌ ꞌuntꞌoh, ꞌinkꞌez be neꞌdilhchus-i nohchꞌeꞌ ꞌi ndi lhadusla-i ꞌi hinadilhya ꞌinkꞌez hibut yo ꞌuntutsulh.”

8 ꞌInkꞌez bulhutsinke ꞌet ꞌuhuyulhni, “Nelerwe tanleh whe ꞌudini ꞌinkꞌez nemoodih tanleh whe ꞌudini?” ꞌEt tsꞌo ꞌonus hitsꞌu dutni nute-un huwa ꞌinkꞌez ooghuni cha huwa tsꞌiyawh hitsꞌu dutni.

9 ꞌEt doo cha ꞌudun huwu nusuti ꞌinkꞌez dulhutsinke hubudaniꞌ ꞌinkꞌez ꞌutni, “Whunulhꞌen doo cha ꞌudun huwu nususti. ꞌAndit ndi dzenis oozaꞌ ꞌinkꞌez ꞌulhdzis oozaꞌ cha ꞌinkꞌez whunizyai ꞌon ꞌat ꞌilho sum, ꞌi cha sbut yo ꞌuhuntutsulh.”

10 ꞌEt dubá yudaniꞌ ꞌinkꞌez dulhutsinke cha budaniꞌ ꞌinkꞌez oobá hukwaꞌ yundaniꞌ ꞌinkꞌez ꞌuyulhni, “Dainja whe ꞌinja? Ndiz unꞌa nusinti nloo ꞌinkꞌez si cha ꞌinkꞌez nyulhutsinke tsꞌiyawh mbut yo untitsulh wheꞌ dini?”11 ꞌInkꞌez bulhutsinke higheꞌ oolnih ꞌinkꞌez oobá ꞌen ꞌantsꞌi huwu nuni nuzut za ꞌuntꞌoh.

Joseph ꞌen bulhutsinke hiye ꞌonket12 ꞌEt bulhutsinke bubá ooghunaꞌ Shechem tsꞌe highaꞌ tiꞌalh ha whuz

whehandil.13 ꞌInkꞌez Israel, Joseph ꞌulhni, “Nyulhutsinke Shechem tsꞌe whuz khuna-i ghaꞌ huꞌaih. ꞌAnih whuz nyutoosꞌa sih!” ꞌEt ꞌuyulhni, “A, njan susda.”

14 ꞌEt whe Israel ꞌuyulhni, “Sla ꞌineh whe, inyalh nyulhutsinke soo ꞌuhintꞌoh whe, khuna-i cha soo ꞌuntꞌoh whe, ꞌinkꞌez khuni ꞌi whuz sba natonꞌalh.” ꞌEt whe njan Hebron whenkoh ꞌet whe yalhꞌaꞌ ꞌinkꞌez Shechem tsꞌe whenya.

15 ꞌEt ꞌuyoon dune Joseph nayilhti ꞌantsꞌi nus ꞌet ꞌatsꞌo nus lhelhtsꞌoyalh ꞌinkꞌez dune ꞌuyulhni, “Di huninta whe ꞌintꞌen?”

81 Genesis 37

16 ꞌEt ꞌutni, “Sulhutsinke bukunusta whe ꞌustꞌen. Sudini ntsꞌe suba khuna-i ghaꞌ hunꞌaih.”

17 ꞌEt dune ꞌutni, “ꞌutsꞌun whehandil wheꞌ hintꞌoh. ‘Dothan ntsꞌez uztoodilh,’ hutni whe ꞌet hubudastsꞌo.” ꞌEt Joseph whuz buba whenanya ꞌinkꞌez Dothan ꞌet nabinla.

18 ꞌEt ꞌaz de uyalh hitilhꞌen whe lhahodinla hituzilhghelh-un.19 ꞌEt ꞌulhodutni, “Nyoon nute-un ꞌaz de uyalh.

20 ꞌEt huwa ꞌandit tsꞌuzoolhghelh ꞌinkꞌez tsa kꞌet ꞌatsꞌooneh! ꞌInkꞌez la ꞌuzdooniꞌ, ‘Khuna-i yellhoh,’ ꞌuzdooniꞌ la, huwunute-un dahoneh subah!”

21 ꞌEt hoontsꞌi Reuben budantsꞌo ꞌinkꞌez bula kꞌe háyalhti ꞌinkꞌez ꞌutni, “ꞌAw lhtsꞌuzoolhghelh.”22 ꞌInkꞌez Reuben ꞌubulhni, “ꞌAw buzkaih hoolhtselh junih! ꞌAntsꞌi njan tsa kꞌet ꞌet ꞌatsoolhtelh, chuntoh ꞌuhoontꞌoh, ꞌaw ootalhizohnal.” ꞌEt de la yoolhyih ꞌinkꞌez dubá tsꞌun naitoolhtelh, ꞌinka ꞌutni.

23 ꞌEt ꞌuhooja Joseph dulhutsinke bugha ninya whe nyoo dzoot huye ha yalhti, nyoo dzoot lhelhtsꞌun otꞌen-i.24 ꞌEt huyilhchoot ꞌinkꞌez nyo tsa kꞌet ꞌet ꞌahuyano, nyo tsa kꞌet ꞌaw too hooloh.

25 ꞌInkꞌez natlꞌa hudiltsꞌiꞌ ꞌuhutiꞌulh wheni, ꞌet do hitanꞌen whe ꞌaz de Ishmael whutꞌenne ꞌaz de hidulh, Gilead tsꞌe ha handil. Camel duntꞌi-i khuna-i cha tsꞌiyawh bulh, bulh butaꞌwhutꞌen-i, lhai cha huyilelh, ꞌinkꞌez balm ꞌinkꞌez myrrh huyulhni, nduntꞌi-i cha Egypt tsꞌe huyutizdla.

26 ꞌEt Judah dulhutsinke ꞌubulhni, “Di suba negha ookat neulhutsin tsꞌuzilhghi ꞌinkꞌez buzkaiꞌ tsꞌuntilhꞌi de?27 ꞌAnih nyoonne Ismael whutꞌenne ꞌaz de ꞌudulhne, ꞌenne be butsꞌeꞌ tsꞌoket, ꞌaw kwꞌelhtsꞌudolhni, neulhutsin ꞌuntꞌoh, ꞌinkꞌez neyustꞌe cha unli.” ꞌEt bulhutsinke huyoozalhtsꞌaiꞌ.

28 ꞌEt ndunne Medianne ooketne ꞌowhuya hidulh, ꞌet bulhutsinke Joseph nyo tsa kꞌet ha nahuyalhti ꞌinkꞌez nyoonne Ismail whutꞌenne, ꞌenne nat whunizyai (20) silver, ꞌi kꞌelha huye ꞌonket ꞌinkꞌez nyoonne Joseph huyilhchoot ꞌinkꞌez Egypt tsꞌe whehuyalhti.

29 ꞌEt Reuben nyo tsa kꞌet whuz naoosja ꞌinkꞌez Joseph ꞌaw nyo tsa kꞌet hooloh, ꞌet dunaih yayidalhchꞌul.30 ꞌInkꞌez dulhutsinke bughu nanja ꞌinkꞌez ꞌutni, “Duneyaz ꞌawet hooloh suliꞌ! Ntsꞌe subah toosya?”

31 ꞌEt nyoo Joseph oodzoot huyilhchoot ꞌinkꞌez dúbe ntsool-iyaz, ꞌi hizilhghi ꞌinkꞌez nyoo dzoot ꞌi buzkaih hiye tunahuyulhchooz.

Genesis 37 82

32 ꞌEt ndi dzoot lhelhtsꞌun otꞌen-i, ꞌi bubá hitsꞌu nahuyoolhchooz ꞌinkꞌez ꞌuhutni, “Ndi natsꞌilhchooz nyeꞌ oodzoot tila ꞌuntꞌoh kꞌus ꞌawundooh tilah?”

33 ꞌEt nayoolhtsꞌit ꞌinkꞌez ꞌutni, “Syeꞌ oodzoot ꞌuntꞌoh! Khuna-i ꞌantsꞌi yellhoh, ꞌaw nawh lheꞌhootꞌoh Joseph yabeꞌ yidalhchꞌul.”

34 ꞌEt Jacob dunaih yayidalhchꞌul ꞌinkꞌez doso ꞌi dutsꞌitoh nayuzguz, ꞌinkꞌez duyeꞌ lhat dzin whe yukꞌe ninudleh.35 ꞌEt ooyeꞌke ꞌinkꞌez ootseꞌke cha tsꞌiyawh kꞌe nahinoꞌah kwaꞌ hutꞌen. ꞌEt hoontsꞌi ꞌaw kꞌe nahinoꞌah aitꞌoh ꞌinkꞌez ꞌutni, “Nyo stsꞌun kꞌut tsꞌe tisyalh, syeꞌ ookꞌeni untislelh.” ꞌInkꞌez oobá yukꞌetso.

36 ꞌEt nyoonne Median whutꞌenne, yun kꞌut Egypt tsꞌe, nyoon Potiphar huyulhni, ꞌen tsꞌun huye ꞌonket. ꞌEn Pharaoh lhuganne moodih, nyo huwunline bumoodih cha unli.

83 Genesis 37

(37:24)© 1996 David C. Cook

Judah ꞌinkꞌez Tamar

38 1 ꞌEt ꞌowhuya whudizulh whe Judah dudulhutsin bughu tizya ꞌinkꞌez dune Adullam whutꞌen-un, Hirah huyulhni, ꞌen yughu

hato tsꞌe whenya.2 ꞌEt nyo Judah Canaan whutꞌen-un, ꞌilhoghun ootseꞌ, ꞌen yunilhꞌen, Shua huyulhni, ꞌinkꞌez yughusda ꞌinkꞌez yuchantꞌinteꞌ.3 ꞌEt ulchan ꞌinkꞌez duneyaz sulhtsi ꞌinkꞌez booziꞌ Er yulhni.4 Doo cha za ulchan ꞌinkꞌez doo cha za dune ooyaz suliꞌ. ꞌEt booziꞌ Onan yulhni.5 ꞌEt doo cha za ulchan ꞌinkꞌez duneyaz ooyaz suliꞌ. ꞌEn booziꞌ Shelah yulhni. Chezib keyoh huwhutni-un, ꞌet nyoon ooba ꞌet ꞌutꞌen whe yulhtsi.

6 ꞌEt Judah duyaz ꞌudetso-un, ꞌen ba tsꞌeke yughu tidalh ha yilhchoot. Ndun tsꞌeke booziꞌ Tamar huyulhni.7 ꞌEt hoontsꞌi Judah ooyeꞌ ꞌudetso Er, ꞌen Moodihti (Yahweh) bunalh whe nintaꞌ ꞌutꞌih, ꞌinkꞌez Moodihti (Yahweh) ꞌen Er yuzilhghi.

8 ꞌInkꞌez Judah ꞌen Onan ꞌuyulhni, “Nyulhutsin ooꞌat ilhchoot ꞌinkꞌez ooghu sinda, ꞌinkꞌez nyulhutsin yukꞌe dutiyalh-un ooleꞌ sih.”9 ꞌEt Onan tꞌeooninzun ꞌet ndun-un tsꞌoodun hotileh de, ꞌen ꞌaw didut ooyaz lhiloh. ꞌInkꞌez Er ndai yutꞌi ꞌi ꞌaw oogha ílhtaskulh. ꞌEt huwa ꞌet njan duhooja whe hukwꞌelhꞌaz dulhutsin ooꞌat tsꞌun daninya whe yuchantꞌinteꞌ. ꞌInkꞌez oochꞌa ꞌuhooja, ꞌi yun kꞌuz tsꞌe whenluz, dulhutsin yuba tsꞌoodun titꞌelh whuchꞌa.10 ꞌInkꞌez njan ꞌet duja-un, Moodihti (Yahweh) tube whutsꞌu dutni ꞌinka ꞌen cha yuzilhghi.

11 ꞌEt Judah duyasꞌat Tamar ꞌuyulhni, “Mbá ooyoh ꞌet sinda ꞌinkꞌez tsandilh za inli, ndun syeꞌ Shelah untiyeh whutsꞌun.” ꞌInkꞌez ꞌutni, “Doo ka sih dulhutsinke kꞌunꞌa daootsah.” ꞌInkꞌez Tamar dubá ooyoh tsꞌe whuz whutitꞌelh ha whenya.

12 ꞌEt whe nduhooja hukwꞌelhꞌaz Shua ootseꞌ, ꞌen Judah ooꞌat, ꞌen dazsai ꞌinkꞌez Judah kꞌe nahinuꞌah. ꞌInkꞌez be ꞌusbai ha tꞌasne butsꞌun keyoh Timnah ꞌet, didut ꞌinkꞌez yulh dune Hirah, ꞌen Adullam whutꞌen, ꞌen bulh, ndo whuz whehanꞌaz.

13 ꞌEt Tamar hiyulh nahoolnuk, ꞌuhuyulhni, “Whunilhꞌen nzaz, Timnah tsꞌe tiyalh ꞌusbai ha titꞌus wheni.”14 ꞌEt nyoo tsandilh naih ye dune unli-i, ye ha naja ꞌinkꞌez neꞌdilbal, ꞌinkꞌez khaꞌosduz. ꞌInkꞌez tsꞌet, Timnah tsꞌuwhutꞌi-un, ꞌet usda. Shelah ꞌawet nizyai yunilhꞌen ꞌinkꞌez ꞌawhuz ooꞌat tileh wheni yugha lhiyulhti ꞌinka.

Genesis 38 84

15 ꞌEt Judah yutilhꞌen, ꞌulꞌen-un ꞌuntꞌoh yuninzun, dunin kꞌeꞌ nilhbal ꞌet huwa.16 ꞌEt yughu ninya ꞌinkꞌez ꞌutni, “Nzih oosteꞌ.” ꞌAw nyoon duyasꞌat ꞌuntꞌoh ꞌaw tꞌeoonuszun. ꞌEt tsꞌeke ꞌutni, “Di sgha tanꞌalh ꞌet de szih tantelh?”

17 ꞌInkꞌez ꞌutni, “Dúbe ntsool-i ꞌilho ꞌi ntsꞌo tlꞌa tistꞌelh.” ꞌInkꞌez tsꞌeke ꞌutni, “Stsꞌu nahitanyeh eh, stsꞌotlꞌa talhtelh whutsꞌun?”

18 ꞌEt Judah ꞌutni, “Di suba ꞌet ngha oosꞌalh be ntsꞌun nahitasyeh-i?” ꞌEt nyoon tsꞌeke ꞌutni, “Nyoo latultꞌo nyooziꞌ be, ꞌinkꞌez nyoo tuz nintun-i cha.” ꞌI tsꞌiyawh yugha ininla ꞌinkꞌez yuzih inteꞌ ꞌinkꞌez ulchan.

19 ꞌEt dudinya ꞌinkꞌez ꞌutsꞌun whenya. Dunin kꞌe inizbal-i cha kꞌunaitilhbalh, ꞌinkꞌez doo cha tsandilh unli-i naih ye naja.

20 ꞌInkꞌez Judah dúbe ntsool-i dutꞌeke Adallam whutꞌen-un, ꞌen whuz yutsꞌu whe yalhti tsꞌeke ꞌinkꞌez ye yutsꞌu nahizya-i cha ꞌet hoontsꞌi ꞌaw nayolhtelh aitꞌoh.21 ꞌEt nyoonne ꞌet whuduneꞌne buboodulhkut, “Nyoon ꞌulꞌen-un, nyoo ti whuzih usda-un, ntsꞌe whenya?” ꞌEt ꞌuhuyulhni, “ꞌAw njan ꞌaw ꞌulꞌenne hooloh wheꞌ hoontꞌoh.”

22 ꞌInkꞌez Judah tsꞌun naoosja ꞌinkꞌez ꞌuyulhni, “ꞌAw naoostelh aitꞌoh ꞌinkꞌez nyo ꞌet whutꞌenne ꞌenne ꞌuhutni, ‘ꞌAw nyo ꞌulꞌenne hooloh,’ hutni.”

23 ꞌEt Judah ꞌutni, “Whute, duba yoolhchoot, ndi doo ka sih yooya tsꞌooleꞌ. Ndi dúbe ootsꞌotlꞌa yisti ꞌinkꞌez ꞌaw nalhilhtel.”

24 ꞌEt whudizulh whutoh ta sanun inleꞌ atꞌen, ꞌet Judah hiyulh nawhulnuk, “Tamar nyasꞌat ꞌulꞌen-un naꞌdudalhtsi ꞌinkꞌez ꞌulꞌen whe ulchan.” ꞌEt Judah ꞌutni, “Tenulhtih ꞌinkꞌez hidolhkꞌun!”

25 ꞌEt tenhinilhti whe ꞌet duzaz yutsꞌo tlꞌa huninꞌai, “Ndi mbe dune oowuzchan-un, ꞌen oochꞌeꞌ ꞌuntꞌoh, ndi latultꞌoh, booziꞌ be tlꞌoolhyaz ꞌinkꞌez tuz cha.”

26 ꞌEt Judah ꞌutni, “A, schꞌeꞌ ꞌuntꞌoh. Sanus tsꞌihꞌun neꞌutꞌen, ꞌaw syeꞌ Shelah oogha lhuyustel ꞌet huwa.” ꞌInkꞌez ꞌon ꞌat ꞌaw tꞌenalhinidzil.

27 ꞌEt ꞌawet whudizulh whe ꞌawet ꞌulhtsi whe nane tsꞌoodunne bulhtsi.28 ꞌEt nyo ꞌawet whe bulh utiltsut whe ꞌilhoghun ꞌen oola cho iltsai. ꞌI nyoo tsꞌeke yughunli-un ꞌugha batseꞌ dulkꞌun-i, ꞌi yulasga ye yulchuz ꞌinkꞌez ꞌutni, “Ndun ꞌen ꞌudechoo whuzdli.”29 ꞌEt ꞌuhooja dulayaz ꞌudun nenadilni whe bulhutsin ookwatselhuhoodli whe ꞌen cha whuzdli. ꞌEt nyoon tsꞌeke ꞌutni, “Dainja whe ꞌinja! Whuzinli nyunchꞌoh za mba ꞌuhoontꞌoh!” ꞌEt huwa ꞌen booziꞌ Perez huyulhni.

85 Genesis 38

30 Hukwꞌelhꞌaz bulhutsin whuzdli, ꞌet nyoon gha batseꞌ dulkꞌun-i oolasga be yulchuz, ꞌen Zerah huyulhni.

Joseph ꞌen keyoh Egypt ꞌet ꞌulhna suliꞌ

39 1 ꞌAndit whe Joseph ntsꞌun Egypt tsꞌe whehiyalhti, ꞌinkꞌez Potiphar, ꞌen budayi cho Pharaoh lhuganne ꞌen huba neꞌduniꞌ,

ꞌen ꞌilhoghun bumoodih unli, ꞌen Egypt whutꞌen ꞌen yonket. Ishmael whutꞌenne tsꞌun ꞌen ntsꞌun whehuyalhti.

2 ꞌEt Moodihti (Yahweh) Joseph yulh ꞌuntꞌoh ꞌinkꞌez tube soo dinꞌa suliꞌ. Nyoon Egypt whutꞌen oomoodih yinli-un ꞌen ooyoh usda.3 ꞌInkꞌez oomoodih yunilhꞌen ꞌahoolhyiz Moodihti (Yahweh) yulh ꞌuntꞌoh ꞌinkꞌez oola kꞌez tsꞌiyawh be unzoo yulhtsi.4 ꞌInkꞌez Joseph tube ooba yinzoo ꞌinkꞌez yuba ꞌutꞌen. ꞌEt ooyoh dulcho whumoodih unli yulhtsi, ꞌinkꞌez ndai la yutꞌi-i cha tsꞌiyawh yula kꞌe yanla.5 ꞌEt yoh moodih yulhtsi ꞌet whutsꞌun ꞌinkꞌez ndai la yutꞌi-i cha tsꞌiyawh yutlꞌa yanla. ꞌEt huwa Moodihti (Yahweh) nyoo Egypt whutꞌen ooyoh dilhtsꞌine soo hoonzoo-un bugha whultsꞌut. ꞌInkꞌez ndai la yutꞌi-i cha, yoh yutꞌi-i cha ꞌinkꞌez ootlꞌo kꞌuz cha yutꞌi-i, tsꞌiyawh Moodihti (Yahweh) soo hoonzoo-un oogha whultsꞌut.6 ꞌEt ndai la yutꞌi-i, tsꞌiyawh Joseph yula kꞌe yanla, ꞌaw didut tꞌeoonuszun di ꞌutꞌi, ꞌutꞌalh-i yuꞌalh-i, ꞌi yuꞌalh. ꞌInkꞌez Joseph dunezooꞌ, ooyustꞌe dulcho whe unzoo, sooꞌ otꞌen cha ꞌuntꞌoh.

7 ꞌEt hukwꞌelhꞌaz whudizulh, ꞌet nyoon oomoodih ooꞌat, Joseph ꞌen yukaꞌ ninzun hukwꞌunꞌa yunilhꞌen ꞌinkꞌez ꞌuyulhni, “Schan tꞌesinti.”

8 ꞌEt hoontsꞌi yuchꞌa tse disnih, ꞌinkꞌez nyoon oomoodih ooꞌat ꞌuyulhni, “Whunilhꞌen smoodih ꞌaw njan yoh dastꞌen ꞌet tꞌeoonuszun. Ndai la yutꞌi-i cha tsꞌiyawh sla kꞌe yanla. ꞌEt ꞌinkꞌez ndi yutꞌi, ꞌi tsꞌiyawh stlꞌa honla slakꞌez tsꞌe.9 ꞌAw njan yoh ꞌaw sanus ꞌulchone hooloh. ꞌAw hoonli cha schꞌa nulhonulhꞌiꞌ. ꞌEt ꞌandit nyun ꞌen ooꞌat inli, ꞌet huwa ntsꞌenꞌa ꞌutisnelh lheꞌwhulcho-un, lheꞌwhultsiꞌ-un ꞌet ꞌutisnelh ꞌinkꞌez Yakꞌusda oochꞌaz lubeshi nedutasdalh?”10 ꞌEt dzin totsuk yulh yalhduk, ꞌet hoontsꞌi ꞌaw lhidustsꞌo, yuchan tꞌeooteꞌ yulhni.

11 ꞌEt ꞌuhooja ꞌoh whuya whudizulh atꞌen, ꞌet Joseph yoh tsꞌe whe naja ꞌutitꞌelh huba, dune cha yoh hooloh.12 Tsꞌeke yunaih yilhchoot ꞌinkꞌez ꞌuyulhni, “Schan tꞌesinti!” Ndi naih yoontun-i, ꞌi yoontun whe yuchꞌa tilhgai ꞌinkꞌez ꞌaz whelgai.

13 ꞌEt ndi oonaih oola kꞌet yulhchooz, nyoon tsꞌeke yunilhꞌen, ꞌen cha ꞌaz whelgai.

Genesis 38 , 39 86

14 Nyoonne dune ꞌenne whuyoh dunene butsꞌa hanyih ꞌinkꞌez ꞌubulhni, “Whunulhꞌen, ndun Hebrew whutꞌen-un ꞌen neghi nilhti neghodloh ha, ꞌinkꞌez yoh daninya ꞌinkꞌez duchan tꞌeoosteꞌ sulhni, ꞌinkꞌez tube cho ꞌasuzdzul!15 ꞌEt ꞌawet hisyih ꞌet sudantsꞌo whe ꞌet ꞌinkꞌez oochꞌa ꞌazdzul, ndi oonaih ꞌi ndi slakꞌez yula ditni ꞌinkꞌez ꞌaz whelgai!”

16 ꞌEt ndi naih yoontun, Joseph oomoodih dananja whutsꞌun yoontun, ꞌinkꞌez yulh yatilhduk.17 ꞌInkꞌez ꞌuyulhni, “Nyoon Hebrew dune ba ꞌutꞌen-un njan danilhti-un, szih neninya ꞌinkꞌez sghudloh.18 ꞌEt oochꞌa ꞌazdzul whe ndi oonaih ꞌi szih yula ditni ꞌinkꞌez ꞌaz whelgai.”

19 ꞌEt Joseph oomoodih whulh ꞌudantsꞌo ndi khuni yudantsꞌo ooꞌat daja yulhni la, “Mba ꞌutꞌen-un njan ꞌet dusinla,” ꞌet hunilchꞌe.20 ꞌEt Joseph oomoodih yilhchoot ꞌinkꞌez dune ꞌahudinꞌai-un, ndet lerwe be ꞌulhnane ꞌadinlane, ꞌet ꞌayanꞌai, ꞌinkꞌez nyo tsa kꞌet ꞌet ꞌadinꞌai.

21 ꞌEt hoontsꞌi Moodihti (Yahweh) Joseph yulh ꞌuntꞌoh, ꞌinkꞌez yugha teꞌninzun, nyo ꞌadinꞌai-un humoodih ꞌen yuba unzoo suliꞌ. 22 ꞌInkꞌez nyo tsa kꞌet ꞌahudinla-un humoodih, nyo ꞌadinlane tsꞌiyawh Joseph tlꞌa banla. Ntsꞌoh dahutꞌen-un ꞌet Joseph ba ꞌuhoontꞌoh.

87 Genesis 39

(39:21)© 1996 David C. Cook

23 ꞌEt nyo ꞌahudinla-un whumoodih, Joseph ndai la yughana-i ꞌaw lhinilhꞌen, Moodihti (Yahweh) yulh ꞌuntꞌoh ꞌet huwa. ꞌInkꞌez ntsꞌoh datꞌen ndai la yughana tsꞌiyawh Moodihti (Yahweh) diztiꞌ yulhtsi.

ꞌAdinlane buba nute

40 1 ꞌEt hukwꞌelhꞌaz ꞌet nduhooja whe ndunne Egypt whutꞌenne lerwe ooyoh ꞌuhutꞌen, dayi neꞌutꞌen, ꞌinkꞌez nyo yoh lhes

ꞌulhtꞌes-un cha, bumoodih lerwe hiba dzoh ꞌuja.2 ꞌInkꞌez lerwe Pharaoh ꞌen ndunne nane yuba neꞌutꞌenne, ꞌenne dayi neꞌutꞌen ꞌinkꞌez dayi ꞌulhtꞌes, ꞌenne tube whe bubulh hunilchꞌe.3 ꞌInkꞌez nahultꞌoh ꞌabanꞌai, nyoon Pharaoh lhuganne oodayi cho ooyoh, ꞌen tlꞌa balhti, Joseph ꞌadinꞌai-un ꞌet.4 ꞌInkꞌez nyo Pharaoh lhuganne oodayi cho, Joseph ꞌen tlꞌa balhti ꞌinkꞌez buba neꞌutꞌen. ꞌInkꞌez ꞌatsul ꞌet ꞌahudanꞌaꞌ.

5 ꞌEt nyoon yoh ꞌutꞌen moodih ꞌinkꞌez nyoon lhes ꞌulhtꞌes-un lerwe ba ꞌutꞌenne nyo ꞌahudinꞌai, nahultꞌoh nuhuztez, ꞌilhe ꞌulhdzis za, lhelhtsꞌun unꞌa nuhuztez.

6 ꞌInkꞌez Joseph bughu daninya bundadaꞌ, ꞌinkꞌez bunilhꞌen, ꞌinkꞌez nahultꞌoh ni hinli.7 ꞌEt Pharaoh oomoodihne hubulh ꞌuhutꞌenne ꞌubulhni, “Di ha ꞌuhtꞌoh nohdzi unduda ꞌandit dzin?”

8 ꞌInkꞌez ꞌuhuyulhni, “Naníltꞌoh ꞌandit ꞌulhdzis nusítez ꞌinkꞌez daja ni whe ꞌutni-un, ꞌaw nedoniꞌne hooloh.” ꞌInkꞌez Joseph ꞌubulhni, “Ndet huwa ꞌet nusuhtez-un, Yakꞌusda ꞌen za iloh lakw ba ꞌuhoontꞌoh. Tꞌewhuntihzeh hukwaꞌ nuzun de, sudúhni.”

9 ꞌEt nyoon yoh ꞌutꞌen moodih, Joseph daja la nusuti ꞌet yadaniꞌ ꞌinkꞌez ꞌutni, “Whunilhꞌen njan nuste-un ꞌantsꞌi duchun ꞌi sbut nadanꞌa.10 ꞌEt ndi duchun ꞌi ta oozooschum hoonli ꞌinkꞌez ootsꞌu haꞌ nulhyeh. Ootsꞌahaꞌ nalhyai ꞌinkꞌez mai tsꞌekoo tooꞌ huyilhꞌi, ꞌi mai ꞌi ootsꞌahaꞌ inalhyai.11 ꞌInkꞌez Pharaoh oolubot ꞌi sla kꞌesꞌai ꞌinkꞌez nyoo mai uschoot ꞌinkꞌez nyo Pharaoh oolubot ꞌet dunisni ꞌinkꞌez Pharaoh oola kꞌe yiskai.”

12 ꞌInkꞌez Joseph ꞌuyulhni, “Daja ni whe ꞌutni nyudutasnelh. Ndi ta ꞌuzooschum ꞌi tat dzin ꞌuntꞌoh.13 Tat dzin inleꞌ de, Pharaoh whutsodaꞌ daintꞌen la, ꞌet nenyanutalhtelh, ntsi ndo ꞌuyutilelh ꞌinkꞌez oolubot ꞌi ootlꞌa itankalh, whutsodaꞌ dailhꞌen lah ba ꞌintꞌen daꞌ.14 ꞌEt hoontsꞌi snaoolnih ꞌawet mba sooꞌ hooja de, ꞌinkꞌez stsꞌun onzooꞌ, Pharaoh sba oobulh yaoolhduk ꞌinkꞌez njan tenaoosjaꞌ.

Genesis 39 , 40 88

15 ꞌAlha Hebrew whutꞌenne bukeyoh ꞌet whutsꞌun sgho ndunistꞌi whe ꞌustꞌoh. ꞌAw hoonli lheꞌusnel whe njan ꞌaw ꞌasuhooꞌalh huba lheꞌhootꞌoh.”

16 ꞌEt nyoon lerwe ba lhes ꞌulhtꞌes-un, nyoon ꞌon ghun-un huwu nusuti-un hoonzoo, ꞌet Joseph ꞌuyulhni, “Si cha whuz unꞌa nususti ꞌinkꞌez njan ꞌet ta lhyul lhestsꞌai, ꞌi stsi kꞌusla.17 ꞌUdedo telh ꞌi lhelhdoh-i lhes sutꞌe-i te, ꞌi Pharaoh ba ꞌuntꞌoh, ꞌinkꞌez dutꞌaiyaz ndo stsi kꞌuskai whe tsꞌiyawh huyanꞌal.”

18 ꞌEt Joseph ꞌuyulhni, “Daja ni whe ꞌutni nyudutasnelh. Ta telh, ꞌi tat dzin ꞌuntꞌoh.19 Tat dzin inleꞌ, ꞌet Pharaoh ntsi ꞌi nchꞌa ndo itilelh, ꞌinkꞌez duchun kꞌez ꞌet nzeꞌtigus ꞌinkꞌez dutꞌai ꞌi nyustꞌe hitiꞌulh.”

20 ꞌEt ꞌuhooja whulh tat dzin inleꞌ whe, ꞌet Pharaoh whuzdli dzin ꞌinkꞌez dune ghu nusuya duba ꞌutꞌenne ba, ꞌinkꞌez nyoon yoh huwunli, ꞌutꞌen ghunli-un whumoodih, ꞌinkꞌez nyoon lhes ꞌulhtꞌes-un bulh, ꞌenne butsi do ꞌuyinla.21 ꞌEt ndun ꞌutꞌen moodih yilhꞌi-un, cha za ꞌet nenainilhti ꞌinkꞌez lubot ꞌi Pharaoh oola kꞌe yanꞌai.22 ꞌEt hoontsꞌi nyoon lhes ꞌulhtꞌes-un, ꞌen yuze ꞌuzguz, Joseph daja yulhni la whuz ꞌunꞌa.

23 ꞌEt hoontsꞌi nyoon ꞌutꞌen moodih-un, ꞌaw Joseph yunaoodilhnoh.

Lerwe Pharaoh ꞌawet nusuti

41 1 ꞌEt ꞌuhooja soo nat yus kꞌut inleꞌ whe Pharaoh nusuti, ꞌinkꞌez whunilhꞌen, ꞌukoh taba usyin ꞌet huwun nusuti.

2 Khuntsul ꞌet nyo ꞌukoh lhtakꞌantꞌi musdoos ꞌi too halghaz, nilhkꞌa ꞌuntꞌoh unzoo ꞌinkꞌez nyo tlꞌo kꞌut ꞌet ꞌuꞌalh.3 ꞌEt whunulhꞌen, ꞌuyoo musdoos lhtakꞌantꞌi ꞌi cha yunilhꞌus, ꞌukoh tsꞌe hailhꞌaz. Ntsiꞌ ꞌinkꞌez oodanusugi ꞌinkꞌez nyo ꞌuyoo musdoos ꞌi yuzih taba nudilhya.4 ꞌInkꞌez nyoo musdoos ntsiꞌ-i oodanusagi-i, nyoo lhtakꞌantꞌi musdoos nilhkꞌa nzoo-i, ꞌi tsꞌiyawh yanꞌalh. ꞌEt Pharaoh tsꞌe nandzut.

5 ꞌEt doo cha nanisti ꞌet whulh nat nusuti. Khuntsul lhtakꞌantꞌi nyoo hunuyeh, lhes te, ooghu hoonli-i, ꞌi ꞌilho ha nalhyai-i, ꞌi yutsꞌu ha nalhyai ncha ꞌinkꞌez nzoo.6 ꞌEt ꞌinkꞌez lhtakꞌantꞌi dindot-iyaz ndaz nilhtsꞌi be ꞌutsiꞌ suliꞌ, ꞌi hukwꞌelhꞌaz ha nalhyai.7 ꞌInkꞌez nyoo lhtakꞌantꞌi ha nalhyai-i, ꞌi nyo lhtakꞌantꞌi nzoo cha ꞌuntꞌoh ꞌinkꞌez ncha, ꞌi yanꞌalh. ꞌEt Pharaoh tsꞌe ninzut ꞌinkꞌez ꞌalha nusuti.

8 ꞌEt ꞌuhooja bundadaꞌ ndi ooyughi tube ꞌutsꞌun unꞌa ooba ꞌuhooja, ꞌinkꞌez Egypt whutꞌen keyoh-un mbene neꞌdulhdeh cha ꞌinkꞌez mbene

89 Genesis 40 , 41

la whunihne cha, ꞌenne bukaꞌ daniꞌ ꞌinkꞌez Pharaoh daja la nusuti-un ꞌet hubudaniꞌ. ꞌInkꞌez tsꞌiyawh ꞌaw gak ndet ꞌuhoontꞌoh-un ꞌet ꞌaw lhuhidusnih, tꞌehonuszun.

9 ꞌEt nyoon yoh ꞌutꞌen moodih-un, ꞌen Pharaoh yulh yailhduk ꞌinkꞌez ꞌuyulhni, “ꞌAndit dzin whe tankꞌus ꞌustꞌoh-un ꞌet whunaznih.10 ꞌEt Pharaoh yuba ꞌutꞌenne bubulh hunilchꞌeꞌ ꞌinkꞌez si ꞌinkꞌez lhes ꞌulhtꞌes-un moodih cho bulh naniltꞌoh whe nyo Pharaoh lhuganne budayi cho ooyoh, ꞌen zih ꞌaneanꞌai.11 Naniltꞌoh nusítez ꞌilhe ꞌulhdzis ꞌinkꞌez whenichꞌoh nekꞌunꞌa ꞌet nusitez naniltꞌoh.12 ꞌEt nyo ꞌilhoghun Hebrew chilhyaz, ꞌen nebulh ꞌadinꞌai nyo Pharaoh lhuganne budayi cho, ꞌen ba neꞌutꞌen-un, ꞌinkꞌez ꞌen datniꞌ ꞌinkꞌez nedaniꞌ nusitez-un, tsꞌiyawh nedaniꞌ.

Genesis 41 90

(41:14)© 1996 David C. Cook

13 ꞌInkꞌez ꞌet ꞌuhooja ntsꞌenꞌa lah nedaniꞌ nusitez-un, whuz unꞌa ꞌuhooja. Si njan seꞌutꞌen ꞌet nenasunilhti ꞌinkꞌez nyoon yuze ꞌuzguz.”

14 ꞌEt Pharaoh, Joseph yukaꞌ daniꞌ ꞌinkꞌez ꞌahoh yughu dahinilhti. Naꞌdunidzo cha ꞌuja ꞌinkꞌez dunaih cha lhkꞌe naidanla, ꞌinkꞌez Pharaoh yughu ninya.

15 ꞌEt Pharaoh ꞌen Joseph ꞌuyulhni, “Nususti ꞌinkꞌez ꞌaw dune sudoniꞌne hooloh. Dasja whe ꞌustꞌen nyun nyulh ꞌudastsꞌo tꞌeooninzun, dune nutes-un ꞌinkꞌez hubudini.”

16 ꞌEt Joseph ꞌen Pharaoh ꞌuyulhni, “ꞌAw si syo tsꞌe ꞌilho ꞌuhoontꞌoh. Yakꞌusda ꞌen la Pharaoh hoonzoo hukwꞌunꞌa yudoniꞌ.”

17 ꞌEt Pharaoh ꞌen Joseph ꞌuyulhni, “Whunilhꞌen, nuste whe ꞌukoh taba susyin ꞌet huwun nususti.18 Khuntsul lhtakꞌantꞌi musdoos ꞌi tooz hailꞌaz. Nzoo cha ꞌuntꞌoh ꞌinkꞌez nilhkꞌa cha ꞌuntꞌoh, ꞌinkꞌez nyo tlꞌokꞌet ꞌet ꞌuꞌalh.19 ꞌEt whunilhꞌen, ꞌuyoo musdoos ꞌi yunilhꞌus. Telꞌen ꞌinkꞌez ꞌutsiꞌ ꞌinkꞌez oodanusugi, ꞌaw whutsodaꞌ ndultsiꞌ-un lhuzisꞌen Egypt whukeyoh ꞌet.20 ꞌInkꞌez nyoo danusugi ꞌinkꞌez ꞌutsiꞌ-i musdoos, ꞌi nyoo lhtakꞌantꞌi ꞌudechoo hailhꞌaz-i nilhkꞌa-i tsꞌiyawh yanꞌalh.21 ꞌEt nyoo musdoos tsꞌiyawh yanꞌal, ꞌaw dune tꞌeooninzunne hooloh ntsꞌenꞌa tsꞌiyawh yanꞌal. Whutsodaꞌ dantꞌoh la, ꞌutsiꞌ ꞌet za ꞌet nduntꞌoh. ꞌEt tsꞌe nuszut.

22 ꞌInkꞌez cha nuste-un, khuntsul lhtakꞌantꞌi lhes kꞌut, ꞌilho ha nuyeꞌ-i, ꞌi nyus de haki tube nzoo ꞌinkꞌez dincha cha ꞌuntꞌoh.23 ꞌEt whunilhꞌen, lhtakꞌantꞌi nyoo mai hunuyeh-i dindat ꞌinkꞌez ndaz nilhtsꞌi-i be ninta ꞌuntꞌen, ꞌi hukwꞌelhꞌaz ꞌi haki.24 Nyoo lhtakꞌantꞌi ꞌutsiꞌ-i dindat-iyaz, ꞌi nyoo ꞌudechoo lhtakꞌantꞌi dincha-i tsꞌiyawh yanꞌal. ꞌInkꞌez neꞌdulhdehne budasniꞌ, ꞌet hoontsꞌi ꞌaw daja ni whe ꞌutni ꞌaw sulhodinel.”

25 ꞌEt Joseph ꞌen Pharaoh ꞌuyulhni, “Ndi Pharaoh ooghun nusinti-i, ꞌilho za unli whe ꞌuntꞌoh, Yakꞌusda (Elohim) Pharaoh ꞌen wheinilhtan datinelh lah.26 Nyoo musdoos lhtakꞌantꞌi nzoo-i, ꞌi lhtakꞌantꞌit yus kꞌut ꞌuntꞌoh. ꞌInkꞌez nyoo ha nalhyeh-i lhtakꞌantꞌi nzoo-i, ꞌi cha lhtakꞌantꞌit yus kꞌut ꞌuntꞌoh. ꞌI ꞌilho be nusinti whe ꞌintꞌoh.27 ꞌInkꞌez lhtakꞌantꞌi musdoos daningi ꞌinkꞌez ꞌutsiꞌ-i, nyoo musdoos unzoo-i yukꞌelhꞌaz too hailhꞌaz-i, ꞌi cha lhtakꞌantꞌit yus kꞌut ꞌuntꞌoh. ꞌInkꞌez ndi ha nanyai-i lhtakꞌantꞌi ndaz nilhtsi whe ꞌutsiꞌ suliꞌ-i, ꞌi cha lhtakꞌantꞌi yus kꞌut dai whutaleh-i, ꞌi ꞌuntꞌoh.

28 Ndi ꞌi Pharaoh ooghun bulh yasduk, Yakꞌusda (Elohim) Pharaoh wheinilhtan datitꞌelh-un.

91 Genesis 41

29 Tube lhtakꞌantꞌit yus kꞌut soo tsꞌiyaitsuk lhai hoonli whe ꞌet Egypt yun kꞌut whutaleh.30 ꞌEt hoontsꞌi, hukwꞌelhꞌaz lhtakꞌantꞌit yus kꞌut ꞌet dai whutaleh ꞌinkꞌez daltsuk iloh hoonli inleꞌ, Egypt ꞌet dune whunaoodutilnoh ꞌinkꞌez nyoo dai yun dulcho gak yutilhtselh.31 Lhai hoonli-un nyo yun kꞌut whunaoodutitnoh nyoo dai niz de dutizulh tube hoontsiꞌ whutaleh.32 ꞌInkꞌez Pharaoh oonusute nat ꞌet hidaniꞌ, Yakꞌusda (Elohim) ꞌuhoonla ꞌet huwa. ꞌInkꞌez ꞌatsulyaz inleꞌ de, ꞌet de Yakꞌusda (Elohim) ꞌet nduwhutalelh.

33 ꞌEt huwa Pharaoh soo dune ꞌuntꞌoh-un, whunih-un, ꞌen ꞌuhutayoolhtelh ꞌinkꞌez Egypt yun kꞌut ndulcho whe whumoodih yoolhtselh.34 ꞌEt Pharaoh ꞌet doneh dune moodihne ndulcho whe yun kꞌut ꞌet ꞌutahaboolelh. Ndai la ꞌuhuyulhꞌen-i, tsꞌiyawh ꞌilhoh kwulaiꞌ (⅕) ꞌulꞌen-i tsꞌiyawh ꞌilhuna huyolelh lhtakꞌantꞌit yus kꞌut whutsꞌun.35 ꞌInkꞌez ndai la ꞌutꞌalh-i ꞌi cha nyo ho hoonzooꞌ-un ꞌulya-i, ꞌi tsꞌiyawh ꞌudun nehuyolelh. Pharaoh ꞌen whumoodih hooleꞌ, ꞌinkꞌez ndi tꞌalh-i nyo ho lhelhdoh keyoh whuti, ꞌet ꞌaz oolaꞌ.36 ꞌEt de ndi ꞌutꞌalh-i ꞌi tsꞌiyawh ꞌet tilalh, ndet la lhtakꞌantꞌit yus kꞌut dai whutalelh, ꞌet wheni Egypt ꞌet za tilalh. Doo ka la nyo dai whuzdliꞌ de, dune yaoodlah ꞌet whuchꞌa.”

Joseph huba neꞌduniꞌ suliꞌ37 ꞌEt ndi khuni Pharaoh ꞌen ooba hoonzoo ꞌinkꞌez yuba ꞌutꞌenne cha

buba hoonzoo.38 ꞌInkꞌez Pharaoh duba ꞌutꞌenne ꞌubulhni, “ꞌAw njan nduntꞌoh-un dune naootsꞌolhtelh aitꞌoh, Yakꞌusda (Elohim) ooyughi bulh ꞌuntꞌoh-un?”

39 ꞌEt Pharaoh, Joseph ꞌuyulhni, “ꞌEt ꞌalha Yakꞌusda tsꞌiyawh njan whunyunilhtan. ꞌAw nyun ndultꞌohne whunihne hooloh.40 Syoh ꞌet ndulcho whumoodih tanleh. Nyun daja dini, whuz unꞌa sduneꞌne cha neꞌhutitꞌen. Njan lerwe kwꞌutsꞌuzda cho kꞌususda-un, ꞌet ꞌawet za nyando ꞌutistꞌelh.”

41 ꞌInkꞌez Pharaoh Joseph ꞌuyulhni, “Whunilhꞌen, Egypt yun kꞌut nduwhulcho-un ꞌet whumoodih tanleh nyuzusi.”42 ꞌEt Pharaoh dulasgayaz latultꞌo nidilꞌai-i, ꞌi tsꞌahayitꞌai ꞌinkꞌez Joseph oola ꞌi yuneidanꞌai. ꞌInkꞌez soo naih diztiꞌ-i nzoo-i be dune yulhtsi ꞌinkꞌez gold ꞌuntꞌoh-i ulhꞌool-i, ꞌi yutsꞌilchun neidanla.43 ꞌInkꞌez bulh nanki nyoo luwagin huyilh-i, chariot huyulhni, ndai la yutꞌi-i, ꞌi ye noyaꞌ yulhni, ꞌinkꞌez ntso uyalh-un ꞌen dugwut

Genesis 41 92

nyo yuntootsih yubut ꞌinkꞌez Egypt yun kꞌut nduwhulcho whe whumoodih unli yulhtsi.

44 ꞌInkꞌez cha Pharaoh, Joseph ꞌuyulhni, “Pharaoh ꞌustꞌoh. ꞌAw nyun ꞌaꞌah lhduzinih de, ꞌaw dune dula cha do huyolhchoot ꞌinkꞌez duke cha do ꞌuhuyooleh-un hooloh.”45 ꞌInkꞌez Pharaoh, Joseph yooziꞌ yugha dinꞌai, Zaphnath-Paaneah yulhni. ꞌInkꞌez ooꞌat yoleꞌ ha Asenath, Poti-Phera, On whulubret ootseꞌ, ꞌen yugha inilhti. ꞌEt Joseph nyo Egypt yun kꞌut ndulcho whe nuya.

46 Joseph tat whunizyat (30) be yus kꞌut Pharaoh Egypt whulerwe but inyin whe ꞌinkꞌez Joseph nyo tenanja ꞌinkꞌez Egypt keyoh ndulcho whe nuya.47 ꞌEt nyo lhtakꞌantꞌit lhai hoonli, tsꞌiyai lhai hoonli-un ꞌowhuya whudizulh whe.48 Ndai la ꞌutꞌalh-i Egypt yun kꞌut hoonli-i, tsꞌiyawh nayalhdzoo, ꞌinkꞌez keyoh whuti totsuk neininla. Ndai la ha nuyeh-i cha tsꞌiyawh keyoh whuti totsuk ꞌet neininla.49 Joseph ha nuyeh-i ꞌutꞌalh-i lhai yulhtsi, yatoo taba sai kꞌunꞌa ꞌet ꞌultsuk-i, ꞌudekꞌez ꞌawet ꞌulhto-un cha ꞌetsul ꞌudija ꞌaw yoolhto aitꞌoh ꞌet huwa.

50 ꞌInkꞌez Joseph nyo dai whutaleh whutso, ꞌet nane duneyaz ooyeꞌ suliꞌ. Nyoon tsꞌeke Asenath, Poti-Phera ootseꞌ, On bulubret, ꞌen yughu bulhtsi.51 Joseph ꞌen ꞌudetso whuzdli-un, ꞌen Manasseh yulhni: “Yakꞌusda (Elohim) ntsꞌenꞌa la teꞌizꞌen ꞌinkꞌez sba ooyoh cha whunaoodiznoh ꞌinka.”52 ꞌInkꞌez whulh nat ooyeꞌ, ꞌen Ephraim yulhni: “Njan yun kꞌut dzoh nusuzut inleꞌ, ꞌandit whe Yakꞌusda (Elohim) ꞌen sba whulai whulhtsi ꞌet huwa.”

53 ꞌEt lhtakꞌantꞌit yus kꞌut tsꞌiyaitsuk lhai dai hooloh-un, Egypt yun kꞌut ꞌet ꞌetsul ꞌuhooja.54 ꞌInkꞌez lhtakꞌantꞌit yus kꞌut dai hoonli-un wheꞌ whuditꞌen. Joseph daja ni la whuz unꞌa, ndulcho whe dai whuzdliꞌ. ꞌEt hoontsꞌi Egypt yun kꞌut ꞌet ꞌutꞌalh-i hoonli.55 ꞌEt tube ꞌawet Egypt dai whuzdliꞌ whe Pharaoh ꞌen dune hitsꞌun tedudlih ꞌutꞌalh-i ha. ꞌEt Pharaoh hubulhni, “Joseph ootsohdulh. Daja nohulhni la ꞌet nduhtꞌen.”

56 Ndi yun kꞌut ndulcho whe dai whuzdliꞌ ꞌinkꞌez Joseph ꞌuzdla bayoh Egypt ꞌet dahaꞌ danla. ꞌInkꞌez Egypt whutꞌen ye butsꞌeꞌ ooket. Tube dai be oonujut suliꞌ Egypt yun kꞌut.

93 Genesis 41

57 Yun kꞌut totsuk whutꞌenne ꞌenne Egypt yun kꞌut whuz Joseph hitsꞌun lhgha dindel, ha nuyeh hootakulh ha. Dai cho ꞌi yun kꞌut nduhoolhcho whe be ꞌuhooja ꞌet huwa.

Joseph bulhutsinke Egypt tsꞌe whehandil

42 1 ꞌEt Jacob yun kꞌut Egypt ꞌet lhes maiꞌ hoonli whunilhꞌen ꞌet duyeꞌ ꞌubulhni, “Di ha ꞌantsꞌi lhunulhꞌen?”

2 ꞌInkꞌez ꞌet ꞌutni, “Egypt ꞌet lhes maiꞌ hoonli ꞌet whulh ꞌudastsꞌo, whuz uhdulh ꞌinkꞌez ꞌet neba oohket ꞌet de sih tsꞌuhoonaꞌ ꞌinkꞌez yatsꞌilhosdla.”

3 ꞌEt Joseph bulhutsinke whunizyane, Egypt tsꞌe whenandil lhes maiꞌ hootakulh ha.4 ꞌEt hoontsꞌi Jacob ꞌaw Joseph bulhutsin Benjamin, ꞌen ꞌaw bubulh whelhuyilhꞌalh, “Doo ka sih hoontsiꞌ-un bulh ꞌuhoneh,” ni ꞌinka.5 ꞌEt Israel ooyeꞌke whuz lhes maiꞌ hootakulh ha whuz whehandil, Canaan ꞌet cha dai hoonli ꞌet huwa.

6 ꞌEt Joseph nyo usda-un dulcho whe bumoodih unli. ꞌEn za ndi lhes maiꞌ yeꞌ ooket keyoh whuduneꞌne tsꞌun. ꞌEt Joseph bulhutsinke whusahandil ꞌinkꞌez hibut soo yoo yo cho yo ꞌuhuntutsulh ꞌankwꞌus yun nonutꞌa whe.7 ꞌEt Joseph dulhutsinke bunilhꞌen ꞌinkꞌez naboolhtsꞌit, ꞌet hoontsꞌi tꞌebunuzun hukwꞌunꞌa neꞌutꞌen ꞌinkꞌez khuni ulhtus ꞌi be bubulh yalhduk ꞌinkꞌez ꞌubulhni, “Ntsꞌez de hahdil?” ꞌEt ꞌuhutni, “Canaan yun kꞌut tsꞌe ha tsꞌandil tꞌalh-i tsꞌootakulh ha.”

8 ꞌEt Joseph dulhutsinke naboolhtsꞌit ꞌinkꞌez didut ꞌaw nalhuhuyooltsꞌulh.9 ꞌEt Joseph ntsꞌenꞌa la bughu nusuti-un ꞌet whunalnih ꞌinkꞌez ꞌubulhni, “Nunutꞌiꞌne ꞌuhtꞌoh! Datsꞌintꞌoh la tetsꞌulꞌen neuntilhꞌelh ha ꞌuhja, ndiz tihdil!”

10 ꞌEt ꞌuhuyulhni, “ꞌAwundooh nemoodih, mba ꞌutꞌenne njan ꞌutꞌalh-i hootakulh ha ꞌuhuja whusahandil.11 Tsꞌiyawh ꞌilhoghun dune ooyeꞌke za ꞌutsꞌintꞌoh, ꞌaw dune ꞌundunutꞌihne lhtsꞌiloh. Mba ꞌutꞌenne ꞌaw nulhdulhꞌenne iloh ꞌuhintꞌoh.”

12 ꞌEt hoontsꞌi ꞌubulhni, “ꞌAwundooh! ꞌEt hoontsꞌi njan datsꞌintꞌoh la tetsꞌulꞌen, ꞌet whuntilhꞌelh ha ꞌuhja!”

13 ꞌEt ꞌuhuyulhni, “Mba ꞌutꞌenne ꞌenne whunizyane ꞌon ꞌat nane lhulhutsinke hinli. ꞌIlhoghun dune za ooyeꞌ Canaan whutꞌen-un, ꞌudekꞌoh-un ꞌen ꞌubá yuzih netlꞌa didaꞌ, ꞌinkꞌez ꞌilhoghun cha hooloh suliꞌ inleꞌ.”

Genesis 41 , 42 94

14 ꞌEt hoontsꞌi Joseph ꞌubulhni, “Daja dusni la, ꞌet ꞌalha ꞌudusni, nulhdulhꞌenne unli whe ꞌuhtꞌoh!15 Ndiz unꞌa ꞌet ootalhdzih. Pharaoh ye khuna-i njan ꞌaw whuchꞌa nalhtuzihdulh, ꞌudekꞌoh-un nohulhutsin whusainya de za.16 ꞌIlhoghun whuz nalhꞌalh ꞌinkꞌez ꞌudekꞌoh-un nohulhutsin whusayoolhtelh. ꞌInkꞌez nohni ꞌadutilalh, ꞌet de nohghun ootalhdzih tsꞌihꞌun unꞌa ꞌuduhni tilah. Pharaoh ye khuna-i be nulhdulhꞌenne uhli tilah ꞌuhtꞌoh!”17 ꞌEt tsꞌiyawh ꞌabanla tat dzin whutsꞌun.

18 ꞌEt Joseph ꞌubulhni whulh tat dzin-un, “ꞌEt nduhneh ꞌinkꞌez hoohnaꞌ, Yakꞌusda (Elohim) be nuzjut ꞌet huwa.19 Tsꞌihꞌun dunene uhli de, nohni nohtoh ꞌilhoghun ꞌen ꞌadooꞌaꞌ ꞌinkꞌez nohni lhes maiꞌ bulh whuz nohyoh tsꞌe nahdulh.

95 Genesis 42

(42:9) © 1996 David C. Cook

20 ꞌInkꞌez ꞌudekꞌoh-un nohulhutsin, ꞌen sba whusalhtih. Nohghuni ootalhdzih ꞌet huwa ꞌinkꞌez ꞌaw yaoohdlah aitꞌoh.” ꞌInka ꞌet nduhuja.

21 ꞌEt ꞌulhodutni, “ꞌAlhaꞌ nekꞌe hoonkatne tsinli. Neulhutsin oozul netsꞌutedudlih inleꞌ ꞌinkꞌez ꞌaw lhtsꞌuditsꞌil, ꞌet huwa njan nekꞌe hooltsꞌut.”

22 ꞌInkꞌez Reuben bubulh yatilduk ꞌinkꞌez ꞌubulhni, “ꞌAw lakw lhunodusnel inleꞌ! ‘Ndun duneyaz ootsꞌun nintaꞌ oohtꞌen junih!’ nohdusni, ꞌinkꞌez ꞌaw lhusoozulhtsꞌai. ꞌEt huwa whunulhꞌen buzkaih ꞌawet netsꞌun hukwaꞌ whutni.”23 ꞌEt hoontsꞌi ꞌaw tꞌehonuszun Joseph tꞌewhuninzun, yuba yalhduk-un ꞌen yuba yalhduk whe bubulh yalhduk ꞌet huwa.

24 ꞌInkꞌez buchꞌaz nalhꞌa ꞌinkꞌez intse. ꞌEt doo cha butsꞌun nalhꞌa bubulh yalhduk ꞌinkꞌez Simeon yilhchoot ꞌinkꞌez bubut ꞌet yulhghel.

Bulhutsinke Canaan tsꞌe whe nahidil25 ꞌEt Joseph ꞌubulhni, ꞌuyoonne dune ndi ꞌeꞌuzdla-i tsꞌiyawh lhes

maiꞌ be buba idulhbun ꞌinkꞌez ndai la hikꞌelha hitilhtselh-i, ꞌi tsꞌiyawh sooniya ꞌeꞌuzdla-i be nayuhdzaiꞌ ꞌinkꞌez nahidutilyelh-i cha butlꞌahle. ꞌEt whuz unꞌa ꞌubinla.26 ꞌEt nyoo budonkey cha tsꞌiyawh hitꞌunaꞌuzdla lhes maiꞌ be ꞌinkꞌez whe nahidil.

27 ꞌEt nehunina ꞌilhoghun nyoo ꞌeꞌuzdla-i kꞌunayanꞌuk, nyoon dughunaꞌ yughaꞌ tiꞌalh ha, nehunina-un soo ꞌudedo nyoo sooniya ꞌet usdzai yutilhꞌen.28 ꞌEt dulhutsinke ꞌubulhni, “Szooniya stlꞌa nahuyanꞌai, njan ꞌet ꞌuntꞌoh, sꞌezdla-i bet!” ꞌEt budzin soo tsꞌihꞌun yo ꞌuja ꞌinkꞌez hunilhjoot ꞌinkꞌez ꞌilhodutni “Dahoontꞌoh-un ꞌet Yakꞌusda (Elohim) negha ooninꞌai?”

29 ꞌEt Jacob dubá ꞌen hitsꞌu naoosdil Canaan yun kꞌut, ꞌinkꞌez hiyulh nahoolnuk ntsꞌoh te bubulh dahootꞌen-un ꞌuhuyulhni,30 “Mbene la nyo yun whumoodih unli-un, tubeh khuni dutsꞌun ꞌi be nebulh yalhduk, ꞌinkꞌez nulhdulhꞌenne keyoh honilhꞌen ooba leꞌ tsꞌintꞌoh.31 ꞌEt hoontsꞌi ꞌutsꞌutni, ‘Tsꞌihꞌun dunene tsinli, ꞌaw nulhdulhꞌenne lhtsꞌiloh.32 Whunizyane ꞌon ꞌat nane lhulhutsinke tsinli, ꞌubá ooyeꞌke ꞌutsꞌintꞌoh. ꞌIlhoghun hooloh suliꞌ, ꞌinkꞌez ꞌudekꞌoh-un ꞌen ꞌubá yuzih usda, Canaan yun kꞌut ꞌet,’ tsꞌutni.

33 ꞌEt dune nyo keyoh whumoodih unli neulhni, ‘Njan whe la tsꞌihꞌun dune uhli tꞌeoonoohzeh, ꞌilhoghun nohulhutsin njan nenulhtih, ꞌinkꞌez ꞌutꞌalh-i nohyoh tsꞌe tꞌalh-i hooloh tsꞌe nahlelh ꞌinkꞌez nahdulh.

Genesis 42 96

34 ꞌInkꞌez ꞌudekꞌoh-un nohulhutsin, ndiz toolhteꞌ. ꞌEt de la tꞌeoonooszin ꞌaw nulhdulhꞌenne lhuhloh, tsꞌihꞌun dune uhli ꞌinkꞌez ndun nohulhutsin nohtlꞌa natistelh ꞌinkꞌez njan ꞌet sih ꞌohket.’ ”

35 ꞌEt ꞌuhooja, duꞌezdla-i huye ha ꞌalhkat whe ꞌilhoghun dune buzooniya yukꞌelha yulhtsi-i, ꞌi be ꞌuzdla-i be yuzdzai ꞌet hitilhꞌen. Bubá cha yunilhꞌen. Tube hunilhjoot.36 ꞌInkꞌez Jacob bubá ꞌubulhni, “Tube tsꞌodi suzulhtsi nohtoh. Joseph ꞌen hooloh suliꞌ, Simeon cha hooloh suliꞌ, ꞌinkꞌez ꞌandit Benjamin ꞌen natilhtelh hukwaꞌ nuhzun. ꞌI tsꞌiyawh sdachꞌe ꞌuhoontꞌoh.”

37 ꞌEt Reuben dubá yulh yatilhduk ꞌinkꞌez ꞌuyulhni, “Syeꞌke nahultꞌoh bubuzolhghelh ꞌaw Simeon ntsꞌu nalhtustel de. Sla kꞌelhtih ꞌinkꞌez whusunaoostelh lah.”

38 ꞌEt hoontsꞌi ꞌuyulhni, “ꞌAw syeꞌ nohbulh tooꞌas aitꞌoh. Ndun nohulhutsin ꞌen dazsai. Dichꞌoh ꞌet ndun syeꞌ hoonli bulh ꞌuhooja de uhdulh whe, ꞌet de stsi dulgi-i tsꞌodi bulh nyo tsꞌun kꞌut tsꞌe tisyalh.”

Joseph bulhutsinke ꞌenne Benjamin bulh whusanahidil

43 1 Tubeh nyo yun kꞌut dai be oonisjoot.2 ꞌEt ꞌuhooja ndi lhes maiꞌ gak huyulhtsi whe Egypt huyonket-i,

bubá ꞌubulhni, “Whuz nahdulh ꞌinkꞌez ꞌutꞌalh-iyaz oohket.”3 ꞌEt hoontsꞌi Judah ꞌen ꞌuyulhni, “Nyoon dune soo tsꞌihꞌun negha

daniꞌ njan dune neulhni, ‘ꞌAw snin doo cha noolhꞌen aitꞌoh nohulhutsin nohbulh eꞌustꞌen de.’4 Neulhutsin nebulh whelhꞌaꞌ de, ꞌet de za whuz uztidulh ꞌinkꞌez ꞌutꞌalh-i mba tsꞌootakulh.5 ꞌEt ꞌaw ndun nebulh tolhꞌaꞌ aitꞌoh de, ꞌaw whuz uztoodilh aitꞌoh. Nyoon dune njan dune neulhni, ‘ꞌAw snin oohꞌen aitꞌoh noulhutsin nohbulh whusalhiyal de.’ ”

6 ꞌInkꞌez Israel ꞌutni, “ꞌEt dahoontꞌoh huwa sdabe tankꞌus unꞌa ꞌusuhla nyoon dune dahniꞌ, ꞌawhuz ꞌuyoon cha nohulhutsin ꞌet dahniꞌ?”

7 ꞌEt ꞌuhutni, “Dune soo tsꞌihꞌun neoodalhkut, wheni ꞌinkꞌez nenatneke cha ꞌinkꞌez ꞌutni, ‘Nohbá khuna eh? ꞌUyoon cha eh nohulhutsin?’ ꞌInkꞌez ꞌet tsꞌudaniꞌ. Ntsꞌenꞌa tꞌetsꞌontazin, ‘Nyulhutsin ookwa nahdulh,’ nedutanelh?”

8 ꞌEt Judah, oobá Israel ꞌuyulhni, “Nyoon duneyaz, si stlꞌa ilhtih ꞌinkꞌez sih whuz naztoodilh ꞌinkꞌez tsꞌuhoonaꞌ. ꞌAw yatsꞌodlah aitꞌoh, wheni cha ꞌinkꞌez nyun cha ꞌinkꞌez neuzkehkeyaz cha.9 Si sichꞌoh ꞌet ndun ookwꞌedutisyalh, soo slakꞌez ꞌet oola dutanih. ꞌEt ꞌaw mba whusanalhustel ꞌinkꞌez mbut nenalhustel de, ꞌilhiz wheni si skꞌe holtsꞌit.

97 Genesis 42 , 43

10 ꞌEt ꞌaw saꞌ nulheꞌtsꞌitꞌel de, ꞌandit ꞌawet whulh nat daꞌ whusanatsꞌidil ooleꞌ.”

11 ꞌInkꞌez bubá Israel hubulhni, “Whuz unꞌa sih ꞌuhotꞌeꞌ. ꞌInkꞌez njan duhneh, ndo ho ha nuyeh-i, mai ꞌukꞌenus unzoo-i buba deyulhle, ꞌinkꞌez dune ootsꞌitilhdulh ꞌi cha bahlelh. Be ꞌuzdudultlo-i naꞌulhyeh-i, ntsool-iyaz cha, ꞌinkꞌez tsꞌihnatlꞌuz ntsool-iyaz cha bulh butaꞌwhutꞌen-i cha ꞌinkꞌez myrrh huyulhni, ꞌi cha, ꞌinkꞌez duchun kꞌut ha nuyeh-i pistachio ꞌinkꞌez almond huyulhni, ꞌi cha ooba yihlelh.12 Sooniya nawh ꞌuniltsuk-i, ꞌi toohdzaih ꞌinkꞌez nyoo sooniya nohba denahuyandzai inleꞌ-i, ꞌi cha toohdzaih, nahunitꞌa whutilah ꞌuhuja.13 Nohulhutsin cha nohbulh tooꞌas. Dugweꞌ duduhdilh ꞌinkꞌez dune ootsꞌu nahdulh.14 ꞌInkꞌez Yakꞌusda ꞌUkꞌenus ꞌUltus-un ꞌuntꞌoh (El Shaddai), ꞌen nohgha teꞌnozeh nyoon oobut. ꞌInkꞌez si ꞌilhoghun nohulhutsin ꞌen cha yula dootnih ꞌinkꞌez Benjamin. ꞌEt ꞌawet tsꞌodi susliꞌ de, ꞌawet tsꞌodi susliꞌ.”

15 ꞌEt nyoonne dune nyoo hitsꞌu hitilhdulh-i cha ꞌinkꞌez Benjamin cha, ꞌen cha hubulh tizꞌaz, sooniya nawh ꞌuniltsuk-i cha, ꞌinkꞌez Egypt tsꞌe whehandil. ꞌInkꞌez Joseph hibut nenindil.16 ꞌEt Joseph, Benjamin bubulh nuꞌas yutilhꞌen whe nyoon ooyoh huwunli-un ꞌuyulhni, “Ndunne dune syoh tsꞌe hubulh inꞌus, ꞌinkꞌez khuna-i nasilghe ꞌinkꞌez lhadinleh. Dzetniz ꞌet ndunne dune sulh naꞌhutitꞌulh.”

17 ꞌEt dune Joseph daja yulhni la whuz unꞌa ꞌuja. ꞌInkꞌez nyoonne dune Joseph ooyoh tsꞌe dabuninla.18 ꞌEt nyoonne dune whe hunuljut, Joseph ooyoh tsꞌe dabunila, ꞌinkꞌez ꞌuhutni, “Nyoo sooniya ꞌi ka la neꞌinla neꞌuzdla-i be nahuyandzai-i ꞌudechoo njan daneuninla. Nechꞌaz nedutadalh-un ꞌet hukwunuta ꞌulhnane kꞌunꞌa neutalhchulh nyoo ghunaꞌ, donkey cha.”

19 ꞌEt nyoon Joseph buyoh whumoodih yuzih nenindil nyo dati ꞌet hiyulh yailhduk.20 ꞌEt ꞌuhiyulhni, “O dune ncha-un, ꞌalha ꞌudecho whusatsꞌandil whe ꞌutꞌalh-i tsꞌootakulh haꞌ tsꞌuja.21 ꞌEt ꞌuhooja, nenatsꞌuntatus naztisdil whe ndi ꞌeꞌuzdla-i ookwꞌunatsꞌunꞌuk ꞌinkꞌez ꞌilhoghun tsinli whe nezoonuyaꞌ nyo ꞌezdla-i be yuzdzai whe, ꞌinka ndi sooniya whusanatsꞌandzai.22 ꞌInkꞌez ꞌuyoo sooniya cha whusatsꞌanꞌai, ꞌutꞌalh-i be tsꞌootakulh ha. ꞌAw tꞌetsꞌonuszun mbe subah nyoo sooniya neꞌezdla-i be nayandzai.”

23 ꞌEt hoontsꞌi ꞌutni, “Nohbulh whudoghel. ꞌAw whenulhjut iloh. NohYakꞌusda (Elohim) ꞌen nohbá ooYakꞌusda (Elohim) ndi ꞌen nohꞌezdla-i ye yanꞌai whe ꞌuntꞌoh. Nohzooniya nusꞌa whe.” ꞌInkꞌez Simeon butlꞌa nayalhti.

Genesis 43 98

24 ꞌEt ndun dune Joseph ooyoh dabuninla, ꞌinkꞌez too bugha nilhdzo ꞌi be duke tanahuzguz ꞌinkꞌez bughunaꞌ cha yutlꞌaꞌ dantsut.25 ꞌInkꞌez nyoo Joseph hitsꞌu hitilhdulh-i lhahidinla, dzetniz wheni nyo ꞌet ꞌutꞌalh-i naꞌhutitꞌulh ꞌet tꞌehonanzin.

26 ꞌEt Joseph duyoh dananja whe nyoo hitsꞌu hitilhdulh-i hitlꞌa huyanla, ꞌinkꞌez hibut yo huntizsel soo yun whutsꞌun.27 ꞌEt dahintꞌoh lah ꞌet hukwa boodulhkut ꞌinkꞌez ꞌutni, “Nohbá soo ꞌuntꞌoh eh, duneti ooghu yalhduk-un, ꞌawhuz eh khuna?”

28 ꞌEt ꞌuhuyulhni, “Mba ꞌutꞌen-un nebá tube soo ꞌuntꞌoh. ꞌAwhuz khuna.” ꞌInkꞌez yubut yo ꞌuntizsel ꞌinkꞌez nyo naꞌhududilhdil.

29 ꞌEt ndo yutanꞌen ꞌinkꞌez dudulhutsin Benjamin yutilhꞌen, ooloo ooyeꞌ, ꞌinkꞌez ꞌutni, “Ndun ꞌen ꞌudekꞌoh nohbulhutsin, ooghun sulh yalhduk inleꞌ?” ꞌInkꞌez ꞌutni, “Yakꞌusda (Elohim) soo cho ntsꞌun oozooꞌ syeꞌ.”30 ꞌEt oodzi tubeh dulhutsin yukꞌeni unli ꞌinkꞌez ꞌutsꞌun whe naja soo ꞌa cho. ꞌInkꞌez ꞌet whenintse, ꞌinkꞌez ꞌusti tsꞌe whuz dananja ꞌinkꞌez ꞌet ꞌutso.

31 ꞌEt nenaꞌnilde ꞌinkꞌez tenanja ꞌinkꞌez kꞌoh ꞌududootun ꞌinkꞌez ꞌutni, “ꞌutꞌalh-i ꞌet nenuhle bubut neinuhle.”

32 ꞌEt didutchꞌoh ꞌutiꞌulh-un hiba neꞌninla, ꞌinkꞌez nyoonne cha didutchꞌoh ꞌet ꞌuhutiꞌulh-un buba neꞌninla. ꞌInkꞌez Egypt whutꞌenne ꞌenne cha didutchꞌoh duba neꞌhuninla. ꞌAw Egypt whutꞌenne, Hebrew whutꞌenne ꞌaw bubulheꞌhusꞌal, Egypt whutꞌenne buba hoontsiꞌ.33 ꞌEt hibut natlꞌa diltsꞌiꞌ. ꞌUdetso whuzdli-un, ꞌudechoo ꞌinkꞌez ꞌudekꞌoh whuzdli-un, ꞌen ꞌudekꞌez, ꞌinkꞌez nyoonne dune tube buba hooncha lhonulꞌen.34 ꞌEt tsꞌiyawh bubut neꞌninkai, ꞌet hoontsꞌi Benjamin yuba deyanla, ꞌi kwulat ꞌi be ꞌonus ꞌultsuk, ꞌi yugha ininꞌai. ꞌInkꞌez too hitnaiꞌ ꞌinkꞌez hiyulh whunalhni.

Joseph oolubot

44 1 ꞌInkꞌez nyoon duyoh whumoodih unli-un ꞌen ꞌuyulhni, “Dune tsꞌiyawh ꞌezdla-i ꞌutꞌalh-i buba idilhbun, soo

nahitilelh-un ꞌet ꞌuldaz-i, ꞌinkꞌez sooniya huye huyonket, ꞌi cha ꞌezdla-i buba denayinꞌaih.2 ꞌInkꞌez slubot silver ꞌuntꞌoh-i, ꞌi ꞌudekꞌoh-un ꞌen ꞌezdla-i ooba deyinꞌaih, ꞌinkꞌez lhes maiꞌ huye ꞌonket-i cha buba denayinꞌaih.” ꞌEt daja Joseph yulhni la, whuz unꞌa ꞌuja.

3 Soo bundadaꞌ yulhkai ꞌet ꞌawet dune whenabuhalhꞌaꞌ dudonkey tucha.

99 Genesis 43 , 44

4 ꞌEt nyo keyoh whuti ꞌawet whanꞌunyaz ha nahidil, ꞌet Joseph nyoon yuba ꞌutꞌen-un ꞌuyulhni, “Dudinyaih, nyoonne buba nanyalh ꞌinkꞌez butꞌasinya de, ꞌet ꞌubudini, ‘ꞌEt di ha hoonzoo-un ꞌet hoontsiꞌ hukwꞌunꞌa kwꞌelha whuzulhtsi?5 Ndi lubot ꞌi iloh eh smoodih ye ꞌutnai-i ꞌinkꞌez ꞌi be nus whunilhꞌen yutnai te? Hoontsiꞌ hukwꞌunꞌa ꞌuhja ꞌet dahja.’ ”

6 ꞌEt butꞌasuya ꞌinkꞌez ndi khuni ꞌi be bubulh yailhduk.7 ꞌInkꞌez ꞌuhuyulhni, “ꞌEt di ha smoodih ndi khuni ꞌi be nebulh yailhduk? ꞌAw mba ꞌutꞌenne ꞌaw whuz unꞌa ndulhutsꞌutꞌen wheꞌ hoontꞌoh.8 Nilhꞌen ndi sooniya yun kꞌut Canaan tsꞌe ha natsꞌandzai, neꞌezdlai-i bet natsꞌinꞌaiꞌ-i. Ntsꞌenꞌa silver kꞌus gold bulh ꞌi nemoodih ooyoh ꞌet tsꞌuduntitꞌih?9 Mbe la mba ꞌutꞌen-un ooghu naꞌyinla-un de, ꞌen daootsah ꞌinkꞌez wheni cha nemoodih be ꞌulhna tsꞌooleh sih.”

10 ꞌInkꞌez ꞌutni, “ꞌEt daja duhni la, mbe oochꞌeꞌ toh natsꞌinla de, ꞌen si seꞌulhna tileh ꞌinkꞌez nohni ꞌaw nohkꞌelhoowhutaltsꞌulh.”

11 ꞌEt soo ꞌa cho ꞌet ꞌilhone hinli ndai la be ꞌuzdla-i yun nahuyanla ꞌinkꞌez hikꞌu naꞌanꞌuk.12 ꞌEt nyoon dune ꞌudetso whudilhdzulh-un, ꞌen oochꞌeꞌ ꞌi cho yet nuniztai, ꞌudekꞌoh-un whutsꞌun, ꞌinkꞌez nyoo lubot ꞌi Benjamin ooꞌezdla-i bet nayinꞌai.13 ꞌEt dunaih ye yidalhchꞌul ꞌinkꞌez nyoo dudonkey hikꞌena ꞌinla, ꞌinkꞌez keyoh whuti tsꞌe nahoosdil.

14 ꞌEt Judah ꞌinkꞌez dulhutsinke Joseph ooyoh tsꞌu nahoosdil, ꞌawhuz ꞌet ꞌutꞌen, hibut ꞌet yun nachaniti.15 ꞌInkꞌez Joseph ꞌubulhni, “Dantꞌi ꞌutꞌen-i ꞌuhla? ꞌAw eh tꞌeoonuzuhzun dantꞌoh-un ꞌustꞌoh, ꞌen dune nus whunilhꞌen whe ꞌuntꞌoh tꞌeooninzin!”

16 ꞌEt Judah ꞌutni, “Nemoodih daja uzdutanelh? Kꞌus ntsꞌenꞌa ꞌaw nekꞌelhuholhtsꞌit hukwꞌunꞌa naꞌtsꞌuhooleh? Yakꞌusda (Elohim) mba ꞌutꞌenne ꞌutꞌen ntsꞌih-i bulh nabinla. Njan nuzdilhya, moodihti be ꞌulhna wheni cha ꞌinkꞌez mbe ndi lubot ooꞌezdlai-i be yuzꞌai ꞌen cha.”

17 ꞌEt hoontsꞌi ꞌutni, “ꞌAw ꞌet ndosneh aitꞌoh. ꞌEt hoontsꞌi mbe slubot nuyuꞌa-un, ꞌen seꞌulhna tileh. ꞌEt nohni, nohdzi whudooghel whe nohbá ootsꞌu nahdulh.”

Judah ꞌen Benjamin ba tedudlih18 ꞌEt Judah yuzih neninya ꞌinkꞌez ꞌutni, “ꞌAw smoodihti si mbut

yatisduk ꞌet sgha ooninꞌaih, ꞌinkꞌez be hunilchꞌe-i mba ꞌutꞌen-un bulh hunolchꞌeh junih. Pharaoh diltꞌoh whe ꞌintꞌoh.

Genesis 44 100

19 Smoodih mba ꞌutꞌenne budini, ‘Nohbá hoonli kꞌus nohulhutsin?’20 ꞌEt nemoodih ꞌutsꞌutni, ‘Nebá hoonli, duneti ꞌinkꞌez duneti suliꞌ whe ooyaz whuzdliꞌ, tsꞌoodun unli, ꞌen bulhutsin dazsai, ꞌinkꞌez ndun tsꞌoodun ooloo buzkeh ꞌenne didutchꞌoh gaih unli, ꞌinkꞌez oobá yukꞌentsiꞌ.’

21 ꞌEt mba ꞌutꞌenne ꞌubudini, ‘Ndiz stsꞌolhtelh. Noosꞌen sih.’22 ꞌEt smoodihti ꞌutsꞌutni, ‘ꞌAw ndun duneyaz dubá yuchꞌa ooyaꞌ aitꞌoh. Dubá yuchꞌa suya de, oobá datitsah.’23 ꞌEt hoontsꞌi mba ꞌutꞌenne ꞌubudini, ‘Ndun ꞌudekꞌoh-un nohulhutsin, ꞌaw ndiz lhtulhtel de, ꞌaw snin ꞌaw naoohtꞌen aitꞌoh.’24 ꞌEt whuz unꞌa mba ꞌutꞌen-un oozih neznindil, ꞌubá ꞌinkꞌez daja dini la, nemoodih inli uzdaniꞌ.

25 ꞌInkꞌez ꞌubá ꞌuneꞌulhni, ‘Whuz nahdulh ꞌinkꞌez ꞌutꞌalh-iyaz oohket.’26 ꞌEt hoontsꞌi ꞌutsꞌutni, ‘ꞌAw whuz naztoodilh aitꞌoh, ꞌudekꞌoh-un neulhutsin nebulh ꞌutꞌen de, ꞌet de za whuz naztidulh. ꞌEn ooyit de ꞌaw nyoon dune oonin nalhtsꞌutistꞌel.’

27 ꞌEt mba ꞌutꞌen-un, ꞌubá ꞌuneꞌulhni, ‘Tꞌeoonuhzun sꞌat nane dune sghu sulhtsi.28 ꞌInkꞌez ꞌilhoghun ꞌen sgho whenya ꞌinkꞌez ꞌudusni, “ꞌAlhaꞌ la yabeꞌ yudalhchꞌul.” ꞌEt whutsꞌun ꞌaw nalhuzistꞌen.29 ꞌEt hoontsꞌi ndun ꞌen cha sghulhchoot de, ꞌinkꞌez hoonli hoontsiꞌ-un bulh ꞌuhooja de, ndi stsꞌeghaꞌ dulgi-i tsꞌodi be nyo tsꞌun kꞌut tsꞌe tisyalh.’

30 ꞌEt huwa mba ꞌutꞌen-un, hukwa ndun tsꞌoodun ꞌaw nebulh lheꞌustꞌen, tube nzih ꞌutitelh-un hukwaꞌ ninzun ꞌet huwa.31 ꞌEt ꞌuwhutanelh, ndun dune-un nebulh lheꞌustꞌen de, datitsah. ꞌEt mba ꞌutꞌenne, wheni gha, mba ꞌutꞌen-un nebá, ꞌen ootsighaꞌ dulgi suliꞌ kꞌet tsꞌun kꞌut tsꞌe tiyalh.32 ꞌEt ndun mba ꞌutꞌen-un, ndun duneyaz yukꞌe danya whe ꞌuntꞌoh. ‘ꞌAw whusanalhustel de, ꞌen sbá ghun ꞌilhiz skꞌe whutaltsꞌulh wheꞌ hoontꞌoh,’ dasniꞌ.

33 ꞌEt huwa si nyo ndun duneyaz ꞌen ookꞌet nye ꞌusna oosleꞌ, ꞌinkꞌez nyoon duneyaz dudulhutsinke bubulh natootꞌas.34 ꞌEt huwa ntsꞌenꞌa suba, sbá ootsꞌu toosyaꞌ ndun duneyaz sulh lheꞌustꞌen de, ꞌet sih ntisꞌelh dawhultsiꞌ lah sbá ookꞌewhutaltsꞌulh ꞌet huwa?”

Joseph bubulhutsinke bunalh ha honꞌai

45 1 ꞌEt Joseph ꞌaw ꞌon ꞌun ꞌoodudotun aitꞌoh, nyoonne yunat nudilhyane bunalh, ꞌinkꞌez ꞌudija, “Tsꞌiyanne nꞌaz nahutoodilh!”

ꞌEt Joseph nyoonne dudulhutsin mbe ꞌuntꞌoh-un hubudaniꞌ.

101 Genesis 44 , 45

2 ꞌInkꞌez soo ꞌultus-un intse ꞌinkꞌez nyoonne Egypt whutꞌenne ꞌinkꞌez Pharaoh ooyoh cha tsꞌiyawh whulh hidantsꞌo.

3 ꞌEt Joseph bubulhtsinke ꞌenne ꞌubulhni, “Si Joseph ꞌustꞌoh. Sbá ꞌawhuz eh khuna?” ꞌEt hoontsꞌi bulhutsinke ꞌaw hiyulh yatoolhdih aitꞌoh. Whuz tube buba nekꞌeꞌhoonil kꞌet.

4 ꞌEt Joseph dudulhutsinke ꞌubulhni, “ꞌAnih szih nenuhdilh.” ꞌInkꞌez hizih nenindil ꞌinkꞌez ꞌutni, “Joseph ꞌustꞌoh! Nohulhutsin Egypt tsꞌe be ꞌohket inleꞌ-un.5 ꞌInkꞌez ꞌandit nohdzi undoodaꞌ kꞌus dulh nahunolhchꞌeh junih. Njan seꞌohket ꞌet huwa, Yakꞌusda ꞌen ndiz sutilhꞌaꞌ dune yalhosdla ha.6 Nat yus kꞌut whutsꞌun njan dai honeꞌ. ꞌAwhuz kwulat yus kꞌut ꞌet ꞌaw dune ꞌaꞌ noolelh cha aitꞌoh, haꞌ hunoolelh cha aitꞌoh tileh.7 ꞌInkꞌez Yakꞌusda (Elohim) nohtso ndiz whe salhꞌaꞌ, Ndi yun kꞌut nohtsꞌu haindene huhoona, ꞌaw dalhuhoosa. Hooncha whe bulaꞌ tinelh.

8 ꞌEt ꞌandit nohni iloh ndiz whe silhꞌaꞌ. Yakꞌusda (Elohim) ꞌen Pharaoh cha oobá sulhtsi ꞌinkꞌez ooyoh cha whumoodih ꞌusli. ꞌInkꞌez Egypt yun kꞌut ndulcho whucha whumoodih ꞌusli.9 Soo ꞌa ꞌinkꞌez ꞌubá ootsꞌun nahdulh ꞌinkꞌez ꞌuduhni, ‘Nyeꞌ Joseph ꞌutni, “Yakꞌusda (Elohim) ꞌen Egypt whumoodih sulhtsi. Ndiz stsꞌinyalh, saꞌ ꞌontꞌen junih!10 Njan Goshen yun kꞌut ꞌet sih hontꞌeꞌ. Soo szih ꞌutantꞌelh, nyun cha ꞌinkꞌez nyuzkeh cha, nyuzkeh bubuzkeh cha, nghunaꞌ, ꞌusbai bulh cha ꞌinkꞌez ndai ꞌintꞌi tsꞌiyawh.11 ꞌEt njan ookwꞌut yinka dutalhtsꞌilh-i ꞌi nohgha tisꞌaih doo ka sih nyun cha ꞌinkꞌez nyoh dilhtsꞌine cha, ndai ꞌintꞌi-i cha telhꞌen ooleꞌ ꞌawhuz kwulat yus kꞌut dai whutaleh wheꞌ hoontꞌoh.” ’

12 ꞌInkꞌez whunilhꞌen nohna cha ꞌinkꞌez sulhutsin Benjamin oona be nanulhtꞌoh sze ꞌuwhutni, nohbulh yasduk.13 ꞌEt de sih ꞌubá dastꞌoh la njan Egypt, ndet hoohꞌen-un cha ꞌinkꞌez soo ꞌa ꞌubá ndiz ulhtelh.”

14 ꞌEt dulhutsin Benjamin yutsꞌilchun kꞌet yilhchoot ꞌinkꞌez intse ꞌinkꞌez Benjamin cha yutsꞌilchun kꞌut ꞌet intse.15 ꞌEt ꞌon ꞌun cha dulhutsinke tsꞌiyawh nabuditsꞌooz ꞌinkꞌez bughintse. ꞌEt hukwꞌelhꞌaz bulhutsinke yulh yahalhduk.

16 ꞌEt tsꞌiyawh dawhudaniꞌ lah Pharaoh ooyoh bulh ꞌuhudantsꞌo ꞌinkꞌez ꞌuhutni, “Joseph bulhutsinke whusahandil,” ꞌinkꞌez Pharaoh cha ꞌinkꞌez yuba ꞌutꞌenne cha tsꞌiyawh huhoontꞌiꞌ.17 ꞌInkꞌez Pharaoh Joseph ꞌulhni, “Nyulhutsinke budini, ‘Nohghunaꞌ bunaꞌilhghelh ꞌinkꞌez nahdulh Canaan yun tsꞌe.

Genesis 45 102

18 Nohbá ndiz ulhtelh ꞌinkꞌez nohyoh whutꞌine cha, tsꞌiyawh ndiz stsꞌun uhdulh. Ndai la kꞌus unzoo-i njan yun Egypt ꞌi si nohgha ooslelh ꞌinkꞌez njan yun kꞌut whukꞌo, ꞌi sih oohꞌalh.’

19 ꞌEt whuz unꞌa khuni mba ꞌulya, ꞌet dineh, ‘Njan Egypt yun kꞌut mbene ꞌulgoo-i tsꞌiyawh ilhchoot. Nohuzkehyaz ꞌinkꞌez nohꞌatke cha ꞌinkꞌez nohbá cha ꞌinkꞌez whusahdilh.20 ꞌInkꞌez ndai la njan uhtꞌi-i ooghuni oohleꞌ junih. Ndai la Egypt yun kꞌut ꞌukꞌenus nzoo-i, ꞌi nohchꞌeꞌ ꞌuntꞌoh.’ ”

21 ꞌEt Israel ooyeꞌke ꞌet nduhuja, ꞌinkꞌez Joseph be neꞌulgoo-i cha tsꞌiyawh butlꞌa yanla. Daja Pharaoh daja yulhni la hukwꞌunꞌa ꞌinkꞌez nuhudilh-un hitiꞌulh-i cha butlꞌa nayanla.22 Tsꞌiyawh ꞌilhoghun hinli whe naih lhkꞌe nahidutilelh-i cha ꞌinkꞌez Benjamin ꞌen tat whunizyai tat ꞌultsuk-i (300) ꞌi silver yugha inindzai, ꞌinkꞌez kwulat kꞌe naidutilelh-i naih, ꞌi cha yugha ininla.23 ꞌInkꞌez dubá ꞌen ndi donkey ꞌi yutsꞌo tlꞌa yanla, whunizyai donkey, Egypt ndai la unzoo-i tsꞌiyawh ꞌi hikꞌe nahuyinla, ꞌinkꞌez whunizyai tsꞌeke donkey, ꞌi cha lhes maiꞌ cha, lhes cha ꞌinkꞌez ꞌutꞌalh-i cha, oobá yutiꞌulh ha cha, ndiz nahatidulh huba, ꞌi hikꞌe nahuyinla.24 ꞌEt dudulhutsinke whenabalhꞌa ꞌinkꞌez whe nahidil ꞌinkꞌez ꞌubulhni, “Khun te nyo nuhdil whute dzoh nohdeh junih.”

25 ꞌEt Egypt whe nahidil ꞌinkꞌez Canaan yun kꞌe nahidil, dubá Jacob ꞌen ootsꞌun.26 ꞌInkꞌez hidaniꞌ, “Joseph ꞌawhuz khuna ꞌinkꞌez Egypt yun kꞌut ndulcho whe moodih unli.” ꞌEt Jacob oodzi ꞌankwꞌus ꞌetsul ꞌuja, ꞌaw hiba ꞌalha lheꞌdusnih ꞌet huwa.27 ꞌEt Joseph daja hubulhni la hidaniꞌ, ꞌinkꞌez nyoo be neꞌulgoo-i cha hinilhꞌen Joseph butsꞌo tlꞌa yanla-i, ꞌet Jacob ooyughi ndo naꞌuja.28 ꞌEt Israel ꞌutni, “ꞌAwet sooꞌ hooja. Syeꞌ Joseph ꞌawhuz khuna, whuz toosya ꞌinkꞌez sih naoostꞌen datisah whutso.”

Jacob ꞌen Egypt yun kꞌut tsꞌun tizya

46 1 ꞌEt Israel ndai la yutꞌi-i tubulh tizya, Beersheba keyoh tsꞌe oozya ꞌinkꞌez oobá Isaac ooYakꞌusda (Elohim) tsꞌun khuna-i

dalhkꞌun. 2 ꞌEt Yakꞌusda (Elohim) ꞌen Israel ꞌulhdzis yunalhtsꞌet hainya ꞌinkꞌez

ꞌutni, “Jacob, Jacob” ni, ꞌet ꞌuyulhni, “Njan ꞌustꞌoh”.3 ꞌInkꞌez ꞌutni, “Yakꞌusda (El) ꞌustꞌoh, mbá ooYakꞌusda (Elohim).

ꞌAw wheniljut whe Egypt tsꞌe tonyaꞌ junih, nyun tube didoh-un ncha-un ꞌet nyutiselh.

103 Genesis 45 , 46

4 Egypt tsꞌe nyulh ꞌutisnelh ꞌinkꞌez ndo naꞌnyutislelh. ꞌInkꞌez ꞌalha Joseph ꞌen nyuna kꞌe dutalni.”

5 ꞌEt whe Jacob ꞌen Beersheba ꞌet dudinya, ꞌinkꞌez Israel whuyeꞌke ꞌen hube ꞌubá whuz hitilhti, bubuzkehyaz cha, ꞌinkꞌez buꞌatke cha, ꞌen ndi nulbas be buhanla, ꞌi Pharoaoh hubutsꞌotlꞌa yanla.6 ꞌInkꞌez khuna-i cha ꞌinkꞌez ndai la huyutꞌi-i cha, Canaan bugha ininkat-i, ꞌi tubulh Egypt tsꞌe whehandil, Jacob ꞌinkꞌez tsꞌu haindene bubulh.7 Ooyeꞌke ꞌinkꞌez ooyeꞌke ꞌon ꞌun ooyeꞌke, ootseꞌke ꞌinkꞌez buyeꞌke butseꞌke, tsꞌiyawh Egypt tsꞌe boozdla.

8 ꞌEt ndi Israel buzkeh bubooziꞌ: Jacob ooyeꞌke, ꞌinkꞌez Egypt tsꞌe whendilne,

Reuben ꞌen ꞌudetso ooyeꞌ, Jacob ooyeꞌ. 9 Reuben ooyeꞌke ꞌenne:

Hanoch, Pallu, Hezron ꞌinkꞌez Carmi. 10 Simeon ooyeꞌke ꞌenne:

Jemuel, Jamin, Ohad, Jachin, Zohar ꞌinkꞌez Shaul, Canaan whutꞌen-un tsꞌeke ooyeꞌ.

11 Levi ooyeꞌke ꞌenne:Gershon, Kohath ꞌinkꞌez Merari.

12 Judah ooyeꞌke ꞌenne:Er, Onan, Shelah, Perez ꞌinkꞌez Zerah (ꞌet hoontsꞌi Er ꞌinkꞌez

Onan bulh ꞌenne Canaan keyoh dahuzsai).Perez ooyeꞌke ꞌenne:

Hezron ꞌinkꞌez Hamul bulh. 13 Issachar ooyeꞌke ꞌenne:

Tola, Puvvah, Iob ꞌinkꞌez Shimron. 14 Zebulun ooyeꞌke ꞌenne:

Sered, Elon ꞌinkꞌez Jahleel.

Genesis 46 104

(46:1)

© 1996 David C. Cook

15 Ndunne Leah ooyeꞌke, ꞌenne Jacob ghu bulhtsi Paddan Aram tsꞌe. Ootseꞌ Dinah, ꞌen cha. Mbene la ooyeꞌke ꞌinkꞌez ootseꞌke cha tat whunizyai ꞌon ꞌat tane (33) hinli. 16 Gad ooyeꞌke ꞌenne:

Zipheon, Haggi, Shuni, Ezbon, Eri, Arodi ꞌinkꞌez Areli. 17 Asher ooyeꞌke ꞌenne:

Imnah, Ishvah, Ishvi, Beriah ꞌinkꞌez Serah bubulhtus.ꞌInkꞌez Beriah ooyeꞌke ꞌenne: Heber ꞌinkꞌez Malchiel.

18 Ndunne ꞌenne Zilpah ooyeꞌke:Laban, Leah dutseꞌ gha inilhti, ꞌen Jacob ghu bulhtsine

whunizyane ꞌon ꞌat lhkꞌutane (16) hinli. 19 Rachel ooyeꞌke, Jacob ooꞌat:

Joseph ꞌinkꞌez Benjamin. 20 ꞌEt Joseph ootsꞌun keyoh Egypt hooni, ꞌenne Manasseh ꞌinkꞌez

Ephraim. ꞌEnne Asenath Poti-Pherah whutseꞌ, keyoh On lubret, ꞌen buzkeh.

21 Benjamin buzkeh ꞌenne:Bela, Becher, Ashbel, Bera, Naaman, Ehi, Rosh, Muppin,

Huppim ꞌinkꞌez Ard. 22 Ndunne ꞌenne Rachel ooyeꞌke, ꞌalhgoh whunizyane ꞌon ꞌat dine

(14), ꞌen Jacob ghu bulhtsi. 23 Dan ooyeꞌ ꞌen Hushim huyulhni. 24 Naphtali ooyeꞌke ꞌenne:

Jahzeel, Guni, Jezer ꞌinkꞌez Shillem.25 Ndunne ꞌenne Bilhah ooyeꞌke, ꞌen Laban ootseꞌ, Rachel,

gha inilhti, ꞌen ndunne Jacob ghu bulhtsi lhtakꞌantꞌine hinli.26 ꞌEt Jacob yulh whendilne Egypt tsꞌe, tsꞌiyawh hitsꞌu hainde,

Jacob ooyeꞌke, buꞌatke, ꞌaw ꞌenne iloh, ꞌalhgoh lhkꞌu tat whunizyai ꞌon ꞌat lhkꞌutane (66) hinli.27 ꞌInkꞌez Joseph ooyeꞌke, Egypt ꞌenne nane hinli, Jacob bulh whusahandilne Egypt tsꞌe hoozdil whe lhtakꞌantꞌit whunizyane (70) hinli.

Jacob ꞌen yun kꞌut Goshen ꞌet nenina28 ꞌEt Judah ꞌen butso yutilhꞌaꞌ Joseph tsꞌun ntsꞌe la Goshen tsꞌe

whuzꞌai ꞌinkꞌez Goshen yun kꞌuz tsꞌe hoozdil.29 ꞌEt Joseph nyoo ye nuya-i, ꞌi lhaidinla, ꞌinkꞌez Goshen tsꞌe whenya, dubá Israel yudutizya ꞌinkꞌez yubut neninya. ꞌInkꞌez yutsꞌilchun kꞌet yukꞌiltsꞌut ꞌinkꞌez saꞌ whe ꞌet yutsꞌilchun kꞌet intse.

30 ꞌInkꞌez Israel, ꞌen Joseph ꞌuyulhni, “ꞌAwet whute daoosah-un sgha ooninꞌaih, nyunin ꞌusꞌen ꞌawhuz khina ꞌet huwa.”

105 Genesis 46

31 ꞌEt Joseph dulhutsinke ꞌinkꞌez dubá ooyoh dilhtsꞌine cha ꞌubulhni, “Toosyaꞌ ꞌinkꞌez Pharaoh dosniꞌ, njan dudoosniꞌ sih, ‘Sulhutsinke ꞌinkꞌez sbá ooyoh dilhtsꞌine cha, Canaan huwhutꞌine sgho nindil.32 ꞌInkꞌez dune ꞌenne ꞌusbai ghunline, whuz unꞌa khuna-i gha ꞌaihne hinli, ꞌinkꞌez dughunaꞌ cha tsꞌiyawh ndai la huyutꞌi-i cha tsꞌiyawh sahuyanla.’33 ꞌEt ꞌuhoneh Pharaoh nohka hizya ꞌinkꞌez ꞌutni de, ‘Dahoontꞌoh-un la huwahna?’34 ꞌEt ꞌudoohniꞌ, ‘Mba ꞌutꞌenne bube ꞌutꞌen dakꞌez whutsꞌun, khuna-i gha hana tsꞌoodunne tsinli whutsꞌun ꞌandit whutsꞌun, wheni cha ꞌinkꞌez netsodaꞌ nebáke ꞌenne cha.’ ꞌEt de sih ndi yun kꞌut Goshen yun kꞌut hoohtꞌeꞌ, ꞌusbai ghunline tsꞌiyawh ꞌilhoghun hinli whe Egypt whutꞌenne bubaꞌ huninzun ꞌet huwa.”

47 1 ꞌEt Joseph Pharaoh tsꞌu whenya ꞌinkꞌez ꞌuyulhni, “Sbá ꞌinkꞌez sulhutsinke, bughunaꞌ te ꞌinkꞌez tsꞌiyai huyutꞌi-i cha, Canaan tsꞌe

ha handil ꞌandit Goshen yun kꞌut ꞌuhintꞌoh.”2 ꞌInkꞌez kwulane dudulhutsinke ꞌenne butizdla ꞌinkꞌez Pharaoh ghu buninla.

3 ꞌEt Pharaoh bulhutsinke ꞌubulhni, “Ndet la huwahna?” ꞌEt ꞌuhuyulhni, “Mba ꞌutꞌenne, ꞌusbai ghunline tsinli, wheni cha ꞌinkꞌez nebákene cha.”

4 ꞌInkꞌez cha Pharaoh ꞌubulhni, “Ndi yun kꞌut tsꞌotitꞌelh ha whusatsꞌandil. Mba ꞌutꞌenne ꞌaw bughunaꞌ yooꞌalh-i hooloh Canaan yun kꞌut dai tube ꞌuja, ꞌet huwa mba ꞌutꞌenne Goshen yun kꞌut huhootꞌen-un ꞌet negha ooninꞌaih.”

5 ꞌEt Pharaoh, Joseph bulh yalhduk ꞌinkꞌez ꞌutni, “Mbá ꞌinkꞌez nyulhutsinke ngho nindil.6 Egypt yun kꞌut mbut whuzꞌai, mbá ꞌinkꞌez nyulhutsinke ꞌukꞌenus ndi yun unzoo-i Goshen yun kꞌut, ꞌet huwhutitꞌelh. ꞌEt ꞌenne butoh soo ꞌukꞌenus tsꞌihꞌun neꞌutꞌen-i ꞌinkꞌez ꞌuyoo unline, ꞌenne butoh hoonli de, ꞌenne ndi sghunaꞌ, tsꞌiyawh himoodih ooleꞌ.”

7 ꞌEt Joseph dubá Jacob sayalhti ꞌinkꞌez Pharaoh yubut neinilhti, ꞌinkꞌez Jacob Pharaoh soo hoonzoo-un ootsꞌun tizooꞌ yuba tenadidli. 8 Pharaoh Jacob yoodulhkut, “Dawhultsuk nye yus kꞌut?”

9 ꞌEt Jacob ꞌen Pharaoh ꞌuyulhni, “Sunawhudizut whe dzin whe lhususya, ꞌet 130 nawhudizut. ꞌAw whulai iloh ꞌinkꞌez hoontsiꞌ whe nawhudizut whudzin whe syustꞌe ꞌantꞌeꞌ. ꞌEt hoontsꞌi ꞌaw sbáke ndi yun kꞌut nuhuzdil-un ndoh whulhdzoh ꞌilhoh ꞌet khisnaꞌ.”10 ꞌEt Jacob, Pharaoh ꞌukꞌenus soo hoonzoo-un ubulh yalhduk ꞌinkꞌez yughu tenanja.

Genesis 46 , 47 106

11 ꞌInkꞌez Joseph, dubá ꞌinkꞌez dulhutsinke Egypt yun ooloh ꞌi bugha ininꞌai, soo ꞌukꞌenus hoonzoo-un, Rameses whuyun kꞌut ꞌet, Pharaoh daja yulhni la, whuz unꞌa.12 ꞌEt Joseph dubá ꞌinkꞌez dulhutsinke ꞌinkꞌez mbene la buyoh whutꞌine cha, lhes dawhultsuk huwa ꞌi bugha ininla.

Joseph dai cho whuzdliꞌ ꞌet hukwꞌun nuhulhyeꞌ13 ꞌEt ꞌaw njan yun kꞌut ꞌutꞌalh-i hooloh, tube dai be oonisjoot ꞌet huwa.

Egypt yun kꞌut cha ꞌinkꞌez Canaan yun kꞌut cha tube tehulꞌen ndi dai ꞌi gha.14 ꞌInkꞌez Joseph ndai la Egypt sooniya, tsꞌiyawh nayalhdzoo. Canaan yun kꞌut cha ndai la lhes ha nuyeh-i huyonket-i, ꞌinkꞌez ndi Joseph, Pharaoh ooyoh tsꞌe wheyanꞌai.15 ꞌEt Egypt yun kꞌut cha sooniya hooloh Canaan yun kꞌut cha sooniya hoolel. ꞌEt Egypt whutꞌenne tsꞌiyawh Joseph highu nindil ꞌinkꞌez ꞌuhutni, “Lhes negha ninꞌaih. Di ha ꞌet nyunalh yatsꞌitadlah? Sooniya gak suliꞌ ꞌet huwa.”

107 Genesis 47

(47:7) © 1996 David C. Cook

16 ꞌEt Joseph ꞌutni, “Nohghunaꞌ ꞌet nenuhle ꞌinkꞌez ꞌi kꞌelha sih ꞌutꞌalh-i nohgha ooslelh, sooniya hooloh suliꞌ de.”17 ꞌEt dughunaꞌ tsꞌiyawh Joseph highu hininla ꞌinkꞌez Joseph ꞌutꞌalh-i bugha ninla ndi yeztli khuna-i te, budonkey te, tsꞌiyawh, ꞌi kꞌelha lhes huyuꞌalh-i bugha ininla, ndi khuna-i tsꞌiyawh ꞌet nawhudizut whe.

18 ꞌEt nawhudizut whe ꞌon ꞌat yus kꞌut ꞌet ꞌuhuyulhni, “ꞌAw nemoodih nchꞌa nuznootꞌiꞌ aitꞌoh, nezooniya gak whuzdliꞌ. Ndai la khuna-i tsꞌutꞌi-i tsꞌiyawh nemoodih nyun za ꞌintꞌi suliꞌ, ꞌaw neyun kꞌut ꞌaw hoonli ngha tsꞌoolelh-i hooloh, neyustꞌe ꞌinkꞌez neyun bulh za ꞌet neninkat.19 ꞌEt di ha nenilhꞌen whe yatsꞌitadlah, wheni ꞌinkꞌez neyun bulh cha neoonket ꞌinkꞌez neyun cha oonket lhes kꞌelha. ꞌInkꞌez wheni ꞌinkꞌez neyun bulh ꞌet sih Pharaoh ba ꞌutꞌenne tsꞌooleꞌ. ꞌAtsꞌuntilelh-i negha ninle, ꞌet de la tsꞌukhoonaꞌ ꞌinkꞌez yalhitsꞌosdla, ꞌet de ndi yun ꞌaw gak uztisle.”

20 ꞌEt Joseph Egypt whuyun tsꞌiyawh ndulcho whe Pharaoh ba yonket. Egypt whutꞌenne dune ndai la yun huyutꞌi, tsꞌiyawh huye ꞌonket tubeh dai be oonujut huba suliꞌ. ꞌEt huwa ꞌet ndi yun tsꞌiyawh Pharaoh oochꞌeꞌ suliꞌ.21 ꞌEt nyoonne dune ꞌenne tsꞌiyawh keyoh whuti tsꞌe nebuninla, Egypt keyoh nduwhulcho whe.22 Mbene la lubret unline, ꞌenne buyun ꞌi za ꞌaw lhuyookulh. Pharaoh ꞌudaꞌ butlꞌaꞌ dantsut, ꞌet huwa nyoo butlꞌa idantsut-i, ꞌi huyuꞌalh, ꞌet huwa duyun ꞌaw huye lheꞌookulh.

23 ꞌEt Joseph dune ꞌubulhni, “Nohyun tsꞌiyawh osket. ꞌAndit dzin Pharaoh ba whunulhꞌen ndi ꞌa ntilelh-i nohba hooni, ꞌi sih yun kꞌut ꞌanoolelh.24 ꞌEt de si haꞌ nule de (⅕) ndai la ꞌa nihla-i, ꞌi Pharaoh oogha yohlelh. (⅘) ꞌi nohchꞌeꞌ tileh, ꞌantilelh wheni ꞌinkꞌez tihꞌulh-i wheni cha, mbene la nohyoh whutꞌine ꞌinkꞌez nohuzkehkeyaz ba cha.”

25 ꞌEt ꞌuhutni, “Be tsꞌukhuna-i silhyih. Nemoodih ba soo tsꞌinzoo tsꞌooleꞌ ꞌinkꞌez ba ꞌutꞌenne tsꞌooleꞌ.”

26 ꞌInkꞌez Joseph ꞌi khuni yulhtsi, Egypt yun kꞌut wheni ꞌandit dzin whutsꞌun Pharaoh ꞌen (⅕) ꞌi oochꞌeꞌ yutaleh, lubretne buyun ꞌi ooyit, ꞌi ꞌaw Pharaoh oochꞌeꞌ lhilelh.

Joseph ꞌen Jacob tsꞌun tsꞌihꞌun nahizya27 ꞌEt Israel, Egypt yun kꞌut ꞌet hitꞌeꞌ, keyoh Goshen huwhutni-un ꞌet

hootꞌeꞌ, lhai huyutꞌi-i ꞌutꞌi suliꞌ.28 ꞌInkꞌez Jacob Egypt yun kꞌut ꞌet whutꞌi, whunizyai ꞌon ꞌat

lhtakꞌantꞌit (17) yus kꞌut. Jacob ndi yun kꞌut indaꞌ, ꞌet 147 yus kꞌut ꞌet hootꞌeꞌ.

Genesis 47 108

29 ꞌEt ꞌawet Israel datitsah whenghoh neooninzut, duyeꞌ Joseph ꞌanih yudaniꞌ ꞌinkꞌez ꞌuyulhni, “ꞌAlhaꞌ mba ꞌuszoo nahoonꞌai de, nla swuz tꞌoh nedilnih ꞌinkꞌez soo cho neꞌsolhꞌen, ꞌaw Egypt ꞌet ꞌasolhtelh junih.30 ꞌAntsꞌi sbáke ꞌenne bubulh oostꞌeꞌ. Egypt whuchꞌa nasolhtelh ꞌinkꞌez la ꞌahudinla-un ꞌet ꞌasoltelh.” ꞌEt ꞌuyulhni, “Daja dini-un ꞌet si ndosneh.”

31 ꞌInkꞌez ꞌutni, “Stsꞌu nahinyeh.” ꞌInkꞌez yutsꞌu nahizya. ꞌEt Israel tse nilhꞌal-un hukwꞌut ꞌet yo nenintꞌai.

Jacob ꞌen Joseph ooyeꞌke, soo hoonzoo-un butsꞌun tizooꞌ

48 1 ꞌEt hukwꞌelhꞌaz njan duhooja whe Joseph ꞌuhuyulhni, “Mbá nduda,” ꞌinkꞌez duyeꞌke nane Manasseh ꞌinkꞌez Ephraim

ꞌenne hubilhchoot.2 ꞌInkꞌez Jacob huyulhni, “Whunilhꞌen nyeꞌ Joseph ntsꞌun tizya.” ꞌInkꞌez Israel do ꞌuja ꞌinkꞌez lili kꞌut ndo netlꞌa dindaꞌ.

3 ꞌEt Jacob, Joseph ꞌuyulhni, “Yakꞌusda ꞌUkꞌenus ꞌUltus-un ꞌustꞌoh (El Shaddai) snalhtsꞌet hainya Canaan whuyun kꞌut Luz whe ꞌinkꞌez soo hoonzoo-un stsꞌun tizooꞌ.4 ꞌInkꞌez ꞌusulhni, ‘Whunilhꞌen lhane ntsꞌu ha tidoh dune lhane whe ntsꞌu ha hutidoh, ꞌinkꞌez ndi yun ꞌi ntsꞌu haindene nkꞌelhꞌaz de ꞌilhiz wheni bugha itasꞌalh.’

5 ꞌAndit ꞌet nane nyeꞌke Ephraim ꞌinkꞌez Manesseh, Egypt ꞌet nyuzkeh huzdliꞌ, nghu tisyalh whutso ꞌenne schꞌeꞌ ꞌuhintꞌoh. Reuben ꞌinkꞌez Simeon bulh bukꞌunꞌa schꞌeꞌ hutileh.6 Nyuzkeh njan hukwꞌelhꞌaz nyuzkeh hutilehne, ꞌenne ndunne dudulhutsin be nabootanzi, ndai la buchꞌeꞌ yutaleh-i ꞌinka.7 ꞌEt si keyoh Padden tsꞌe hasya, Rachel szih ꞌet Canaan yun kꞌut dazsai, tsꞌidulh whe keyoh Ephrath ꞌawet nilhduk suliꞌ whe ꞌet, ꞌinkꞌez Ephrath tsꞌu ti (Bethlehem tsꞌuwhutni-un) ꞌet ꞌasti.”

8 ꞌEt Israel, Joseph ooyeꞌke bunilhꞌen ꞌinkꞌez ꞌutni, “Ndunne ꞌenne mbene wheꞌ hintꞌoh?”

9 ꞌInkꞌez Joseph dubá ꞌulhni, “Syeꞌke ꞌuhintꞌoh. Njan yun kꞌut Yakꞌusda (Elohim) sgha bunilhtine.” ꞌInkꞌez ꞌutni, “Deꞌ ndiz stsꞌu bilhtelh ꞌinkꞌez si soo hoonzoo-un butsꞌun tiszooꞌ.”

10 ꞌInkꞌez Israel oona ꞌawet njan be tetsun suliꞌ tube hoonyan ꞌet huwa ꞌaw soo cho lhubisꞌen. ꞌEt Joseph hizih nebunilhti ꞌinkꞌez nabuditsꞌooz ꞌinkꞌez bubontun.

11 ꞌInkꞌez Israel, Joseph ꞌulhni, “ꞌAw nyunin ntisꞌelh ꞌaw huwu ni lhnuzuszut, ꞌet hoontsꞌi ꞌalha Yakꞌusda (Elohim) nyuzkeh bubusunilhtan.”

109 Genesis 47 , 48

12 ꞌEt Joseph dugwut zih uzyin whuz de habalhti ꞌinkꞌez soo yun tsꞌe nenintꞌai yubut nachaninti.13 ꞌInkꞌez Joseph nahultꞌoh hubilhchoot, Ephraim ꞌen nailhnih tsꞌunkꞌus yilhchoot, Israel ꞌintlꞌus tsꞌe oola tsꞌun ꞌinkꞌez Manesseh ꞌen ꞌintlꞌus tsꞌe dula be Israel nailhnih tsꞌunkꞌus hubilhchoot ꞌinkꞌez hizih nebunilhti.14 ꞌInkꞌez Israel dula nailhnih be Ephraim ootsi kꞌut nedilni, ꞌen ꞌudekꞌoh-un ꞌuntꞌoh, ꞌinkꞌez ꞌintlꞌus tsꞌe ꞌet Manesseh ootsi kꞌut ꞌet nedilni, ꞌinkꞌez yukꞌunudulnih-un Manesseh ꞌen ꞌudetso-un whuzdli.

15 ꞌInkꞌez Joseph soo hoonzoo-un be ubulh yalhduk ꞌinkꞌez ꞌutni,“Yakꞌusda (Elohim) mbe la sbáke Abraham ꞌinkꞌez Isaac bulh hitso

nusuꞌazne,Yakꞌusda (Elohim) mbe la ꞌandit dzin whutsꞌun yinka susda

nduwhulhyiz whe sgha ꞌanꞌaih, 16 Ndun Lizas mbe la hoontsiꞌ-un whuchꞌa nasonket-un,

ꞌen ndunne duneyaz soo hoonzoo-i be za tlꞌa ookat.Ndai sooziꞌ ꞌi be bubohozi,ꞌinkꞌez sbáke Abraham ꞌinkꞌez Isaac bubooziꞌ be cha,ꞌinkꞌez soo ndi yun kꞌut ꞌet lhane cho hooleꞌ.”

17 ꞌEt Joseph dubá nailhnih tsꞌunkꞌus ꞌet Ephraim kꞌe dilni ꞌet whunilhꞌen, ꞌet whutsꞌu dutni ꞌinkꞌez dubá oola yilhchoot Ephraim ootsi kꞌudilhni whe ꞌinkꞌez Manesseh ootsi kꞌe dilhni.18 ꞌInkꞌez Joseph dubá ꞌulhni, “ꞌAwundooh sbá, ndun ꞌen ꞌudetso-un whuzdli whe ꞌuntꞌoh, nailhnih tsꞌunkꞌus ꞌet ootsi kꞌe dilni.”

19 ꞌEt hoontsꞌi oobá hukwa lheꞌnizun ꞌinkꞌez ꞌutni, “Tꞌeoonuszun syeꞌ, tꞌeoonuszun ꞌen cha ndi yun kꞌut dune tileh ꞌinkꞌez ncha tileh. ꞌEt hoontsꞌi ndun ookꞌoh-un, ꞌen yanus ꞌulcho tileh ꞌinkꞌez soo keyoh whudizbun whe yutsꞌu ha yandene hutileh.”20 ꞌEt nahultꞌoh soo hoonzoo-un be ubulh yalhduk whe ꞌutni,

“Nohni nohbá Israel soo hoonzoo-un be nohbulh yalhduk ꞌinkꞌez ꞌudutinelh,

‘Yakꞌusda (Elohim), Ephraim ꞌinkꞌez Manesseh bukꞌunꞌa oohtꞌeꞌ’.”

ꞌEt whuz unꞌa Ephraim ꞌen Manesseh tso nenilhti.21 ꞌEt Israel, Joseph ꞌuyulhni, “Whunilhꞌen ꞌawet dassah whe ꞌustꞌoh,

ꞌet hoontsꞌi Yakꞌusda (Elohim) nyulh ꞌutitꞌelh mbáke bukeyoh tsꞌe whuz nanyutilhtelh.22 ꞌOn ꞌun cha ndai la nyulhutsinke bugha inusla-i, yun ꞌilhoh ꞌultsuk ꞌi be nyun ngha nusla. ꞌI Amor whutꞌenne ooghu yuschoot inleꞌ, saluzti be ꞌinkꞌez skꞌaza be.”

Genesis 48 110

Jacob ooyeꞌke bubulh dawhutanelh budaniꞌ

49 1 ꞌInkꞌez Jacob duyeꞌke bukaꞌ dani ꞌinkꞌez ꞌutni, “ꞌIlhoozahdilh ꞌet de sih nohbulh dawhutanelh la ꞌudekꞌez dzin nohudutasnelh.

2 ꞌIlhozahdilh ꞌinkꞌez oozulhtsꞌai Jacob ooyeꞌkeꞌinkꞌez nohbá Israel oozulhtsꞌai.

3 Reuben nyun ꞌudetso syeꞌ whuzdli-un inli.Ndai la be ꞌustus-i ꞌinkꞌez ꞌudechoo be ꞌustus suliꞌ-i,ndai la ꞌilhoh tuneꞌ zustꞌen-un ꞌinkꞌez dalcho-i be be ꞌustus-i cha.

4 Too nudutunne ootꞌa niuznootan aitꞌoh.ꞌAw hoonzoo lhotuzanꞌel mbá oolili kꞌut ꞌet inteꞌꞌinkꞌez whudutsun whuzilhtsi.Ndai la ookꞌosteꞌ-i ꞌi ookwꞌut inteꞌ ꞌet huwa.

5 Simeon ꞌinkꞌez Levi bulh lhulhutsinke hudli.Be dzoh neꞌudzut-i bubulh ꞌuntꞌoh,ndet la huwhutꞌi-un.

6 ꞌAw szul buzih neooyaꞌ junih.Be dastiꞌ-i, ndet la huwhutꞌi-un bubulh ꞌuyotꞌeꞌ junih.Huhunilchꞌe whe dune huzilhghi ꞌet huwa,ꞌinkꞌez kꞌuneꞌ hutꞌen whe musdoos dune kechun dugha hininguz.

7 Bube huske-i ookwꞌehoodeh,tube be oonujut ꞌet huwa.Huye huske-i tube ookwꞌehunduda.Jacob ꞌet lhkꞌe butistelh ꞌinkꞌez Israel ꞌet lhelhdun nebutastelh.

8 Judah nyun ꞌutantꞌelh,nyulhutsinke nyuhudutalhtiꞌ.Nla ꞌi mbene la nchꞌaz ditnine bukꞌudutalni,mbá buzkeh ꞌenne mbut yo ꞌuhuntitsulh.

9 Judah ꞌi khuna-iti lion huyulhni,ꞌi ooyaz ꞌuntꞌoh.

Ndai la ꞌinghan-i syeꞌ,ꞌi bulh ndo ꞌinja.Yo untutꞌaih ꞌinkꞌez khuna-iti lion huyulhni,ꞌi kꞌunꞌa ꞌusti ꞌinkꞌez khuna-iti lion unli de,mbe suba hinolhchꞌeh?

10 Ndai la lerwene tuz nuhidutun-i,ꞌi Judah yuyit lheꞌtistꞌel.

ꞌInkꞌez keyoh huwu ni ookꞌuneꞌ whutꞌen-i, ꞌi ꞌaw ooke eguz whuchꞌa naoodzit aitꞌoh,

Shiloh whusainya ꞌet whutsꞌun.

111 Genesis 49

ꞌInkꞌez dunene ꞌen bukꞌoh tsꞌe hikꞌuneꞌ ootꞌen ha. 11 Oodonkey ꞌi nyoo duchun nudunulhye ꞌidutaguz,

ꞌinkꞌez donkey ooyaz ꞌi duchun nudunulhye ꞌi soo ꞌukꞌenus unzoo yuzih neitalhtelh.

Dunaih ꞌi tsꞌekoo tooꞌ be tunayuzguz,ꞌinkꞌez dunaih ꞌi mai tsꞌekoo tooꞌ huyilh-i,i ootooꞌ ꞌi be tunayuzguz.

12 Oona ꞌi tsꞌekoo tooꞌ anus dunulhgus,ꞌinkꞌez ooghoo lilet anus ꞌulhyul

13 Zebulun ꞌen yatoo ba hoonzoo-un ꞌet whutitꞌelh.Ndai la tsꞌi yanakuk-i,ꞌi ba, ꞌinkꞌez keyoh Sidon ꞌet whuzih whutitꞌelh.

14 Issachar ꞌen donkey ulhtus-i ꞌuntꞌoh.Ndai ndaz-i yeguz nanki, ꞌi ꞌet titꞌelh.

15 Natsꞌulyiz-un hoonzoo-un ꞌet honꞌenꞌinkꞌez yun kꞌut hoonzoo ꞌutighelh wheni yo ꞌutinelh.ꞌInkꞌez ꞌulhna didohne huzdliꞌ.

16 Dan ꞌen duduneꞌne buba nahutiyeh.Israel ꞌilhoh didohne ootsꞌu haindene ꞌenne ꞌuhintꞌoh.

17 Dan ꞌen ti whuzih tlꞌughus, viper, tileh.Tlꞌughus ꞌoolchꞌoolh-i ti whuzih,ꞌinkꞌez yeztli kꞌentsꞌul cha oolhchꞌoolh.

ꞌInkꞌez mbe la yukusda-un ꞌen kꞌoh unꞌa yukꞌudutildus. 18 O Moodihti (Yahweh) ndet la whesutalhyih-un hubasꞌeꞌ! 19 Gad ꞌen lhuganne didohne ꞌenne hikꞌut nutidulh,

ꞌet hoontsꞌi ꞌudekꞌoh ꞌet whuchꞌaꞌ tilhdoh. 20 Asher ꞌutꞌalh-i ootsꞌu ha yultsꞌuk-i,

ꞌi tube dutatiꞌ, ꞌinkꞌez nzoo-i ootsꞌu ha tikulh. 21 Naphtali ꞌen yeztsꞌe oolazditni-i leꞌ ꞌuntꞌoh,

khuni nzoo-i za huwaꞌaih. 22 Joseph ꞌen duchun zooschum cho ootsꞌa ha ꞌukat-i unli.

Too kꞌet whuzih ꞌet ootsꞌa hakat-i ꞌuzooschum unli.ꞌInkꞌez be ꞌuzooschum nyo sih hukwꞌut ndulcho whe hoonli.

23 Mbene la kꞌaza be lhuganne tube hidzi undalhdaꞌ.Nuhinulhtso ꞌinkꞌez hutsꞌuditni.

24 ꞌEt hoontsꞌi ookꞌaza ulhtus-un ꞌet za ꞌuntꞌoh inleꞌ.ꞌInkꞌez oogan ꞌi cha ꞌonus oonutꞌi lhtus suliꞌ.

Jacob ooYakꞌusda (Elohim) be oonujut-un ulhtus-un,oola ꞌi be ꞌuntꞌoh (ꞌen ꞌUsbai Ghunli-un unli, Israel Whutseꞌ ꞌuntꞌoh).

Genesis 49 112

k 49:25 Ndi booziꞌ El, ꞌi “Yakꞌusda ꞌEn Tsꞌiyai-i Anus Ulhtus-un ꞌUntꞌoh,” ni whe ꞌutni. Sizi Gri ꞌen cha tsꞌiyai-i anus ulhtus-un ꞌuntꞌoh. Whuz unꞌa Sizi Gri dantꞌoh unli. Rev 1:8 ꞌEt whe neMoodihti Sizi Gri njan ndutni, “Si ꞌustꞌoh Alpha ꞌinkꞌez Omega ꞌusli. ꞌUdechoo wheꞌ whuditꞌen-un ꞌinkꞌez ꞌetsul ꞌuwhutánelh-un, ꞌen ꞌustꞌoh. Mbe ꞌusli ꞌinkꞌez ꞌistꞌeꞌ-un, ꞌinkꞌez whusatíyalh-un ꞌustꞌoh, ꞌinkꞌez tsꞌiyai-i anus ulhtus-un, ꞌen ꞌustꞌoh.” Mt 3:11; Rev 4:8; 11:17; 16:5-7.

25 Mbá ooYakꞌusda (El), k ꞌen nlaꞌutinelh.ꞌInkꞌez ꞌUkꞌenus ꞌUltus-un (EL Shaddai),ꞌen soo hoonzoo-i za ntlꞌa ookat.

Yakꞌuz tsꞌe hakat-i, ꞌi be mba soo hoonzoo-i ntlꞌa ookat.Yatoo tꞌah tsꞌe hoonli ꞌi be cha mba soo hoonzoo-i whutaleh.

Tsꞌekoo butsꞌooꞌ tsꞌoodunne huye ꞌulhtuk-i beꞌinkꞌez tsꞌekoo buchan cha mba soo hoonzoo-i ntlꞌa ookat whutaleh.

26 Mbá soo hoonzoo-i nohtlꞌa ookat,ꞌi stsodaꞌne ꞌonus soo hoonzoo-i za butlꞌa yiltsꞌut,whanus unzoo suliꞌ.

Ndo yakꞌuz ꞌilhiz wheni nodistꞌai-un soo ꞌukꞌenus nilhdzaꞌ-un ꞌet whutsꞌun,ꞌi Joseph ootsi kꞌut ꞌutitꞌelh ꞌinkꞌez ootsitꞌah hukwꞌut,ꞌi bulhutsinke anus ꞌutitꞌelh.

27 Benjamin ꞌen yus tube ooyeꞌiltsꞌul-i unli,bundadaꞌ ꞌet si yuzilhghi-i yooꞌalh,ꞌinkꞌez ꞌulhdzis ꞌet ndai la yughan-i,oogha yunkat-i lhkꞌe yulih.”

28 Ndunne ꞌenne tsꞌiyawh Israel tsꞌu haindene whunizyane ꞌon ꞌat nane didohne, ꞌet ndi khuni ꞌi be buba hubulh yailhduk ꞌinkꞌez soo hoonzoo-i butsꞌun tizooꞌ, ꞌilhoghun hinli whe ntsꞌenꞌa la didutchꞌoh soo hoonzoo-i be ubulh yalhduk.

Jacob dazsai ꞌinkꞌez ꞌahuyalhti29 ꞌEt ꞌinkꞌez ꞌubulhni, “ꞌAwet sulh duneꞌne, ubulh ꞌistꞌeꞌne ꞌenne

ꞌawet butsꞌun tisyalh. Ndet la tseꞌan Ephron yun kꞌut ꞌi Hitt whutꞌen-un ꞌuntꞌoh, ꞌen ootseꞌan ꞌet sbákene bubulh ꞌasoolhtelh,30 tseꞌan ꞌet Machpelah yun kꞌut ꞌet ꞌuhoontꞌoh, Mamre whutso Canaan yun kꞌut ꞌi Abraham, Ephron, Hitt whutꞌen-un unli-un, ꞌen ooyun, tsꞌun kꞌut wheni ꞌet honket.31 ꞌEt Abraham ꞌinkꞌez Sarah ooꞌat bulh cha ꞌabuhalhti, ꞌet Isaac ꞌinkꞌez ooꞌat Rebekah bulh cha ꞌabuhalhti, ꞌinkꞌez si cha ꞌet Leah ꞌasti.

113 Genesis 49

32 Ndai la yun ꞌinkꞌez tseꞌan ookꞌu whuzꞌai-i, ꞌi Heth ooyeꞌkene tsꞌun huyonket.”

33 ꞌInkꞌez Jacob ꞌawet buzkeh hubulh yalhduk-un ꞌetsul ꞌudija whe, lili kꞌe nadilꞌez ꞌinkꞌez ꞌudekꞌez ha najiz. ꞌInkꞌez whutsodaꞌ oonatneke bubulh ꞌuntꞌohne ꞌenne butsꞌun whenya.

50 1 ꞌEt Joseph dubá yunin kꞌe chaniti ꞌinkꞌez yukꞌut intse ꞌinkꞌez naiditsꞌooz.

2 ꞌInkꞌez Joseph yuba ꞌutꞌenne, yoo be duyunne, ꞌenne dubá oozi lhahidooleh hubulhni. ꞌEt yoo be duyunne, ꞌenne Israel oozi yesaꞌ sooꞌ titꞌelh-i, ꞌi be highaizna.3 Dit whunizyat dzin (40) ꞌet whuz unꞌa hubaꞌ hoontꞌoh tsꞌet ubuhulhti, ꞌinkꞌez bukꞌe nihunudleh. Whuz unꞌa buzih lhadulyanne, ꞌinkꞌez Egypt whutꞌenne, ꞌenne lhtakꞌantꞌit whunizyat dzin (70) ꞌet hikꞌe nudleh whe inleꞌ.

4 ꞌEt ꞌawet ndi dzin lhaoodinla ꞌet Joseph, Pharaoh ooyoh whutꞌine hubulhni, “ꞌAndit nohna soo tsꞌihꞌun sulh newhunaꞌai de, ꞌet Pharaoh soo nehoozulhtsꞌai, ꞌen dudoohniꞌ,5 ‘ꞌUbá ootsꞌun nahizusya whe njan dudusni, “Whunilhꞌen ꞌawet datisah. Ndet la stsꞌun kꞌut, Canaan yun kꞌut ꞌuwhusla-un ꞌet ꞌasolhtelh,” sulhni. ꞌEt huwa sla dinih, ꞌubá ꞌatistelh ꞌinkꞌez la whusanaoosja.’ ”

6 ꞌInkꞌez Pharaoh ꞌutni, “Whuz inyalh ꞌinkꞌez mbá ꞌailhtih, khuni daja dini la ootsꞌu nahizinya-i kꞌunꞌa.”

7 ꞌEt Joseph whuz dubá whenayalhti ꞌaitilhtelh ha, mbene la Pharaoh yuba ꞌutꞌenne cha tsꞌiyawh hiyulh whendil. Ooyoh ꞌudetso whudilhdzulhne, ꞌenne cha ꞌinkꞌez Egypt yun kꞌut ꞌudetso whudilhdzulhne, ꞌenne cha hiyulh whendil.8 Joseph ooyoh whutꞌine, bulhutsinke ꞌinkꞌez oobá ooyoh dilhtsꞌine cha tsꞌiyawh hiyulh whendil. Tsꞌoodunne ꞌinkꞌez bughunaꞌ cha, musdoos cha, ꞌinkꞌez tsꞌiyawh nyo Goshen whuyun kꞌut ꞌet neboninla.9 ꞌEt yeztli ꞌinkꞌez nyowhi huye nudilh-i huye ꞌuzdla-i cha tubeh lhane dune ꞌilhozdil.

10 ꞌEt nyo Atad oochꞌeꞌ lhes maiꞌ dunuldus-un, ꞌet nehunindil, Jordan whanooꞌ ꞌuhoontꞌoh, ꞌinkꞌez soo tube ꞌet hikꞌe niudle. ꞌEt Joseph ꞌen lhtakꞌantꞌit dzin ꞌet dubá yukꞌe nudleh whe inleꞌ.11 ꞌEt nyo Canaan whutꞌenne dune nyo lhes maiꞌ dunuldus-un ꞌet hikꞌe nudleh whunilhꞌen, ꞌet huwhuhunilhꞌen ꞌinkꞌez ꞌuhutni, “Njan ꞌet tube Egypt whutꞌenne hukwꞌe hunduda whe hikꞌe nudleh.” ꞌEt huwa ooboozih Abel Mizraim, Jordan whanooꞌ whuzꞌaih ꞌi hooziꞌ huyulhtsi.

12 ꞌEt duyeꞌke daja hubulhni la, whuz unꞌa ꞌuhuyinla.

Genesis 49 , 50 114

13 Ooyeꞌke Canaan keyoh tsꞌe nahuyoolhti ꞌinkꞌez nyo Machpelah yun ꞌet tseꞌan ꞌet ꞌahayalhti, Mamre whutso ꞌet Abraham nyoo yun Ephron, Hitt whutꞌen-un, ꞌen tsꞌun yonket tsꞌun kꞌut wheni.14 ꞌEt Joseph dubá ꞌayalhti whe ꞌet Egypt tsꞌu naoosja, bulhutsinke cha, yulh nusudilne ꞌenne cha tsꞌiyawh whuz nahoosdil.

Joseph bulhutsinke soo naꞌbudutni15 ꞌEt Joseph bulhutsinke bubá ꞌawet dazsai ꞌet ꞌuhutni,

“Joseph netsꞌu dootni tilah, datsꞌinla la hoontsꞌi hukwꞌunꞌa ꞌutsꞌinla ꞌet tilah neba kꞌelha hoolhtselh.”16 ꞌEt Joseph hitsꞌo tlꞌa khuni inꞌai ꞌuhuyulhni, “Mbá datitsah whutso njan ndutni,17 ‘ꞌEt Joseph dohniꞌ, “Ntsꞌu tezdudlih, nyulhutsinke buba whunahodolnoh ꞌinkꞌez whe nintaꞌ huntꞌen cha tube hoontsꞌi kꞌunꞌa ꞌunyuhinla, ꞌet huwa mbá ooYakꞌusda (Elohim) ba ꞌutꞌenne, ꞌenne buba whunahoodolnoh.” ’ ” ꞌInkꞌez Joseph intse hiyulh yailhduk whe.

18 ꞌEt bulhutsinke ꞌenne cha hinin tsꞌe ꞌet hibut nahankat ꞌinkꞌez ꞌuhutni, “Whunilhꞌen mba ꞌutꞌenne tsinli.”

19 Joseph ꞌubulhni, “Whenulhjut iloh. Yakꞌusda (Elohim) ꞌen la ookꞌedusda wheꞌ duhni?20 ꞌEt nohni tube hoontsiꞌ hukwꞌunꞌa ꞌusutilelh kꞌunꞌa ꞌusuhla, ꞌet hoontsꞌi Yakꞌusda (Elohim) ꞌen ooba hoonzoo hukwꞌunꞌa ꞌuhoonla, ꞌandit dzin wheni dune lhane hubutisyih ha.21 ꞌEt huwa whenulhjut iloh, nohuzkehyaz cha nohni cha tsꞌiyai be lhanohdutisleh.” ꞌInkꞌez kꞌe naꞌbuninꞌa ꞌinkꞌez soo cho khuni nzoo-i be bubulh yailhduk.

Joseph dazsai22 ꞌEt Joseph Egypt yun kꞌut ꞌet hootꞌeꞌ, dichꞌoh cha ꞌinkꞌez oobá

ooyoh whutꞌine inleꞌne, ꞌenne cha ꞌinkꞌez Joseph whunizyat whunizyai ꞌon ꞌat whunizyai (110) yus kꞌut ꞌet khana.23 Joseph ꞌet Ephraim buzkeh tawh whudidoh whutsꞌun bunalhꞌen, Machir buzkeh Manasseh ooyeꞌ, ꞌenne cha Joseph oogwꞌut kꞌut ꞌet hunizyai.

24 ꞌInkꞌez Joseph dulhutsinke ꞌubulhni, “ꞌAwet datisah, ꞌet hoontsꞌi Yakꞌusda (Elohim) ꞌalha nohtsꞌun nutiyalh ꞌinkꞌez ndi yun chꞌa nanohtalelh, ꞌinkꞌez Abraham, Isaac ꞌinkꞌez Jacob cha yun butsꞌi yooziꞌ-i, whuz nanohtilelh.”25 ꞌEt Joseph, Israel buzkeh hitsꞌu nahizya ꞌet ꞌubulhni, “ꞌAlhaꞌ Yakꞌusda (Elohim) nohtsꞌun nutiyalh ꞌinkꞌez ustsꞌun ꞌi njan whuchꞌa naoolelh.”

26 ꞌEt Joseph dazsai, 110 be yus kꞌut ꞌinkꞌez hizi saꞌ sooꞌ titꞌelh huba lhahidinla ꞌinkꞌez Egypt ꞌet chunkelh ꞌet hitalhtelh ha.

115 Genesis 50

116

Njan Yakꞌusda Ooghuni ꞌUdechoo Khuni Neba Lhaídinla-i, ꞌi Hebrew whutꞌenne bughuni kꞌunꞌa, ꞌi be ꞌukꞌunéyuzguz. Yakꞌusda booziꞌ Hebrew bughuni kꞌunꞌa, ꞌi be lhelhtsꞌun unꞌa booziꞌ hooni be ꞌuntꞌoh. ꞌI be whunenulhtun Yakꞌusda dantꞌoh unli.ꞌEt njan ndi ꞌudustlꞌus Genesis Be ꞌUdustlꞌus, ꞌet Yakꞌusda booziꞌ

ꞌukꞌeyánguz, ꞌi ꞌuntꞌoh: Adonai, El, El Elohe-Yisrael El Elyon, El Olam, El Roi, El Shaddai, Elohim, Yahweh, ꞌinkꞌez Yahweh Yireh.

Adonai

Ndi booziꞌ Adonai ꞌi “Moodih ꞌEn neKꞌuneꞌulꞌen-un ꞌuntꞌoh,” ni whe ꞌutni. Gn 15:2; 18:3.

El

Ndi booziꞌ El, ꞌi “Yakꞌusda ꞌEn Tsꞌiyai-i ꞌUkꞌenus Ulhtus-un,” ni whe ꞌutni. Gn 6:6; 7:1; 14:18; 20:13; 31:13; 35:1; 46:3; 49:25.

El Elohe-Yisrael

Ndi booziꞌ, El Elohe-Yisrael, ꞌi “Yakꞌusda ꞌEn Israel Whutꞌenne BuYakꞌusda Ulhtus-un ꞌUntꞌoh,” ni whe ꞌutni. Gn 33:20.

El Elyon

Ndi booziꞌ El Elyon, ꞌi “Yakꞌusda Soo ꞌUkꞌenus Dizti-un Unli,” ni whe ꞌutni. Gn 14:18,19,20.

El Olam

Ndi booziꞌ El Olam ꞌi “ꞌIlhiz Wheni Yakꞌusda Unli,” ni whe ꞌutni. Gn 21:33.

El Roi

Ndi booziꞌ El Roi ꞌi “Yakꞌusda ꞌEn Whunilhꞌen,” ni whe ꞌutni. Gn 16:13.

Yakꞌusda Oobooziꞌ Hebrew Bughuni Kꞌunꞌa

El Shaddai

Ndi booziꞌ El Shaddai, ꞌi “Yakꞌusda ꞌEn ꞌUkꞌenus ꞌUltus-un Unli,” ni whe ꞌutni. Gn 17:1; 28:3; 35:11; 43:14; 48:3.

Elohim

Ndi booziꞌ Elohim, ꞌi whunenulhtun “Yakꞌusda ꞌEn ꞌAw ꞌIlhoghun Za Unli lhíloh, ꞌet hoontsꞌi ꞌen ꞌilhoghun unli whe ꞌuntꞌoh.” ꞌEt whuz unꞌa ndi booziꞌ ni whe ꞌutni. Gn 1:2; 2:2; 3:1; 4:25; 5:1; 6:2; 7:9; 8:1; 9:1; 17:3; 19:29; 20:3; 21:2; 22:1; 23:6; 24:3; 25:11; 26:24; 27:20; 28:4; 30:2; 31:5; 32:1; 33:5; 35:1; 39:9; 40:8; 41:16; 42:18; 43:23; 44:16; 45:5; 46:1; 48:9; 50:17.

Yahweh

Ndi booziꞌ Yahweh, ꞌi “Mbe Usli, ꞌEn ꞌUstꞌoh,” ni whe ꞌutni. Gn 2:4; 3:1; 4:1; 5:29; 6:3; 7:1; 8:20; 9:26; 10:9; 11:5; 12:1; 13:4; 14:22; 15:1; 16:2; 17:1; 18:1; 19:13; 20:18; 21:1; 22:14; 24:1; 25:21; 26:2; 27:7; 28:13; 29:31; 30:24; 31:3; 32:9; 38:7; 39:2; 49:18.

Yahweh Yireh

Ndi booziꞌ Yahweh Yireh ꞌi “Moodihti ꞌEn Haootiꞌalh,” ni whe ꞌutni. Gn 22:14.

117

Documents

· 2019. 10. 28. · 1 1 1 Soo ꞌudechoo wheꞌ whuditꞌen whe Yakꞌusda (Elohim) a ndi yun ꞌinkꞌez yakꞌuz ꞌet ꞌuhóonla. 2 Yun, ba ndo hoonli lhiloh ꞌinkez aw ookut