Plenchi
Bèl a bati TRINGG TRINGGG bèlèm........ TRINGG TRINGGG bèlèm........
Subi nos plenchi di positivismo. Bin tuma energia positivo pa bo karga
bo bateria pa henter siman. Un felis wikènt pa bo. Kontentu ku bo tei.
Kon ta bai ku e ayuno? Spera bo ta logra tene un tiki mas. Un wikent
bendishoná pa bo. Relahá i disfrutá di naturalesa. Wak rònt di bo i
atmirá streanan, luna, mata i bestia. Tin asina tantu kos pa nos ta
agradesido ne.
Dal bo te pa freska i limpia bo kurpa. Kome mas salú den e temporada
aki y hasi hopi orashon.
Not’é riba bòrchi
Kolegio Sur Herman Joseph ta sigui selebrá nan 45 aña. Aki un
selebrashon tur afo na WTC.
Den agènda Liber di skol:
Mart dia 26 pa aprel dia 4 Pasku Grandi.
Liber nashonal:
Mart dia 30 Bierne Santu
Aprel dia 2 Dos dia di Pasku Grandi.
Riba rapòrt Radulphus Collega tabatin un dia habri masha bon bishitá. E potrènan
ta papia pa nan mes.
Mi ta konta E kacho ambisioso
Blankita a haña un wesu grandi i gordo den e mondi banda di su kas.
Mesora el a kue e wesu a kana pa bai wardé den su kurá. Na kaminda el
a pasa banda di laman di Nieuwe Haven. Aki el a mira un kacho ku un
wesu mas grandi ku esun di dje. Mesora el a drenta den e awa pa e kue
e wesu mas grandi i gordo. Ora el a drenta e no a topa niun kacho i niun
wesu. El a disidí di sali bèk for di e laman. El a bira pa kue su wesu pa
asina e sigui su kaminda. Pero nada di e wesu. Ora el a drenta golos
golos den e awa pa kue e wesu for di e kacho, el a laga su mes wesu kai.
E wesu a bai den profundidat i el a keda sin nada.
Blankita a mira su mes refleho den e laman i a kere ta un kacho ku un
wesu mas grandi ku di dje. El a riska tur kos pa kue e wesu mas grandi
pero a perde saku perdu kangreu.
Un prenchi
Stephanie i Kimberly Verbeek-Jacobino ta dos alumno di Glorieux College
ku tantu na skol, komo den deporte ta mashá disipliná. Stephanie i Kimberly
ta miembro di “Swordfish Swimming Curaçao” i durante di un torneo di
balèt di awa ku a tuma lugá na pisina di Asiento na Emmastad, riba dianan
19, 20 i 21, nan a gana 5 medaya; 2 di oro, 1 di plata i 2 di bròns. Riba e
potrèt por mira Steaphanie i Kimberly huntu ku nan yùfrounan, yùfrou Sint
Jago i yùfrou Maduro, ku a bai animá nan durante di e torneo.Un pabien di
kurason pa e alumnonan ehemplar aki.
Mucha djispou Yufrou: “Zamir, kuantu ta 2-2”
Zamir: “Empate den futbòl, yufrou”
Yufrou: “Kuantu ta 2x1”
Zamir: “Oferta kumpra 1 bai ku 2”